Salamo 80:1-19
I le faatonu o le ʻaufaimusika o “Lili.” O le faamanatuga. O le salamo a Asafo.+ O le pese.
80 Le Leoleo Mamoe o Isaraelu e, ia e faafofoga mai,O oe o lē e taʻitaʻia Iosefa e pei o se lafu mamoe.+
O oe o lē o afio i luga* o kerupi,+Ia e susulu mai.*
2 Ia e faailoa lou malosi+I luma o Efaraima, ma Peniamina, ma Manase;Ia e afio mai e faaola iā i matou.+
3 Le Atua e, ia e toe faafoʻisia i matou;+Ia faamalamalama mai ou fofoga iā i matou, ina ia faaolaina ai i matou.+
4 Ieova le Atua o ʻau e, o le ā ea le umi e te matuā toʻasā mai ai i le tatalo a lou nuu?+
5 Ua e fafagaina i matou i loimata e fai ma meaʻai,Ua e faainu foʻi i matou i loimata e matuā tele lava.
6 Ua e faia i matou ma mea e femisaa‘i ai o matou tuaoi;Ua fiafia o matou tuaoi e tauemu mai pea iā i matou.+
7 Le Atua o ʻau e, ia e toe faafoʻisia i matou;Ia faamalamalama mai ou fofoga iā i matou, ina ia faaolaina ai i matou.+
8 Na e aumaia se vine+ mai i Aikupito.
Na e tutuliesea foʻi atunuu ma e totōina ai.+
9 Na e faamamāina le laueleele mo le vine,Ma ua sosolo ona aa ma tumu ai le nuu.+
10 Ua maluʻia mauga i lona paolo,Ma arasi o le Atua i ona lālā.
11 Ua sosolo atu ona lālā e oo i le sami,Ua oo atu fo‘i ona tātupu i le Vaitafe.*+
12 Aiseā ua e soloia ai pā maa o le togāvine,+Ina ia tau ai ona fua e i latou uma e ui ane ai?+
13 Ua faatama‘ia e puaa ʻaivao,Ua aai ai foʻi manu o le vao.+
14 Le Atua o ʻau e, ia e toe foʻi mai faamolemole.
Ia e silasila ifo mai i le lagi ma e silafia ai!
Ia e tausi i lenei vine,+
15 O le pogati* na totō e lou aao taumatau,+Ma silasila ifo i le tamaʻi laau* na e faamalosia mo oe lava.+
16 Ua susunuina i le afi+ ma tuu i lalo.
Ua fano foʻi i latou i le aʻoaʻiga mai iā te oe.*
17 Tau ina ia lagolagoina e lou aao le tagata o loo i lou aao taumatau,O le atalii o le tagata o lē na e faamalosia mo oe lava.+
18 Ona matou lē liliuese lea mai iā te oe.
Ia e faaolaina i matou, ina ia o matou valaau atu ai i lou suafa.
19 Ieova le Atua o ʻau e, ia e toe faafoʻisia i matou;Ia faamalamalama mai ou fofoga iā i matou, ina ia faaolaina ai i matou.+
Faamatalaga Pito i Lalo
^ Pe atonu “i le vā.”
^ Po o le “Ia faaali mai lou pupula.”
^ E faasino atu i le vaitafe o Eufirate.
^ Po o le “lālā.”
^ Epe., “le atalii.”
^ Epe., “i le aʻoaʻiga mai i ou fofoga.”
