Numera 22:1-41
22 Ona malaga ese lea o le fanauga a Isaraelu mai i lea mea ma faatutū o latou faleʻie i le fanua laugatasi o le toafa o Moapi, i le isi itu o Ioritana e faafesagaʻi ma Ieriko.+
2 Ua iloa foʻi e Palako+ le atalii o Seporu mea uma sa faia e Isaraelu i tagata Amorī,
3 ma ua fefefe tele Moapi ona o lea nuu, auā ua toʻatele i latou; ua matuā atuatuvale Moapi ona o le fanauga a Isaraelu.+
4 Ona faapea atu lea o Moapi i toeaina o Mitiana:+ “E faatamaʻia e lenei faapotopotoga mea uma e siʻomia ai i tatou e pei ona ʻai e le povi poʻa o le vao o le fanua.”
Ua avea Palako le atalii o Seporu ma tupu o Moapi i lea taimi.
5 Ua ia aauina atu ni avefeʻau iā Palaamo le atalii o Peoro, i Petoru+ lea e i tala ane o le Vaitafe* o le laueleele o lona nuu. Ua ia aami iā te ia, ma faapea atu: “Vaai oe! Ua ō mai ni tagata mai i Aikupito. Faauta! Ua latou ufitia le laueleele+ i le mamao e mafai ona vaai i ai se tasi,* ma o loo latou nonofo i oʻu luma tonu lava.
6 Faamolemole seʻi maliu mai, ma faamalaia nei tagata mo aʻu,+ auā ua sili atu lo latou malolosi nai lo o aʻu. Atonu e mafai ona ou faatoʻilalo i latou ma tutuliese mai i le laueleele, auā ua ou iloa o lē e te faamanuia i ai e manuia a o lē e te faamalaia i ai e malaia.”
7 Ona malaga lea o toeaina o Moapi ma toeaina o Mitiana faatasi ma le totogi o valovaloga i o latou lima, ua latou taunuu iā Palaamo+ ma faailoa mai iā te ia le fe‘au a Palako.
8 Ua ia fai atu iā i latou: “Ia outou tofafā i inei i le pō lenei, ma o le a ou taʻu atu lava iā te outou upu e fetalai mai ai Ieova iā te aʻu.” Ona nonofo faatasi ai lea o perenise o Moapi ma Palaamo.
9 Ua afio mai le Atua ma fetalai mai iā Palaamo:+ “O ai nei tamāloloa o loo faatasi ma oe?”
10 Ona tali atu lea o Palaamo i le Atua moni: “Ua oo mai iā te aʻu le feʻau a Palako le atalii o Seporu, o le tupu o Moapi, e faapea,
11 ‘Vaai foʻi! Ua ō mai le nuu mai i Aikupito, ma ua latou ufitia le laueleele i le mamao e mafai ona vaai i ai se tasi.* Ia e sau ma faamalaia i latou mo aʻu.+ Atonu e mafai ai ona ou tau ma i latou ma tutuliese i latou.’”
12 Ae ua fetalai mai le Atua iā Palaamo: “Aua e te alu faatasi ma i latou. Aua foʻi e te faamalaiaina le nuu auā ua faamanuiaina i latou.”+
13 Ua tulaʻi Palaamo i le taeao ma faapea atu i perenise a Palako: “Ia outou ō i lo outou atunuu, auā ua lē finagalo Ieova tatou te ō.”
14 Ona ō lea o perenise o Moapi ma toe fo‘i atu iā Palako ma faapea atu: “Ua musu Palaamo e matou te ō mai.”
15 Peitaʻi, ua toe aauina atu e Palako nisi perenise e toʻatele atu ma e sili atu ona aloaʻia nai lo o le vaega muamua.
16 Ua latou taunuu atu iā Palaamo ma faapea atu iā te ia: “O le tala lenei a Palako le atalii o Seporu, ‘Faamolemole aua ne‘i iai se mea e taofia ai oe mai i lou maliu mai iā te aʻu,
17 auā o le a ou matuā faamamaluina lava oe, ma o mea uma e te saunoa mai ai o le a ou faia. Faamolemole maliu mai, ma ia e faamalaia lenei nuu mo aʻu.’”
18 Ae ua tali mai Palaamo i auauna a Palako: “Afai e foaʻi mai e Palako iā te aʻu lona fale e tumu i siliva ma auro, e lē mafai ona ou solia le poloaʻiga a Ieova loʻu Atua, e tusa po o se mea itiiti po o se mea telē.+
19 Ae faamolemole ia outou tofafā i inei i lenei pō, ina ia ou iloa ai po o le ā se isi fetalaiga a Ieova iā te aʻu.”+
20 Ona afio mai lea o le Atua iā Palaamo i le pō ma fetalai mai iā te ia: “Afai ua ō mai ia tane e aami oe, ia outou ō ma i latou. Ae tau ina ia e tautala atu i upu ou te fai atu ai iā te oe.”+
21 Ona tulaʻi lea o Palaamo i le taeao ma faanofoa lana asini* ma ua ō faatasi ma perenise o Moapi.+
22 Peita‘i, ua matuā toʻasā le Atua ona ua alu o ia; ona tū lea o le agelu a Ieova i le auala e tetee atu iā te ia. Ua tiʻetiʻe Palaamo i lana asini ma ua ō faatasi ma ana auauna e toʻalua.
23 Ua iloa e le asini le agelu a Ieova ua tū i le auala, ua i lona lima lana pelu ua seʻi; ua taumafai le asini e liliuese mai i le auala ina ia alu atu i le fanua. Ae ua sasa e Palaamo le asini ina ia toe liliu i le auala.
24 Ua tū le agelu a Ieova i se ala vāiti i le vā o togāvine e lua, ua iai le pā maa i le tasi itu ma le pā maa i le isi itu.
25 Ua iloa atu e le asini le agelu a Ieova ona matuā sōsō lea o ia i le pā ma omia ai le vae o Palaamo i le pā; ona toe sasa ai lea e Palaamo le asini.
26 Ona toe alu atu lea o le agelu a Ieova ma tū i se mea vāiti, o se mea e lē mafai ona liliu ai i le itu taumatau po o le itu tauagavale.
27 Ae ua iloa e le asini le agelu a Ieova ona taoto ifo ai lea o ia i lalo o Palaamo; ua matuā ita Palaamo ma soona sasa le asini i lona tootoo.
28 Mulimuli ane ua faatautala e Ieova le asini* ma ua faapea mai le asini+ iā Palaamo: “O le ā laʻu mea ua fai iā te oe ua e sasa faatolu ai aʻu?”+
29 Ona tali atu lea o Palaamo i le asini: “Auā ua leaga lau amio iā te aʻu. Pe ana iai se pelu i loʻu lima, ua ou fasimatea oe!”
30 Ua faapea mai le asini iā Palaamo: “Pe e lē o aʻu ea o lau asini na e tiʻetiʻe ai i lou olaga atoa seʻia oo mai i le asō? Pe e masani ea ona ou faia faapea iā te oe?” Ua ia tali atu: “E leai!”
31 Ona faapupulaina lea e Ieova o mata o Palaamo,+ ma ua ia vaai ai i le agelu a Ieova o loo tū i le ala, ua uu lana pelu i lona lima. Ona ia ifo toʻele loa lea, ua tootuli ma faō.
32 Ua fai mai le agelu a Ieova iā te ia: “Aiseā ua e sasa faatolu ai i lau asini? Faauta! Ua ou sau e tetee atu iā te oe, auā ua lē tusa lou ala ma loʻu loto.+
33 Sa iloa aʻu e le asini ma sa taumafai faatolu e liliuese mai i oʻu luma.+ Pe ana lē liliuese le asini mai i oʻu luma, semanū ua ou fasiotia oe, ae faasaoina le asini!”
34 Ona fai atu lea o Palaamo i le agelu a Ieova: “Ua ou agasala auā ua ou lē iloa o oe lea ua tū i le ala e fetaiaʻi ma aʻu. Afai e leaga lenei mea i lau silafaga, o le a ou toe foʻi.”
35 Ae ua faapea mai le agelu a Ieova iā Palaamo: “Ia ō ma tamāloloa, ae tau ina ia e tautala atu i upu ou te fai atu ai iā te oe.” Ona ō pea lea o Palaamo faatasi ma perenise a Palako.
36 Ina ua faalogo Palako ua sau Palaamo, ona alu atu loa lea o ia e faafetaui o ia i le aai o Moapi e i le auvai o Arinona, o loo i le tuaoi o le laueleele o le atunuu.
37 Ua fai mai Palako iā Palaamo: “Pe na ou lē aauina atu ea nisi e aami iā te oe? Aiseā na e lē sau ai iā te aʻu? Pe e te manatu e lē mafai ona ou matuā faamamaluina oe?”+
38 Ona tali atu lea o Palaamo iā Palako: “O lea ua ou sau. Pe mafai lava ona ou fai atu se tala? O upu e tuu mai e le Atua i loʻu gutu, o upu ia ou te tautala atu ai.”+
39 Ua ō Palaamo ma Palako ma ua la taunuu atu i Kiriata-usota.
40 Ona faia lea e Palako o taulaga i povi ma mamoe ma aauina atu nisi vaega iā Palaamo ma perenise ua faatasi ma ia.
41 Ua oo i le taeao ona ave lea e Palako o Palaamo ma la ō aʻe i Pamota-paala, ina ia iloa atu ai e ia tagata uma o le nuu.+
Faamatalaga Pito i Lalo
^ E foliga mai o le vaitafe o Eufirate.
^ Epe., “le mata o le laueleele.”
^ Epe., “le mata o le laueleele.”
^ Epe., “asini fafine.”
^ Po o le “ua tatala e Ieova le gutu o le asini fafine.”
