Numera 19:1-22
-
Le povi mūmū ma le vai e faamamā ai (1-22)
19 Ona toe fetalai mai lea o Ieova iā Mose ma Arona e faapea:
2 “O le tulafono lenei ua poloaʻi mai ai Ieova, ‘Ia fai atu i le fanauga a Isaraelu, e ao ona latou aumai iā te oe se povi mūmū e matuā lelei lava,+ e aunoa ma se faalētonu ma e leʻi oo foʻi i ai se amo.
3 Ia oulua avatu le povi iā Eleasaro le ositaulaga, e na te ave i tua o le togālauapi, ma fasia ai i ona luma.
4 Ona ave lea e Eleasaro le ositaulaga o se vaega o le toto o le povi i lona tamatamaʻilima, ma sausau faafitu i le eleele i luma lava o le faleʻie o le feiloaʻiga.+
5 Ona susunuina lea o le povi i ona luma. E susunuina lona paʻu, o lona aano, o lona toto faatasi ma ona otaota.+
6 E ave fo‘i e le ositaulaga le laau o le arasi, o le lālā isopo,+ ma mea ua vali mūmū sesega ma togi i le afi lea ua susunuina ai le povi.
7 E tatā e le ositaulaga ona ofu ma tāʻele o ia* i le vai, ona sau ai lea o ia i le togālauapi; ae e lē mamā le ositaulaga seʻia oo i le afiafi.
8 “‘O lē na susunuina le povi e na te tatā ona ofu i le vai, e tāʻele foʻi o ia* i le vai, ma e lē mamā o ia seʻia oo i le afiafi.
9 “‘E aoao mai e se tagata o loo mamā lefulefu o le povi+ ma tuu i se nofoaga mamā i tua o le togālauapi, ma e ao ona teuina e le faapotopotoga o le fanauga a Isaraelu, e saunia ai le vai e faamamā ai.+ O le taulaga lea o agasala.
10 O lē e aoaoina lefulefu o le povi, e ao ona tatā ona ofu ma e lē mamā o ia seʻia oo i le afiafi.
“‘E faia lenei mea ma tulafono tumau mo le fanauga a Isaraelu ma le tagata ese ua aumau iā te i latou.+
11 O so o se tasi e paʻi i se tagata oti,* e lē mamā o ia i aso e fitu.+
12 E ao i lea tagata ona faamamā o ia lava i lea vai i le aso lona tolu, ona mamā ai lea o ia i le aso lona fitu. Ae afai e na te lē faamamāina o ia lava i le aso lona tolu, e lē mamā o ia i le aso lona fitu.
13 O tagata uma e papaʻi i le tino o so o se tagata oti, ma na te lē faamamāina o ia lava, ua ia faaleagaina le faleʻie paia o Ieova,+ ma e tatau ona fasiotia lea tagata mai i tagata Isaraelu.+ Talu ai ona e leʻi sausauina i ona luga le vai mo le faamamāina,+ ua lē mamā ai pea o ia. Ua lē mamā pea o ia.
14 “‘O le tulafono lenei pe a oti se tane i le faleʻie: O i latou uma e ulufale atu i lea faleʻie ma ē o loo iai i le faleʻie, e lē mamā i latou mo aso e fitu.
15 E lē mamā tanoa uma e leʻi faamauina lelei tapuni.*+
16 E lē mamā i aso e fitu so o se tasi i le fanua e paʻi atu i se isi ua fasiotia i le pelu, po o se tino oti, po o se ponaivi o se tagata, po o se tuugamau.+
17 E ao ona latou ave ni lefulefu mo lē ua lē mamā mai i le taulaga o agasala lea na faamūina, ma tuu i se ipu ona sasaa lea i ai o ni vai mai i le vaipuna.
18 Ona ave lea e se tagata mamā+ o le lālā isopo+ ma lolō i le vai ma sausau ai le faleʻie ma ipu uma, ma tagata ua iai i lea mea, i luga foʻi o lē na paʻi i se ponaivi, po o se isi ua fasiotia, po o se tino oti, po o se tuugamau.
19 E sausau e le tagata o loo mamā le vai i luga o lē e lē o mamā i le aso lona tolu atoa ma le aso lona fitu, ma e na te faamamāina o ia mai i le agasala i le aso lona fitu;+ ona ia tatā lea o ona ofu ma tāʻele i le vai, ona mamā ai lea o ia i le afiafi.
20 “‘A o le tagata ua lē mamā ma ua lē faamamāina o ia lava, e ao ona fasiotia o ia,+ auā ua ia faaleagaina le faleʻie paia o Ieova. E leʻi sausauina le vai e faamamā ai i ona luga, o lea e lē mamā o ia.
21 “‘Ia fai lenei mea ma tulafono tumau mo i latou: E ao i lē ua sausauina le vai mo le faamamāina+ ona tatā ona ofu, ma o lē e paʻi i le vai mo le faamamāina e lē mamā o ia seʻia oo i le afiafi.
22 O mea uma e paʻi i ai lē ua lē mamā e lē mamā foʻi ia mea, ma o le tagata e paʻi i ia mea e lē mamā o ia seʻia oo i le afiafi.’”+
Faamatalaga Pito i Lalo
^ Epe., “lona tino.”
^ Epe., “lona tino.”
^ Po o “i le tino oti o so o se tagata.”
^ Po o le “leʻi faamauina ufiufi i le manoa.”
