Numera 9:1-23
9 Ona fetalai mai lea o Ieova iā Mose i le toafa o Sinai i le masina muamua+ o le tausaga lona lua talu ona latou ō ese mai i le atunuu o Aikupito, e faapea:
2 “E ao i le fanauga a Isaraelu ona faia le taulaga o le Paseka+ i lona aso atofaina.+
3 I le aso 14 o lea masina i le afiafipō,* e ao ona outou faia ai le Paseka i lona aso atofaina. E ao ona outou faia+ e tusa ma ona tulafono ma fuafuaga masani uma.”
4 Ona fai atu lea o Mose i le fanauga a Isaraelu ina ia faia le taulaga o le Paseka.
5 Ona latou faia lea o le taulaga o le Paseka i le masina muamua, i le aso 14 o lea masina i le afiafipō* i le toafa o Sinai. Ua faapea lava ona faia mea uma e le fanauga a Isaraelu, e pei ona poloaʻi mai ai Ieova iā Mose.
6 Ua iai foʻi ni tane o ē ua lē mamā ona sa papaʻi i se tagata oti,+ ua lē mafai ai ona latou faia le taulaga o le Paseka i lea aso. Ona latou ō atu lea i luma o Mose ma Arona i lea aso+
7 ma faapea atu iā Mose: “E ui ina matou lē mamā ona o le papaʻi i se tagata oti, aiseā e taofia ai i matou mai i le faia o le taulaga iā Ieova i le aso atofaina faatasi ma le fanauga a Isaraelu?”+
8 Ona fai atu lea o Mose iā i latou: “Ia outou faatali i inā, ae seʻi oʻu faalogo atu i le mea ua poloaʻi mai ai Ieova e faatatau iā te outou.”+
9 Ona fetalai mai lea o Ieova iā Mose:
10 “Ia e fai atu i le fanauga a Isaraelu e faapea, ‘E ui lava e lē mamā se tasi o outou po o se tasi o a outou tupulaga o loo mulimuli mai ona o le papaʻi i se tagata oti,+ pe ona o loo alu i se malaga mamao, ae e ao lava iā te ia ona faia le taulaga o le Paseka iā Ieova.
11 E ao ona latou faia i le masina lona lua,+ i le aso 14 i le afiafipō.* E ao ona latou aai faatasi ai ma le falaoa e lē faafefeteina, ma fualaau ʻaina oona.+
12 Aua neʻi o latou faatotoeina se mea seʻia oo i le taeao,+ aua foʻi neʻi gauia se ivi o le manu.+ E ao ona latou faia e tusa ma tulafono uma o le Paseka.
13 Ae afai e mamā se tagata pe e leʻi alu foʻi i se malaga mamao, ae ua ia lē faia le taulaga o le Paseka, e ao ona fasiotia lea tagata,+ auā ua ia lē avatu le taulaga a Ieova i le aso atofaina. E tali atu lea tagata i lana agasala.
14 “‘Ae afai e nofo aumau se tagata ese faatasi ma outou, e ao foʻi ona ia faia le taulaga o le Paseka iā Ieova.+ E na te faia faapea e tusa ma tulafono o le Paseka ma ona fuafuaga masani.+ E tasi lava le tulafono mo outou, o le tagata aumau atoa ma le tagatānuu.’”+
15 O le aso ua faatūina ai le faleʻie paia,+ ua ufitia ai e le ao le faleʻie paia o le mea ua iai foʻi le atolaau o le feagaiga,* ae i le pō ua iai pea se mea e foliga e pei o se afi i luga o le faleʻie paia seʻia oo i le taeao.+
16 Ua faapena ai lava ona tupu: Pe a ao, e ufitia le faleʻie i le ao, ae i le pō ua foliga e pei o le afi.+
17 Pe a alu aʻe le ao mai i luga o le faleʻie, ona malaga ese loa lea o le fanauga a Isaraelu,+ o le nofoaga e tū ai le ao, o i inā foʻi e faatutū ai e le fanauga a Isaraelu o latou faleʻie.+
18 O le faatonuga a Ieova e malaga ese ai le fanauga a Isaraelu, o le faatonuga foʻi a Ieova e latou te faatutū ai o latou faleʻie.+ O aso uma e iai le ao i luga o le faleʻie paia, e latou te nonofo ai pea i o latou faleʻie.
19 A iai pea le ao i luga o le faleʻie paia mo aso e tele, ona usiusitaʻi foʻi lea o le fanauga a Isaraelu iā Ieova ma lē malaga ese ai.+
20 I nisi taimi ua iai pea le ao i ni nai aso i luga o le faleʻie paia. O le faatonuga a Ieova e latou te nonofo ai pea i o latou faleʻie, o le faatonuga foʻi a Ieova e latou te malaga ese ai.
21 I nisi taimi ua iai pea le ao mai i le afiafipō seʻia oo i le taeao, ae pe a alu aʻe le ao i le taeao, ona latou malaga ese ai foʻi lea. E tusa po o le ao po o le pō e alu aʻe ai le ao, e latou te malaga ese lava.+
22 E tusa lava pe lua ni aso, po o se masina, pe sili atu, ae pe a iai pea le ao i luga o le faleʻie paia, e nonofo ai pea le fanauga a Isaraelu i o latou faleʻie, ma e lē malaga ese i latou. Ae pe a alu aʻe le ao, ona latou malaga ese lea.
23 O le faatonuga a Ieova e latou te faatutū ai o latou faleʻie, ma o le faatonuga foʻi a Ieova e latou te malaga ese ai. Ua latou usiusitaʻi iā Ieova, ona o le faatonuga a Ieova e ala iā Mose.
Faamatalaga Pito i Lalo
^ Epe., “le vā o afiafi e lua.”
^ Epe., “le vā o afiafi e lua.”
^ Epe., “le vā o afiafi e lua.”
^ Epe., “Molimau.”
