Levitiko 9:1-24
-
Faia e Arona taulaga (1-24)
9 I le aso lona valu,+ ua aami e Mose o Arona ma ona atalii, atoa ma toeaina o Isaraelu.
2 Ua ia faapea atu iā Arona: “Ia e ave se tamaʻi povi mo le taulaga o agasala+ mo oe, ma se mamoe poʻa mo le taulaga mū, o manu ia e matuā lelei lava, ma ia aumaia i luma o Ieova.
3 Ae ia e fai atu i le fanauga a Isaraelu e faapea, ‘Ia ave se ʻoti poʻa mo le taulaga o agasala, atoa ma se tamaʻi povi ma se tamaʻi mamoe poʻa, e ta‘itasi tausaga le matutua, e matuā lelei lava, e fai ai le taulaga mū,
4 ma se povi poʻa ma se mamoe poʻa mo taulaga faifaatasi,+ ina ia fai ai taulaga i luma o Ieova, o le taulaga i meaʻai+ ua iai sina suāuu, auā o le asō e faaali mai ai Ieova iā te outou.’”+
5 Ona latou aumaia lea o ia mea i luma o le faleʻie o le feiloaʻiga e pei ona poloaʻi atu ai Mose. Ona faalatalata ane lea o le faapotopotoga atoa ma tutū i luma o Ieova.
6 Ua toe faapea atu Mose: “O le mea lenei na poloaʻi mai ai Ieova e tou te faia, ina ia faaali mai e Ieova lona mamalu iā te outou.”+
7 Ona fai atu lea o Mose iā Arona: “Ia e faalatalata atu i le fata faitaulaga ma faia lau taulaga o agasala,+ ma lau taulaga mū, ma faia le togisala mo oe+ ma lou aiga atoa; ia e faia foʻi le taulaga mo le nuu+ ma faia le togisala mo i latou+ e pei ona poloaʻi mai ai Ieova.”
8 Ona faalatalata atu lea o Arona i le fata faitaulaga ma fasi le tamaʻi povi o le taulaga o agasala mo ia lava.+
9 Ona aumaia lea e atalii o Arona o le toto+ iā te ia, ua ia lolō i ai lona tamatamaʻilima ma nini ai seu o le fata faitaulaga, a o le toto ua totoe ua ia sasaa i lalo o le fata faitaulaga.+
10 Ua ia susunu i luga o le fata faitaulaga le gaʻo, o fatugaʻo, ma le gaʻo o le ate mai i le taulaga o agasala, e pei ona poloaʻi mai ai Ieova iā Mose.+
11 Ua ia susunu foʻi le aano ma le paʻu o le manu i le afi i tua o le togālauapi.+
12 Ona ia fasi lea o le manu e fai ai le taulaga mū, ua avatu e atalii o Arona iā te ia le toto, ua ia sausau i itu uma o le fata faitaulaga.+
13 Ua latou avatu iā te ia le taulaga mū i ona tufaaga ma le ulu, ma ua ia susunuina na mea i luga o le fata faitaulaga.
14 Ua ia fufulu foʻi gaʻau ma vae,* ona ia susunuina ai lea faatasi ma le taulaga mū i luga o le fata faitaulaga.
15 Ona ia avatu lea o le taulaga mo le nuu, ma ua ia ave le ʻoti o le taulaga o agasala lea ua faia mo le nuu, ua fasi ma fai ai le taulaga o agasala e pei o lea na faia muamua.
16 Ona ia avatu lea o le taulaga mū ma faia e tusa ma faiga masani.+
17 Ua ia avatu le taulaga i meaʻai+ ma faatumu ai lona lima i se luuga, ma susunu ai i luga o le fata faitaulaga, e ese mai i le taulaga mū o le taeao.+
18 Ua ia fasi le povi poʻa ma le mamoe poʻa o le taulaga faifaatasi, lea e faia mo le nuu. Ona avatu lea e atalii o Arona le toto iā te ia, ua ia sausauina i itu uma o le fata faitaulaga.+
19 A o gaʻo o le povi poʻa,+ o le siʻusiʻu gaʻoa o le mamoe poʻa, o le gaʻo ua ufiufi ai gaʻau, o fatugaʻo, ma le gaʻo o le ate,+
20 ua latou tuu ia gaʻo uma i luga o fatafata o manu, ona ia susunu ai lea o gaʻo i luga o le fata faitaulaga.+
21 Ae ua lūlū e Arona i le isi itu ma le isi itu o fatafata ma le alagavae taumatau e fai ma taulaga lūlū i luma o Ieova, e pei ona poloaʻi atu ai Mose.+
22 Ua faaloaloa e Arona ona lima i le nuu ma faamanuia iā i latou,+ ma ua alu ifo o ia mai i le faia o le taulaga o agasala, o le taulaga mū ma taulaga faifaatasi.
23 Mulimuli ane, ua ulufale atu Mose ma Arona i le faleʻie o le feiloaʻiga, ua toe ulufafo mai ma faamanuia i le nuu.+
Ona faaali atu lea e Ieova o lona mamalu i le nuu atoa,+
24 ma sau ai le afi mai iā Ieova,+ ua susunu ai le taulaga mū ma gaʻo i luga o le fata faitaulaga. Ua vāai i ai tagata uma, ona latou alalaga ai lea, ma ua latou faapaʻuʻū faō.+
Faamatalaga Pito i Lalo
^ E faasino atu i le vaega pito i lalo o le tulivae agaʻi i lalo.
