Mataupu Fitu

O Mea ua Tatou Iloa Mai le Faatagaina e le Atua o le Amioleaga

1, 2. (a) O le ā le aafiaga na semanū e oo iā i tatou pe ana faaumatia e Ieova le ʻaufouvale i Etena i lenā lava taimi? (e) O ā sauniuniga alofa ua faaavanoa mai e Ieova iā i tatou?

NA FAAPEA mai le augātamā anamua o Iakopo: “Ua itiiti ma ua leaga tausaga o loʻu nei olaga.” (Kenese 47:9) Ua faapena foʻi ona fai mai Iopu, o le tagata “ua saasaa ona aso, [ma] ua tumu i le atuatuvale.” (Iopu 14:1) I le pei o i laʻua, ua faapena le toʻatele o i tatou, ua fesagaʻi ma tulaga faigatā, o faiga lē tonu, e oo lava i mala. Peitaʻi, o lo tatou fananau mai, e lē o se faiga lē tonu lea a le Atua. E moni e lē o lelei atoatoa o tatou mafaufau ma tino, ma e lē o iai so tatou aiga Parataiso e pei o le aiga na uluaʻi iai Atamu ma Eva. Ae faapefea pe ana fai na faaumatia e Ieova i laʻua i le taimi lava na la fouvale ai? E ui lava na semanū e lē oo mai ai ni maʻi, ni faanoanoaga, po o le oti, ae na semanū foʻi e lē maua ai ni tagata. Na semanū tatou te lē feola mai. Ona o le alofa mutimutivale o le Atua, na lava ai le taimi sa maua ina ia faia e Atamu ma Eva ni a la fanau, e ui lava ua tuufaasolo mai i nei fanau le lē lelei atoatoa. Ma e ala mai iā Keriso, ua faia ai e Ieova se sauniuniga mo i tatou, ina ia toe maua mai le mea na melea e Atamu—le ola e faavavau i se lalolagi parataiso.—Ioane 10:10; Roma 5:12.

² Maʻeu se faalaeiauga mo i tatou, i le mafai ona tatou nonofo tatali atu i le taimi o le a ola ai e faavavau i le lalolagi fou ma ona siʻomaga faa-Parataiso! O inā o le a  tatou lē toe aafia ai i maʻi, i faanoanoaga, i tigā ma le oti, ma lē toe aafia ai foʻi i tagata leaga. (Faataoto 2:21, 22; Faaaliga 21:4, 5) Peitaʻi ua tatou iloa mai faamaumauga a le Tusi Paia, e ui ina tāua iā i tatou ma Ieova lo tatou lava faaolataga, ae e iai se isi mea e sili atu ona tāua o loo aofia ai.

Ona o Lona Suafa Silisili

3. O le ā e aofia i le faataunuuga o le fuafuaga a Ieova mo le lalolagi ma tagata?

³ O loo aofia le suafa o le Atua i le faataunuuga o lana fuafuaga mo le lalolagi ma tagata. O lenā suafa, o Ieova, o lona uiga “O Lē ua Faapogaia.” E faatino mai e lona suafa lona tulaga o le Pule Silisili Ese Aoao, o Lē Fai Fuafuaga, ma o le Atua o le upu moni. Ona o le tulaga o Ieova, ua faalagolago ai le mauaina o le filemu ma le sologa lelei o le vateatea aoao, i le matuā faaaloalo atu i lona suafa ma mea o aofia ai, ma ia usiusitai foafoaga uma iā te ia.

4. O le ā sa aofia i le fuafuaga a Ieova mo le lalolagi?

⁴ Ina ua māeʻa ona foafoaina Atamu ma Eva, ona tauaao mai lea e Ieova iā i laʻua se tofiga e faataunuu. Sa ia faamanino mai, o lana fuafuaga e lē tau ina faatoʻilalo le lalolagi uma—ma faalautele atu ai tuaoi o le Parataiso—ae ia faaaināina i ni a la fanau. (Kenese 1:28) Pe sa tatau ea ona lē taulau lenei fuafuaga ona o la laʻua agasala? Pagā se faalumaina o le suafa o Ieova e ona le malosi uma, pe a lē mafai ona ia faataunuuina lana fuafuaga mo lenei lalolagi ma tagata!

5. (a) Pe ana fai e aai le uluaʻi ulugalii i le laau e iloa ai le lelei ma le leaga, faamata o le ā le taimi o le a la feoti ai? (e) Na faapefea ona faataunuu e Ieova lana fetalaiga o loo i le Kenese 2:17, ae i le taimi e tasi o loo ia tausisia pea lana fuafuaga mo le lalolagi?

⁵ Na lapataʻia e Ieova Atamu ma Eva, pe afai e lē  usiusitai ma aai i le laau e iloa ai le lelei ma le leaga, o le a la feoti ‘⁠i le aso’ lava e la te aai ai. (Kenese 2:17) E tusa ma lana folafolaga, sa taʻusalaina ai e Ieova i laʻua i le aso lava na la faia ai le agasala, ma folafola atu i ai le faasalaga o le oti. I le silafaga a le Atua, na feoti ai lava Atamu ma Eva i lenā aso. Ae peitaʻi, ina ia faataunuu pea lana fuafuaga mo le lalolagi, na faataga ai e Ieova i laʻua e faia ni a la fanau a o leʻi feoti moni i le tino. E ui i lea, talu ai o le silafaga a le Atua i le 1,000 tausaga e tutusa lea ma le aso e tasi, ina ua iʻu la le ola o Atamu i le 930 o ona tausaga, o lenā sa leʻi atoa se “aso” e tasi. (2 Peteru 3:8; Kenese 5:3-5) Sa moni lava la le fetalaiga a Ieova e tusa ai o le taimi e faaoo ai le faasalaga o le oti, ma sa leʻi avea lo la feoti ma itu e suia ai lana fuafuaga mo le lalolagi. Peitaʻi, ua faatagaina pea tagata lē lelei atoatoa, e aofia ai ma tagata amioleaga, ina ia ola mo sina vaitaimi.

6, 7. (a) E tusa ai o le Esoto 9:15, 16, aiseā e faataga ai pea e Ieova le amioleaga e faaauau mo se vaitaimi? (e) Na faapefea ona faaalia le mana o Ieova i le mea na tupu iā Farao, ma na faapefea foʻi ona faalauiloa ai Lona suafa? (i) O le ā o le a iʻu i ai pe a muta lenei faiga amioleaga o mea?

⁶ O fetalaiga a Ieova i le pule o Aikupito i aso o Mose, ua faaalia atili ai le māfuaaga ua faataga ai e le Atua le amioleaga e faaauau pea. Ina ua taofi e Farao le ō ese atu o le fanauga a Isaraelu mai Aikupito, sa leʻi taia ai loa e Ieova o ia i lenā taimi. Na tuuina ane Mala e Sefulu i le nuu, e faaalia ai le mana o Ieova i auala ofoofogia. Ina ua aumai le lapataʻiga o le mala lona fitu, sa fetalai Ieova iā Farao, e lē o se mea faigatā iā te Ia ona tafiesea Farao ma ona tagata nai le laueleele. “[Ae] moni lava,” na fetalai Ieova, “o le mea lava lea ua ou faatuina ai oe, ina ia ou faaali ai loʻu mana ia te oe, ma ia taʻua loʻu igoa i le lalolagi uma lava.”—Esoto 9:15, 16.

⁷ Ina ua laveaʻiina e Ieova le fanauga a Isaraelu, sa  matuā lauiloa ai lava lona suafa. (Iosua 2:1, 9-11) I aso nei, ua toeitiiti 3,500 tausaga talu ona mavae lenā taimi, ae e lē o mafai lava ona galo le mea sa ia faia i tuā i inā. E lē gata sa faalauiloaina ai lona suafa moni o Ieova, ae faapena foʻi i le mea moni e uiga i Lē o loo tauaveina lenā suafa. Ua faamausalīina ai i inei le talaaga o Ieova, o le Atua e tausi i ana folafolaga, ma gaoioi mo se lelei o ana auauna. (Iosua 23:14) Ua faailoa mai ai e faapea, ona ua iā te ia le malosi uma, e leai la se mea e mafai ona taofia maia lana fuafuaga. (Isaia 14:24, 27) O lea e mafai ai ona tatou mautinoa, ua lē pine ona gaoioi mai lea o ia mo se lelei o ana auauna faamaoni, e ala i le faaumatiaina o le faiga aoao o mea leaga a Satani. O lenā faaaliga o lona mana e sili ona malosi, ma le mamalu ua tuuina atu ai i le suafa o Ieova, o le a lē taitai ona galo. O le a lē muta mai faamanuiaga o le a maua ai.—Esekielu 38:23; Faaaliga 19:1, 2.

‘Aue! le Loloto o le Atamai o le Atua’

8. O ā manatu ua uunaʻia i tatou e Paulo e manatunatu i ai?

⁸ I lana tusi atu i Kerisiano i Roma, ua lāgā ai e le aposetolo o Paulo le fesili: “O i le Atua ea le amioletonu?” Ua ia tali mai ma le maumauaʻi: “Aua neʻi faapea.” Ona ia faamamafa lea o le alofa mutimutivale o le Atua, ma faasino atu i le fetalaiga a Ieova e faatatau i le faatagaina o Farao e ola pea mo sina taimi. Ua faaalia foʻi e Paulo o i tatou o tagata, ua pei o ni omea o loo uu i lima o le faiipu omea. Ona ia taʻua lea: “Ua onosai le Atua, ma ua matuā faapalepale i ipu o le toasa ua faatatauina i le malaia, ina ua finagalo o ia e faaali mai ai lona toasa, ma faailoa mai ai lona mana; e faailoa mai ai foi le faulai o lona viiga i ipu o le alofa, na ia muai saunia e oo i le manuia; o i tatou foi na valaauina e ia, e le gata i Iutaia, a e atoa foi ma nuu ese.”—Roma 9:14-24.

9. (a) O ai ua fai ma “ipu o le toasa ua faatatauina i le malaia”? (e) Aiseā ua matuā faapalepale ai Ieova e ui ina tetee tagata iā te ia, ma o le a faapefea ona lelei le iʻuga mulimuli mo ē alolofa iā te ia?

 ⁹ Talu mai le fouvalega i Etena, so o se tasi lava e tetee atu iā Ieova ma ana tulafono, ua avea ma “ipu o le toasa ua faatatauina i le malaia.” I le faagasologa o taimi uma talu mai lenā taimi, ua faaalia ai e Ieova lona faapalepale. Sa faatauemu tagata amioleaga i ona ala, sa faasauā i ana auauna, na oo lava ina latou fasiotia lona Alo. Ua faaalia e Ieova lona matuā onosai, e ala i le lava ma totoe o le taimi ua ia tuu mai, ina ia iloa manino ai e foafoaga uma e faimafaufau, iʻuga malaia o le fouvale i le Atua, ma le pule tutoʻatasi ese o le tagata mai iā te ia. I le taimi e tasi, na saunia e le maliu o Iesu le ala mo le laveaʻia o tagata usiusitai, ma le ‘faaumatiaina o galuega a le tiapolo.’—1 Ioane 3:8; Eperu 2:14, 15.

10. Aiseā ua faapalepale mai ai pea Ieova i tagata amioleaga mo le tusa ma le 1,900 tausaga ua tuanaʻi atu?

¹⁰ A o faagasolo le silia ma le 1,900 tausaga talu ona toe faatūina Iesu, o loo faapalepale pea Ieova i “ipu o le toasa,” i le taofiofia o le oo mai o lo latou faaumatiaga. Aiseā? Talu ai, ua ia sauniunia i latou o le a aufaatasi ma Iesu Keriso i lona Malo faalelagi. E 144,000 le aofaʻi o i latou nei, ma o i latou o “ipu o le alofa” lea na taʻua e le aposetolo o Paulo. Muamua, sa valaaulia tagata mai tagata Iutaia ina ia faia aʻe ai lenei vaega faalelagi. Mulimuli ane, sa valaaulia e le Atua tagata o Nuu Ese. E leai ma se tasi o i latou nei o uunaʻia faamalosi e Ieova ina ia auauna atu iā te ia. Peitaʻi, mai iā i latou o loo talisapaia ana sauniuniga alofa, ua ia foaʻi mai ai i nisi le faaeaga o le avea ma pule faatasi ma lona Alo i le Malo faalelagi. Ua toeitiiti nei ona atoatoa loa lea o sauniuniga mo lenā vaega faalelagi.—Luka 22:29; Faaaliga 14:1-4.

11. (a) O le ā le vaega o loo manuia nei i le faapalepale mai pea o Ieova? (e) O le a faapefea ona manuia ai ē ua maliliu?

 ¹¹ Ae faapefea i latou o le a aināina le lalolagi? O le faapalepale mai pea o Ieova, ua mafai ai foʻi ona aoaoina faatasi le “motu o tagata e toatele” mai atunuu uma. Ua oo atu nei i le faitau miliona lo latou aofaʻi. Ua folafola mai e Ieova, o le a faasaoolaina atu lenei vaega i le lalolagi i le iʻuga o lenei faiga o mea, ma latou maua le faamoemoe o le ola e faavavau i se lalolagi parataiso. (Faaaliga 7:9, 10; Salamo 37:29; Ioane 10:16) I le taimi atofaina a le Atua, o le a toe faatutūina mai ai le vao o tagata ua maliliu, ma tuuina atu i ai le avanoa e avea ai ma tagatānuu i le lalolagi o le Malo faalelagi. I le Galuega 24:15, ua muaʻi taʻu mai ai e le Afioga a le Atua e faapea: “O le a toe tutū mai e ua amiotonu atoa ma e ua amioletonu.”—Ioane 5:28, 29, LF.

12. (a) O ā mea ua tatou iloa e uiga iā Ieova ona o lona faapalepale i ē amioleaga? (e) O le ā sou lagona e faatatau i le auala ua tauaaoina ai e Ieova nei mataupu?

¹² Po o iai ea se amiolētonu i nei mea uma? E leai, auā o le taofiofia o le oo mai o le faaumatiaga o ē amioleaga, po o “ipu o le toasa,” ua faaalia ai e le Atua lona alofa i isi, ina ia ōgatusa ma lana fuafuaga. E faaalia ai i inei le telē o lona alofa mutimutivale ma lona agalelei. E lē gata i lea, o le iai o le taimi e mātauina ai le faatinoina o lana fuafuaga, ua tele ai mea tatou te iloa e uiga iā Ieova lava ia. Ua tatou maofa i vala eseese o ona uiga ua faaalia mai—lona faamasinotonu, lona alofa mutimutivale, lona faapalepale, lona atamai uiga eseese. O le atamai o Ieova i le tauaaoina o le finauga i le pule silisili ese aoao—lana aiā e pule ai—o le a faavavau ona avea ma molimau i le mea moni e faapea, o lana auala e pule ai, o le auala lea e silisili ona lelei. E tatou te faapea atu faatasi  ma le aposetolo o Paulo: “Aue! le loloto o le tamaoaiga o le poto [“atamai,” NW ] atoa ma le silafaga a le Atua. E le masuesueina ana faamasinoga; e le mafai foi ona iloa ona ala.”—Roma 11:33.

Le Avanoa e Faaalia ai lo Tatou Tuutoina

13. Pe a tatou fetaiaʻi ma mafatiaga totino, o le ā le avanoa ua tatou maua mai ai, ma o le ā o le a fesoasoani iā i tatou ina ia tali atu ai ma le atamai?

¹³ E toʻatele auauna a le Atua ua iai i ni tulaga e aofia ai ni mafatiaga totino. E faaauau pea o latou mafatiaga talu ai e leʻi oo i le taimi e faaumatia ai e le Atua tagata amioleaga ma toe faafoʻisia tagata i le tulaga lelei e pei ona ia folafola mai. Pe tatau ea ona tatou tigā ai i lenei mea? Pe lē tatau ea ona tatou manatu i tulaga faapena, o ni avanoa tatou te saosaolaumea ai i le faamaonia atu o le pepelo o le Tiapolo? E mafai ona tatou maua le malosi e faia ai faapea, pe a teu i o tatou mafaufau le ʻaiʻoiga lenei: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faataoto 27:11) Na faapea mai ma le maumauaʻi Satani, o lē o loo faifai iā Ieova, pe a oo ina lē toe iai ni meafaitino a tagata pe aafia i ni maʻi, o le a latou tuuaʻia le Atua, e oo lava ina faifai iā te ia. (Iopu 1:9-11; 2:4, 5) Tatou te faafiafiaina le finagalo o Ieova, pe a tatou faaalia e lē moni lenā tuuaʻiga iā i tatou ona o lo tatou faamaoni iā te ia e tusa lava pe fesagaʻi ma faigatā.

14. O ā aogā e mafai ona tatou maua pe a faalagolago atu iā Ieova a o tatou fetaiaʻi ma puapuaga?

¹⁴ Pe a tatou faalagolago atu iā Ieova a o fetaiaʻi ma puapuaga, e mafai ona tatou ati aʻe ai ni uiga tāua. Mo se faaaʻoaʻoga, ona o mea na mafatia ai Iesu, ‘sa ia aʻoaʻoina ai le usiusitai,’ i se auala e na te leʻi silafia muamua. E mafai foʻi ona tatou aʻoaʻoina se mea mai o tatou puapuaga,  i le mafai ai ona tatou ati aʻe le onosai, le tumau, ma le talisapaia loloto mo ala amiotonu o Ieova.—Eperu 5:8, 9; 12:11; Iakopo 1:2-4.

15. E ono aogā faapefea i isi lo tatou tumau ma le onosai i toʻatugā?

¹⁵ O le a mātau mai e isi mea o loo tatou faia. Ona o mea o loo tatou fesagaʻia talu ai lo tatou fiafia i le amiotonu, atonu i se taimi o le a oo ina iloa ai e nisi o i latou, po o ai Kerisiano moni i aso nei. Ma e ala i le autasi ma i tatou i le tapuaʻiga, e mafai ai foʻi ona latou maua faamanuiaga o le ola e faavavau. (Mataio 25:34-36, 40, 46)  E finagalo Ieova ma lona Alo ina ia maua e tagata lenā avanoa.

16. E faapefea i lo tatou manatu i o tatou lava toʻatugā, ona fesootaʻi mai i le mataupu o le autasi?

¹⁶ Maʻeu se lelei pe a tatou manatu i mea, e tusa lava pe faigatā, o ni avanoa e faaalia ai lo tatou tuutoina iā Ieova, ma le faia foʻi o se sao i le faataunuuina o lona finagalo! O lo tatou faia faapea e mafai ona faamaonia atu ai lo tatou matuā autasi ma le Atua ma Keriso. Na tatalo Iesu iā Ieova mo Kerisiano moni uma, i lona faapea atu: “E le faapito laʻu tatalo mo i latou nei [ona soo sa latou aufaatasi], a o i latou foi e faatuatua ia te au ona o la latou upu; ina ia tasi i latou uma, faapei o oe le Tamā o i totonu ia te au, o aʻu foi o i totonu ia te oe, ia tasi i latou i totonu ia te i taua.”—Ioane 17:20, 21.

17. O le ā le faamautinoaga e mafai ona iā i tatou pe a tatou faamaoni iā Ieova?

¹⁷ Pe afai tatou te faamaoni iā Ieova, o le a ia tauia tele mai i tatou. Ua faapea mai lana Afioga: “Ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa, ina ua outou iloa e le se mea faaleaoga lo outou tautiga i le Alii.” (1 Korinito 15:58) Ua faapea mai foʻi: “E le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa.” (Eperu 6:10, LF) Ua taʻua i le Iakopo 5:11 e faapea: “Faauta, ua tatou taʻuamuia i e onosai. Ua outou faalogologo i le onosai o Iopu, ua outou iloa foi le iuga i la le Alii, ina ua mutimuti vale tele le Alii ma le alofa naunau.” O le ā le iʻuga na oo iā Iopu? “Ua sili foi ona faamanuia e Ieova o le gataaga o Iopu i lona amataga.” (Iopu 42:10-16) Ioe, o Ieova e “na te tauia mai o e matuā saili ia te ia.” (Eperu 11:6) Ma e matuā matagofie  le taui o le a maua ai—le ola e faavavau i se lalolagi parataiso!

18. O le ā e iʻu ina tupu i so o se manatunatuga tigā atonu o loo iā i tatou?

¹⁸ O le a aveesea e le Malo o le Atua mea leaga uma ua faia i le aiga faaletagata mai lava i le faitau afe o tausaga ua tuanaʻi. O faamanuiaga o le a iai i lenā taimi, o le a matuā sili atu ona tele na i lo so o se mafatiaga o loo oo iā i tatou i le taimi nei. O le a lē atuatuvale ai o tatou loto i ni manatunatuga lē lelei o ni mea sa tatou mafatia ai i taimi ua mavae. O mafaufauga ma gaoioiga faamalosiau e faatumulia ai olaga o tagata i aso taʻitasi i le lalolagi fou, o le a faifai mālie lava ona tafiesea atu ai ni manatunatuga tigā. Ua faalauiloa mai e Ieova: “Ou te faia le lagi fou [se pulega fou faalelagi o le Malo e pulea ai le fanau a tagata] ma le lalolagi fou [se sosaiete o tagata amiotonu]; e le toe manatua mea na muamua, e le alu ae foi i le loto. A e peitai ia outou olioli ma fiafia e faavavau i le mea ou te faia.” Ioe, i le lalolagi fou a Ieova, o le a mafai e tagata amiotonu ona faapea mai: “Ua mapu le lalolagi uma, ua filemu lava; ua latou alalaga ma le fiafia.”—Isaia 14:7; 65:17, 18.

Talanoaga Autalu

• A o faatagaina e Ieova le amioleaga, ua faapefea ona ia faaalia ai i se tulaga talafeagai, se faaaloalo tele mo lona lava suafa?

• Ua faapefea e le faapalepale mai o le Atua i “ipu o le toasa” ona oo mai ai lona alofa mutimutivale iā i tatou?

• O le ā e tatau ona tatou taumafai e malamalama i ai i tulaga e aafia ai ni mafatiaga o i tatou lava?

[Fesili mo le Suʻesuʻega]

[Ata i le itulau 67]

“Ua sili foi ona faamanuia e Ieova o le gataaga o Iopu i lona amataga”