O LE ā sou manatu, o ai le tamaitiiti i le lalolagi na sili ona fiafia i ai Ieova?— O lona Alo, o Iesu. Seʻi o tatou talanoa i mea na faia e Iesu e faafiafia ai lona Tamā.

E pe a ma le tolu aso e malaga ai se tasi mai le nuu na iai Iesu ona taunuu lea i Ierusalema, le aai sa iai le malumalu matagofie o Ieova. Na taʻua e Iesu le malumalu o “le fale o loʻu Tamā.” I tausaga taʻitasi, e ō ai le aiga o Iesu i inā ina ia auai i le Paseka.

I se tasi tausaga ina ua 12 tausaga o Iesu, na toe foʻi ai lona aiga ina ua uma le Paseka. Ina ua mālōlō i le pō, na faatoʻā iloa ai e lona aiga latou te lē o malaga faatasi ma Iesu auā e lē o faatasi o ia ma aiga ma uō. O lea na toe foʻi ai loa Maria ma Iosefa i Ierusalema i le pō lava lenā, e suʻe mai Iesu. O le ā sou manatu, o fea na iai Iesu?—

Na la maua atu Iesu i le malumalu. O loo faalogologo Iesu i le ʻauaʻoaʻo, ma o loo fai atu ana fesili iā i latou. Na mafai e Iesu ona tali uma a latou fesili. Ua latou ofo i le poto o Iesu. Ua e iloa la le māfuaaga na fiafia ai le Atua i lona Atalii?—

Na matuā fiafia Maria ma Iosefa ina ua maua Iesu. Peitaʻi, e leai ma se popole o Iesu. Na iloa e Iesu, e leai se mea e oo iā te ia pe a iai i le malumalu. O lea na faapea atu ai: “Lua te lē iloa ea e tatau ona ou i le fale o loʻu Tamā?” Sa iloa e Iesu o le malumalu o le fale lenā o le Atua, ma e fiafia tele e alu i ai.

Na toe foʻi faatasi Maria, Iosefa ma Iesu i Nasareta, ma e 12 tausaga o Iesu i le taimi lenā. O le ā sou manatu, na faapeʻī le amio a Iesu i ona mātua?— Ua fai mai le Tusi Paia “ua anaana o ia iā te  i laʻua.” O le ā le uiga o lenā mea?— O lona uiga, na usiusitai Iesu iā i laʻua. Ioe, na faia e Iesu mea na faatonu ai o ia e ona mātua, e aofia ai le faia o feʻau e pei o le laʻu mai o vai mai le vaieli.​—Luka 2:41-52.

Seʻi manatu i lenei mea: E ui lava e lelei atoatoa Iesu, peitaʻi, na usitai pea i ona mātua lē lelei atoatoa. Pe na fiafia le Atua i lenā mea?— Ioe, talu ai o loo faatonuina tamaiti e le Tusi Paia: “Ia outou faalogo i o outou mātua.” (Efeso 6:1) E te faafiafiaina foʻi le Atua pe afai e te faalogo i ou mātua, e pei o Iesu.

O se isi auala e te faafiafiaina ai le Atua, o le taʻu atu lea i tagata o tala e uiga iā te ia. Ua faapea mai isi e lē tatau i tamaiti ona latou faia lenā mea. Peitaʻi, ina ua taumafai tagata e vavao tamaiti mai le talanoa e uiga i le Atua, na fai atu Iesu: ʻTou te leʻi faitau ea, Ua saunia e le Atua le viiga mai gutu o tamaiti?’ (Mataio 21:16) E mafai la e i tatou uma lava ona taʻu atu i isi tala e uiga iā Ieova, faapea o  ia o se Atua e maoaʻe lona lelei, pe a tatou mananaʻo moni e fai. E tatou te faafiafiaina le Atua pe a tatou faia faapea.

O fea tatou te aʻoaʻoina ai tala e uiga i le Atua, lea e mafai ona tatou talanoa atu ai i isi?— E maua i le suʻesuʻeina o le Tusi Paia i o tatou aiga. Peitaʻi, e tele atu mea tatou te aʻoaʻoina i le nofoaga e suʻesuʻe faatasi ai tagata o le Atua. Ae e faapefea ona tatou iloa tagata o le Atua?—

O ā mea e fai e tagata i a latou sauniga? Pe latou te aʻoaʻoina moni mea ua fai mai ai le Tusi Paia? Pe latou te faitau ma talatalanoa i le Tusi Paia? O le auala lenā tatou te faalogo ai i le Atua, a ea?— E tatau ona tatou faalogologo i tala ua fetalai mai ai le Atua i sauniga faa-Kerisiano, a ea?— Ae faapefea pe a fai mai tagata, e lē moomia ona tatou usitai fua i mea o fai mai ai le Tusi Paia? O le ā sou manatu, faamata o ni tagata o le Atua tagata na?—

O se isi manatu lenei e mafaufau i ai. Ua fai mai le Tusi Paia, o tagata o le Atua o le a avea o “se nuu mo lona suafa.” (Galuega 15:14) Talu ai o Ieova le suafa o le Atua, e mafai ona tatou fesili atu i tagata, pe latou te tapuaʻi iā Ieova. Afai latou te tali mai e leai, ua tatou iloa la e lē o ni tagata o le Atua i latou. E taʻu atu foʻi e tagata o le Atua, i isi tala e uiga i le Malo o le Atua. E latou te faaalia foʻi lo latou alofa i le Atua, e ala i le usiusitai i ana tulafono.​—1 Ioane 5:3.

Afai e te iloa tagata latou te faia mea uma na, e tatau la ona e ʻaufaatasi ma i latou a o faia la latou tapuaʻiga. E tatau ona e faalogo lelei i sauniga na, ma tali fesili e talanoaina ai. O le mea lenā a Iesu na fai, a o iai i le fale o le Atua. A faapea e te faia mea na, o le a e faafiafiaina le Atua, e pei o Iesu.

Pe e mafai ona e mafaufau i nisi tamaiti o loo taʻua i le Tusi  Paia, o ē na faafiafiaina le Atua?— O se faataʻitaʻiga lelei, o Timoteo. E leʻi talitonu lona tamā iā Ieova. Peitaʻi, na talitonu lona tinā o Eunike atoa ai ma le tinā o lona tinā o Loi. Na faalogo Timoteo iā i laʻua ma na malamalama ai iā Ieova.

Na asiasi Paulo i le aai na iai Timoteo ina ua matua Timoteo. Na mātau e Paulo le sogasogā o Timoteo e auauna iā Ieova. O lea na ia valaaulia ai Timoteo la te ō faatasi ina ia mafai ona tele atu nisi mea e fai e Timoteo e auauna ai i le Atua. So o se nofoaga lava na la malaga i ai, na la taʻu atu i tagata tala i le Malo o le Atua ma tala iā Iesu.​—Galuega 16:1-5; 2 Timoteo 1:5; 3:14, 15.

Peitaʻi, pe na o faataʻitaʻiga sa faia e tama o loo iai i le Tusi Paia, na faafiafiaina ai le Atua?— E leai. Seʻi mafaufau i le tala i se teineitiiti Isaraelu na faafiafiaina le Atua. Na avea Isaraelu ma fili o Suria i le taimi na ola ai le teineitiiti lenei. I se tasi aso, na fetauaʻi ai Suria ma Isaraelu ma ave ai faapagota lenei teineitiiti. Na  auina atu o ia i le fale o le tamāloa e igoa iā Naamanu, o lē na taʻitaʻia le ʻautau. Na auauna ai i inā i le avā a Naamanu.

Na maua Naamanu i le maʻi e taʻua o le lepela. E leʻi mafai e se fomaʻi ona foʻia lona maʻi. Peitaʻi, na talitonu le teineitiiti Isaraelu e mafai e se tasi o perofeta a le Atua ona faamālōlō iā Naamanu. Ae e leʻi auauna Naamanu ma lana avā iā Ieova. Pe e tatau la ona talanoa atu le teineitiiti i le mea ua talitonu i ai? O le ā se mea e te faia pe ana o oe?—

Na faapea atu le teineitiiti: ʻMaʻimau pe ana alu atu Naamanu i le perofeta a Ieova i Isaraelu, semanū e uma ai lona maʻi lepela.’ Na faalogo Naamanu i le teineitiiti, ma alu ai loa i le perofeta a Ieova. Na toe malosi Naamanu ina ua usitai i le faatonuga a le perofeta. O le māfuaaga lenā na tapuaʻi ai Naamanu i le Atua moni.​—2 Tupu 5:1-15.

E te manaʻo e te fesoasoani i se tasi e aʻoaʻoina tala e uiga iā Ieova ma mea e mafai ona faia e Ieova, e pei o le teineitiiti lenā?— O ai e mafai ona e fesoasoani i ai?— Atonu i le taimi muamua, e manatu tagata e latou te lē moomia le fesoasoani. Peitaʻi, e mafai ona e talanoa iā i latou i mea lelei ua faia e Ieova. Atonu latou te faalogo mai. E mafai ona e mautinoa, e faafiafiaina Ieova i mea na.