Mataupu Muamua

Le Autasi Faaletapuaʻiga i o Tatou Taimi—O le ā le Uiga?

1, 2. (a) O le ā se gaoioiga mataʻina o loo tupu i o tatou taimi? (e) O le ā le faamoemoe ofoofogia ua maua e tagata loto faamaoni?

I LE lalolagi atoa, e iai se gaoioiga mataʻina ua faia mo le autasi faaletapuaʻiga. O loo autasia ai le faitau miliona o tagata o atunuu uma, ituaiga ma gagana. E toʻatele nisi o loo aoaoina pea i tausaga taʻitasi. Ua mātauliaina i le Tusi Paia i latou nei o “molimau” a Ieova, ma ua taʻua o “le motu o tagata e toatele.” O loo latou ‘auauna atu i le Atua i le ao ma le po.’ (Isaia 43:10-12; Faaaliga 7:9-15) Aiseā ua latou faia ai lenei mea? Talu ai ua latou iloa, o Ieova o le Atua moni lea e toʻatasi. Ona latou mananaʻo ai lea ia faaōgatusa o latou olaga ma ana tapulaa amiotonu. Ua latou aʻoaʻoina foʻi e faapea, o loo tatou ola nei i “aso e gata ai” o lenei lalolagi amioleaga, ua toeitiiti nei ona faaumatia lea e le Atua, ma o le a ia suia i lana lalolagi fou faaparataisoina.—2 Timoteo 3:1-5, 13; 2 Peteru 3:10-13.

² Ua folafola mai e le Afioga a le Atua: “E toe itiiti, ona leai lea o le tagata amio leaga . . . A o e agamalu, e fai mo latou le nuu; e faafiafia foi i latou ia te i latou ona o le manuia e tele.” (Salamo 37:10, 11) “E fai lava le nuu mo tagata amiotonu, e nonofo ai pea i latou.” (Salamo 37:29) “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue,  e leai foi se toe puapuaga; auā ua mavae atu mea muamua.”—Faaaliga 21:4.

3. Ua faapefea ona ausia le autasi moni faaletapuaʻiga?

³ O i latou ua autasia nei i le tapuaʻiga moni ua avea ma uluaʻi tagata o le a nofoia lenā lalolagi fou. Ua latou aʻoaʻoina le finagalo o le Atua, ma o loo latou faia i le mea sili ona lelei e oo i ai lo latou mafai. Sa faaalia e Iesu le tāua o le faia faapea ina ua ia fetalai: “O le ola e faavavau foi lenei ia latou iloa [“mauaina pea o le poto e uiga iā te,” NW] oe le Atua moni e toatasi.” (Ioane 17:3) Na tusia e le aposetolo o Ioane e faapea: “E mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”—1 Ioane 2:17.

Le Mea e Uiga Moni i Ai

4. (a) O le ā e uiga moni i ai le aoaoina o tagata e toʻatele i le tapuaʻiga autasi i o tatou taimi? (e) Ua faapefea ona faamatalaina e le Tusi Paia lenei aoaoina?

⁴ O le ā e uiga moni i ai le aoaoina o tagata e toʻatele i le tapuaʻiga autasi i o tatou taimi? O se faamaoniga manino lea o lo tatou matuā tulata atu i le iʻuga o lenei lalolagi amioleaga, ae sosoo mai ai loa ma le amataga o le lalolagi fou a le Atua pe a uma lenā faaumatiaga. Ua tatou vaaitino i le faataunuuga o valoaga a le Tusi Paia lea na valoia mai ai lenei aoaoina mataʻina. Ua taʻua e se tasi o na valoaga e faapea: “O aso e gata ai [aso nei e gata ai] e oo ina faatumauina ai le mauga o i ai le fale o Ieova [lana tapuaʻiga moni ua faamamaluina] i tumutumu o mauga [e sili aʻe i se isi ituaiga o tapuaʻiga], . . . ona gasolo ane lea o nuu i ai. E o mai lava nuu ese [“atunuu,” NW] e tele, ma latou faapea ane, O mai ia, tatou o ae ia i le mauga o Ieova, o le fale foi o le Atua o Iakopo; e aʻoaʻo mai ai o ia ia te i tatou i ona ala, ona tatou savavali ai lea i ona ala.”—Mika 4:1, 2; Salamo 37:34.

5, 6. (a) Ua moni faapefea le manatu o loo liliu atu atunuu iā Ieova? (e) O ā fesili e ao ona tatou fesiligia ai i tatou lava?

 ⁵ E ui e lē o atunuu atoa o loo gasolo atu i le maota faaleagaga o Ieova mo le tapuaʻiga, ae e faitau miliona tagata taʻitoʻatasi mai atunuu uma o loo latou faia faapea. A o latou aʻoaʻoina fuafuaga alofa ma uiga lelei o Ieova le Atua, ua matuā pāʻia ai o latou loto. E latou te saʻili ma le lotomaulalo ina ia iloa po o ā mea o loo faafinagaloina e le Atua mai iā i latou. Ua pei a latou tatalo o le tatalo a le faisalamo o lē na faapea atu: “Ia e aʻoaʻo mai ia te au e fai lou finagalo; auā o oe lava loʻu Atua.”—Salamo 143:10.

⁶ Po o e iloa atu ai oe i lea motu o tagata e toʻatele, o loo faapotopoto mai nei e Ieova i totonu o se tapuaʻiga autasi? Po o faaalia ea i lau tali atu i faatonuga ua e maua mai lana Afioga e faapea, e te ioe moni lava o Ieova o le Puna o na faatonuga? O le ā le tele o le a e ‘savali ai i ona ala’?

Le Auala ua Faataunuuina Ai

7. (a) O le ā le mamao e iʻu ina faataulauina ai le autasia faaletapuaʻiga? (e) Aiseā ua faanatinati ai le avea ma se tagata tapuaʻi a Ieova i le taimi nei, ma e mafai faapefea ona tatou fesoasoani i isi ina ia faia lenā mea?

⁷ O le fuafuaga a Ieova mo foafoaga uma e iai o latou mafaufau, ina ia autasia i le tapuaʻiga moni. Maʻeu so tatou moomoo mo le aso o le a tapuaʻia ai e i latou uma o loo feola, le Atua moni e toʻatasi! (Salamo 103:19-22) Peitaʻi a o leʻi tupu lenā mea, e ao ona tafiesea e Ieova i latou uma o loo mumusu e faia lona finagalo amiotonu. Ona o lona alofa mutimutivale, ua ia muaʻi lapataʻia mai ai le mea o le a ia faia, ina ia maua e tagata i so o se vaipanoa le avanoa e suia ai o latou ala. (Isaia 55:6, 7) O lea la, o loo logo atu ai i o tatou aso “i atunuu uma, ma ituaiga, ma gagana eseese, ma nuu,” lenei faatalauula faanatinati:  “Ia outou matatau i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.” (Faaaliga 14:6, 7) Po ua e taliaina ea lenā valaaulia? Afai ua e taliaina, o lou faaeaga la le valaaulia foʻi o isi ina ia latou iloa ma tapuaʻi atu i le Atua moni.

8. Pe a māeʻa ona aʻoaʻoina aʻoaʻoga faavae o le Tusi Paia, o le ā le agaʻigaʻi atili i luma e ao ona tatou matuā taumafai e fai?

⁸ E lē o le finagalo o Ieova le tapuaʻia o ia e tagata o loo faapea mai e latou te talitonu iā te ia, ae o loo saʻilia pea o latou lava manaʻoga. E finagalo le Atua i tagata ina ia latou ‘iloa lelei lona finagalo’ ma faatinoina i o latou olaga. (Kolose 1:9, 10) O lea la, o tagata lototalisapaia ua aʻoaʻoina aʻoaʻoga faavae o le Tusi Paia, o loo mananaʻo e agaʻigaʻi i le taʻumatuaina faa-Kerisiano. O lo latou faanaunauga ia latou matuā iloa lelei Ieova, ia faalautele ma faaloloto lo latou malamalamaga i lana Afioga, ma ia faatatauina atili i o latou olaga. E latou te taumafai ia faaalia atu uiga o lo tatou Tamā faalelagi, ma manatu i mea e pei ona ia silasila i ai. Ua uunaʻia ai la i latou ina ia saʻili mo auala e faia ai so latou sao i le galuega faasaoola, lea ua ia faatulagaina e faia i le lalolagi i o tatou aso. Po o lou faanaunauga foʻi lenā?—Mareko 13:10; Eperu 5:12–6:3.

9. O ā auala ua mafai ai ona maua le autasi moni i aso nei?

⁹ O loo faaalia e le Tusi Paia faapea, o ē auauna iā Ieova e tatau ona avea o ni tagata e autasi. (Efeso 4:1-3) E tatau ona iai lenei autasi i le taimi nei, e ui o loo tatou ola i se lalolagi fevaevaeaʻi, ma o loo tatou tauivi pea ma o tatou lava tulaga lē lelei atoatoa. Sa tatalo faatauanau Iesu ina ia tasi ona soo uma, ia iā i latou le autasi moni. O le ā o le a uiga i ai lenei mea? Muamua, ia iai sa latou faiā lelei ma Ieova ma lona Alo. Lona lua, ia autasi i latou uma. (Ioane  17:20, 21) Ina ia ausia lenā faamoemoe, ua avea ai le faapotopotoga Kerisiano o le faalapotopotoga ua faaaogā e Ieova e aʻoaʻoina ai ona tagata.

O ā Vala e Saosaolaumea i le Autasi?

10. (a) O le ā tatou te atiina aʻe, pe a tatou faaaogāina totino le Tusi Paia e fefulisaʻi ai tali o ni fesili o loo tatou aafia ai? (e) Ia auʻiliʻili vala e saosaolaumea i le autasi faa-Kerisiano, e ala i le taliina o fesili ua lisi mai i lenei palakalafa.

¹⁰ E fitu vala autū o loo taʻua i lalo e saosaolaumea i le autasi o le tapuaʻiga. A o e taliina fesili o loo avatu faatasi ai, ia manatunatu pe faapefea i manatu taʻitasi, ona aafia ai lau faiā ma Ieova faapea lau faiā ma ou uso Kerisiano. O le fefulifulisaʻi i nei manatu ma tagaʻi atu i mau o loo faasino mai ae lē o sii maia upu, o le a saosaolaumea i lou atiina aʻe o le atamai faale-Atua, le tomai e mafaufau ai, atoa ma le faautauta—o ni uiga e manaʻomia e i tatou uma. (Faataoto 5:1, 2; Filipi 1:9-11) Ia faasolosolo taʻitasi ona iloiloina nei vala.

(1) Tatou te amanaʻia le aiā a Ieova e faataatia ai tapulaa i mea e lelei ma mea e leaga. “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”—Faataoto 3:5, 6.

Aiseā e ao ai ona tatou saʻili atu i fautuaga ma taʻiala a Ieova pe a faia ni filifiliga? (Salamo 146:3-5; Isaia 48:17)

(2) Ua iā i tatou le Afioga a le Atua e taʻitaʻia ai i tatou. “Na talia e outou le afioga a le Atua na outou faalogo mai ai ia i matou, ua le talia e outou o le upu a tagata, a e peitai o le upu a le Atua, (e moni lava lea,) ua matuā galue foi lea i totonu ia te outou o e faatuatua.”—1 Tesalonia 2:13.

 O le ā se lamatiaga o iai i le faia o mea tatou te “manatu” i ai e saʻo? (Faataoto 14:12; Ieremia 10:23, 24; 17:9)

Pe afai tatou te lē iloa po o le ā se fautuaga a le Tusi Paia i se mataupu, o le ā e tatau ona tatou faia? (Faataoto 2:3-5; 2 Timoteo 3:16, 17)

(3) Ua tatou maua uma aogā mai le polokalame e tasi o le fafagaina faaleagaga. “E aʻoaʻoina lau fanau uma lava e Ieova.” (Isaia 54:13) “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le Aso [o le faaumatiaga] o loo tāulata mai.”—Eperu 10:24, 25.

O ā aogā e maua e i latou e faaaogāina lelei faatulagaga a Ieova mo le fafagaina faaleagaga? (Isaia 65:13, 14)

(4) O lo tatou Taʻitaʻi, o Iesu Keriso, ae lē o se tagata. “Aua neʻi taʻua outou o rapi; auā e toatasi la outou aʻoaʻo; a o outou uma o le au uso outou. Aua foi neʻi tou taʻua se tasi i le lalolagi o lo outou tamā; auā e toatasi lo outou Tamā, o i le lagi ia. Aua foi neʻi taʻua outou o aʻoaʻo [“taʻitaʻi,” NW]; auā e toatasi la outou aʻoaʻo [“Taʻitaʻi”], o le Keriso lea.”—Mataio 23:8-10, LF.

Pe tatau ea ona manatu se tasi o i tatou faapea e sili aʻe o ia i lo isi? (Roma 3:23, 24; 12:3)

(5) Tatou te vaai atu i le pulega a le Malo o le Atua ua na o lea le faamoemoe mo tagata. “O lenei, ia faapea outou ona tatalo, Lo matou Tamā e, o i le lagi, Ia paia lou suafa. Ia oo mai lou malo, Ia faia lou finagalo, I le lalolagi e pei ona faia i le lagi. A ia outou muai saili lona malo ma lana amiotonu.”—Mataio 6:9, 10, 33, LF.

 E faapefea i le ‘muai sailia o le malo’ ona fesoasoani i le puipuimaluina o lo tatou autasi? (Mika 4:3; 1 Ioane 3:10-12)

(6) Ua faatupuina e le agaga paia i tagata tapuaʻi a Ieova uiga e matuā tāua i le autasi faa-Kerisiano. “O le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le lē gaoiā [“pulea totino,” NW].”—Kalatia 5:22, 23, LT.

O le ā e ao ona tatou faia ina ia faatupuina ai e le agaga o le Atua ona fua iā i tatou? (Galuega 5:32)

E faapefea ona aafia la tatou faiā ma o tatou uso Kerisiano pe a iā i tatou le agaga o le Atua? (Ioane 13:35; 1 Ioane 4:8, 20, 21)

(7) O tagata tapuaʻi moni uma a le Atua e auai i le talaʻia o le tala lelei o lona Malo. “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:14.

O le ā e ao ona uunaʻia ai i tatou e fia faia so tatou sao atoatoa i lenei galuega talaʻi? (Mataio 22:37-39; Roma 10:10)

11. O le ā le iʻuga, pe a tatou faatatauina upu moni a le Tusi Paia i o tatou olaga?

¹¹ O lo tatou tapuaʻi autasi iā Ieova, e atili ai ona tatou vavalalata atu iā te ia, ma mafai ai ona tatou maua se aufaatasiga e faafouina ai, faatasi ma o tatou uso talitonu. Ua faapea mai le Salamo 133:1: “Faauta, o le mea e matuā lelei ma le matagofie lava, pe a nonofo faatasi lava o uso.” Maʻeu se faafouina pe a ō ese mai le lalolagi ma ana gaoioiga uma manatu faapito, o amioga lē mamā, ma faiga sauā, ae faatasitasi ma i latou o ē alolofa moni iā Ieova ma usiusitai i ana tulafono!

 ʻAlofia Aafiaga e Faatupu ai Fevaevaeaʻiga

12. Aiseā e manaʻomia ai ona tatou ʻalofia le agaga o le fia tutoʻatasi?

¹² Ina ia lē faaleagaina lo tatou autasi tautele i le lalolagi atoa, e ao ona tatou ʻalofia aafiaga e faatupu ai fevaevaeaʻiga. O se tasi o nei aafiaga o le agaga o le fia tutoʻatasi ese mai i le Atua ma ana tulafono. Ua fesoasoani mai Ieova iā i tatou e ʻalofia lenei uiga e ala i le faaalialia mai o lē o loo faapogaia, o Satani le Tiapolo. (2 Korinito 4:4; Faaaliga 12:9) O Satani lea na taaʻina Atamu ma Eva ina ia lē amanaʻia le mea na fetalai i ai le Atua, ma faia ni faaiʻuga e feteenaʻi ma le finagalo o le Atua. O ni iʻuga malaia na oo ai iā i laʻua faapea foʻi ma i tatou. (Kenese 3:1-6, 17-19) Ua matuā lofia lenei lalolagi i le agaga o le fia tutoʻatasi ese mai i le Atua ma ana tulafono. E manaʻomia la ona tatou teena lenā agaga mai iā i tatou lava.

13. O le ā o le a faaalia ai po o tatou sauniuni moni mo le olaga i le lalolagi fou amiotonu a le Atua?

¹³ O se faaaʻoaʻoga, ia manatunatu i le folafolaga faamanititino a Ieova ina ia aveese le lalolagi amioleaga o loo iai nei, ae suia i lagi fou ma le lalolagi fou lea e “mau ai le amiotonu.” (2 Peteru 3:13) Po ua lē uunaʻia ea e lenā faamoemoe i tatou, ina ia amata ona sauniuni e ola ai i lenā taimi o le a maua ai na o le amiotonu? E manaʻomia ai le utagiaina o le fautuaga manino a le Tusi Paia: “Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā.” (1 Ioane 2:15) O lea la, o loo tatou teena le agaga o lenei lalolagi—lona uiga fia tutoʻatasi, lona soona faamamafaina o le manatu ifo o le tagata iā te ia lava, o ana amioga lē mamā ma faiga sauā. Ua fai ma a tatou masani le faalogo atu iā Ieova ma usiusitai iā te ia mai o tatou loto, e tusa pe o iai ni faanaunauga lē talafeagai o lo tatou tulaga  lē lelei atoatoa. O loo avatu e lo tatou olaga atoa se faamaoniga e faapea, o o tatou manatu ma uunaʻiga o o tatou loto, e faaautū uma i le faia o le finagalo o le Atua.—Salamo 40:8.

14. (a) Aiseā e tāua ai ona talia nei loa le avanoa e aʻoaʻoina ala o Ieova ma ola aʻe ai i o tatou olaga? (e) O le ā le uiga iā i tatou taʻitoʻatasi o mau na e faasino mai i le palakalafa, ae lē o sii maia o latou upu?

¹⁴ Pe a oo mai le taimi atofaina e faaumatia ai e Ieova lenei faiga amioleaga o mea, faatasi ai ma i latou uma o ē fiafia i ona ala, o le a lē faatuai o ia. O le a ia lē tolopōina lenā taimi pe suia foʻi ana tapulaa ina ia faamalieina ai i latou o loo taumafai pea e pipii i le lalolagi, a o faalotolotolua pea i le aʻoaʻoina ma le faia o le finagalo o le Atua. O le taimi lenei e gaoioi ai! (Luka 13:23, 24; 17:32; 21:34-36) Maʻeu la se faamāfanafanaloto o le vaai atu i le motu o tagata e toʻatele o loo latou taliaina lenei avanoa tautele, ma saʻili atu ma le naunautaʻi i faatonuga ua saunia e Ieova e ala mai i lana Afioga ma le faalapotopotoga, ma savavali ai ma le autasi i ona ala e agaʻi atu i le lalolagi fou! Ma o le tele lava o mea tatou te aʻoaʻoina e faatatau iā Ieova, o le atili foʻi lenā ona tatou alolofa iā te ia ma mananaʻo e auauna iā te ia.

Talanoaga Autalu

• O le ā le fuafuaga a Ieova e faatatau i le tapuaʻiga?

• Pe a māeʻa ona tatou aʻoaʻoina aʻoaʻoga faavae o le Tusi Paia, o le ā le agaʻigaʻi atili i luma e ao ona tatou saʻili ma le naunautaʻi e fai?

• O le ā e mafai ona fai e i tatou taʻitoʻatasi ina ia autasi ai ma isi tagata tapuaʻi o Ieova?

[Fesili mo le Suʻesuʻega]

 [Ata i le itulau 4]

‘O e agamalu, e fai mo latou le nuu ma e faafiafia i latou ona o le manuia e tele’