Salamo 77:1-20
I le faatonu o le ʻaufaimusika o le Iutana.* O le salamo a Asafo.+ O le pese.
77 Ou te alaga atu i le Atua i loʻu leo;Ou te alaga atu i le Atua, ona faafofoga mai lea o ia iā te aʻu.+
2 Na ou saʻili iā Ieova i le aso o oʻu puapuaga.+
I le pō, e faaloaloa atu ai oʻu lima iā te ia e lē aunoa.*
E leʻi mafai ona faamāfanafanaina aʻu.
3 Ina ua ou manatua le Atua, ona ou atuatuvale lea;+Ua ou popole lava ma ou vaivai ai.+ (Selā)
4 Ua e taofia oʻu laumata;Ua ou atuatuvale foʻi ma ua lē mafai ona ou tautala.
5 Ua ou mafaufau i aso anamua,+I le tele o tausaga ua mavae.
6 Ou te manatua la‘u pese i le pō;+Ou te manatunatu i loʻu loto;+Ou te matuā saʻiliʻili ina ia malamalama.
7 Pe e faavavau ea ona lafoaʻia i tatou e Ieova?+
Pe e lē toe fiafia mai lona finagalo iā i tatou?+
8 Po ua mavae atu ea e faavavau lona alofa faamaoni?
Po o le a lē vāai ea tupulaga i le faataunuuga o lana folafolaga?
9 Po ua galo ea i le Atua ona alofa mai,+Po ua muta fo‘i lona alofa mutimutivale ona o lona toʻasā? (Selā)
10 Po ou te fai atu pea: “O le mea lenei ua ou mafatia* ai:+
Ua taofia e Lē e Silisili Ese lana fesoasoani iā i tatou”?
11 Ou te manatua galuega a Ioa;Ou te manatua mea ofoofogia na e faia i aso anamua.
12 Ma ou te mafaufau loloto i au galuega uma,+Ou te manatunatu foʻi i mea na e faia.
13 Le Atua e, e paia ou ala.
O ai ea se atua e silisili e pei o oe, le Atua e?+
14 O oe o le Atua moni e faia mea mamana.+
Ua e faailoa atu foʻi lou malosi i nuu.+
15 Ua e lavea‘ia* lou nuu i lou mana,*+O le fanauga a Iakopo ma le fanauga a Iosefa. (Selā)
16 Le Atua e, ua iloa atu oe e vai;Ua iloa lava oe e vai ma atugalu ai.+
Ua atuatuvale foʻi vai loloto.
17 O ao ua faamaligiina ifo vai.
O le lagi puaoa ua taalili mai,O au aū fo‘i ua felelei solo.+
18 O le leo o lou faititili+ ua pei o uili o le kariota;O le emo o uila ua faamalamalama ai le laueleele;+Ua gatete foʻi le lalolagi ma lūlūina.+
19 O lou ala na ui i le sami,+O lou ala foʻi na ui i vai e tele;Ae ua lē iloa e se tasi ou tulaga aao.
20 Na e taʻitaʻia lou nuu e pei lava o se lafu mamoe,+I le vaavaaiga a* Mose ma Arona.+
Faamatalaga Pito i Lalo
^ Tagaʻi i le Uiga o Upu.
^ Epe., “ae e lē gase lava.”
^ Po o le “manuʻa.”
^ Epe., “faaolaina.”
^ Epe., “aao.”
^ Epe., “E ala i lima o.”
