Le Saʻolotoga ua Olioli ai Tagata Tapuaʻi o Ieova
Mataupu Lima
Le Saʻolotoga ua Olioli ai Tagata Tapuaʻi o Ieova
1, 2. (a) O le ā le saʻolotoga na foaʻi mai e le Atua i le uluaʻi ulugalii? (e) Ia taʻu mai nisi o tulafono sa pulea ai gaoioiga a Atamu ma Eva.
INA ua foafoaina e Ieova le uluaʻi tamāloa ma le fafine, sa iā i laʻua se saʻolotoga e sili mamao atu i lo se isi lava saʻolotoga ua maua e tagata i aso nei. Sa fai ma o la aiga le Parataiso, le Faatoʻaga matagofie o Etena. Sa leai ni maʻi e ponaʻia ai lo la fiafiaga i le olaga, auā sa lelei atoatoa o la mafaufau ma tino. Sa leʻi fuafuaina e oo iā i laʻua le oti lea e pei ona oo nei i tagata uma talu mai lenā taimi. E lē gata i lea, sa leʻi pei i laʻua o ni masini ua faapolokalameina, ae sa iā i laʻua le meaalofa ofoofogia o le filifiliga saʻoloto, le tomai e faia ai a laʻua lava filifiliga. Peitaʻi, ina ia faaauau pea ona olioli i lea saʻolotoga, sa tatau ona la faaaloalo i tulafono a le Atua.
2 Mo se faaaʻoaʻoga, seʻi mafaufau i tulafono o le tino na sa faatulaga mai e le Atua. O le mea moni, atonu o nei tulafono sa leʻi tusitusia maia, peitaʻi sa faia Atamu ma Eva i se auala na faigofie ai lava ona la usitaia na tulafono. O le iai o so la lagona mataʻai na taʻu atu ai ua manaʻomia ona aai; o lo la galala na taʻu atu ai ua manaʻomia ona feinu; o le goto ifo o le lā na taʻu atu ai ua manaʻomia ona momoe. Na aumaia foʻi e Ieova iā i laʻua se tofiga e galulue ai. Sa avea lenā tofiga o se tulafono, auā o le a pulea ai a la gaoioiga e fai. Sa tatau ona la fanauina mai ni fanau, ia faatino le pule i ituaiga uma o meaola i le lalolagi, ma faalautele atu tuaoi o le Parataiso seʻia oo ina aofia ai le lalolagi atoa. (Kenese 1:28; 2:15) Maʻeu le manaia ma le aogā o lenā tulafono! Sa aumaia ai iā i laʻua ni galuega na matuā faamalieina ai, ma mafai ai ona la faaaogā atoatoa o la tomai i ni auala e manuia ai. E lē gata i lenā, sa telē lo la saʻolotoga e faia ai filifiliga e faatatau i le auala o le a la faataunuuina ai lo la tofiga. O le ā se isi mea e ono toe manaʻonaʻo i ai se tasi?
3. Sa mafai faapefea ona aʻoaʻoina e Atamu ma Eva le auala e faaaogāina ai ma le atamai le la filifiliga saʻoloto?
3 Ina ua tuuina mai iā Atamu ma Eva le avanoa e faia ai filifiliga, sa leʻi uiga faapea, e so o se filifiliga lava la te ono faia o le a iʻu i ni iʻuga lelei. O le la filifiliga saʻoloto sa tatau ona faatinoina ia tusa ai ma tulafono ma mataupu silisili a le Atua. Sa mafai faapefea ona la aʻoaʻoina nei tulafono ma mataupu silisili? E ala i le faalogo atu i Lē na faia i laʻua ma mātauina ana galuega. Na foaʻi mai e le Atua iā Atamu ma Eva le atamai sa manaʻomia mo lo la faatatauina o mea na la aʻoaʻoina. Talu ai sa foafoaina i laʻua i se tulaga e lelei atoatoa, o so la faanaunauga masani la le mananaʻo e faaatagia atu uiga o le Atua pe a faia filifiliga. E mautinoa sa tatau ona la faautauta i le faia o lenā mea, pe afai la te talisapaia moni mea na faia e le Atua mo i laʻua ma mananaʻo e faafiafiaina o ia.—Kenese 1:26, 27; Ioane 8:29.
4. (a) Faamata na avea le poloaʻiga na tuuina mai iā Atamu ma Eva e aua le ʻaina le fua o se laau e tasi, e taofia ai lo la mauaina o le saʻolotoga? (e) Aiseā na talafeagai ai lenei tulafono?
4 Sa talafeagai ai la le filifili o le Atua e tofotofoina lo la tuutoina atu iā te ia o lo la Foaʻi Ola, atoa ai ma lo la lotomalilie e tumau i lana pulega. O le poloaʻiga lenei a Ieova iā Atamu: “O laau uma o i le faatoaga e te ʻai ai. A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kenese 2:16, 17) Ina ua uma ona foafoaina Eva, sa logo atu foʻi iā te ia lenei tulafono. (Kenese 3:2, 3) Pe na taofia ai ea e lenei faasāsāga lo la mauaina o le saʻolotoga? E mautinoa e leai. Sa la maua le anoanoaʻi o taumafa eseese, ina ia la taumamafa ai e aunoa ma le ʻaina o le fua o lenā laau e tasi. (Kenese 2:8, 9) Sa talafeagai ai ona la amanaʻia e faapea o le lalolagi e ā le Atua ia, auā o ia na foafoaina. O lona uiga, ua iā te ia le aiā e faia ai tulafono e fetaui i lana fuafuaga, ma e aogā i tagata.—Salamo 24:1, 10.
5. (a) Pe na faapefea ona melea e Atamu ma Eva lo la saʻolotoga mamalu na iai? (e) O le ā na suia i ai le saʻolotoga lea sa olioli ai muamua Atamu ma Eva, ma ua faapefea ona tatou aafia ai?
5 Ae o le ā na tupu? I le uunaʻia e faanaunauga manatu faapito, sa faaaogāsesē ai e se agelu lana filifiliga saʻoloto ma oo ai ina avea ma Satani, o lona uiga, o “Lē Tetee.” Sa ia faasesēina Eva e ala i le faailoa atu iā te ia o se mataupu e feteenaʻi ma le finagalo o le Atua. (Kenese 3:4, 5) Sa aufaatasi atu Atamu iā Eva i le solia o le tulafono a le Atua. E ala i le aapa atu i se mea e lē o laʻua e ana, na la melea ai lo la saʻolotoga mamalu sa iai. Sa pulea i laʻua e le agasala, ma e pei ona sa lapataʻia e le Atua, na mulimuli ane oo mai ai le oti. O le tofi sa la tuufaasolo mai i a la fanau o le agasala—e faaalia i se faanaunauga o le tagata na fanau mai lava ma ia, ina ia faia le mea leaga. O le agasala na aumaia ai foʻi vaivaiga faaletino ua iʻu ai i faamaʻi, le soifuaga matua, ma le oti. O le faanaunauga mo le faia o mea leaga, ma ua faateteleina ona o aafiaga faa-Satani, ua iʻu ai i se lalolagi o tagata ua lauiloa i le feitagaʻi, o soligātulafono, o faiga faatigā, atoa ai ma taua ua fano ai le faitau miliona o tagata. E matuā ese lava lea tulaga ma le saʻolotoga na foaʻi mai e le Atua i tagata i le amataga!—Teuteronome 32:4, 5; Iopu 14:1, 2; Roma 5:12; Faaaliga 12:9.
Le Mea e Mafai Ona Maua ai le Saʻolotoga
6. (a) O fea e mafai ona maua ai le saʻolotoga moni? (e) O le ā le saʻolotoga na fetalai i ai Iesu?
6 Pe a fua atu i tulaga leaga o loo iai i so o se vaipanoa i aso nei, e lē o se mea la e ofo ai le faanaunau o tagata mo se saʻolotoga e sili atu. Peitaʻi o fea e mafai ona maua ai le saʻolotoga moni? Na fetalai Iesu e faapea: “Afai tou te tumau pea i laʻu mataupu, o oʻu soo moni outou. E iloa foi e outou le mea moni, e tuu saʻoloto foi outou e le upu moni.” (Ioane 8:31, 32) E lē o le saʻolotoga lea e faamoemoe i ai tagata, pe a latou teena se tasi pule po o se tasi faigāmalo ona ua mananaʻo i le isi. Peitaʻi, o lenei saʻolotoga e taulaʻi tonu atu lava i le aa o faafitauli o tagata. O le mea lea sa talanoaina e Iesu o le saʻolotoga mai le faapologaina i le agasala. (Ioane 8:24, 34-36) O lea la, afai e avea se tagata ma se soo moni o Iesu Keriso, e oo iā te ia se suiga tele i lona soifuaga, se saʻolotoga!
7. (a) E mafai faapefea ona tatou saʻoloto mai le agasala i le taimi nei? (e) Ina ia maua lenā saʻolotoga, o le ā e tatau ona tatou faia?
7 E lē faapea la o le a lē toe lagona e Kerisiano moni i le taimi nei, ni aafiaga o le faanaunauga sa fananau mai ma i latou ina ia faia le agasala. Talu ai ua tuufaasolo mai iā i latou le agasala, o loo latou feagai pea la ma se tauiviga. (Roma 7:21-25) Peitaʻi, afai e ola moni se tagata e ōgatusa ma aʻoaʻoga a Iesu, ona lē toe nofo pologa ai lea o ia i le agasala. O le a lē toe avea le agasala iā te ia e pei o se pule tautalatasi, o lē na te avatua iā te ia ni faatonuga e tatau lava ona lē faatalatū e usitaia. O le a lē toe saisaitia o ia i se ituaiga o olaga e aunoa ma se fuafuaga, lea e ono oo ai iā te ia se lotofuatiaifo leaga. O le a iai lona lotofuatiaifo mamā i luma o le Atua, auā ua faamagaloina ana agasala ua tuanaʻi, ona o lona faatuatua i le taulaga a Keriso. Atonu e ono tulaʻi mai faanaunauga agasala, peitaʻi afai na te teena le faatinoina o na faanaunauga ona o loo ia manatua aʻoaʻoga mamā a Keriso, o inā e faaalia ai e lē o toe pule le agasala iā te ia.—Roma 6:12-17.
8. (a) O ā saʻolotoga ua aumaia e le Faa-Kerisiano moni iā i tatou? (e) O le ā le uiga e ao ona tatou faaalia i taʻitaʻi faalelalolagi?
8 Seʻi mafaufau i saʻolotoga ua tatou olioli ai o ni Kerisiano. Ua tatou saʻoloto mai aafiaga o aʻoaʻoga sesē, mai le noanoatia i talitonuga ma faiga faanuupō, ma le toʻilalo i le agasala. O upu moni matagofie e faatatau i le tulaga o ē ua maliliu faapea le toetū, ua tatou saʻoloto ai mai le soona mataʻu fua i le oti. O le iloaina ua toe o se aga ona suia lea o faigāmalo a tagata lē lelei atoatoa e le Malo amiotonu o le Atua, e faasaʻolotoina ai i tatou mai le aunoa ma se faamoemoe. (Tanielu 2:44; Mataio 6:10) Peitaʻi, e lē avea lenā saʻolotoga ma itu e taʻutonuina ai se lē faaaloalo i pulega faalemalo ma a latou tulafono.—Tito 3:1, 2; 1 Peteru 2:16, 17.
9. (a) Ua faapefea ona fesoasoani mai ma le alofa Ieova iā i tatou ina ia olioli i se saʻolotoga sili lea ua mafai nei ona maua e tagata? (e) E mafai faapefea ona tatou faia filifiliga atamai?
9 E lē o le finagalo o Ieova faapea e tuu mai e faitalia lava i tatou ma faavasega e ala i le saʻiliʻili solo, po o lē fea le auala e sili ona lelei e ola ai. Ua ia silafia le auala na faia aʻi i tatou, le mea e tatou te maua ai le faamalieina moni, atoa ma le mea e faavavau ona aogā iā i tatou. E na te silafia manatunatuga ma amioga e mafai ona faaleagaina ai le faiā a se tagata ma Ia, faapea foʻi le faiā a lenā tagata ma le isi ona uso a tagata, pe atonu e taofia mai ai le oo atu o lenā tagata i le lalolagi fou. Ona o le alofa o Ieova, ua ia faailoa mai ai nei mea uma iā i tatou e ala mai i le Tusi Paia ma lana faalapotopotoga vaaia. (Mareko 13:10; Kalatia 5:19-23; 1 Timoteo 1:12, 13) Ona fai ai lea ma a tatou avega tauave le faaaogāina o lo tatou saʻolotoga mai le Atua, ina ia filifili ai i le auala e tatou te gaoioi ai. I le lē pei o Atamu, afai ua tatou utagiaina mea o loo taʻu mai e le Tusi Paia iā i tatou, o le a tatou faia la ni filifiliga atamai. O le a faaalia ai o lo tatou faanaunauga autū i le olaga, o le mauaina lea o se faiā lelei ma Ieova.
O Loo Mananaʻo i se Isi Saʻolotoga e Ese Mai
10. O le ā le saʻolotoga e ese mai, lea ua saʻilia e nisi o ē ua avea ma Molimau a Ieova?
10 E iai taimi e ono manatu ai nisi talavou Molimau a Ieova—ma isi foʻi ua faasolo atu ina tagata matutua—e latou te mananaʻo i se isi saʻolotoga e ese mai. Atonu e foliga faatosina mai le lalolagi, ma o le tele lava o lo latou mafaufau i ai, o le malosi foʻi lea o lo latou faanaunauga ina ia faia ni mea e lē faa-Kerisiano o loo taatele i le lalolagi. Atonu e lē o fuafua na tagata e faaaogāsesēina fualaau faasāina, pe inu tele, pe faia le faitaaga. Peitaʻi ua amata ona latou auaufaatasi ma nisi e lē o ni Kerisiano moni, ma mananaʻo ai ina ia talia mai i latou e nei tagata. E ono iʻu lava ina amata ai ona latou faataʻitaʻi i gagana ma amioga a na tagata.—3 Ioane 11.
11. O fea e sau ai i nisi taimi faatosinaga ina ia faia mea sesē?
11 O nisi taimi o faatosinaga ina ia lolo atu i amioga e lē faa-Kerisiano, e sau mai se tasi e faapea mai o loo auauna iā Ieova. Na tupu lenā mea i nisi o uluaʻi Kerisiano, ma e mafai foʻi ona tupu i o tatou aso. O tagata faapena e masani ona mananaʻo e fai mea latou te manatu o le a maua ai so latou fiafiaga, peitaʻi o mea nei e feteenaʻi ma tulafono a le Atua. E latou te uunaʻia isi ina ia fai mea e “faamalieina ai tuʻinanau.” E latou te ‘folafola atu le saʻolotoga, a o i latou lava ua fai ma pologa o le amio leaga.’—2 Peteru 2:19.
12. O ā iʻuga faanoanoa o amioga e feteenaʻi atu i tulafono ma mataupu silisili a le Atua?
12 O iʻuga e maua mai i lea saʻolotoga e masani lava ona faaleagaina ai, auā o le solia lea o tulafono a le Atua. Mo se faaaʻoaʻoga, o feusuaʻiga lē mamā e mafai ona iʻu ai i faalogona leaga, o faamaʻi, o le oti, o se maʻitaga e leʻi manaʻomia, ma e ono malepe ai foʻi le faaipoipoga. (1 Korinito 6:18; 1 Tesalonia 4:3-8) O le faaaogāsesēina o fualaau faasāina e mafai ona iʻu ai i le itaitagofie, le fenumiaʻi o le tautala, le puaoa o le vaai, le niniva, le tau lē lava o le mānava, le fenumiaʻi o le mafaufau, ma le oti. E iʻu ina ola faalagolago i ai, lea e ono taʻitaʻia atu ai i le faia o solitulafono ina ia lagolago ai lea masaniga leaga. E tai tutusa lava ma iʻuga e oo i ai le faaaogāsesēina o le ʻava malosi. (Faataoto 23:29-35) Atonu e manatu i latou o aafia i ia amioga e faapea o loo saʻoloto i latou, peitaʻi e mulimuli ane latou te toe iloa ane ae ua tuai, ua avea i latou ma pologa i le agasala. Pagā se pule ina a sauā o le agasala! O le fefulifulisaʻi nei o manatu i le mataupu, e mafai ona fesoasoani e puipuia ai i tatou mai le oo atu i sea tulaga.—Kalatia 6:7, 8.
Le Mea e Amata Mai ai Faafitauli
13. (a) E masani faapefea ona mapuna aʻe tuʻinanau na e taʻitaʻia atu ai i faafitauli? (e) Ina ia malamalama po o ai ‘aumea leaga,’ o le silafaga a ai tatou te manaʻomia? (i) A o e taliina fesili ua lisi atu i le palakalafa e 13, ia faamamafa le silafaga a Ieova.
13 Seʻi manatu i le mea e masani ona amata mai ai faafitauli. O loo faamatala mai e le Tusi Paia: “Ua taitasi ma faaosoosoina, pe a tosina ma maileia i lona lava tuʻinanau. Pe a to le tuʻinanau ona fanau mai ai lea o le agasala; a matua le agasala ona fanaua mai ai lea o le oti.” (Iakopo 1:14, 15) Pe faapefea ona mapuna aʻe le tuʻinanau? E ala i mea e alu i totonu o le mafaufau. E masani lava o le iʻuga lenei o le faatasitasi ma tagata e latou te lē faatatauina mataupu silisili o le Tusi Paia. E mautinoa lava, ua tatou iloa uma e ao ona tatou ʻalofia le “feoai [“aumea,” NW] ma e amio leaga.” (1 Korinito 15:33) Peitaʻi o ai aumea e leaga? O le ā le silafaga a Ieova i le mataupu? O le fefulifulisaʻi o manatu i fesili o loo mulimuli mai ma tagaʻi i mau o loo faasino mai, e tatau ona fesoasoani iā i tatou e faia ai ni faaiʻuga saʻo.
Pe avea ea le foliga amio lelei mai o nisi tagata, e ono faapea ai o i latou o ni aumea lelei? (Kenese 34:1, 2, 18, 19)
Pe mafai e a latou talanoaga, atonu po o a latou tausuaga, ona faaalia ai pe tatau ona tatou aumea vavalalata ma i latou? (Efeso 5:3, 4)
O le ā se lagona o Ieova pe a tatou filifilia se aufaatasiga māfana ma tagata e lē alolofa iā te ia? (2 Nofoaiga a Tupu 19:1, 2)
E ui atonu tatou te faigaluega pe aʻoʻoga faatasi ma tagata e lē tutusa a tatou talitonuga, ae aiseā e manaʻomia ai ona tatou faaeteete? (1 Peteru 4:3, 4)
O le matamata i televise ma tifaga, le faaaogāina o le Initineti, ma le faitau i tusi, mekasini, ma nusipepa, o auala na e auaumea ai ma isi. O ā ituaiga o faamatalaga mai na mea e ao ona tatou puipuimalu i ai? (Faataoto 3:31; Isaia 8:19; Efeso 4:17-19)
O le ā ua faailoaina atu iā Ieova e uiga iā i tatou, ona o aumea o loo tatou filifilia? (Salamo 26:1, 4, 5; 97:10)
14. O le ā le saʻolotoga sili o loo faatalia maia i latou o ē faatatauina ma le faamaoni i le taimi nei fautuaga o le Afioga a le Atua?
14 Ua matuā lalata mai lava iā i tatou le lalolagi fou a le Atua. E ala i le pulega a le Malo faalelagi a le Atua, o le a faasaʻolotoina ai le fanau a tagata mai taaʻiga a Satani ma lana faiga aoao o mea amioleaga. O le a faasolosolo mālie ona aveesea aafiaga uma o le agasala mai tagata usiusitai, seʻia oo ina lelei atoatoa le mafaufau ma le tino, ina ia mafai ai ona tatou olioli i le ola e faavavau i le Parataiso. O le a iʻu ai lava ina maua e foafoaga uma le saʻolotoga lea e ōgatusa atoatoa ma ‘le agaga o Ieova.’ (2 Korinito 3:17, NW) Po o se mea talafeagai ea pe afai o le a maʻimau atu na mea uma ona o le lē manatu mamafa i le taimi nei i fautuaga a le Afioga a le Atua? E ala i lo tatou faaaogāina ma le atamai i aso nei o lo tatou saʻolotoga faa-Kerisiano, seʻi o tatou faaalia manino atu e faapea, o le mea tatou te manaʻomia moni lava, o “le saolotoga o le fanau a le Atua e manuia ai.”—Roma 8:21.
Talanoaga Autalu
• O le ā le saʻolotoga na olioli ai le uluaʻi ulugalii? E faapefea ona faatusatusa mai lenā saʻolotoga i le mea ua oo nei i ai le fanau a tagata?
• O le ā le saʻolotoga ua maua e Kerisiano moni? E faapefea ona ese lenei mai le saʻolotoga lea o loo manatu i ai le lalolagi?
• Aiseā e matuā tāua ai le ʻalofia o aumea leaga? I le lē pei o Atamu, o filifiliga a ai tatou te talia e faatatau i le mea e leaga?
[Fesili mo le Suʻesuʻega]
[Ata i le itulau 46]
Ua lapataʻi mai le Afioga a le Atua: “Aua neʻi faaseseina outou, ‘O le feoai aumea ma e amio leaga e leaga ai amio lelei’”
