Mataupu 42

Le Lagi Fou ma le Lalolagi Fou

1. O le ā ua faamatalaina e Ioane ina ua toe faatepa o ia e le agelu i tuā lava i le amataga o le Pulega o le Afe Tausaga?

UA FAAAUAU ona faailoa mai lenei vaaiga matagofie a o toe faatepa e le agelu Ioane i tuā lava i le amataga o le Pulega o le Afe Tausaga. O le ā ua ia faamatalaina? “Ona aʻu iloa lea o le lagi fou ma le lalolagi fou; auā ua mavae atu le uluaʻi lagi, ma le uluaʻi lalolagi, ua leai foʻi se toe sami.” (Faaaliga 21:1) Ua iloa atu nei se vaaiga mataʻina e tosina atu i ai!

2. (a) Sa faataunuuina faapefea i tagata Iutaia na toe faafoʻisia i le 537 T.L.M. le valoaga a Isaia i le lagi fou ma le lalolagi fou? (e) Tatou te iloa faapefea o le a iai se isi faatatauga o le valoaga a Isaia, ma ua faataunuuina faapefea lenei folafolaga?

² Sa fetalai Ieova iā Isaia i le faitau selau o tausaga a o leʻi oo i aso o Ioane: “Auā faauta mai, ou te faia le lagi fou ma le lalolagi fou; e lē toe manatua mea na muamua, e lē alu aʻe foʻi i le loto.” (Isaia 65:17; 66:22) Sa faataunuuina muamua lenei valoaga ina ua toe foʻi tagata Iutaia faamaoni i Ierusalema i le 537 T.L.M. ina ua mavae lo latou faaaunuua mo le 70 tausaga i Papelonia. I lea toe faafoʻisiaga, na latou faatūina ai se siʻomaga ua faamamāina, “se lalolagi fou,” i lalo o se faiga malo fou, le “lagi fou.” Ae peitaʻi, sa faasino atu le aposetolo o Peteru i se isi faatatauga atili o le valoaga, i le faapea mai: “A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.” (2 Peteru 3:13) Ua faaalia mai nei e Ioane ua faataunuuina lenei folafolaga i le aso o le Alii. O le a mavae atu le “uluaʻi lagi, ma le uluaʻi lalolagi,” le faiga o mea a Satani ua faatulagaina faatasi ai ma lana fausaga o faiga malo lea ua taaʻina e Satani ma ana temoni. O le a lē toe iai le “sami” fesouaʻiina o tagata amioleaga ma fouvale iā te ia. O le a suia i le “lagi fou ma le lalolagi fou”​—se siʻomaga fou i le lalolagi i lalo o se faiga malo fou, le Malo lea o le Atua.​—Faatusatusa i le Faaaliga 20:11.

3. (a) O le ā ua faamatalaina e Ioane, ma o le ā le Ierusalema Fou? (e) E faapefea ona ʻalu ifo mai le lagi’ le Ierusalema Fou?

³ Ua faaauau ona faapea mai Ioane: “Na ou iloa foʻi le aai paia, o Ierusalema fou, ua alu ifo mai le Atua i le lagi, ua saunia pei o se faatoʻānofotane ua teuteuina mo lana tane.” (Faaaliga 21:2) O le faatoʻānofotane a Keriso, o le Ierusalema Fou lea, ua faia aʻe i Kerisiano faauuina ua tutumau faamaoni seʻia oo i le oti, ma ua faatutūina aʻe e avea ma tupu ma faitaulaga faatasi ma Iesu lea ua faamamaluina. (Faaaliga 3:12; 20:6) E pei ona sa avea le nuu o Ierusalema ma nofoaga autū o le faiga malo i Isaraelu anamua, ua faapea foʻi ona faia aʻe e le Ierusalema Fou ma lana Faatoʻāfaiavā, le pulega mo le faiga fou o mea. O le lagi fou lea. E ʻafio mai le faatoʻānofotane mai le lagi,’ e lē i se uiga faitino, ae i le uiga o le uaʻi saʻo mai i le lalolagi. O le faatoʻānofotane a le Tamaʻi Mamoe e ao ona avea ma ana paaga fesoasoani faamaoni, i le faagaoioiga o se faiga malo amiotonu mo tagata. O se faamanuiaga moni lava mo le lalolagi fou!

4. O le ā le folafolaga ua faia e le Atua e talitutusa i le folafolaga na ia faia i le nuu fou na faavaeina o Isaraelu?

 ⁴ Ua taʻu atili mai e Ioane iā i tatou: “Na ou faalogo foʻi i le leo tele mai le lagi, ua faapea mai, ʻFaauta, ua i ai le afioaga o le Atua faatasi ma tagata, e mau foʻi o ia ma i latou; e fai foʻi i latou mona nuu, e iā te i latou le Atua lava.’” (Faaaliga 21:3) Ina ua faia e Ieova le feagaiga o le Tulafono ma le nuu fou o Isaraelu i lenā taimi, na ia folafolaina e faapea: “Ou te tuu foʻi loʻu malumalu i totonu iā te outou; e lē ʻinoʻino foʻi aʻu iā te outou. Ou te fealuaʻi foʻi i totonu iā te outou, e fai foʻi aʻu mo outou Atua, e fai foʻi outou moʻu nuu.” (Levitiko 26:11, 12) Ua faia nei e Ieova se folafolaga talitutusa i tagata faamaoni. I le vaitaimi o le afe tausaga o le Aso Faamasino, o le a avea ai i latou ma tagata e matuā faapitoa lava iā te ia.

5. (a) O le a faapefea ona mau le Atua faatasi ma tagata i le vaitaimi o le Pulega o le Meleniuma? (e) O le a faapefea ona mau le Atua faatasi ma tagata pe a mavae le Pulega o le Afe Tausaga?

⁵ I le vaitaimi o le Pulega o le Meleniuma, o le a “mau” ai Ieova faatasi ma tagata i se faatulagaga lē tumau, i le avea lea o lona Alo ua fai ma tupu o Iesu Keriso, ma ona sui. Ae peitaʻi, i le iʻuga o le Pulega i le Afe Tausaga, pe a toe tuuina atu e Iesu le Malo i lona Tamā, o le a lē manaʻomia ai se tupu e fai ma sui po o se fautua. O le a mau Ieova ma ʻona tagata’ i se uiga faaleagaga, i se auala tumau ma le tuusaʻo. (Faatusatusa i le Ioane 4:23, 24.) Maʻeu se faaeaga maualuga mo tagata ua toe faafoʻisia i le tulaga lelei atoatoa!

6, 7. (a) O ā folafolaga matagofie ua faailoa mai e Ioane, ma o ai o le a olioli i ia faamanuiaga? (e) Ua faamatalaina faapefea e Isaia se parataiso e faaleagaga ma faaletino foʻi?

⁶ Ua faaauau ona faapea mai Ioane: “E soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.” (Faaaliga 21:4) O lea foʻi ua toe faamanatu mai iā i tatou folafolaga faagaeeina na iai muamua. Sa tulimataʻi foʻi e Isaia le taimi o le a lē toe iai ai le oti ma le mapuitigā ma o le a suia le faanoanoa i le olioli. (Isaia 25:8; 35:10; 51:11; 65:19) Ua faamautinoa mai nei e Ioane faapea ua iai se faataunuuga matagofie o nei folafolaga i le vaitaimi o le afe tausaga o le Aso Faamasino. O le a olioli muamua lava le motu o tagata e toʻatele i faamanuiaga. E faaauau pea ona leoleoina i latou e le “Tamaʻi Mamoe o loo i luma o le nofoālii,” ma o le a ia “taʻitaʻi iā te i latou i puna o vai ola; e soloieseina foʻi e le Atua o loimata uma nai o latou mata.” (Faaaliga 7:9, 17) Ae mulimuli ane ona oo uma atu lea i ai ma i latou o ē toe tutū ma faaalia le faatuatua i sauniuniga a Ieova faatasi ma i latou, i le olioli ai i se parataiso e faaleagaga ma faaletino foʻi.

⁷ Ua faapea mai Isaia: “Ona faapupulaina ai lea mata o ē tauaso, e faalogoa foʻi taliga o ē tutuli.” Ioe, “ona osooso ai lea o le pipili e pei o le ʻaila, e pese foʻi le laulaufaiva o le gūgū.” (Isaia 35:5, 6) I lenā foʻi taimi, “latou te faia fale, ma latou mau ai; latou te totō tovine, ma latou aai i o latou fua. Latou te lē fai fale ina ia mau ai nisi; latou te lē totō ina ia ʻai ai nisi; auā e pei o aso o le laau aso o loʻu nuu; e uma lava i ē ua filifilia e aʻu o mea na faia e o latou lima.” (Isaia 65:21, 22) O le a lē liaʻiesea i latou mai le lalolagi.

8. O le ā ua fetalai mai ai Ieova lava ia e tusa ai ma le maufaatuatuaina o nei folafolaga matagofie?

⁸ Maʻeu ni muaʻi vaaiga ofoofogia ua faatumulia ai o tatou mafaufau a o tatou manatunatu loloto i nei folafolaga! Ua teuina mo tagata faatuatua ni sauniuniga ofoofogia e ala mai i le pulega alofa a le lagi. Pe ua lelei naʻuā ia folafolaga e faigatā ai ona iloa pe moni? Pe ua na o ni miti ea a se toeaina matua na faaaunuua i le motu o Patamo? Ua tali mai Ieova lava ia: “Ua fetalai mai foʻi lē tiʻetiʻe i le nofoālii, ʻFaauta, ou te faia ia fou mea uma lava.’ Ua fetalai mai foʻi o ia iā te aʻu, ʻIa e tusi; auā o upu nei e moni ma le faamaoni ia.’ Ua fetalai mai foʻi o ia iā te aʻu, ʻUa uma ona fai. O aʻu le Alefa ma le Omeka, o le amataga ma le gataaga.’”​—Faaaliga 21:5, 6a.

9. Aiseā e mafai ai ona manatu i nei faamanuiaga i le lumanaʻi faapea e mautinoa aʻiaʻi le faataunuuina?

⁹ Ua peiseaʻī o loo sainia e Ieova lava ia mo tagata faamaoni, se faamaoniga, po o se pepa faamaonia, i nei faamanuiaga i le lumanaʻi. O ai e fia tofotofo e fesiligia se tasi faapena ua faia sea Faamaoniga? Ioe, e matuā mautinoa  nei folafolaga a Ieova ua ia fetalai mai ai e peiseaʻī ua uma ona faataunuuina: “Ua uma ona fai.” E lē o Ieova ea “le Alefa ma le Omeka . . . , o loo soifua, na soifua foʻi, o le a afio mai, e ona le malosi uma lava”? (Faaaliga 1:8) O ia moni lava lea! Ua faalauiloa mai e ia lava: “O aʻu lē muamua, o aʻu foʻi lē mulimuli; a e leai se atua, ua na o aʻu lava.” (Isaia 44:6) Ona o le tulaga lenā o Ieova, ua mafai ai ona ia faagaeeina valoaga ma faataunuuina i auʻiliʻiliga uma. Maʻeu se faamalosia ai o le faatuatua! Ua ia folafola mai foʻi: “Faauta, ou te faia ia fou mea uma lava.”! Na i lo le fesiligia pe taunuu moni nei mea ofoofogia, e mautinoa e tatau ona tatou manatunatu: ʻO le ā e ao ona ou faia e aʻu lava ia ina ia maua ai na faamanuiaga?’

“Le Vai” mo Ē Fia Feinu

10. O le ā le “vai” ua ofoina mai e Ieova, ma ua fai ma faailoga o le ā?

¹⁰ O Ieova lava ia o lē ua faalauiloa mai faapea: “O lē ua fia inu ou te foaʻifuaina atu iā te ia ai le puna o le vai ola.” (Faaaliga 21:6e) Ina ia faamalieina lenā fia inu, e ao ai i se tagata ona iloa ona manaʻoga faaleagaga ma naunau ina ia taliaina “le vai” ua saunia e Ieova. (Isaia 55:1; Mataio 5:3) O le ā “le vai”? Na tali e Iesu lava ia lea fesili a o molimau atu i se fafine i tafatafa o se vaieli i Samaria. Na ia fetalai atu iā te ia: “A o sē inu i le vai ou te avatu iā te ia, e lē toe fia inu ia e faavavau; a o le vai ou te avatu iā te ia, e avea i totonu iā te ia o le vaipuna, e puna i luga i le ola e faavavau.” O lenā “puna o le vai ola” e tafe mai le Atua e auala iā Keriso e avea o sana sauniuniga mo le toe faafoʻisiaina o tagata i le ola lelei atoatoa. E tatau ona tatou matuā naunau ina ia matuā feinu mai lenā vaipuna, e pei ona sa oo foʻi i le fafine Samaria! Ma i le pei o lenā fafine, maʻeu le tatau ona tatou sauniuni ina ia taofia le naunau i mea e masani ai, ina ia mafai ai ona taʻu atu i isi le tala lelei!​—Ioane 4:14, 15, 28, 29.

O Ē o Loo Manumalo

11. O le ā le folafolaga ua faia e Ieova, ma o ai e faatatau muamua i ai ia upu?

¹¹ E ao foʻi iā i latou o ē feinu i lenā “vai” e faafouina ai ona manumalo, e pei ona faaauau ona fetalai mai Ieova: “O lē manumalo e maua e ia mea uma, e fai foʻi aʻu mona Atua, e fai foʻi o ia moʻu atalii.” (Faaaliga 21:7) Ua talitutusa lenei folafolaga ma folafolaga na iai i feʻau ia sa avatu i ekalesia e fitu; o lea, e ao ai ona faatatau muamua nei upu i soo faauuina. (Faaaliga 2:7, 11, 17, 26-28; 3:5, 12, 21) A o faagasolo mai tausaga, ua aloaʻia ma le naunautaʻi e uso faaleagaga o Keriso lo latou faaeaga o le avea ma vaega o le Ierusalema Fou. O le a latou maua o latou faamoemoe, pe afai latou te manumalo, e pei ona manumalo Iesu.​—Ioane 16:33.

12. O le a faataunuuina faapefea i le motu o tagata e toʻatele le folafolaga a Ieova i le Faaaliga 21:7?

¹² O loo tulimataʻi foʻi e le motu o tagata e toʻatele mai atunuu uma lenei folafolaga. E ao foʻi ona latou manumalo, i le auauna ma le faamaoni i le Atua seʻia oo ina latou ō mai nai le puapuaga tele. Ona latou ulu atu lea i lo latou tofi faalelalolagi, ʻle malo ua saunia mo i latou talu ona faavaeina le lalolagi.’ (Mataio 25:34) O i latou nei ma isi, o mamoe faalelalolagi a le Alii o ē manumalo mai le tofotofoga i le iʻuga o le afe tausaga, ua taʻua o “le ʻau paia.” (Faaaliga 20:9) O le a latou olioli i se faiā paia, e pei se tamā i se fanau ma Lē na Foafoaina i latou, o Ieova le Atua, i le avea ai o ni sui o lana faalapotopotoga aoao.​—Isaia 66:22; Ioane 20:31; Roma 8:21.

13, 14. Ina ia fai ma tofi folafolaga matagofie a le Atua, o ā faiga e ao ona tatou matuā maumauaʻi e ʻalofia, ma aiseā?

¹³ Faatasi ai ma lenei faamoemoega matagofie i o latou manatu, maʻeu le tāua o le tatau nei i Molimau a Ieova ona tutumau i le mamā mai mea e faaleagaina ai o le lalolagi a Satani! E manaʻomia ona fai sa tatou filifiliga malosi, maumauaʻi, ma maumaututū e faapea, o le a lē tāitai ona tosoina atu i tatou e le Tiapolo i le faauōga lea o loo faamatalaina e Ieova lava ia i inei: “A o ē loto vaivai, ma ē lē faatuatua, ma ē fai mea e inosia, ma ē fasioti tagata, ma ē faitaaga, ma ē faataulāitu, ma ē ifo i tupua, atoa ma ē tala pepelo uma, e fai o latou tofi i le lepa e mū i le afi ma le teio, o le oti faalua lea.” (Faaaliga 21:8) Ioe, e ao i lē o  le a maua sona tofi, ona ʻalo ese mai faiga ua faaleagaina ai lenei lalolagi tuai. E ao ona ia manumalo e ala i le tutumau ma le faamaoni a o fesagaʻi ai ma omiga uma ma faaosoosoga.​—Roma 8:35-39.

¹⁴ E ui ina manatu lotu o loo faapea mai o lotu Kerisiano o ia o le faatoʻānofotane a Keriso, ae ua mātaulia o ia i ana faiga inosia o loo faamatalaina i inei e Ioane. E alu la o ia i le faaumatiaga e faavavau faatasi ma ē uma o totoe o Papelonia le Aai Sili. (Faaaliga 18:8, 21) O le iʻuga foʻi lenā o so o se tasi lava o le ʻaufaauuina po o le motu o tagata e toʻatele o le a faia ia amioga leaga, pe amata ona ia faamaʻiteina le faia o ia amioga. Afai latou te faaauau pea i nei amioga, o le a latou lē mauaina faamanuiaga na folafolaina. Ma i le lalolagi fou, so o se tasi e taumafai ina ia tumau i ia faiga o le a vave lava ona faaumatia, i le oti faalua e aunoa ma se faamoemoe e toe faatūina.​—Isaia 65:20.

15. O ai ua matilatila i le avea ma ē manumalo, faatasi ai ma le ā le vaaiga ua aumaia e le Faaaliga i se tumutumuga mataʻina?

¹⁵ E matilatila le Tamaʻi Mamoe, o Iesu Keriso, ma lana faatoʻānofotane le 144,000, le Ierusalema Fou i le avea ma ē manumalo. Maʻeu la le fetaui o le tatau ona aumaia o le Faaaliga i se tumutumuga mataʻina, e ala i se vaaiga matagofie ma le maofa ai e faatatau i le Ierusalema Fou! Ua faamatalaina nei e Ioane le toe vaaiga mulimuli e tasi.

[Fesili mo le Suʻesuʻega]

 [Ata i le itulau 302]

I le lalolagi fou, o le a iai galuega ma mafutaga faaleuso e olioli ai tagata uma