Oi tatou uma lava ua iai se filifiliga. A lē o lo tatou auauna atu ia Ieova po o le auauna atu ia Satani ma ana temoni. E lē mafai ona tatou faia mea uma e lua. Maeu le lelei o le auauna atu ia Ieova!

E pei ona tatou iloaina, e fiafia temoni e faatauga ma ooleina tagata. Ae e lē faapena Ieova. E alofa mai o ia i tagata e pei ona alofa mai o se tamā i lana fanau. O Ia o Lē Foaiina mai “mea lelei uma . . . ma mea alofa uma e atoatoa ona lelei.” (Iakopo 1:17) Na te lē taofia mai so o se mea lelei mo tagata, e tusa lava pe faigata tele ia te Ia lava.​—Efeso 2:4-7.

Mafaufau i mea na faia e Iesu le Alo o le Atua i le lalolagi nei. Na ia toe faatautatalaina gūgū ma faapupula mata o ē tauaso. Na ia faamaloloina lepela ma ē pipili. Na ia tutulia temoni ma faamaloloina maʻi eseese uma. Na oo foi ina faatutuina e Iesu ē na feoti e ala i le mana o le Atua.​—Mataio 9:32-35; 15:30, 31; Luka 7:11-15.

Na i lo o le taʻuina mai o pepelo e faaseseina ai i tatou, e moni mea uma e fetalai i ai le Atua. Na te lē faaseseina lava se tasi.​—Numera 23:19.

E pei lava ona taofimauina e le faamoega apogaleveleve le lago, e faapena foi ona taofimauina e faiga faataulaitu ma le pepelo le faitau miliona o tagata. Latou te matatau i ē ua feoti. Latou te fefefe i temoni. E popole i latou i faamalaiaga, faailoga, lavevea i ni nifo, ma faalauatau. Ua saisaitia i latou i talitonuga ma aganuu e faavae aʻe i pepelo a Satani le Tiapolo. Ua lē maileiina auauna a le Atua i nei mea.

E silisili atu le malosi o Ieova na i lo o Satani. Afai e te auauna ia Ieova, o le a na puipuia oe mai temoni. (Iakopo 4:7) O le a lē taitai ona faaleagaina oe e ni faiga faalauatau. Mo se faaaoaoga, i Nigeria, na faalauatau ai e ni faataulaitu matautia se toatolu se Molimau a Ieova ina ia fasiotia ona o lona lē alu ese mai le nuu. Ina ua lē taulau le faalauatauga, sa matuā mataʻu tele se tasi o faataulaitu mai le toatolu lea ma alu atu ai ma aioi i le Molimau mo le faamagaloga.

Pe afai e faalavelave ane temoni ia te oe, e mafai ona e valaau atu ia Ieova i lona suafa ma o le a ia puipuia oe. (Faataoto 18:10) Ae ina ia mafai ona e maua le puipuiga a le Atua, e tatau ona e matuā vavae ese atoatoa mai so o se mea e fesootai atu i faiga faataulaitu po o tapuaiga faatemoni. Sa faia faapea e i latou sa tapuai i le Atua i Efeso i aso ua mavae. Sa latou faapotopotoina a latou tusi uma faataulaitu ma susunu uma. (Galuega 19:19, 20) E tatau foi i auauna a le Atua i aso nei ona faia faapea. Tuuese uma mea faataulaitu, fagu vai po o ni vai faataulaitu, o mea faapea e avatu ai se “puipuiga,” tusi faataulaitu po o so o se mea lava e fesootai atu i faiga faataulaitu.

Afai e te manao e faafiafia le Atua, e lē lava le na o le lafoai o le tapuaiga sese ma taofia le toe faia o le mea sese. E tatau ona faia sou sao uigā mo le tapuaiga moni. Ua faaalia mai e le Tusi Paia le mea ua manaomia:

Ua iai ia Satani ma ana temoni ni tagata i le lalolagi o loo latou aʻoaʻoina atu ma faia mea sese. Ae ua iai foi ni tagata o Ieova. O i latou o Molimau a Ieova. (Isaia 43:10) Ua silia i le ono miliona Molimau i le lalolagi atoa. Ua taumafai uma i latou ina ia faia mea ua lelei, ma aʻoaʻo atu i tagata le upu moni. I le tele o atunuu, e mafai ona e feiloai atu ia i latou i le Maota o le Malo, o i inā o le a latou talia lelei ai oe ma le mafana.

O la latou galuega o le fesoasoani atu lea i isi ia auauna i le Atua. O le a latou suesueina le Tusi Paia ma oe i lou fale, e fesoasoani ai ia te oe ina ia tapuai atu ai i le Atua i le ala saʻo. E te lē totogia atu ni tupe mo lenei mea. E fiafia Molimau e aʻoaʻo atu le upu moni ona latou te alolofa i tagata ma latou te alolofa foi ia Ieova le Atua.