Mataupu Sefuluiva

Ia Tautala Pea i le Afioga a le Atua ma le Lototele

1. (a) O le ā le tala lelei na folafola atu e soo o Iesu, ae na faapeʻī le tali mai i ai a nisi tagata Iutaia? (e) O ā fesili tatou te ono fesiligia?

I LE toetoe 2,000 tausaga ua mavae, na faauuina ai le Alo o le Atua, o Iesu Keriso, e avea ma Tupu i le lumanaʻi i le lalolagi atoa. Sa fasiotia Iesu ona o uunaʻiga a tagata lotu na feita iā te ia, peitaʻi na toe faatūina o ia e Ieova nai le oti. O Iesu lea ua mafai ai nei ona maua le ola e faavavau. Ae peitaʻi, ina ua folafola atu e soo o Iesu lenei tala lelei i le lautele, sa iai ni sauāga na tulaʻi mai. O nisi o i latou na lafoina i falepuipui, na sasaina ma faatonuina ia aua neʻi toe tautatala e uiga iā Iesu. (Galuega 4:1-3, 17; 5:17, 18, 40) O le ā sa latou faia? O le ā na semanū e te faia? Faamata o le a e faaauau pea ona molimau atu ma le lototele?

2. (a) O le ā le tala ofoofogia e tatau ona folafolaina atu i o tatou aso? (e) O ai o loo iai le tiute tauave ina ia talaʻi atu le tala lelei?

² I le 1914 na faanofotupuina ai i le lagi le Tupu o le Malo o le Atua, o Iesu Keriso, ina ia pule ‘i totonu o e ita ia te ia.’ (Salamo 110:2) Na sosoo ai ma le lafoina ifo o Satani ma ana temoni i le lalolagi. (Faaaliga 12:1-5, 7-12) O lea ua amata aso e gata ai o lenei faiga leaga o mea. Pe a iʻu lenei vaitaimi, ona tuʻimomomoina lea e le Atua le faiga o mea aoao a Satani. (Tanielu 2:44; Mataio 24:21) O le a maua e i latou e faasaoina le faamoemoe, ina ia ola e faavavau i luga o le lalolagi lea o le a avea ma parataiso. Pe  afai ua e taliaina lenei tala lelei, o le a e manaʻo la e talaʻi atu i isi. (Mataio 24:14) Ae o le ā se tali mai e te faatalitalia?

3. (a) E faapefea ona tali mai tagata i le feʻau o le Malo? (e) O le ā le fesili e ao ona tatou fesagaʻia?

³ Pe a e folafola atu le tala lelei o le Malo, atonu e talilelei mai e nisi tagata, ae o le toʻatele lava o le a faalēano mai. (Mataio 24:37-39) O nisi atonu e faatauemu pe tetee mai iā te oe. Na lapataʻi mai Iesu e faapea, e ono tetee mai ou lava tauaiga. (Luka 21:16-19) Atonu foʻi e ala mai i lau galuega, po o le aʻoga. I nisi vaega o le lalolagi, o loo fesagaʻi ai Molimau a Ieova ma faasāsāga a faigāmalo. Pe a fesagaʻi ma ni tulaga faapena, po o le a faaauau pea ona e tautala i le afioga a le Atua ma le lototele ma “tumau i le faatuatua”?—1 Korinito 16:13.

Ia Lē Faalagolago i so Tatou Lava Malosi

4. (a) Ina ia faamaonia o i tatou o auauna faamaoni a le Atua, o le ā le mea autū e manaʻomia? (e) Aiseā e tāua tele ai sauniga faa-Kerisiano?

⁴ E manaʻomia tele e se auauna faamaoni a Ieova ona faalagolago atu i ana sauniuniga. O se tasi o nei sauniuniga, o sauniga a le faapotopotoga. Ua timaʻia i tatou e le Tusi Paia ina ia aua neʻi lafoaʻia le auai i sauniga. (Eperu 10:23-25) O i latou o loo faaauau ona avea ma molimau faamaoni a Ieova, ua faamalolosi e auai e lē aunoa i sauniga faatasi ma isi o latou uso tapuaʻi. O sauniga nei o loo faateleina ai lo tatou poto i le Tusi Paia. E lē gata i lea, e faateleina ai lo tatou malamalama i upu moni ua iloa lelei, ma atili ai ona tatou nofouta i auala e faaaogā ai na upu moni. E atili ai ona māfana la tatou mafutaga ma o tatou uso Kerisiano i la tatou tapuaʻiga autasi, ma faalaeiauina ai i tatou e faia le finagalo o le Atua. Ua saunia e le agaga o Ieova taʻiala e ala mai i le faapotopotoga,  ma e ala i lenā agaga, ua mafai ai ona faatasi Iesu ma i tatou.—Mataio 18:20; Faaaliga 3:6.

5. O ā ni faatulagaga ua faia e Molimau a Ieova mo a latou sauniga pe a faasāina la latou galuega?

⁵ Po o e auai e lē aunoa i sauniga uma, ma po o e faatatauina ea iā te oe lava mea o loo talanoaina ai? I nisi taimi, pe a faasāina le galuega a Molimau a Ieova, e manaʻomia ona faia sauniga i ni vaega toʻalaiti i fale o aiga. Atonu e fesuisuiaʻi nofoaga ma taimi e fai ai, ma atonu e lē o taimi uma e talafeagai ai ma tulaga o se tasi, o nisi sauniga ua faia i le leva o le pō. Peitaʻi e ui i ni tulaga e lē talafeagai ma tulaga totino o se tasi pe fesagaʻi ai foʻi ma ni lamatiaga, ae o loo faia lava e uso ma tuafāfine faamaoni ni taumafaiga filigā, ina ia auai atu i sauniga taʻitasi.

6. E faapefea ona tatou faaalia lo tatou faalagolago atu iā Ieova, ma e fesoasoani faapefea lenei mea iā i tatou ina ia tautala ai pea ma le lototele?

⁶ Ua faatuputeleina le faalagolago atu iā Ieova e ala i le saʻili pea e lē aunoa iā te ia i ni tatalo faamaoni, i le iloaina e tatou te manaʻomia le fesoasoani a le Atua. Pe e te faia lenā mea? Sa tatalo pea lava pea Iesu a o faagasolo lana faiva i le lalolagi. (Luka 3:21; 6:12, 13; 22:39-44) Ma i le pō ae malama le aso o lona faasatauroina, na ia faalaeiauina ai ona soo: “Ina mataala ia, ma tatalo, neʻi oo mai le faaosoosoga ia te outou.” (Mareko 14:38) Pe a tatou fetaiaʻi ma uiga faalēano mai i le feʻau o le Malo, e ono oso aʻe iā i tatou se manatu ina ia tatou faifaiaga i la tatou faiva. Pe afai e tauemua i tatou e tagata pe sauāina i tatou ona o la tatou talaʻiga, atonu e oso ane se manatu e aua loa le toe faia, ina ia ʻalofia ai faafitauli. Peitaʻi, afai tatou te tatalo naunautaʻi mo le agaga o le Atua ina ia fesoasoani mai iā i tatou e tautala ai pea ma le lototele, o le a leoleomaluina ai i tatou mai le lolo atu i na manatu.—Luka 11:13; Efeso 6:18-20.

 Se Tala Faamaumauina o le Molimau Atu ma le Lototele

7. (a) Aiseā tatou te naunau faapitoa ai i le tala o loo faamauina i le Galuega? (e) Tali fesili o loo i le faaiʻuga o lenei palakalafa, e faamamafa ai le auala e mafai ona aogā ai iā i tatou nei faamatalaga.

⁷ E faapitoa lo tatou naunau uma atu i le tala o loo faamauina i le tusi o Galuega. O loo taʻu mai ai le auala na mafai ai e aposetolo ma isi uluaʻi soo—o tagata sa iai o latou faalogona e pei foʻi o i tatou—ona foʻia toʻatugā ma faamaonia mai, o i latou o ni molimau lototetele ma le faamaoni a Ieova. Seʻi o tatou iloilo se vaega o lenā tala faamaumauina, e ala i le faaaogāina o fesili ma mau faasino o loo mulimuli mai. A o tatou faia faapea, seʻi manatu i se auala e mafai ona aogā patino ai iā te oe mea o loo e faitauina.

Pe na maualuluga ni aʻoaʻoga a le ʻauaposetolo? Pe o i latou o ni tagata na feola mai lava e lē fefefe e tusa po o le ā se mea e tupu? (Ioane 18:17, 25-27; 20:19; Galuega 4:13)

O le ā na mafai ai e Peteru ona tautala ma le lototele i luma o le faamasinoga a Iutaia, lea na faasalaina ai le Alo o le Atua? (Mataio 10:19, 20; Galuega 4:8)

O le ā na faia e le ʻauaposetolo i vaiaso a o leʻi tuuina atu i latou i luma o le ʻau Saniterini? (Galuega 1:14; 2:1, 42)

Ina ua avatu e pule le poloaʻiga i le ʻauaposetolo e aua neʻi toe talaʻi atu i le suafa o Iesu, na faapefea ona tali mai i ai Peteru ma Ioane? (Galuega 4:19, 20)

Ina ua toe tatala mai i latou, o ai na toe saʻili atu i ai le ʻauaposetolo mo se fesoasoani? Pe sa latou tatalo atu ea ina ia taofia sauāga, po o le ā? (Galuega 4:24-31)

 O le ā le auala na faaaogāina e Ieova e saunia mai ai se fesoasoani, ina ua taumafai tagata tetee e taofia le galuega talaʻi? (Galuega 5:17-20)

Na faaalia faapefea e le ʻauaposetolo, sa latou malamalama i le pogai na mafai ai ona laveaʻia i latou? (Galuega 5:21, 41, 42)

E ui lava sa taape solo le toʻatele o le ʻausoo ona o sauāga, ae o le ā sa faaauau pea ona latou faia? (Galuega 8:3, 4; 11:19-21)

8. O ā iʻuga faafiafia loto na maua mai i le faiva a uluaʻi soo, ma ua faapefea ona tatou aafia ai?

⁸ Sa leʻi maʻimau la latou galuega o le talaʻia o le tala lelei. E tusa ma le 3,000 soo na papatisoina i le Penetekoso o le 33 T.A. “Ua . . . faaopoopoina i le Alii e ua faatuatua, e toatele o tane atoa ma fafine.” (Galuega 2:41; 4:4; 5:14, LF) Mulimuli ane, e oo lava i sē na faasauā i tagata o le Atua, o Saulo lea o Taso, na iʻu ina avea ma Kerisiano ma amata ona ia molimau atu ma le lototele i le upu moni. Mulimuli ane sa lauiloa o ia o le aposetolo o Paulo. (Kalatia 1:22-24) E leʻi muta le galuega na amata mai i le uluaʻi senituri. Ua matuā uluola lava i nei aso e gata ai, ma ua oo atu i tuluʻiga uma o le lalolagi. Ua faaeaina i tatou e faia ai so tatou sao, ma a o tatou faia faapea, e mafai ona tatou aʻoaʻoina mai ai i le faaaʻoaʻoga na faataatia e molimau faamaoni, o ē na auauna e muamua atu iā i tatou.

9. (a) O ā avanoa sa faaaogā e Paulo e talaʻi atu ai? (e) O ā auala e te folafola atu ai i isi le feʻau o le Malo?

⁹ Ina ua aʻoaʻoina e Paulo le upu moni e uiga iā Iesu Keriso, o le ā na ia faia? “Ona talaʻi loa lea e ia . . . o Iesu, ua faapea atu, ‘O ia lava o le Alo o le Atua.’” (Galuega 9:20, LF) Sa ia talisapaia le alofa tunoa o le Atua iā te ia, ma na  ia iloa ai e manaʻomia e tagata uma le tala lelei lea sa ia mauaina. O Paulo o se tagata Iutaia, ma e tusa ai ma le tū masani i na taimi, sa ia alu atu i sunako ina ia molimau atu ai. Sa ia talaʻi foʻi mai lea fale i lea fale, ma felafolafoaʻi ma le manino ma tagata i malae. Ma sa ia lotomalie e agaʻi atu i oganuu fou ina ia talaʻi atu i ai le tala lelei.—Galuega 17:17; 20:20; Roma 15:23, 24.

10. (a) Na faapefea ona faaalia e Paulo, e ui sa lototele o ia, ae na faautauta foʻi i le auala na molimau atu ai? (e) E mafai faapefea ona tatou faaalia atu uiga o Paulo, a o molimau atu i tauaiga, i ē faigaluega faatasi, pe aʻoʻoga faatasi?

¹⁰ Sa lototele Paulo, ae sa faautauta foʻi, e pei ona tatau ona tatou faia. Sa ia talanoa atu i tagata Iutaia e tusa ai o folafolaga na faia e le Atua i o latou augātamā. I tagata Eleni, sa ia talanoa atu i ai e tusa o mea sa latou masani ai. O nisi taimi sa ia faaaogā mea na oo tonu iā te ia a o aʻoaʻoina le upu moni, e fai ma ana auala e molimau atu ai. Na ia faapea atu: “Ou te faia foi le mea nei ona o le tala lelei, ina ia ou auai i ona faamanuiaga.”—1 Korinito 9:20-23, LF; Galuega 22:3-21.

11. (a) O le ā na faia e Paulo e ʻalofia ai le faataututū soo ma ē na tetee ane iā te ia? (e) O afea tatou te ono faataʻitaʻia ai ma le atamai le faaaʻoaʻoga a Paulo, ma e faapefea? (i) O fea e maua mai ai le malosi ina ia tautala atu ai pea ma le lototele?

¹¹ Ina ua avea teteega ma itu na foliga ai sa sili atu ona lelei mo Paulo le talaʻi i se isi vaipanoa mo sina taimi, sa ia faia loa faapena i lo le taumafai e faataututū soo ma ē na tetee ane iā te ia. (Galuega 14:5-7; 18:5-7; Roma 12:18) Peitaʻi sa lē taitai ona mā o ia i le tala lelei. (Roma 1:16) E ui sa lē fiafia Paulo i faiga faamaualuluga ma faiga sauā sa fai ane e tagata tetee, ae sa ia “loto tele ona o lo tatou Atua” ina ia talaʻi ai pea. Na ia faapea mai: “Sa ia te au le Alii, ma na faamalosi mai ia te au, ina ia faaatoatoaina e  aʻu le talaʻiga.” (1 Tesalonia 2:2; 2 Timoteo 4:17) O loo faaauau pea e le Ulu o le faapotopotoga Kerisiano, o Iesu, ona foaʻi mai le malosi o loo tatou manaʻomia e fai ai le galuega na ia valoia maia mo o tatou aso.—Mareko 13:10.

12. O le ā ua fai ma faamaoniga o le lototele faa-Kerisiano, ma o le ā ua faavae aʻe ai lea lototele?

¹² Ua iā i tatou māfuaaga uma e faaauau ai pea ona tautala ma le lototele i le afioga a le Atua, e pei lava ona sa faia e Iesu ma isi auauna faamaoni a le Atua i le uluaʻi senituri. E lē faapea o le a faia ai e aunoa ma se magafagafa, pe taumafai e uunaʻi faamalosi le feʻau iā i latou e lē o mananaʻo ai. Peitaʻi e tatou te lē faavaivai ona o uiga faalēano mai o tagata; e lē taofia foʻi la tatou galuega ona o teteega. I le pei o Iesu, e tatou te faasino atu i le Malo o le Atua ua na o lea le faigāmalo saʻo mo le lalolagi atoa. E tatou te tautatala atu ma le mautinoa auā o loo fai i tatou ma sui o Ieova, le Pule Silisili Ese Aoao, ma e talu ai o le feʻau o loo tatou folafola atu e lē mai iā i tatou, ae mai iā te ia. Ma e tatau ona avea lo tatou alofa mo Ieova, o le uunaʻiga e sili ona malosi mo le viviiina o ia.—Filipi 1:27, 28; 1 Tesalonia 2:13.

Talanoaga Autalu

• Aiseā e tāua ai ona folafola atu le feʻau o le Malo i tagata uma e mafai ai, ae o ā uiga e mafai ona tatou faatalitalia o le a faaalia mai?

• E mafai faapefea ona tatou faaalia, e tatou te lē o faalagolago i so tatou lava malosi ina ia auauna ai iā Ieova?

• O ā lesona aogā ua tatou aʻoaʻoina mai le tusi o Galuega?

[Fesili mo le Suʻesuʻega]

 [Ata i le itulau 173]

E pei ona sa faia i le taimi ua tuanaʻi, ua faapena foʻi i aso nei ona tautatala auauna a Ieova i le afioga a le Atua ma le lototele