Mataupu Valu

‘Tau e Tetee Atu i Agaga Leaga’

1. Aiseā tatou te fia uaʻi patino atu ai i gaoioiga a agaga leaga?

E TOʻATELE tagata ua aamu i le manatu faapea e iai agaga leaga. Peitaʻi e lē o se mea e ono manatu māmā i ai. Pe talitonu i ai tagata pe leai, ae o loo iai agaga leaga, ma o loo taumafai e faaoo mai omiga i tagata uma. Ua lē sao mai ai foʻi tagata tapuaʻi a Ieova. O le mea moni, o i latou lea e taulaʻi tonu mai i ai. Ua lapataʻia i tatou e le aposetolo o Paulo e faatatau i lenā mea, i le faapea mai: “Tatou te le tau ma tagata, a o alii sili [lē vaaia], ma faipule, ma alii o le pouliuli o lenei lalolagi, atoa ma agaga leaga i mea o i le lagi.” (Efeso 6:12) I o tatou aso, ua matuā sili ona mataʻutia omiga o loo faaoo mai e agaga leaga, talu ai ua lafo ifo Satani mai le lagi ma ua matuā lotoa tele, auā ua na iloa ua saasaa ona pō.—Faaaliga 12:12.

2. E mafai faapefea ona tatou manumalo i le tauiviga e tetee atu i agaga e sili ona malolosi i lo tagata?

² Pe faamata e mafai ona manumalo i le tauiviga e tetee atu i agaga e sili ona malolosi i lo tagata? Ioe, ae faatoʻā mafai e ala i le faalagolago atoatoa atu iā Ieova. E tatau ona tatou faalogo iā te ia ma usiusitai i lana Afioga. O le faia faapea, e mafai ai ona tatou ʻalofia le tele o se faaleagaina i le tino, i amioga, ma i faalogona, e pei ona oo iā i latou ua puleaina e Satani.—Iakopo 4:7.

O Pule o le Lalolagi i Nofoaga Faalelagi

3. O ai o loo tetee ma le sauā mai i ai Satani, ma e faapefea?

³ O loo manino lelei ona faamatala mai e Ieova iā i tatou le tulaga o le lalolagi e pei ona ia silafia mai i lona afioaga  i le lagi. Na ia faaali mai i le aposetolo o Ioane se faaaliga o loo vaaia ai Satani o se “tarako tele e mūmū.” Sa nofosauni e na te ʻaina pe faatamaʻia pe a mafai, le Malo Faa-Mesia o le Atua, i le taimi lava e fanau ai i le lagi i le 1914. Ina ua lē taulau Satani i lenā mea, ona ia faasasao mai loa lea o le tele o teteega sauā i ē ua fai ma sui o lenā Malo i le lalolagi. (Faaaliga 12:3, 4, 13, 17) E faapefea ona tauina e Satani lenei taua? E ala mai i ona lava tagata ua fai ma ona sui.

4. O ai le puna o le malosi o faigāmalo a tagata, ma e faapefea ona tatou iloa lenā mea?

⁴ Ona sosoo lea ma le vaaia e Ioane o se manu feʻai e fitu ona ulu ma nifo e sefulu, o se manu feʻai ua iai lana pule “i ituaiga uma, ma gagana eseese, ma nuu.” O loo fai lenā manu feʻai ma faatusa o le faiga o mea faapolotiki i le lalolagi atoa. Na logoina mai iā Ioane e faapea, “ua tuuina atu foi ia te ia [le manu feʻai ] e le tarako [Satani le Tiapolo] lona malosi, ma lona nofoālii, ma le pule tele.” (Faaaliga 13:1, 2, 7) Ioe, o Satani o le puna lea o le malosi ma le pule o faigāmalo a tagata. O lea, e pei ona tusia e le aposetolo o Paulo, o ‘alii moni o lenei lalolagi’ e faasino atu i “agaga leaga i mea o i le lagi,” o loo latou pulea mai faigāmalo a tagata. O i latou uma e fia tapuaʻi iā Ieova e ao ona latou malamalama lelei i lenā mea.—Luka 4:5, 6.

5. O le ā ua faapotopotoina atu nei i ai pule faapolotiki?

⁵ E ui ina faapea mai le toʻatele o pule faapolotiki o latou o tagata lotu, ae aunoa ma se atunuu o gauaʻi atu i le pulega a Ieova, po o le pulega a lana Tupu tofia, o Iesu Keriso. O loo tauivi i latou uma e taofi mau i a latou lava pule. I aso nei, e pei ona faaalia i le faamatalaga i le Faaaliga, o loo faapotopotoina ai e ‘agaga o temoni’ pule o le lalolagi, i “le taua i le aso tele o le Atua e ona le malosi uma lava” iā Amaketo.—Faaaliga 16:13, 14, 16; 19:17-19.

6. Aiseā e manaʻomia ai ona faaeteete ina ia lē faasesēina ma oo ai ina lagolagoina le faiga o mea a Satani?

 ⁶ I aso taʻitasi, ua aafia ai olaga o tagata i feteenaʻiga faapolotiki, le vafealoaʻi, le tamaoaiga ma tulaga o lotu, lea ua matuā malepe ai le aiga faaletagata. Pe a tutupu nei feteenaʻiga, e masani lava ona faaituʻau ai tagata—a lē i upu pe i gaoioiga—i le atunuu, le ituaiga, le gagana, po o se faalapotopotoga o loo faia ai sa latou vaega. E tusa foʻi pe lē o faia se vaega a tagata i nisi feteenaʻiga, ae masani ona sili atu lo latou fiafia i le isi vaega na i lo le isi. Peitaʻi e tusa lava po o ai le tagata po o le vaega e latou te fiafia i ai, ae o ai moni lea o loo latou lagolagoina? Ua manino mai le tala a le Tusi Paia: ‘O le lalolagi uma o loo nofo toilalo i lē o leaga.’ (1 Ioane 5:19) Pe mafai la faapefea e se tasi, ona ʻalofia le taʻitaʻisesēina o ia faatasi ma le isi vaega uma o tagata? Pe afai e na te lagolagoina atoatoa le Malo o le Atua, ma solitū aʻiaʻi mai feteenaʻiga a le lalolagi.—Ioane 17:15, 16.

O Mailei Taufaasesē a Lē o Leaga

7. Ua faapefea ona faaalia le poto o Satani i lona faaaogāina o lotu sesē?

⁷ I vaitaimi uma o le talafaasolopito, ua faaaogā ai e Satani sauāga, a lē i upu, po o tau i le tino, ina ia faaliliu ese ai tagata mai le tapuaʻiga moni. Ua ia faaaogā foʻi auala e sili atu ona iloagatā—o gaoioiga faaʻoleʻole ma mailei taufaasesē. Ua ia taofiofia ma le poto le toʻatele o tagata i le pogisa e ala i lotu sesē, ma faapogaia i latou e manatu faapea o loo auauna atu i le Atua. Ona o le leai o so latou poto saʻo e uiga i le Atua ma se alofa mo le upu moni, atonu ai o le a latou tosina atu i ni sauniga faalotu e faagaee ai le agaga ma lagona ootia, pe faaofo foʻi i ni gaoioiga mamana. (2 Tesalonia 2:9, 10) Peitaʻi ua lapataʻia i tatou, e oo lava i ē sa iai muamua i le tapuaʻiga moni, “e o ese nisi . . . , latou te faalogo i agaga e faasese ma aʻoaʻoga  a temoni.” (1 Timoteo 4:1, LF) E mafai faapefea ona tupu lenā mea?

8. E mafai faapefea e Satani ona ia maileia atu i tatou i lotu sesē e tusa lava po o lea o loo tatou tapuaʻi iā Ieova?

⁸ E faaaogāina ma le poto e le Tiapolo o tatou vaivaiga. Pe o tatou fefefe lava i tagata? Afai o tatou faapena, e oo ina tatou lolo atu i omiga mai tauaiga po o tuaoi, ina ia auai i ni gaoioiga e puna mai lotu sesē. Pe o tatou faamaualuluga ea? Afai o tatou faapena, e tatou te ono feita la pe a fautuaina i tatou, pe afai foʻi e lē taliaina e isi ni manatu o loo tatou fiafia i ai. (Faataoto 15:10; 29:25; 1 Timoteo 6:3, 4, LF) Na i lo le toe fetuunaʻi o o tatou manatu ina ia ōgatusa ma le faaaʻoaʻoga a Keriso, e tatou te ono fiafia atu i manatu o ē ‘o loo taʻua mea e mālie i la latou faalogo’ e ala i le faapea mai, ua lava ma totoe le tau ina faitau o le Tusi Paia ma ola i se olaga lelei. (2 Timoteo 4:3, NW) E lē āfaina iā Satani pe o tatou auai atu i se isi vaega faalotu, pe tau ina tatou nonofo pea i la tatou lava lotu, pau lava lona faanaunauga ia tatou lē tapuaʻi atu iā Ieova, i le auala o loo faatonu mai e le Atua i lana Afioga ma lana faalapotopotoga.

9. Ua faapefea ona faaaogā ma le faaʻoleʻole e Satani feusuaʻiga e faataunuu ai ana fuafuaga?

⁹ E maileia foʻi ma le faaʻoleʻole e Satani tagata ina ia faamalieina o latou faanaunauga masani i ni auala sesē. Ua ia faia lenei mea i le faanaunauga mo feusuaʻiga faaleituaiga. I le teena o tapulaa a le Tusi Paia i amioga tatau, e toʻatele tagata o le lalolagi ua manatu i feusuaʻiga a ni tagata e leʻi faaipoipo, o se mea talafeagai e maua ai le fiafia, po o se auala foʻi e faaalia atu ai o i latou o ni tagata ua matutua. Ae faapefea i latou ua faaipoipo? E toʻatele ua faia le mulilua. Ma e tusa foʻi pe o faamaoni lo la va, ae toʻatele tagata ua mananaʻo e toe tatala a latou faaipoipoga pe teteʻa, ina ia mafai ai ona latou nonofo ma se isi  tagata. O loo taulaʻi atu osofaʻiga iloagatā a Satani, ina ia taaʻina ai tagata e tau ina ola mo le faamalieina faaletino i le taimi nei, ae lē manatunatu i aafiaga mulimuli mai e oo iā i latou faapea foʻi ma isi, aemaise i la latou faiā ma Ieova ma lona Alo.—1 Korinito 6:9, 10; Kalatia 6:7, 8.

10. O ā auala e taumafai Satani e faaleagaina ai o tatou uiga agaʻi i amioga lē mamā ma faiga sauā?

¹⁰ O le isi faanaunauga masani, e mo faafiafiaga ma tafaoga. Pe afai e lelei, e mafai ona faafouina ai le tino, le mafaufau, ma faalogona. Peitaʻi o le ā le gaoioiga o le a tatou faia pe a faaaogā ma le poto e Satani taimi o mālōlōga, e taumafai ai e tataʻi ese o tatou mafaufau mai le finagalo o le Atua? Mo se faaaʻoaʻoga, ua tatou iloa e ʻinoʻino Ieova i amioga lē mamā faaleituaiga ma faiga sauā. Pe a faaalialia mai na mea e tifaga, o polokalame i televise, po o ni koneseti, pe tatou te saofafaʻi ai lava ma matamata pea i ai? Ia manatua foʻi, a o latalata mai le taimi o le faaumatiaga o Satani, o le a ia faamautinoa ai le faateleina o le leaga o na mea, auā “o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.” (2 Timoteo 3:13) E manaʻomia ai la ona tatou mataala e lē aunoa, e tetee atu i faufauga a Satani.—Kenese 6:13; Salamo 11:5; Roma 1:24-32.

11. O ā auala e ono maileia ai se tagata pe a lē mataala, e tusa lava po o se tasi ua ia iloa le mea moni e uiga i faiga faataulāitu?

¹¹ Ua tatou iloa foʻi, o i latou e matuā aafia i so o se ituaiga o faiga faaagaga—o valovaloga, o faiga faataulāitu, po o le taumafai e talanoa i tagata ua maliliu—e inosia e Ieova. (Teuteronome 18:10-12) O le manatuaina o lenā mea, o le a tatou lē mafaufau ai e fesootaʻi atu i ni faataulāitu, ma o le a tatou lē taliaina foʻi i latou i o tatou fale ina ia faatino ai a latou faiga faatemoni. Ae pe o le a tatou faalogologo atu ea iā i latou, pe a faaali mai i le televise pe  i le Initineti? E ui lava o le a lē taitai ona tatou taliaina ni togafitiga mai se fomaʻi faataulāitu, ae pe tatou te nonoaina ea se manoa i le tapulima o se pepe faatoʻā fanau mai, ona o le manatu atonu e puipuia ai le tamaitiiti mai se mea e āfaina ai? I le iloa e taʻusalaina e le Tusi Paia le faalauatauina o isi, pe o le a tatou faatagaina ea la se faataulāitu e puleaina o tatou mafaufauga?—Kalatia 5:19-21.

12. (a) Ua faapefea ona faaaogā musika e faatupu aʻe ai ni o tatou mafaufauga i ni manatu ua tatou iloa e sesē? (e) E faapefea i lavalava o se tasi, le teuina o lona lauulu, po o lana tautala, ona faaalia mai ai lona viiviia o i latou e inosia e Ieova olaga o loo ola ai? (i) O le ā e manaʻomia mai iā i tatou, pe afai tatou te lē fia aafia i mailei taufaasesē a Satani?

¹² Ua faapea mai le Tusi Paia, o le faitaaga ma mea lē mamā uma, e lē tatau (ona o ni faanaunauga lē mamā) ona taʻua e i tatou. (Efeso 5:3-5) Ae faapefea pe afai o na mataupu o loo maua mai i se musika e logomālie, e faagauloto mai le fati, pe topetope foʻi lona tuʻituʻi mai? Po o le a amata ea ona tatou toe pesepese atu ai i upu na e viiviia ai feusuaʻiga e aunoa ma le faaipoipo, le faaaogāina o fualaau faasāina mo se fiafiaga, ma isi lava amioga agasala? Pe afai tatou te iloa e lē tatau ona tatou faataʻitaʻi i olaga o tagata o loo matuā aafia i na mea, ae pe o tatou mananaʻo ea e maitauliaina faatasi i tatou ma na tagata, e ala i le faataʻitaʻi i le faiga o o latou lavalava, le teuina o o latou lauulu, po o le auala e tautatala ai? Pagā le matuā taufaaʻoleʻole o metotia o loo faaaogā e Satani e maileia ai tagata, ina ia faataʻitaʻi atu i lana auala leaga o mafaufauga! (2 Korinito 4:3, 4, LF) Ina ia lē aafia i tatou i ana mailei taufaasesē, e tatau ona tatou ʻalofia le tafetafea ese atu faatasi ma le lalolagi e aunoa ma ni taʻiala. E manaʻomia ona teu i o tatou mafaufau po o ai “alii o le pouliuli o lenei lalolagi,” ma ia tauivi ma le filigā e tetee atu i a latou taaʻiga.—1 Peteru 5:8.

 Ua Faaauupegaina Ina ia Manumalo

13. E mafai faapefea e so o se tasi o i tatou e lē lelei atoatoa, ona manumalo i le lalolagi lea e pulea e Satani?

¹³ A o leʻi maliu Iesu, na ia fetalai atu i ona aposetolo: “Ia outou loto tetele, ua ou manumalo i le lalolagi.” (Ioane 16:33) Sa mafai foʻi e i latou ona manumalo. Pe tusa ma le 60 tausaga mulimuli ane, na tusi mai ai le aposetolo o Ioane: “O ai se na te manumalo i le lalolagi, pe afai e le o lē talitonu, o Iesu o le Alo lava ia o le Atua?” (1 Ioane 5:5) E faaalia lenā faatuatua pe a tatou usitaia poloaʻiga a Iesu ma faalagolago atu i le Afioga a le Atua, e pei ona sa faia e Iesu. O le ā le isi mea e manaʻomia? Ia tatou pipii mau i le faapotopotoga ua avea ai o ia ma Ulu. Pe a tatou faia se agasala, e ao ona tatou matuā salamō ma naunautaʻi e saʻili le faamagaloga a le Atua, e faavae aʻe i le taulaga a Iesu. O le faia faapea, e mafai ai foʻi ona tatou manumalo, e ui i o tatou tulaga lē lelei atoatoa ma mea sesē tatou te faia.—Salamo 130:3, 4.

14. Faitau le Efeso 6:13-17, ma faaaogā fesili ma mau o loo i lenei palakalafa, e fai ma faavae mo le talanoaina o aogā e maua mai i vaega taʻitasi o le ofutau faaleagaga.

 ¹⁴ Ina ia taulau manuia, e manaʻomia ona tatou oofu i le “ofutau atoatoa mai le Atua,” ma ia aua neʻi lafoaʻia sona vaega. Seʻi suʻe lau Tusi Paia faamolemole i le Efeso 6:13-17, ma faitau i lona faamatalaina o lenā ofutau. E ala i le taliina o fesili o i lalo, seʻi manatu pe faapefea ona aogā iā te oe le puipuiga e maua mai i vaega taʻitasi o le ofutau.

‘Ua fusia i sulugātiti o le faamaoni’

E ui atonu ua tatou iloa le upu moni, ae faapefea ona puipuia i tatou, pe a lē aunoa ona tatou suʻesuʻe, mafaufau loloto i upu moni o le Tusi Paia, ma auai i sauniga? (1 Korinito 10:12, 13; 2 Korinito 13:5; Filipi 4:8, 9)

“Ufifatafata o le amiotonu”

O ai e ana lenei tapulaa o le amiotonu? (Faaaliga 15:3)

Ia faataʻitaʻi mai pe faapefea i le lē mulimuli i ala amiotonu o Ieova, ona lamatia ai le tulaga faaleagaga o tagata. (Teuteronome 7:3, 4; 1 Samuelu 15:22, 23)

‘⁠O vae ua faaseevaeina i le tala lelei o le filemu’

Ua faapefea ona leoleomaluina i tatou, pe a pisi pea o tatou vae ina ia ō atu ma talanoa i tagata, e faatatau i sauniuniga a le Atua mo le filemu? (Salamo 73:2, 3; Roma 10:15, LF; 1 Timoteo 5:13)

“Talipupuni o le faatuatua”

Pe a iā i tatou le faatuatua ua mausalī ona faavaeina, o le a faapefea ona tatou gaoioi ai pe a fetaiaʻi ma ni taumafaiga ua fuafua e faatupu ai so tatou masalosalo pe matataʻu ai? (2 Tupu 6:15-17; 2 Timoteo 1:12)

 “Puloutau o le faaolataga”

Ua faapefea ona fesoasoani le faamoemoe o le olataga i se tasi, ina ia lē maileia ai i le soona popolevale i meafaitino? (1 Timoteo 6:7-10, 19, LT)

“Pelu a le Agaga”

O le ā e ao ona tatou faalagolago pea i ai, a o tetee atu i mea e osofaʻia ai lo tatou itu faaleagaga po o le itu faaleagaga o isi? (Salamo 119:98; Faataoto 3:5, 6; Mataio 4:3, 4)

O le ā le isi mea e matuā tāua ina ia taulau manuia ai i le taua faaleagaga? O le ā le tele e tatau ona faaaogā ai? Mo se lelei o ai? (Efeso 6:18, 19, LF)

15. E mafai faapefea ona tatou tausolomua e gaoioi i le taua faaleagaga?

¹⁵ Ona o i tatou o ni fitafita a Keriso, ua avea ai i tatou ma vaega o se ʻautau tele o loo auai i se taua faaleagaga. Pe afai tatou te mataala pea ma faaaogā lelei le ofutau atoatoa mai le Atua, o le a tatou lē āfaina ai i lenei taua. Na i lo lea, o le a avea i tatou o se fesoasoani faalaeiau i o tatou uso a auauna a le Atua. O le a tatou nofosauni ma naunautaʻi e tausolomua e gaoioi, ma folafola le tala lelei o le Malo Faa-Mesia o le Atua, le pulega faalelagi lea o loo matuā lilivau Satani e tetee atu i ai.

Talanoaga Autalu

• Aiseā e matuā solitū aʻiaʻi ai pea tagata tapuaʻi a Ieova i feteenaʻiga a le lalolagi?

• O ā nisi o mailei taufaasesē ua faaaogā e Satani e faaleagaina ai le tulaga faaleagaga o Kerisiano?

• Ua faapefea i le ofutau faaleagaga mai le Atua ona leoleomaluina ai i tatou i la tatou taua faaleagaga?

[Fesili mo le Suʻesuʻega]

[Ata i le itulau 76]

Ua faapotopotoina atunuu iā Amaketo