O le ā e Tupu Pe a Oti?
Mataupu 8
O le ā e Tupu Pe a Oti?
1. O ā fesili e masani ona fesili ai tagata e uiga i ē ua feoti?
ATONU ua e iloa le faalogona gaogao e oo mai i le lē iloa o sē pele i le oti. Paga se faavauvau ma le lē mafesoasoania e mafai ona e lagonaina! Ua alaga tatau ai ona fesili: O le ā e tupu i se tagata pe a oti? Pe o ola pea o ia i se isi mea? Pe o ē o ola o le a toe faatasi fiafia i le lalolagi ma ē ua feoti?
2. O le ā sa tupu i le tagata muamua, o Atamu, i lona oti?
2 Ina ia taliina na fesili, e lelei mo i tatou le iloaina po o le ā sa tupu i a Atamu i lona oti? Ina ua ia agasala, sa tulei atu le Atua: “Auā o le efuefu oe, e te toe foi atu lava i le efuefu.” (Kenese 3:19) Mafaufau i le uiga o lena mea. A o lei foafoaina o ia e le Atua mai i le efuefu, sa leai se Atamu. Sa lei ola o ia. O lea, ina ua mavae lona oti, sa toe foi atu Atamu i lea lava tulaga e tasi, o le lē i ai pe e ola.
3. (a) O le ā le oti? (e) O le ā ua fai mai ai le Failauga 9:5, 10) i le tulaga o ē oti?
3 I se faaupuga faigofie, o le oti o le tuufaafegai lea o le ola. Ua faaalia e le Tusi Paia lenei mea i le Failauga 9:5, 10: “Auā o e ua ola, ua latou iloa e oti i latou; a o e ua oti, latou te le iloa se mea; ua leai foi se toe totogi ia te i latou; auā ua faagalogaloina i latou. O mea uma ua e iloa e faia e ou lima, ina faia ma lou malosi; auā e leai se galuega, po o se mafaufau, po o se iloa, po o se poto i le tuugamau, o loo e alu atu i ai.”
4. (a) O le ā e tupu i oe malosi e mafaufau o le tagata i le taimi e oti ai? (e) Ai se ā e taofi ai faalogona uma o le tagata i le taimi e oti ai?
4 O lona uiga o ē ua feoti e lē mafai ona faia pe lagona se mea. Ua le toe manatunatu, e pei ona fai mai le Tusi Paia: “Aua tou te faatuatua i alii, po o le fanau a tagata, e le o i ai se olataga. E alu ese lona agaga, e foi atu i le eleele na i ai o ia; e faaumatia i lea lava aso ona manatunatu.” (Salamo 146:3, 4) I le oti, o le agaga o le tagata, le malosi o le ola, lea e faatumauina i le mānava, “e alu ese.” E le toe ola. O lea, o le faalogo, vaai, tago, sogisogi ma le tofo, e faalagolago i le mafai ona mafaufau ua faamuta. E tusa ma le Tusi Paia, ua oo atu le tagata oti i se tulaga o le lē iloa aʻiaʻi o se mea.
5. (a) E faapefea ona faaalia e le Tusi Paia e tutusa tulaga o tagata oti ma manu mamate? (e) O le ā le “agaga” e mafua ai tagata ma manu e ola?
5 I le oti, ua tutusa ai tagata ma manu i lenei tulaga, lē iloa taputapu o se mea. Matau le manatu a le Tusi Paia: “E pei ona oti o le tasi, e faapea foi ona mate o le tasi, e tasi lava le mānava [agaga] ia te i latou uma; e leai lava se mea e sili ai le tagata i le manu; e mai le efuefu uma lava, e toe foi atu foi uma lava i le efuefu.” (Failauga 3:19, 20) E tutusa le ‘agaga’ po o le malosi o le ola e lē vaaia, ona foi uma atu ai lea tagata ma manu i le efuefu na faia ai i laua.
E OTI LE SOLU
6. E faapefea ona faaalia e le Tusi Paia o mea ola po o manu o solu?
6 Ua fai mai isi tagata ua eseese le tagata ma manu ona o le tagata e i ai lona solu ae e lē i ai i manu. Peitai, ua fai mai le Kenese 1:20 ma le 30 na faia e le Atua “mea ola” (“solu”) e ola i le vai, ma e i ai i mea ola le ‘ola o se solu.’ Ua faaaoga e nisi Tusi Paia upu e pei o “mea ola” ma le “ola” na i lo le “soul’ (“solu”), ae ua faapea mai o latou faamatalaga faaopoopo, o le upu “soul” o le upu lea o loo i le uluai gagana. O isi faasinoga a le Tusi Paia i mea ola o ni solu o loo i le Numera 31:28. Ua faapea “ia taitasi ai le tailima o selau o mea (solu), o tagata, ma povi, ma asini, atoa ma mamoe.”
7. O le ā ua fai mai ai le Tusi Paia e faamaonia ai o solu o manu ma solu o tagata e oti?
7 Ona o mea ola o ni solu, pe a latou mamate, e uma foi o latou solu. Fai mai le Tusi Paia: “Ona mamate ai lea o mea ola uma (solu) o i le sami?” (Faaaliga 16:3) A e faapefea i solu faaletagata? E pei o isi mataupu muamua, sa lei faia e le Atua le tagata ma se solu. O le tagata o se solu. O lea, pe a oti le le tagata, e oti foi lona solu. Ua faamaonia soo e le Tusi Paia. E lē o fai mai lava le Tusi Paia o le solu e lē maoti. Ua fai mai le Salamo 22:29, “e punonou i ona luma atoa uma o e ō ifo i le eleele, atoa ma le ua le faaola o ia ia te ia.” Ua faamatala e le Esekielu 18:4 ma le 20, “O le tagata (solu) e agasala e oti lava ia.” Afai e te sue i le Iosua 10:28-39, e faafitu ona taʻua ai le faaumatia po o e fasiotia o le solu.
8. E faapfea ona tatou iloa Iesu Keriso, le solu faaletagata, na oti?
8 Fai mai le valoaga a le Tusi Paia i a Iesu: “Ua ia sasaa atu o lona ola (solu) ia oti; . . . na ia aveina foi le agasala a tagata e toatele.” (Isaia 53:12) O le aʻoaʻoga i le togiola le tagata, e ao ona i ai se solu (se tagata) tutusa e faia ia le taulaga. I le ‘sasaaina atu e Keriso o lona ola (solu) ia oti,’ na saunia ai le tau o le togiola. Sa maliu Iesu, solu faaletagata.
9. O le ā le uiga o upu, 1 ‘e toe foi atu le agaga i le Atua o le na aumaia?
9 E pei ona iloa, o le “agaga” o se mea e ese mai i lo tatou solu. O le agaga, o le malosi o le ola. O lenei malosi o le ola o loo i totonu o sela taitasi o le tagata ma manu. Ua faatumauina ma faaolaolaina e le mānava. O le ā fa le Tusi Paia i le oti e “toe foi atu le efuefu i le eleele . . . ma toe foi atu le agaga i le Atua o le na foaiina mai ai”? (Failauga 12:7) I le oti, e tuua e le malosi o le ola le tino o sela uma, ma i se taimi ona pala lea o le tino. Ae e lē faapea e tuua moni e lo tatou malosi o le ola le lalolagi ma alu atu i le Atua. Na i lo lea, ua toe foi le agaga i le Atua i se uiga faapea, o lo tatou faamoemoe mo le ola i le lumanai ua faalagolago nei atoatoa i le Atua. Ua na o lona mana lava e mafai ona toe faafoisia mai le agaga, po o le malosi o le ola ina ia tatou toe feola ai.—Salamo 104:29, 30.
LASALO—O SE TAGATA NA OTI MO ASO E FA
10. E ui lava ina sa maliu Lasalo, o le ā sa taʻua e Iesu e tusa ai ma lona tulaga?
10 O le mea sa tupu i a Lasalo, o lē na maliu mo aso e fa ua fesoasoani i a i tatou ia malamalama i le tulaga o le oti. Sa taʻu atu e Iesu i ona soo: “O loo moe la tatou uo o Lasalo; a e ou te alu fafagu ia te ia.” Ae na tali atu le au soo: “Le Alii e, afai o moe ia, e ola.” Ona taʻutino atu lea e Iesu ma le manino: “Ua oti Lasalo.” Ai se ā na fetalai ai Iesu sa moe Lasalo ae sa oti moni lava o ia? Sei o tatou tagai i ai.
11. O le ā sa faia e Iesu mo Lasalo ua oti?
11 Ina ua latalata Iesu i le nuu o Lasalo, sa faafetaiaia o ia e Mareta, le tuafafine o Lasalo. Ona la o atu lea ma isi i le tuugamau o Lasalo. Sa tuu i se ana, ma sa fuli i ai se maa. Sa tulei atu Iesu: “Ave ese ia le maa.” Ona ua fa aso o oti Lasalo, sa faatalatu Mareta: “Le Alii e, ua oo ina manogi.” Peitai sa fuliese le maa, ma sa alaga Iesu: “Lasalo e, ina sau ia i fafo.” Ma sa faapea lava! Sa sau i fafo ua ola, o loo fusifusia i ie na tanumia ai. Sa tulei atu Iesu: “Tatala ia ia te ia, ina tuu atu ia e alu.”—Ioane 11:11-44.
12, 13. (a) Ai se ā e mafai ai ona tatou mautinoa sa lē iloa e Lasalo se mea ina ua oti? (e) Ai se ā na fetalai ai Iesu o loo moe Lasalo a o le mea moni sa oti o ia?
12 Mafaufau i lenei mea: O le ā le tulaga o Lasalo i na aso e fa i le taimi o lona oti? Pe sa i ai o ia i le lagi? Sa o ia o se tagata lelei. Ae leʻi taʻua lava e Lasalo sona i ai i le lagi, auā e mautinoa lona faia faapea pe ana fai sa i ai o ia. E leai, sa oti moni Lasalo, e pei ona fetalai i ia Iesu. Ae ai se ā na taʻu muamua atu ai Iesu i ona soo o Lasalo o loo moe?
13 Ia, na silafia e Iesu e le o toe iloa e Lasalo ua maliu se mea e pei ona taʻua e le Tusi Paia: “O e ua oti, latou te le iloa se mea.” (Failauga 9:5) Ae o se tagata ola e mafai ona toe fafagu mai i se moe gase. O lea sa alu atu Iesu e faaalia lea tulaga, e ala i le mana o le Atua na tuu atu i a te ia o le a mafai ai ona toe fafagu lana uo o Lasalo mai le oti.
14. O le malamalama e tusa ai ma le mana o Keriso e toe faatuina ē ua feoti e tatau ona uunaia ai i tatou e faia le ā?
14 Pe a moe gase se tasi, na te le manatua se mea. E tutusa ma ē ua oti. Ua leai ni o latou lagona. E lē o toe i ai i latou. Ae i le taimi atofa a le Atua, o ē ua oti ua togiola e le Atua o le a toe faatutu i le ola. (Ioane 5:28) E mautinoa la, ua ao i lenei poto ona uunaia i tatou ia maua le finagalo malie o le Atua. Afai tatou te faia, e tusa pe tatou te feoti, e manatua i tatou e le Atua ma faatutu i le ola.—1 Tesalonia 4:13, 14.
[Fesili mo le Suʻesuʻega]
[Ata i le itulau 76]
ATAMU—fai mai i le efuefu . . . toe foi i le efuefu
[Ata i le itulau 78]
O le ā le tulaga o Lasalo a o lei faatuina mai o ia e Iesu?
