O AI na fiafia i le taimi na fai ai e Saulo mea leaga?— O Satani le Tiapolo. Ae na fiafia ai foʻi taʻitaʻi lotu Iutaia. Peitaʻi, ina ua avea Saulo ma soo o le Faiaʻoga Sili ma ua igoa iā Paulo, na amata ai ona feita taʻitaʻi lotu iā te ia. Pe e te malamalama la i le māfuaaga e faigatā ai mo soo o Iesu ona latou fai le mea lelei?—

Na faatonuina e le ositaulaga sili o Anania tamāloloa e fetagofi e tuʻi le gutu o Paulo. Na taumafai foʻi Anania e tuu Paulo i le falepuipui. E tele faafitauli na oo iā Paulo ina ua avea ma soo o Iesu. O se faataʻitaʻiga, na fasi o ia e tagata leaga ma na latou tauʻaia Paulo i maa ina ia oti ai.​—Galuega 23:1, 2; 2 Korinito 11:24, 25.

E toʻatele tagata e taumafai e uunaʻia i tatou ina ia faia mea e lē fiafia i ai le Atua. Seʻi mafaufau i fesili nei: E te manaʻo moni lava e fai le mea lelei? Pe e te fiafia e fai le mea lelei, e tusa lava pe feita ai tagata iā te oe? E manaʻomia la ona e loto tele, a ea?—

 Atonu e te tau manatu, ʻAiseā e feita ai tagata pe a tatou faia mea lelei? Pe e lē tatau ea ona latou fiafia?’ E tatau ona fiafia pe a fai e se tasi le mea lelei. Na masani ona fiafia tagata iā Iesu ona o mea lelei na ia faia. I se isi aso, na potopoto ai tagata o se aai i le faitotoʻa o le fale na nofo ai Iesu. Na latou ō mai auā na faamālōlōina e Iesu tagata mamaʻi.​—Mareko 1:33.

Peitaʻi, e iai taimi e leʻi fiafia ai tagata i mea na aʻoaʻo atu e Iesu. E ui lava na aʻoaʻo atu e Iesu le mea moni i taimi uma, ae na matuā lē fiafia isi tagata iā Iesu ona o le tautala i le mea moni. Na tupu lenā mea i se tasi aso i Nasareta, i le aai na ola aʻe ai Iesu. Na alu atu Iesu i le sunako, o se nofoaga na potopoto ai tagata Iutaia ina ia tapuaʻi i le Atua.

 Na fai e Iesu se lauga matagofie faale-Tusi Paia i le sunako. Na fiafia tagata i le taimi muamua. Na ofo tagata i le matagofie o upu na fetalai ai Iesu. O le mea e ofo ai, ona o lenei alii na latou ola faatasi aʻe lava i lo latou aai.

Peitaʻi, na iai se isi mea na taʻu atu e Iesu. Na faamatalaina e Iesu le taimi na fiafia faapitoa ai le Atua i tagata e lē o ni Iutaia. Ina ua fai atu le tala lenā a Iesu, na feita ai tagata sa i le sunako. E te iloa le māfuaaga?— Na manatu tagata nei, e na o i latou e fiafia faapitoa i ai le Atua. O lo latou manatu, o latou lava e sili na i lo isi tagata. Na latou feita la iā Iesu, ona o lana tala na fai. E te iloa la le mea na latou taumafai e fai iā Iesu?—

Ua fai mai le Tusi Paia: ʻUa fetagofi iā Iesu ma tuli i tua o le aai. Ua taʻitaʻi iā te ia i le tofē o le mauga, ina ia latou faatītō iā te ia, ma oti ai! Peitaʻi, na sola ese Iesu.’​—Luka 4:16-30.

Ana faapea o oe lea e tupu ai le mea lenā, pe e te toe foʻi e talanoa atu i na tagata e uiga i le Atua?— E tatau la ona e loto tele, a ea?— Peitaʻi, na toe foʻi Iesu i Nasareta ina ua mavae le tausaga. Ua taʻu mai e le Tusi Paia: “Ona aʻoaʻo atu ai lea o ia iā te i latou i lo latou sunako.” E leʻi taofia ai le talanoa atu o Iesu i le upu moni, ona o lona fefe i tagata e leai so latou alofa i le Atua.​—Mataio 13:54.

I se isi aso Sapati, na faatasi ai Iesu ma se tamāloa e pē lona lima, i se tasi o nofoaga. Na tuuina e le Atua le mana iā Iesu e faamālōlō ai lenā tamāloa. Ae na taumafai nisi o tamāloloa na iai i inā, e faavevesi iā Iesu. O le ā le mea o le a fai e le Faiaʻoga Sili?— Muamua lava, na fesili atu Iesu: ʻA faapea e iai sau mamoe e paʻū i se pū i se aso Sapati, pe e te tago e avaʻe i luga?’

Ioe, e mafai ona latou aveina aʻe i luga se mamoe e ui o le aso Sapati, lea e tatau ona latou mālōlō ai. Ona faapea atu lea o Iesu:  ʻE sili atu le fesoasoani i se tamāloa i le Sapati, auā e tāua atu le tamāloa i lo le mamoe.’ Na matuā manino la, sa tatau iā Iesu ona fesoasoani i lenei tamāloa e ala i le faamālōlōina o lona lima!

Na faapea atu Iesu i le tamāloa e faaloaloa lona lima. Na vave lava ona lelei le lima o le tamāloa. Faauta i le fiafia o le tamāloa! Ae faapefea isi tamāloloa? Faamata na latou fiafia?— E leai. Ua atili ai ona feita iā Iesu. Ua ō nei ma fai a latou fuafuaga e fasioti Iesu!​—Mataio 12:9-14.

E faapena foʻi aso nei. E tusa lava po o le ā le tele o a tatou mea lelei e fai, ae e lē mafai ona tatou faafiafiaina tagata uma. O lea la, e tatau ona tatou filifili po o ai tatou te mananaʻo moni e faafiafia. Afai tatou te mananaʻo e faafiafia Ieova le Atua ma lona Alo o Iesu Keriso, e tatau la ona tatou faia i taimi uma mea ua la aʻoaʻoina mai. Afai tatou te faia lenā mea, o ai o le a feita mai iā i tatou? O ai o le a taumafai e faafaigatā lo tatou faia o mea lelei?—

O Satani le Tiapolo. O ai ma isi?— O ē o loo faasesēina e Satani ina ia talitonu i aʻoaʻoga sesē. Na faapea atu Iesu i taʻitaʻi lotu i ona aso: “O outou nai lo outou tamā le tiapolo, tou te fia faia foʻi mea e tuʻinanau i ai lo outou tamā.”​—Ioane 8:44.

E toʻatele tagata e fiafia i ai le Tiapolo. Na taʻua e Iesu tagata na o “le lalolagi.” O le ā sou manatu, o le ā le uiga o le tala a Iesu o “le lalolagi” i latou?— Seʻi o tatou vaai i le Ioane mataupu e 15, fuaiupu e 19. E mafai ona tatou faitau i upu nei a Iesu e faapea: “Afai a ni tagata o le lalolagi outou, po ua alofa mai le lalolagi i ona tagata; ae e lē ni o le lalolagi outou, a ua ou filifilia outou nai le lalolagi, o le mea lea e ʻinoʻino ai le lalolagi iā te outou.”

O lea la, o le lalolagi lea e ʻinoʻino i soo o Iesu, o tagata uma e lē o mulimuli atu iā te ia. Aiseā ua ʻinoʻino ai le lalolagi i soo o Iesu?— Seʻi mafaufau i le mea lenei. O ai le pule o le lalolagi?—  Ua taʻu mai e le Tusi Paia: ʻA o le lalolagi uma o loo nofo toʻilalo i lē o loo leaga.’ O lē o loo leaga, o Satani le Tiapolo.​—1 Ioane 5:19.

Po ua e iloa la le māfuaaga e faigatā tele ai ona fai le mea saʻo?— O loo faafaigatā e Satani ma lana lalolagi, le faia o mea lelei. Peitaʻi, e iai foʻi se isi māfuaaga. E te manatua lea māfuaaga?— Na tatou aʻoaʻoina i le Mataupu e 23 o le tusi lenei, na tatou fananau uma mai ma le agasala. Pe lē o se mea e fiafia ai pe a lē toe iai le agasala, le Tiapolo ma lana lalolagi?—

Ua folafola mai e le Tusi Paia: “E mavae atu foʻi le lalolagi.” O le uiga o lenei mea, o le a lē toe iai i latou e lē o mulimuli i le Faiaʻoga Sili. E lē faatagaina i latou e ola e faavavau. Pe e te iloa la, o ai o le a ola e faavavau?— Ua faapea mai le Tusi Paia: “O lē fai le finagalo o le Atua, e tumau lea e faavavau.” (1 Ioane 2:17) Ioe, na o i latou e fai mea lelei, o ē o loo faia “le finagalo o le Atua,” e ola e faavavau i le lalolagi fou a le Atua. Po o le ā lava la le faigatā, ae tatou te mananaʻo pea e fai le mea lelei, a ea?—