Mataupu 12

Ua Aafia Oe i Se Finauga Tāua

1, 2. (a) Ai se ā e afaina moni ai i a te oe le ala o e ola ai? (e) Po o ai le isi o afaina, ma ai se ā?

AFAINA moni le auala o ola ai lou olaga. O lona uiga, a lē o se lumanai lelei, o se lumanai masei mo oe. Mulimuli lava, o le a fuaina ai pe o le a tafiesea oe faatasi ma lenei lalolagi po o le sao mai i lona iuga i le lalolagi fou amiotonu a le Atua o le mea e mafai ai ona e ola e faavavau.—1 Ioane 2:17; 2 Peteru 3:13.

² E lē na o oe e afaina i le ala o ola ai lou olaga. E aafia ai foi isi. E pei o ou matua, a o soifua i laua, o mea e te faia e ono aumaia ai i a i laua a lē o le viiga, o le faalumaina. Na fai mai le Tusi Paia: “O le atalii poto na te faafiafia lona tamā; a o le tama valea e faanoanoa ai lona tinā.” (Faataoto 10:1) A e sili ona tāua, o le ala o e ola ai e aafia ai Ieova le Atua. A lē o le faafiafiaina ai o ia, o le faafaanoanoaina ai. Ai se ā? Ona o se finauga tāua o loo e aafia ai.

PE O LE A FAAMAONI TAGATA I LE ATUA?

3. O le ā le lui na faia e Satani i a Ieova?

³ O lenei finauga sa lagā e Satani le Tiapolo. Na lagā ina ua mafai ona ia faapogaia Atamu ma Eva e solia le tulafono a le Atua ma faatasia ma ia e fouvale i le Atua. (Kenese 3:1-6) O lenei mea ua lagona e Satani o se fouvale e luitau ai i a Ieova: ‘Na pau le mafuaaga e auauna atu ai tagata ona o mea latou te maua mai i a te oe. Tuu mai se avanoa i a te aʻu ma e mafai ona ou faaliliu ese so o se tagata mai i a te oe.’ E ui lava e lē o i ai moni nei upu i le Tusi Paia, ua manino sa taʻu atu e Satani se mea faapea i le Atua. Ua faaalia lea i le Tusi Paia i le tusi o Iopu.

4, 5. (a) O ai Iopu? (e) O le ā sa tupu i le lagi i aso o Iopu?

⁴ O Iopu o se tagata na ola aʻe i le tele o senituri ina ua mavae  le fouvalega i le faatoaga o Etena. Sa o ia o se auauna amiotonu ma le faamaoni a le Atua. Ae pe na afaina moni ea i le Atua po o Satani sa faamaoni Iopu? Ua faaalia i le Tusi Paia o lea le tulaga. Ua taʻua ai le faaali atu o Satani i luma o Ieova i le faamasinoga i le lagi. Matau le mataupu o la la talanoaga:

⁵ “Ua oo i le tasi aso, ona o mai ai lea o atalii o le Atua e tutū mai i luma o Ieova; na sau foi Satani faatasi ma i latou. Ua fetalai atu Ieova ia Satani, Ua e sau ea mai fea? Ona tali mai lea o Satani ia Ieova, ua faapea, Ua ou sau na aʻu fealuai i le lalolagi, ma fesavaliai ai. Ua fetalai atu Ieova ia Satani, ua e mafaufau ea i laʻu auauna o Iopu, auā ua leai se tasi e tusa ma ia i le lalolagi, o le tagata ua sao lana amio ma le amiotonu, o le ua mataʻu i le Atua, ma ʻaloʻalo ese i mea leaga”?—Iopu 1:6-8.

6. O le ā le finauga ua faaalia e le Tusi Paia sa uma ona i ai i aso o Iopu?

⁶ Ai se ā na tulei ai Ieova i a Satani o Iopu o se tagata amiotonu? Auā sa i ai se finauga pe o le a tumau pea Iopu i le faamaoni i a Ieova pe leai. Mafaufau i le fesili a le Atua, “Ua e sau ea mai fea?,” o le tali a Satani, “Ua ou sau na aʻu fealuai i le lalolagi, ma fesavaliai ai.” Ua faaalia i lenei fesili ma le tali a Satani sa faataga e Ieova ni avanoa saoloto mo ia e faaauau ai lana lui na te mafai ona ia faaliliu ese soo se tasi mai i le Atua. O le ā la le tali a Satani i le fesili a Ieova e tusa ma le faamaoni o Iopu?

7, 8. (a) O le ā le mafuaaga sa taʻua e Satani ua auauna atu ai Iopu i le Atua? (e) O le ā le mea na faia e Ieova ina ia faaleleia le finauga?

⁷ “Ona tali mai ai lea o Satani ia Ieova, ua faapea mai, Ua mataʻu fua ea Iopu i le Atua? ua e le siosiomia ea i le aupa o ia, ma lona fale, atoa ma ana mea uma i itu uma? ua e faamanuia le galuega a ona lima, ua e faateleina foi ana manu i le fanua. A e peitai ia e aapa atu lou aao, ma e tago atu i ana mea uma, pe na te le faifai ai ea ia te oe i ou lava luma?”—Iopu 1:9-11.

⁸ I lana tali atu, sa faia ai e Satani se faamolemolega o le faamaoni o Iopu i le Atua. Ua finau atu Satani, ‘ua auauna Iopu ia te oe ona o mea ua e foai atu mo ia, ae e lē ona ua alofa o ia i a te oe.’ Sa faitio foi Satani sa faaaoga e Ieova lona mana silisili i se auala lē tonu. Ua ia faapea atu, ‘ua puipuia pea lava o ia.’ O lea, ina ia faaleleia le finauga, sa tali atu Ieova: “Faauta,  ua i lou lima ana mea uma, tau o ia lava aua e te faaoo i ai lou lima.”—Iopu 1:12.

9. O le ā le faalavelave na faatupu e Satani i a Iopu, ma o le ā le iuga?

⁹ Ona faapogaia loa lea e Satani faalavelave mo Iopu. Ua faamamate lafu manu uma a Iopu po o le gaoia foi. Ma na ia faapogaia le fasiotia o fanau e toa 10 a Iopu. Sa toe lava o mea uma a Iopu na le iloa, ae na tumau o ia i le faamaoni i a Ieova. Sa le faifai o ia i le Atua. (Iopu 1:2, 13-22) Ae sa lē iu ai i ina le mataupu.

10. O le ā ua faaalia ai sa lei lolo atu pe fiu Satani?

¹⁰ Sa toe faaali atu foi Satani ma isi agelu i luma o Ieova. Ua toe fesili atu foi Ieova i a Satani pe sa ona iloaina le faamaoni o lana auauna o Iopu ma faapea atu: “Ua taofi mau pea foi e ia lana amiotonu.” Ma i lea sa tali atu Satani: “O le paʻu e sui aʻi le paʻu; o mea uma foi ua i ai i le tagata, e avatua e ia e sui aʻi lona ola. A e peitai ia e aapa atu lou aao, ma e tago atu i ona ivi ma ona aano, pe na te le faifai ai ea ia te oe i ou lava luma?”—Iopu 2:1-5.

11. (a) O ā isi tofotofoga na faapogaia e Satani i a Iopu? (e) Sa o le ā le iuga?

¹¹ Na tali atu Ieova i le faataga o Satani e faia soo se mea na te mafaia i a Iopu, e ui ina tulei atu le Atua: ‘E te le fasiotia o ia.’ (Iopu 2:6) Ona taia loa lea e Satani Iopu i le faamaʻi leaga tele. Sa tele le puapuaga o Iopu ma na tatalo ai o ia ia oti. (Iopu 2:7; 14:13, 14) Sa faasaga tau foi lana avā ia te ia, i le faapea atu: “Ina faifai ia e oe i le Atua, ma e oti ai.” (Iopu 2:9) Ae na teena e Iopu faapea: “Seia oo lava i loʻu oti ou te le faateaina lava laʻu amio sao.” (Iopu 27:5) Sa tumau Iopu i le faamaoni i le Atua. Ma sa faamaonia ai sa sese Satani i lana lui e auauna Iopu i le Atua ona o mea faitino ua na maua a e lē o le alofa. Sa faaalia foi le lē mafai e Satani ona faaliliu ese tagata uma mai i le Atua.

12. (a) O le ā le tali i le lui a Satani na saunia e Iopu mo le Atua? (e) O le ā sa faamaonia e le faamaoni o Iesu i le Atua?

¹² O le ā le faalogona o Ieova ona o le faamaoni o Iopu? Sa fiafia tele o ia! Ua augani mai le Afioga a le Atua: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faataoto 27:11) O Satani o ia lea o faifai i a Ieova. I lona ala faamaoni sa faafiafia ai e Iopu le Atua. Ua avatu e lea  mea i le Atua se tali i le lui faamaualuga a Satani e lē mafai ona auauna tagata i a te Ia i lalo o tofotofoga. E toatele isi ua saunia se tali mo le Atua. O le faataʻitaʻiga sili o le tagata lelei atoatoa o Iesu. Sa ia taofi mau i lona faamaoni i le Atua e ui i tofotofoga ma faaosoosoga uma na oo i a te ia. Ua faamaonia i lea sa ono mafai ona faia faapea e Atamu lelei atoatoa pe ana fai na ia manao moni i ai, ma sa lē amiolētonu le Atua i le faatalitalia o le usiusitai atoatoa mai i le tagata.

O FEA O E TU AI?

13. (a) O le ā o faia e le ala o ola ai lou olaga agai i le finauga? (e) E mafai faapefea ona tatou faafiafia i le Atua po o le faapogaia ona faatiga i a te ia?

¹³ E faapefea lou ola? Atonu e te le manatu e afaina moni le ala o e ola ai. A e e afaina. Pe e te iloa pe leai, e lagolagoina ai a lē o le itu a le Atua, o le itu a Satani. E manatu Ieova mo oe, ma finagalo o ia e te auauana i a te ia ma ola e faavavau i le lalolagi parataiso. (Ioane 3:16) Ina ua fouvale Isaraelu i le Atua, sa tiga ona faalogona. (Salamo 78:40, 41) Pe o le ala o e ola ai o faafiafia ai le Atua po o faatiga i a te ia? O le mea moni, ia faafiafia i le Atua, e manaomia ona e aʻoaʻoina ana tulafono ma usitai ai.

14. (a) E tusa ai ma feusuaiga faaleituaiga, o ā tulafono e tatau ona tatou usiusitai i ai ina ia faafiafia i le Atua? (e) Ai se ā o se solitulafono ai le solia o ia tulafono?

¹⁴ O le sini o Satani o le faapogaia lea o tagata ia soli le tulafono a le Atua e pulea ai le faaaoga o le malosi o o latou totoga fanau tama, ma lana fuafuaga o le faaipoipo ma le aiga. O tulafono a le Atua e puipuia ai lo tatou fiafiaga ua fai mai, o tagata e lei faaipoipo e le tatau ona auai i ni feusuaiga faaleituaiga, ma o tagata faaipoipo e lē tatau ona faia ni feusuaiga faaleituaiga, ma soo se tasi e ese mai i a latou paaga faaipoipo. (1 Tesalonia 4:3-8; Eperu 13:4) A soli le tulafono a le Atua, e masani ona fananau mai tamaiti e aunoa ma ni matua alofa ma tausi i latou. E iʻu foi ina faia e tinā ni faapaʻu tama, fasiotia ia tamaiti a o lei fananau mai. O le toatele foi o ē faia le faitaaga latou e mauaina le faamaʻi leaga e ono mafai ona faaleagaina ai tamaiti atonu e fananau mai i a i latou. O se solitulafono i le Atua le faia o se feusuaiga faaleituaiga ma sē e lei faaipoipo  i ai. Sa fai mai Iopu: “Afai ua olegia loʻu loto i se fafine, po ua ou lamalama i le faitotoa o lē ma te tuaoi . . . o le agasala tele lea.”—Iopu 31:1, 9, 11.

15. (a) Afai tatou te faia le faitaaga, o ai o tatou faafiafia ai? (e) Ai se ā ua poto ai ona tatou usiusitai i tulafono a le Atua?

¹⁵ E lē tatau ona faateia i tatou, e lenei lalolagi pulea e le Tiapolo o le a na faia ia faafoliga o se tulaga masani ma e tonu foi mo oe le faia o feusuaiga faaleituaiga ma sē lua te lei faaipoipo. Afai e te faia lea, ua e faamalie Satani a e lē o Ieova. Ina ia faafiafia le Atua, e ao ona “sosola ese ia outou i le faitaaga.” (1 Korinito 6:18) E moni e lē masani ona faigofie le faamaoni i le Atua. Sa lē faigofie foi i a Iopu. Ae manatua, ua poto ona usiusitai pea i le tulafono a le Atua. E te fiafia nei pe a e faia. A e silisili ona tāua, o le a e lagolago le itu a le Atua i le finauga. Ma o le a na faamanuia oe i le ola e faavavau i le fiafia i le lalolagi.

16. (a) Sa faapefea ona faamanuiaina Iopu mo lona faamaoni? (e) O le ā e mafai ona tautalagia e tusa ai ma mea leaga ua faapogaia e Satani, e pei o le fasiotia o atalii e toa 10 o Iopu?

¹⁶ E moni sa mafaia e Satani ona faamativaina Iopu ma faapogaia le feoti o le toa 10 o lana fanau. Sa avea lenei o se faanoanoaga tiga mo Iopu. Ae ina ua faamaonia le faatuatua o Iopu, sa faaluaina ona faamanuia le Atua i a te ia na i lo mea sa i ai muamua a o lei faatagaina Satani e tofotofo i a te ia. Sa avea foi Iopu ma tamā mo nisi fanau e toasefulu. (Iopu 42:10-17)   E faaopoopo atili atu i ai, tatou te mautinoa le fanau e toa 10 a Iopu o e na fasiotia e Satani, o le a toe faaolaina i le toe tutū mai o e ua feoti. Ma le mautinoa lava, e leai se faafitauli po o se leaga ua faatagaina Satani e fai o le a lē faasaʻoina e lo tatou Tamā alofa o Ieova, i lana taimi atofaina.

17. Aiseā e afaina moni ai le ala o tatou ola ai?

¹⁷ O lea, ia manatua pea i lou mafaufau, e afaina moni le ala o ola ai lou olaga. E afaina moni i a Ieova le Atua ma Satani le Tiapolo. Ua mafua lenei mea ona o loo e aafia i se finauga pe o le a faamaoni tagata i le Atua pe leai.

[Fesili mo le Suʻesuʻega]

 [Ata i le itulau 106]

Sa fetaiai Iopu ma le lui a Satani e faapea o le ā leai lava se tasi e tutumau ma le faamaoni i le Atua i lalo o tofotofoga

[Ata i le itulau 110]

O le faia o feusuaiga faaleituaiga ma se tasi e te lei faaipoipo i ai ua o se solitulafono faasaga i le Atua

[Ata i le itulau 111]

Sa faamanuia e Ieova Iopu ona o lona faamaoni e sili mamao atu na i lo mea sa i a te ia muamua