I NISI taimi, e faia ai e Ieova se mea uiga ese e puipuia ai i latou e laiti, auā e lē mafai ona latou puipuia i latou lava. A faapea e te savalivali i se aso i fafo o le tou fale, e te ono vaaia ai se tasi o auala e faia ai e Ieova lenei mea. Ae atonu e lē faigofie ona e malamalama i le mea moni o tupu.

O loo e vaai atu i se manulele o paʻū ifo i le eleele, e latalata ane iā te oe. E foliga mai ua lavea si manulele. O loo taumafai e alu ma toso si ona apaʻau, a o e savali atu i ai. A o e taumafai atu e puʻe, ae atili ai ona televave ese atu ma oe. Ona faafuaseʻi lea ona toe lele ese atu. E leai ma se mea o leaga o lona apaʻau! E te iloa le mea a le manulele na fai?—

I tafatafa ane o le mea lea sa faapaʻū ifo iai le manulele, sa iai lana toloaʻi. Sa popole si manulele neʻi e iloa lana toloaʻi ma e faia i ai se mea leaga. Sa faatagā foliga mai la ua lavea ina ia e mulimuli atu ai iā te ia ma e alu ese ai. E te iloa se tasi e mafai ona puipuia i tatou, e pei ona puipuia e le manulele fafine lana toloaʻi?— Ua faatusaina e le Tusi Paia Ieova i se manulele e taʻua o le aeto, o se manulele e fesoasoani i lana toloaʻi.​—Teuteronome 32:11, 12.

 O Iesu o le Alo lea e sili ona pele iā Ieova. A o soifua Iesu i le lagi, na avea o ia ma se agaga malosi e pei o lona Tamā. Na mafai e Iesu ona tausia ia lava. Ae, ina ua fanau mai i le lalolagi o se pepe, e leʻi mafai ona tausia e Iesu ia lava. Na manaʻomia e Iesu le puipuiga.

Ina ia faataunuuina le finagalo o le Atua mo ia i le lalolagi, na manaʻomia ona ola aʻe Iesu e avea o se tagata matua, e lelei atoatoa. Peitaʻi, na taumafai Satani e fasioti Iesu a o leʻi taitai oo ina matua. O le faaoso naunau ia o le tala e faatatau i auala na puipuia ai e Ieova Iesu. E te fia faalogo i ai?—

E leʻi leva ona fanau mai Iesu, ae faia loa e Satani se mea e foliga i se fetu ma faasusulu mai le lagi i le itu i Sasaʻe. Na mulimuli atu tamāloloa e suʻesuʻe i fetu i lenā fetu, ma e mamao tele le mea na agaʻi atu i ai le fetu, seʻia oo i Ierusalema. Na fesili atu tamāloloa nei i tagata, po o fea o le a fanau ai lē o le a avea ma tupu o tagata Iutaia. Ina ua fesili atu i tamāloloa na iloaina le tala a le Tusi Paia, na latou tali mai: “O Peteleema.”​—Mataio 2:1-6.

 Ina ua faalogo Herota le tupu amio leaga i Ierusalema, i tala e uiga i le tupu fou ua fanau mai i Peteleema, o se aai e lata ane, na fai atu ai le tupu i tamāloloa e suʻesuʻe i fetu: ʻIa saʻili i le tama itiiti; pe a outou iloa, ia outou faailoa mai iā te aʻu.’ E te iloa le māfuaaga na fia iloa ai e Herota le mea o iai Iesu?— Ona e loto leaga Herota ma e manaʻo e fasioti Iesu!

O le a faapefea ona puipuia e le Atua lona Alo?— Ina ua taunuu le ʻausuʻesuʻe i fetu i le fale na iai Iesu, na latou ave i ai meaalofa. Mulimuli ane, na lapataʻi e le Atua le ʻausuʻesuʻe i fetu e ala mai i se miti, e aua le toe foʻi iā Herota. O lea na latou ui ai i se isi auala na i lo le toe foʻi atu i Ierusalema. Ina ua iloa e Herota ua toe foʻi le ʻausuʻesuʻe i fetu, na matuā ita ai lava. I lona taumafai e fasioti Iesu, na faatonu ai e Herota e fasioti uma tamaiti e leʻi atoa le lua tausaga, i Peteleema! Peitaʻi, e oo atu i lenā taimi, ua lē o toe iai Iesu i inā.

E te iloa le auala na sola ese ai Iesu?— Ina ua toe foʻi le ʻausuʻesuʻe i fetu, na lapataʻi e Ieova, Iosefa le toʻalua o Maria, ia latou sosola i le nuu mamao i Aikupito. O inā na saogalemu ai Iesu mai le tupu leaga o Herota. I tausaga mulimuli ane ai ina ua toe foʻi Maria, Iosefa ma Iesu mai Aikupito, na toe lapataʻi atu ai foʻi le Atua iā Iosefa. Na taʻu atu i ai e ala i se miti, e ō i Nasareta ona e saogalemu ai Iesu.​—Mataio 2:7-23.

Po ua e iloa la le auala na puipuia ai e Ieova lona Alo?— O ai e te manatu e tai pei o le toloaʻi a le manulele fafine lea na faalafi i le vao, po o Iesu foʻi i le taimi a o laʻitiiti? Faamata e pei oe o  i latou?— E iai foʻi tagata e mananaʻo e fai mea leaga iā te oe. E te iloa tagata na?—

O loo fai mai le Tusi Paia, e pei Satani o se leona feʻai e manaʻo e ʻai i tatou. E faapei ona taulaʻi atu leona i tamaʻi manu, e masani foʻi ona taulaʻi atu Satani ma ana temoni i tamaiti. (1 Peteru 5:8) Ae e sili atu le malosi o Ieova na i lo Satani. E mafai e Ieova ona puipuia lana fanau, pe toe faaleleia se mea leaga na faia e Satani iā i latou.

E te manatua foʻi le Mataupu e 10 o le tusi lenei, o le ā foʻi le mea o loo taumafai Satani ma ana temoni, e uunaʻia i tatou e fai?— Ioe, latou te taumafai e uunaʻia i tatou e faia feusuaʻiga lea e fai mai le Atua e sesē. Peitaʻi, o ai foʻi e faataga ona faia feusuaʻiga?— Ioe, o le fafine ma le tamāloa ua uma ona faaipoipo.

O le mea e faanoanoa ai, e iai tagata matutua e fiafia e faia feusuaʻiga ma tamaiti. O le iʻuga, ua faia ai e tama ma teine amioga lē mamā ia na latou aʻoaʻoina mai tagata matutua na. E amata ai foʻi ona faaaogā e nei tamaiti, o latou totogasā i se auala sesē. O le mea lenā na tupu i aso a la, i le aai o Sotoma. O loo taʻua i le Tusi Paia, na taumafai tagata o lenā aai, o ʻtama atoa ma toeaina,’ e faia feusuaʻiga ma tamāloloa na asiasi atu iā Lota.​—Kenese 19:4, 5.

E pei ona moomia e Iesu le puipuiga, e te moomia foʻi la le puipuiga mai tagata matutua—ma isi foʻi tamaiti—o ē o loo taumafai e faia feusuaʻiga ma oe. E masani ona faauō atu tagata nei iā te oe. Atonu latou te ofoina atu se meaalofa mo oe, pe a e fai atu e te lē taʻuina lava i se isi, mea e latou te mananaʻo e fai faatasi ma oe. Peitaʻi, e ese le leaga o tagata na, e pei lava o Satani ma ana temoni, e pau lava le mea e mananaʻo ai, o le faamalieina o i latou lava. E latou te taumafai la e faamalie i latou lava, e ala i le faia o feusuaʻiga ma tamaiti. E matuā sesē lava lenā mea!

E te iloa le mea atonu latou te faia, ina ia faamalie ai i latou  lava?— Atonu latou te taumafai e milimili lou totogasā. Pe latou te faapapaʻi atu foʻi o latou totogasā i lou totogasā. Peitaʻi, aua lava neʻi e faatagaina so o se tasi, e lotelote pe milimili lou totogasā. E oo lava i sou uso, se tuagane, se tuafafine, o lou tinā po o lou tamā. E matuā faasā ona tago se tagata i lou totogasā.

O le ā le auala e te puipuia ai lou tino mai tagata fai mea leaga faapena?— Muamua lava, aua neʻi e faatagaina se tagata e taaloalo i lou totogasā. A faapea e taumafai se tasi e taaloalo ai, fai i ai ma le leotele: “Aua! O le a ou taʻuina oe!” A faapea mai le tagata, o oe e tuuaʻi i le mea na tupu, aua e te talitonu i ai. E pepelo lenā tala. Alu e taʻu lana mea na fai, e tusa lava po o ai le tagata lenā! Alu pea e taʻu tusa lava pe fai atu e nanā le lua mea na fai ma e na o oulua e tatau ona iloa. Po o le ā lava le faapea atu o lenā tagata e na te avatu ni meaalofa mananaia mo oe, pe faafefe atu foʻi, e tatau pea ona e tamoʻe vave ese ma e alu e taʻu lenā tagata.

E lē tatau ona e fefe fua, ae e tatau ona e faaeteete. A faapea e lapataʻi atu ou mātua e te faaeteete i se tagata po o se nofoaga e ono tupu ai se mea leaga iā te oe, e tatau ona e faalogo i ou mātua. Afai e te faalogo i ou mātua, e leai la se avanoa e faia ai e se tagata amio leaga se mea leaga iā te oe.