Mataupu 16

Amata Ona Pule le Malo o le Atua

1. (a) O le ā ua loa ona taulaʻi atu i ai tagata faatuatua? (e) Ai se ā ua taʻua ai le malo o le Atua o se “aai”?

MO LE faitau afe o tausaga, o tagata sa faatuatua i le malo o le Atua sa vaavaai atu i luma i le taimi o le a amata ai ona pule. Mo se faataʻitaʻiga, ua faapea mai le Tusi Paia sa faatalitali Aperaamo faatuatua “i se aai ua faavaeina, o lona mataisau ma le tufuga o le Atua lea.” (Eperu 11:10) O lea “aai” o le malo o le Atua. Ae ai se ā ua taʻua ai o se “aai”? Talu ai o aso anamua sa masani ona pule se tupu i luga o se aai. O lea, sa masani ona mafaufau tagata i se aai o se malo.

2. (a) O le ā le faaalia ai sa o se mea moni le Malo i uluai soo o Keriso? (e) O le ā sa latou mananao e iloa?

 ² O le malo o le Atua sa o se mea moni i uluai soo o Keriso. Ua faaalia i lo latou naunau i lana pule. (Mataio 20:20-23) O se fesili i o latou mafaufau: O afea o le a amata ona pule ai Keriso ma ona soo? Ina ua faaali atu Iesu i ona soo ina ua uma lona toe tu aʻe, sa latou fesili atu: “Le Alii e, o ona po nei ea e te toe fuatai mai ai le malo ia Isaraelu?” (Galuega 1:6) Po o e naunau e fia iloa po o afea e amata ai le pule a Keriso o se tupu i le malo o le Atua, e pei foi o ona soo?

O LE PULEGA O LOO TATOU I AI KERISIANO

3, 4. (a) O ā ua faaalia ai e pule pea le Atua o se Tupu? (e) Ia, ai se ā la na aʻoaʻo ai e Keriso ona soo ia tatalo i le malo ia oo mai?

³ Sa aʻoaʻo e Keriso ona soo ia tatalo i le Atua: “Ia oo mai lou malo. Ia faia lou finagalo o i le lalolagi, e pei ona faia i le lagi.” (Mataio 6:9, 10) Ae atonu e fesili mai se tasi: ‘Pe lē o pule pea ea Ieova le Atua o se tupu? Afai e pule pea ia, ai se ā la e tatalo ai ia oo mai lona malo?’

⁴ E moni, ua taʻua i le Tusi Paia Ieova o le “Tupu o le vavau.” (1 Timoteo 1:17) Ma ua faapea mai: “Ua faatumauina e Ieova o lona nofoālii i le lagi; ua pule aoao foi lona malo.” (Salamo 103:19) O lea, ua avea pea Ieova ma Pule Silisili i luga o ana foafoaga uma lava. (Ieremia 10:10) E ui i lea, ona o le fouvalega faasaga i lana pule i le faatoaga i Etena, sa fuafua ai e le Atua se malo faapitoa. O lenei le malo sa mulimuli ane aʻoaʻo e Iesu Keriso ona soo e tatalo i ai. O lana fuafuaga faaiua lea o faalavelave ua tulaʻi mai ona ua liliu ese Satani le Tiapolo ma isi mai le pule a le Atua.

5. Afai o lea o le malo o le Atua, ai se ā ua taʻua ai foi o le malo o Keriso ma le malo o le 144,00?

⁵ O lea pulega a le Malo fou ua maua lana pule ma le aiā e pule ai mai i le Tupu Silisili, o Ieova le Atua. O lona malo. Ua atulasi ona taʻua i le Tusi Paia o le “malo o le Atua.” (Luka 9:2, 11, 60, 62; 1 Korinito 6:9, 10; 15:50) Ona ua tofia e Ieova lona Alo ia avea ma ana Pule Autu, ua mafai foi ona faasino i ai o le malo o Keriso. (2 Peteru 1:11) E pei ona tatou aʻoaʻoina mai i se uluai mataupu e 144,000 tagata mai i le fanau a tagata o  le a pule ma Keriso i lea malo. (Faaaliga 14:1-4; 20:6) O lea ua faasino foi i ai le Tusi Paia o lo ‘latou malo.’—Tanielu 7:27, NW.

6. E tusa ai ma nisi tagata, o anafea na amata ia le pule o le malo o le Atua?

⁶ O isi ua fai mai na amata le pule o le Malo i le tausaga na toe afio ai Iesu i le lagi. Ua latou faapea mai na amata le pule a Keriso ina ua na liligiina ifo le agaga paia i ona soo i le tausamiga o le Penetekoso a Iutaia i le 33 T.A. (Galuega 2:1-4) Ae o le pulega o le Malo na fuafua e Ieova ia faaiua ai faalavelave uma na faapogaia e le fouvalega a Satani, na lei amata i ina lana pule. E leai lava se mea e faaalia ai o le ‘tama tane,’ o le pulega lea a le Atua e avea ai Keriso o se pule, sa fanau i ina ma amata lana pule. (Faaaliga 12:1-10) Ia, pe sa ia Iesu se malo i le tausaga e 33 T.A. i soo se auala?

7. I luga o ai ua pule ai Keriso talu mai le 33 T.A.?

⁷ Ioe, sa amata ona pule Iesu i lana faapotopotoga o soo, o ē o le a faatasi ma ia i le lagi. Ua tautala la le Tusi Paia i a i latou, a o i ai i pea i le lalolagi, ua aumai ai “le malo o lona Alo pele [o le Atua].” (Kolose 1:13) O lenei “malo,” i luga o Kerisiano ua faamoemoe mo le ola faalelagi, ua lē o lea le pulega o le Malo sa aʻoaʻo e Iesu ona soo e tatalo i ai. O se malo lea i luga e na o le 144,000 tagata e pule ma ia i le lagi. Ma i le gasologa o senituri, ua avea na o i latou ma ona tagatanuu. O lea pule, po o le ‘malo o le Alo o le alofa o le Atua,’ o le a iu pe a maliu lē aupito mulimuli o nei tagatanuu ua i ai le faamoemoe mo le lagi faatasi ma Keriso i luga. O le la lē toe pule mai Keriso i luga o i latou ae o le a avea i latou ma tupu ma ia i le Malo o le Atua ua leva ona valoia.

AMATA ONA PULE I TOTONU O ONA FILI

8. (a) O le ā ua faaalia ai a mavae le toe tu ae o Keriso o le a i ai se taimi mo le faatalitalia o lei amataina lana pule? (e) O le ā na tulei ai le Atua i a Keriso ina ua oo i le taimi mo ia e pule ai?

⁸ Ina ua toe tu ma afio Keriso i le lagi, sa lei pule loa o le Tupu o le malo o le Atua. Sa tatau ona faatali e pei ona fai mai le Aposetolo o Paulo: “Peitai ane o ia [Iesu Keriso], na avatua e ia le taulaga e tasi mo agasala, ona nofo lea o ia i le itu taumatau o le Atua e faavavau, o loo faatalitali atu ai pea, seia avea i latou e fai ma ona fili ma mea e tu ai ona aao.” (Eperu 10:12, 13) Ina ua oo i le taimi e pule ai Keriso, ona tulei lea o  Ieova i a te ia: “Ia pule oe i totonu o e ita ia te oe.”—Salamo 110:1, 2, 5, 6.

9. (a) Ai se ā e le mananao ai tagata uma i le malo o le Atua? (e) Ina ua amata le pule o le malo o le Atua, o le ā ua faia e nuu?

⁹ Pe o se tala ese lea ona e i ai ē e fai ma fili o le malo o le Atua? E le o tagata uma e fia ola i lalo o se malo e ao i ona tagatanuu ona fai o mea ua tonu. Ina ua uma ona taʻua pe faapefea ona fai Ieova ma lona Alo ma pule i le lalolagi, ona fai mai lea o le Tusi Paia, “ua ita foi nuu.” (Faaaliga 11:15, 17, 18) E le talia e nuu le malo o le Atua ona ua taʻitaʻiseseina e Satani i latou ia tetee atu.

10, 11. (a) Ina ua amata le pule o le malo o le Atua, o le ā ua tupu i le lagi? (e) O le ā ua tupu i le lalolagi? (i) O lea, o le ā le manatu tāua e ao ona tatou manatua?

¹⁰ Ina ua amata ona pule le malo o le Atua, sa nonofo pea Satani ma ana agelu i le lagi. Ona e tetee i latou i le pule a le Malo, o le taimi lava lea na pa ai le taua i le lagi. Ma o le iuga, ua tulia Satani ma ana agelu mai le lagi. Ua faapea mai se alaga i lenei mea: “O ona po nei ua oo mai ai le olataga, ma le mana, ma le malo o lo tatou Atua, ma le pule a lona Keriso.” Ioe, ua amata le pule o le malo o le Atua! Ua olioli le lagi ona ua tulia ese Satani ma ana agelu mai i ina. “O le mea lea ia outou olioli ai, le lagi e atoa ma e ua nonofo ai,” o le tala lea a le Tusi Paia.—Faaaliga 12:7-12.

¹¹ Pe o se taimi fiafia foi lea mo le lalolagi? E leai! O se taimi e sili o faalavelave mo le lalolagi i lo soo se isi lava taimi. Ua fai mai le Tusi Paia: “O i talofa ia te outou o e nonofo i le fanua ma le sami, auā ua na ia iloa ua saasaa ona po.” (Faaaliga 12:12) O se manatu tāua lenei e tatau ona manatua: O le amataga o le pule o le malo o le Atua e lē uiga o se filemu ma se saogalemu faafuasei loa i le lalolagi. O le filemu moni o le a oo mulimuli mai pe a oo ina pulea atoatoa e le malo o le Atua le lalolagi. O le a tupu lenei mea i le iuga o le “saasaa ona po,” pe a tuuesea Satani ma ana agelu mai i le ala ina ia latou lē toe faalavelave i soo se tasi.

12. Ai se ā e mafai ai ona tatou faatalitalia o le a taʻuina mai e le Tusi Paia i a i tatou le taimi e amata ai le pule o le malo o le Atua?

¹² O anafea na lafoina ai Satani mai le lagi, ma ua faapogaia faalavelave mo le lalolagi mo le “saasaa ona po”? O anafea na  amata ai le pule o le malo o le Atua? Pe ua aumaia e le Tusi Paia se tali? E tatau ona faapea lava. Ai se ā? Talu ai, a o mamao lava, sa valoia e le Tusi Paia po o afea o le a aliali mai ai muamua le Alo o le Atua o se tagata i le lalolagi ia avea o le Mesia. O le mea moni, ua faasino tonu lava i le tausaga e avea ai o ia ma Mesia. E faapefea la le tulaga tāua o le afio mai o le Mesia po o le Keriso, ina ia amata lana pule o le Malo? Ma le mautinoa lava tatou te faatalitalia le taʻuina mai e le Tusi Paia i a i tatou po o afea e tupu ai lenei mea!

13. E faapefea ona valoia e le Tusi Paia le tausaga tonu e faaalia mai ai le Mesia i le lalolagi?

¹³ Ae atonu e fesili mai se tagata: ‘O fea o valoia mai ai e le Tusi Paia le tausaga tonu e aliali mai ai le Mesia i le lalolagi?’ Ua fai mai le tusi o le Tusi Paia o Tanielu: “E afua mai i le oo atu o le poloaiga ia toe faia ma ia atiina ae Ierusalema, e oo atu i le Mesia le Alii, e fitu vaiasosa ma vaiasosa e onogafulu ma le lua,” po o le 69 vaiaso. (Tanielu 9:25) E ui i lea, o nei mea ua lē o ni vaiaso moni e 69, e na o le 483 aso, po o le sili ae foi i le tausaga e tasi. O ia vaiaso o vaiaso faaletausaga e 69, po o le 483 tausaga. (Faatusatusa i le Numera 14:34) O le poloaiga ia toe fausia pa o Ierusalema sa tuuina atu i le 455 T.L.M. * (Neemia 2:1-8) O lea, o nei 69 vaiaso faaletausaga na iu i le 483 tausaga mulimuli ane ai, i le 29 T.A. Ma o le tausaga tonu lava lea na afio atu ai Iesu i a Ioane ina ia papatisoina! Ma i lea lava taimi na faauuina ai o ia i le agaga paia ma avea o le Mesia, po o le Keriso.—Luka 3:1, 2, 21-23.

PE A AMATA ONA PULE LE MALO O LE ATUA

14. O le ā ua faaatagia e le “laau,” i le Tanielu mataupu e fa?

¹⁴ Ae, o fea o valoia ai e le Tusi Paia le tausaga e amata ai le pule a Keriso o se tupu o le malo o le Atua? O loo i le tusi lava lea o Tanielu. (Tanielu 4:10-37) O se laau tele e oo i le lagi ua faaaoga e fai ma ata o le Tupu o Nepukanesa o Papelonia. O ia o le pule silisili faaletagata i lena taimi. E ui i lea, sa faamalosia le Tupu o Nepukanesa ia iloa e i ai se tasi e sili atu ona  maualuga ma pule. O ia “o lē Silisili ese,” po o le “Tupu o le lagi,” o Ieova le Atua. (Tanielu 4:34, 37) O lea, i se auala aupito sili ona tāua, o lenei laau e tau i le lagi sa fai ma sui o le pule silisili a le Atua, ae maise lava e uiga i lo tatou lalolagi. O le pule a Ieova sa faataʻitaʻia mai mo se taimi e ala i se malo na ia faatuina i a Isaraelu. O lea o tupu mai i le ituaiga o Iuta o ē na pule i tagata Isaraelu sa taʻua faapea o loo tietie “i le nofoālii o Ieova.”—1 Nofoaiga a Tupu 29:23.

15. Ina ua tuuina i lalo le “laau,” ai se ā na fusia ai i ni fusi?

¹⁵ E tusa ma le tala o le Tusi Paia o tusia i le Tanielu mataupu e fa, sa tipi i lalo lenei laau e paʻi i le lagi lona maualuga. Ae sa totoe pea le pogati, ma sa fusia i fusi uamea ma apa memea. Sa taofia ai le pogati mai le toe ola seia oo i le taimi a le Atua e aveesea ai le fusi ma toe amata ai ona tupu. E faapefea ma o anafea na tuuina ai i lalo le pule a le Atua?

16.(a) E faapefea ma o anafea na tuuina ai i lalo le pule a le Atua? (e) O le ā sa taʻuina atu i le tupu mulimuli o Iuta sa nofo i le “nofoālii o Ieova”?

¹⁶ I lona taimi tatau, ona o le malo o Iuta sa faavaeina e Ieova na amioleaga tele naua, ua ia faataga ai le Tupu o Nepukanesa na te faaumatia, ia tuu i lalo. Sa tupu lea i le tausaga e 607 T.L.M. I lena taimi, sa taʻu atu ia Setekaia, le tupu mulimuli o Iuta na nofo i le nofoālii o Ieova: “To ese ia le palealii, . . . e le toe i ai lava  lea, seia afio mai o ia ua i ai le tonu, ona ou avatua ai lea ia te ia.”—Esekielu 21:25-27.

17. O le ā le vaitaimi na amata i le 607 T.L.M.?

¹⁷ O lea, o le pulega a le Atua, e pei ona faaatagia mai e le “laau,” sa tuuina i lalo i le 607 T.L.M. Ua lē toe i ai se malo e fai ma sui o le pulega a le Atua i le lalolagi. Ona amata ai lea o se vaitaimi mai i le 607 T.L.M., sa mulimuli ane taʻua e Iesu, taimi atofaina o nuu ese” po o “tausaga o nuu ese.” (Luka 21:24, NW) I lea ‘vaitaimi atofaina’ sa leai se malo a le Atua e faaatagia ai lana pule i le lalolagi.

18. O le ā sa tupu i le iuga o “taimi atofaina o nuu ese”?

¹⁸ O le ā e tupu i le faaiuina o nei “taimi atofaina o nuu ese”? O le a tuuina atu loa e Ieova le mana ma le pule i Le “ua i ai le tonu.” O Ia lea o Iesu Keriso. O lea, afai e mafai ona tatou sueina po o anafea na iu ai “taimi atofaina o nuu ese,” e mafai foi la ona tatou iloaina po o anafea na amata ona pule ai Keriso o se tupu.

19. Mo le fia “taimi” o le a faalavelave ai le pule a le Atua i luga o le lalolagi?

¹⁹ E tusa ai ma le Tanielu mataupu e fa, o nei “taimi atofaina” o le a avea ma fitu taimi po o “tausaga e fitu.” Ua faaalia e Tanielu o le a i ai le ‘fitu taimi’ o le a lē toe galue ai le pulega a le Atua i le lalolagi e pei ona faaatagia mai e le “laau.” (Tanielu 4:16, 23)  O le ā le umi o ia ‘taimi e fitu’ po o “tausaga e fitu”?

20. (a) O le ā le umi o le “taimi” po o le “tausaga” e tasi? (e) O le ā le umi o “tausaga e fitu”? (i) Ai se ā tatou te faitauina ai o le aso mo le tausaga?

²⁰ I le Faaaliga 12:6, 14, ua tatou maua ai o aso e 1,260 e tutusa o “le tausaga [1 tausaga], ma tausaga [2 tausaga], ma lona vaeluagalemu o tausaga.” O se aofai e 3 1/2 tausaga. O lea, o se “tausaga” e tutusa e 360 aso. O lea, o “tausaga e fitu” ua avea ma 7 x 360, po o le 2,520 aso. Afai tatou te faitau le aso mo le tausaga, e tusa ai ma le tulafono a le Tusi Paia, o “tausaga e fitu” ua tutusa e 2,520 tausaga.—Numera 14:34; Esekielu 4:6.

21. (a) O afea e amata ai ma iu a i“taimi atofaina o nuu ese? (e) O afea e amata ai le pule o le malo o le Atua? (i) Ai se ā ua tonu ai pea ona tatalo mo le malo o le Atua ia oo mai?

²¹ Ua tatou iloa na amata “taimi atofaina o nuu ese” i le tausaga e 607 T.L.M O lea i le faitauina o tausaga e 2,520 mai i lena aso, ua tatou oo atu ai i le 1914 T.A. O lea tausaga lea na iu ai “taimi atofaina.” E faitau miliona tagata o ola pea o manatua mea na tutupu i le 1914. I lena tausaga, na amata ai e le Taua l a le Lalolagi se vaitaimi o faalavelave matautia seia oo mai i o tatou aso. O lona uiga, na amata le pule a Iesu Keriso o se tupu i le malo faalelagi o le Atua i le 1914. Ma talu ai ua uma ona amata le pule a le Malo, maeu la le fetaui ona tatou tatalo atu ia “oo mai” ia ma tafiesea le faiga amioleaga a Satani mai le lalolagi!—Mataio 6:10; Tanielu 2:44.

22. Ae, o le ā le fesili atonu ua fesiligia e ni isi?

²² E ui i lea atonu e fesili mai se tagata: ‘Afai ua maea ona toe afio mai Keriso e pule i le malo o lona Tamā, ai se ā tatou te le vaaia ai o ia?’

[Faaopoopoga i lalo]

[Fesili mo le Suʻesuʻega]

[Siata i le itulau 140, 141]

I le 607 T.L.M. o le malo o le Atua i a Iuta sa paū.

I le 1914 T.A. sa amata ai ona pule Iesu Keriso o se tupu o le malo faalelagi o le Atua

607 T.L.M.— 1914 T.A.

607 T.L.M.—Oketopa, 1 T.L.M. = 606 Tausaga

1 T.L.M.—Oketopa, 1914 T.A. = 1,914 Tausaga

TAIMI E FITU O NUU ESE = 2,520 TAUSAGA

[Ata i le itulau 134]

“Le Alii e, o ona po nei ea e te toe fuatai mai ai le malo ia Isaraelu”?

[Ata i le itulau 139]

O le laau maualuga o i le Tanielu mataupu e 4 ua fai ma sui o le pulega tau atua. Mo se vaitaimi sa faataʻitaʻia e ala mai i le malo o Iuta

[Ata i le itulau 140, 141]

Sa tuuina i lalo le laau ina ua faaumatia le malo o Iuta