Tanielu 2:1-49
-
Atuatuvale le tupu o Nepukanesa i lana miti (1-4)
-
Leai se tagata atamai e faamatalaina le miti (5-13)
-
Liliu atu Tanielu i le Atua mo se fesoasoani (14-18)
-
Vivii i le Atua mo le faailoa mai o le mea lilo (19-23)
-
Faailoa atu e Tanielu le miti i le tupu (24-35)
-
Le uiga o le miti (36-45)
-
Tu‘imomomo e le maa le faatagata (44, 45)
-
-
Faamamaluina Tanielu e le tupu (46-49)
2 O le tausaga lona lua o le nofoaiga a le tupu o Nepukanesa na fai ai ana miti, ua matuā atuatuvale ai o ia,+ ma ua lē mafai ai ona moe.
2 Ona faatonuina lea e le tupu e aami i ositaulaga e faia faiga faaagaga, o ē e valaau i ē ua oti, o taulāitu, ma le ʻau Kaletaia* ina ia taʻu mai i le tupu ana miti. Ua latou ō mai ma tutū i luma o le tupu.+
3 Ua fai atu le tupu iā i latou: “Na fai laʻu miti, ma ua ou atuatuvale i loʻu fia iloa o lea miti.”
4 Ua tali mai le ʻau Kaletaia i le tupu i le gagana Arama:*+ “Le tupu e, ia soifua oe e faavavau. Ia e taʻu mai i au auauna le faalepō, ae seʻi o matou faamatala atu le uiga.”
5 Ua tali atu le tupu i le ʻau Kaletaia: “O laʻu poloaʻiga lenei: Afai e tou te lē faailoa mai le miti iā te aʻu atoa ma lona uiga, e vaevaeniniiina outou, o le a avea foʻi o outou fale ma faleese o tagata uma.*
6 Ae afai e tou te faailoa mai le miti ma lona uiga, e tou te maua mai iā te aʻu o meaalofa, o le taui, ma le mamalu tele.+ O lea, seʻi faamatala mai iā te aʻu le miti ma lona uiga.”
7 Ua latou tali faalua mai e faapea: “Ia faailoa mai e le tupu le miti i ana auauna, ma o le a matou faamatala atu lona uiga.”
8 Ae ua tali atu le tupu: “Ua ou iloa lelei lava ua outou faatuatuai ona o loo fia maua so outou taimi e mafaufau ai, auā ua outou iloa laʻu poloaʻiga.
9 Afai e tou te lē faamatala mai iā te aʻu le miti, o le a oo iā te outou uma le faasalaga lea e tasi. Ae ua pepelo ma sesē le upu ua outou ioe e taʻu mai iā te aʻu, ma faamoemoe o le a suia loʻu mafaufau. O lea, ia taʻu mai iā te aʻu le miti, ona ou iloa ai lea e mafai ona outou faamatala mai lona uiga.”
10 Ua tali mai le ʻau Kaletaia i le tupu: “E leai se tagata i lenei lalolagi* e mafai ona faia le mea e manaʻo i ai le tupu, auā e leʻi fesili mai se tupu lauiloa po o se kovana i se mea faapena i so o se ositaulaga e faia faiga faaagaga, po o sē e valaau i ē ua oti po o se tasi o le ʻau Kaletaia.
11 E faigatā le mea ua fesili mai ai le tupu, ma e leai se tasi o iai e mafai ona faamatala le miti i le tupu seʻi vaganā ai atua, o ē e lē o nonofo faatasi ma tagata.”
12 Ona o lenei mea ua matuā maʻemaʻeā ai le tupu, ma ua ia faatonu atu ia faaumatia tagata atamamai uma i Papelonia.+
13 Ina ua oo atu le poloaʻiga ma ua toetoe lava a fasiotia tagata atamamai, ua latou saʻili foʻi iā Tanielu ma ana uō ina ia fasiotia i latou.
14 Ona talanoa atu lea o Tanielu ma le faautauta ma le faaeteete iā Arioka le taʻitaʻi o le ʻauleoleo a le tupu, o lē ua alu atu e fasiotia tagata atamamai o Papelonia.
15 Ua fesili atu Tanielu iā Arioka le tagata aloaʻia a le tupu: “Aiseā ua faia ai e le tupu lea faatonuga sauā?” Ona faailoa lea e Arioka o le mataupu+ iā Tanielu.
16 Ua ulufale atu Tanielu ma talosaga i le tupu mo se taimi ina ia mafai ona ia faamatala atu ai le uiga o le miti i le tupu.
17 Ona alu lea o Tanielu i lona fale ma faailoa atu le mataupu i ana uō o Hanania, o Mesaelu, ma Asaraia.
18 Ua ia talosaga atu iā i latou ina ia tatalo i le Atua o le lagi ia alofa mutimutivale mai e tusa ai ma lenei mea lilo, ina ia lē faaumatia Tanielu ma ana uō faatasi ma isi tagata atamamai uma o Papelonia.
19 Ona faailoa atu lea iā Tanielu le mea lilo i se faaaliga i le pō.+ O lea, ua vivii atu Tanielu i le Atua o le lagi.
20 Ua folafola atu e Tanielu:
“Ia viia le suafa o le Atua e oo i le faavavau,*Auā e na o ia e ona le atamai ma le mana.+
21 O ia e suia taimi ma tau,+E aveesea tupu ma faatūina tupu,+E avatua le atamai i ē e atamamai, ma le poto i ē ua iai le faautaga loloto.+
22 Ua ia faaali mai mea loloto ma mea ua lilo,+Ua ia silafia le mea o loo i le pōuliuli,+Ua siʻomia foʻi o ia e le malamalama.+
23 Le Atua e o oʻu augātamā, ou te avatu iā te oe le faafetai ma le viiga,Ona ua e foaʻiina mai iā te aʻu le atamai ma le malosi.
O lenei ua e faailoa mai iā te aʻu le mea na matou talosaga atu ai iā te oe;Ua e faailoa mai iā i matou le mataupu a le tupu.”+
24 Ona alu atu lea o Tanielu iā Arioka, o lē ua tofia e le tupu e fasiotia tagata atamamai uma o Papelonia,+ ma faapea atu iā te ia: “Aua neʻi fasiotia tagata atamamai o Papelonia. Ia avatu aʻu i luma o le tupu, ma ou te faamatala atu le uiga o le miti i le tupu.”
25 Ua faavave ona ave e Arioka o Tanielu i luma o le tupu, ma fai atu iā te ia: “Ua ou maua se tagata mai i ē na aumai faapagota mai i Iuta,+ e mafai ona faamatalaina le uiga o le faalepō i le tupu.”
26 Ua faapea mai le tupu iā Tanielu, lea ua faaigoa iā Peletisara:+ “Pe e mafai moni lava ona e faailoa mai iā te aʻu le miti na ou vaaia ma lona uiga?”+
27 Ua tali atu Tanielu i le tupu: “E leai se tasi o tagata atamamai, o ē e fesili i ē ua oti, o ositaulaga e faia faiga faaagaga, po o ē e saʻiliʻili i fetu e mafai ona faamatala atu i le tupu le mea lilo ua ia fesili mai ai.+
28 Peitaʻi, o loo soifua le Atua i le lagi o Lē e na te faaali mai mea lilo,+ ma ua ia faaali mai foʻi i le tupu o Nepukanesa le mea e tupu i le faaiʻuga o aso. Ua faapenei lau miti ma faaaliga na e vaaia i lou tofaga:
29 “A o oe le tupu e, na oso aʻe ou mafaufauga i luga o lou moega e tusa ma mea o le a tutupu i le lumanaʻi, ma ua faailoa mai iā te oe e Lē e na te faaali mai mea lilo mea o le a tutupu.
30 A o aʻu, e leʻi faaalia mai iā te aʻu lenei mea lilo, ona o se atamai ua iā te aʻu e sili atu i se isi tagata ola, ae ina ia faamatala atu i le tupu le uiga o le miti, ma e silafia ai manatunatuga o lou loto.+
31 “O oe le tupu e, na e silafia ma vaaia se faatagata telē lava. O lenā faatagata e telē ma e maʻeu lona feʻilafi, na tū i ou luma ma e mataʻutia lona foliga mai.
32 O le ulu o lenā faatagata ua faia i le auro lelei,+ o lona fatafata ma ona lima o siliva,+ o lona manava ma ona ogāvae o le ʻapamemea,+
33 o ona vae o le uʻamea,+ ma o ona tapuvae e faia isi vaega i le uʻamea a o isi vaega o le omea.+
34 A o e silasila atu pea i le faatagata, na e silafia se maa ua tofia, ae e leʻi tofia i ni lima, ma ua taia ai le faatagata i ona vae uʻamea ma le omea ma nutililii ai.+
35 I lea taimi, ua nutililii faatasi ai le uʻamea, o le omea, o le ʻapamemea, o le siliva ma le auro, ma ua pei o vao mamago i le mea e soli ai saito i le tau vevela, ma ua lelea i le matagi ma ua leai ma se mea ua totoe. Ae o le maa na taia ai le faatagata, ua avea ma mauga telē ma ua tumu ai le lalolagi atoa.
36 “O le faalepō lenei, ma o le a matou taʻu atu i le tupu lona uiga.
37 O oe le tupu e, le tupu o tupu ua tuuina mai ai e le Atua o le lagi le malo,+ le mana, le malosi, ma le mamalu,
38 ma ua ia tuuina atu i lona lima o so o se mea ua nonofo ai tagata, o manu o le fanua ma manufelelei o le lagi, ma ua ia faia o ia ma pule i ia mea uma,+ o oe o le ulu auro lava lea.+
39 “Ae pe a mavae atu oe, e tulaʻi mai se isi malo+ e maulalo ifo iā te oe; ona tulaʻi mai lea o se isi malo, o le malo lona tolu, o le ʻapamemea lea, e pule foʻi i le lalolagi atoa.+
40 “A o le malo lona fā, o le a malosi o ia e pei o le uʻamea.+ Auā e pei ona tuʻimomomoina ma olopalaina e le uʻamea o mea uma, ioe, e pei ona nutililiia e le uʻamea, o le a faapea foʻi ona ia tuʻimomomoina ma nutililiia ia malo uma.+
41 “E pei ona e silafia o vae ma tamatamaʻivae na faia isi vaega i omea a le fai ipu omea a o isi vaega o uʻamea, o le a vaevaeina lea malo, ae o nisi o vaega o le a iai le malosi o le uʻamea, e pei ona e vaaia ua fefiloi faatasi le uʻamea ma le omea ua vaivai.
42 Talu ai o tamatamaʻivae ua faia isi vaega i le uʻamea a o isi vaega o le omea, o le a faapena ona iai le vaega malosi o lea malo ma e iai foʻi le vaega e vaivai.
43 E pei ona e silafia, na fefiloi le uʻamea ma le omea ua vaivai, o le a fefiloi faatasi i latou ma tagata;* ae e lē mafai ona pipii faatasi o le tasi i le isi, e pei ona lē mafai ona filogia o le uʻamea ma le omea.
44 “O aso o ia tupu, o le a faatūina ai e le Atua o le lagi o le malo+ e lē faaumatia lava.+ O lea malo foʻi e lē tuuina atu i se isi nuu.+ O le a ia tuʻimomomoina ma faaumatia ia malo uma,+ ae e tumau lea malo e faavavau,+
45 auā e pei ona e silafia na tofia se maa mai i se mauga ae e leʻi tofia i lima, ma na tuʻimomomoina ai le uʻamea, o le ʻapamemea, o le omea, o le siliva ma le auro.+ Ua faailoa atu e le Atua Silisili i le tupu o mea o le a tutupu i le lumanaʻi.+ E moni le miti ma e maufaatuatuaina lona faamatalaina.”
46 Ona faapaʻū faō lea o le tupu o Nepukanesa i luma o Tanielu ma avatu iā te ia le faaaloaloga. Ua ia faatonu foʻi e avatu iā te ia se meaalofa ma mea manogi e mū.
47 Ua faapea atu le tupu iā Tanielu: “E moni lava o lo outou Atua, o le Atua o atua, o le Alii o tupu, ma o Lē e na te faaali mai mea lilo, auā ua mafai ona e faaali mai lenei mea lilo.”+
48 Ona avatu ai lea e le tupu o le mamalu tele iā Tanielu, ma le anoanoaʻi o meaalofa lelei iā te ia, ua ia faia foʻi o ia ma pule i le itumalo o Papelonia,+ ma lē e sili e pule i tagata atamamai uma o Papelonia.
49 O le talosaga a Tanielu na tofia ai e le tupu Sataraka, Mesako, ma Apeteniko+ e pule i mataupufai a le itumalo o Papelonia, ae ua auauna Tanielu i le maota o le tupu.
Faamatalaga Pito i Lalo
^ E faasino atu i se vaega e tomai i valovaloga faataulāitu ma saʻili i fetu.
^ O le Ta 2:4e e oo i le 7:28 sa muaʻi tusia i le gagana Arama.
^ Pe atonu “mea e tiaʻi ai lapisi; faaputuga o otaotavale.”
^ Po o le “laueleele mātūtū.”
^ Po o le “e mai i le vavau e oo i le faavavau.”
^ Po o “le fanau a tagata,” e faasino atu i tagata lautele.
