Mataupu Luasefulutasi

Ua Oo le Fuafuaga a Ieova i le Manuia Faamamaluina

1, 2. (a) O le ā le fuafuaga a Ieova mo ana foafoaga atamamai? (e) O ai sa aofia i le aiga autasi o ē tapuaʻi i le Atua?

UA AUTASI foafoaga atamamai uma e tapuaʻi atu i le Atua moni e toʻatasi, ma ua maua e i latou uma le saʻolotoga mamalu o ni fanau a le Atua—o le fuafuaga alofa lenā a Ieova. O le faanaunauga sili foʻi lenā o ē e alolofa i le amiotonu.

² Na amata ona faataunuuina e Ieova lenei fuafuaga sili ina ua amata ana galuega o le foafoaga. O lana uluaʻi foafoaga, o lona Alo lea, o lē e talu mai lava le taimi o lona toetū, ua avea ai “o le pupula o [le] mamalu [o le Atua] ma ua matuā tusa lava ma ia.” (Eperu 1:1-3) Sa tutasi lenei Alo talu ai na foafoaina toʻatasi e le Atua. Mulimuli ane, o le Alo lenei na faaauala mai ai le faia o isi uma mea: muamua o agelu i le lagi, ona sosoo lea ma tagata i le lalolagi. (Iopu 38:7; Luka 3:38) O i latou uma nei sa faia aʻe ai le aiga aoao e tasi. E ioe i latou uma, o Ieova o le Atua lea, o le Pule Silisili Ese Aoao, ma o lo latou Tamā e alofa.

3. (a) O le ā ua tuufaasolo mai iā i tatou uma mai o tatou uluaʻi mātua? (e) O le ā le sauniuniga alofa na faia e Ieova mo le fanau a Atamu?

³ Ina ua faasalaina i le oti o tatou uluaʻi mātua ona o ni ē sa agasala ma le loto i ai, sa tutuliesea i laʻua mai Etena ma faatōina e le Atua. Sa lē toe avea i laʻua o  se vaega o lona aiga i le vateatea aoao. (Kenese 3:22-24; Teuteronome 32:4, 5) Na tatou tupuga uma mai lava iā i laʻua, o lona uiga ua tatou fananau uma mai ma ni uiga agasala. Peitaʻi na silafia e Ieova e iai nisi mai le fanau a Atamu ma Eva o le a fiafia i le amiotonu. O lea na Ia faia ai ma le alofa se sauniuniga, ina ia mafai e i latou nei ona maua “le saolotoga o le fanau a le Atua e manuia ai.”—Roma 8:20, 21.

Ua Lē Toe Iai Isaraelu i se Tulaga Taʻuleleia

4. O le ā le faaeaga na tuuina atu e Ieova iā Isaraelu anamua?

⁴ Pe tusa ma le 2,500 tausaga talu ona māeʻa le foafoaina o Atamu, na tuuina atu e Ieova i nisi tagata le faaeaga o le iai o sa latou faiā faapitoa ma Ia. Sa ia filifilia Isaraelu anamua e avea ma ona nuu ma foaʻiina mai iā i latou ana Tulafono. (Kenese 12:1, 2) Na ia faamaopoopoina i latou e avea o se nuu, ma sa faaaogā e faataunuuina lana fuafuaga. (Teuteronome 14:1, 2; Isaia 43:1) Ae peitaʻi, sa saisaitia pea i latou i le agasala ma le oti, o lea na lē maua ai e i latou le saʻolotoga mamalu lea na muaʻi iai iā Atamu ma Eva.

5. Na faapefea ona lē toe iai i le fanauga a Isaraelu so latou tulaga faapitoa ma le Atua?

⁵ E ui i lea, sa maua e le fanauga a Isaraelu se tulaga taʻuleleia i le silafaga a le Atua. Sa iā i latou foʻi le tiute tauave ina ia faaaloalo iā Ieova o lo latou Tamā, ma ia galulue e tusa ma lana fuafuaga. Na faamamafa mai e Iesu le tāua o lo latou faataunuuina o lenā avega tauave. (Mataio 5:43-48) Peitaʻi ane, sa leʻi taulau ona faia e le nuu o Isaraelu lenei mea. E ui ina sa faapea mai na tagata Iutaia “e tasi lo matou Tamā, o le Atua lea,” ae na taʻutino atu i ai e Iesu, o a latou amioga ma o latou uiga e faaalia mai ai le sesē o lenā manatu. (Ioane 8:41, 44, 47)  I le 33 T.A., na soloia ai e le Atua le Tulafono, ma muta ai foʻi ma lana faiā faapitoa ma Isaraelu. Ae pe o le uiga ea o lenei mea, e lē o toe mafai ona maua e tagata se faiā lelei ma le Atua?

Le Aoaoina ‘o Mea o i le Lagi’

6. O le ā le fuafuaga o le “pulega” lea e taʻua e Paulo i le Efeso 1:9, 10?

⁶ Na faaalia e le aposetolo o Paulo, e mafai e nisi o le fanau a tagata ona maua se faiā faapitoa ma le Atua. Mo se faaaʻoaʻoga, i le faatulagaga a Ieova lea e mafai ai e i latou e faaalia le faatuatua, ona avea ma tagata o Lona ʻauaiga, na tusi mai Paulo e faapea: “Ua faailoa mai [e le Atua] ia te i tatou le mea lilo sa i lona finagalo, e tusa ma lana lava pule tunoa, na ia tuu ai i lona lava finagalo; ina ia na faaopoopoina ia Keriso i le sauniuniga [“pulega,” NW] i le faaatoaga o tausaga, o mea uma lava o i le lagi, atoa ma mea o i le lalolagi.” (Efeso 1:9, 10, LF) O loo faaautū atu lenei “pulega” iā Iesu Keriso. O ia ua mafai ai ona aumaia tagata i se tulaga lelei i luma o le Atua. Ua maua e se vaega faatapulaa o i latou le faamoemoe o le ola i le lagi. E sili atu ona toʻatele le aofaʻi o i latou o le a ola e faavavau i le lalolagi.

7. O ai e faasino i ai ‘mea o i le lagi’?

⁷ Muamua, na amata mai i le Penetekoso 33 T.A., ona uaʻi atu manatu i ‘mea o i le lagi,’ o lona uiga, o i latou o le a fai ma suli faatasi ma Keriso i le Malo faalelagi. Ona o lo latou faatuatua i le tāua o le taulaga a Iesu, na taʻuamiotonuina ai i latou e le Atua. (Roma 5:1, 2) Mulimuli ane, na faaaofia ai tagata Iutaia ma tagata o Nuu Ese, ma maua ai le aofaʻiga e 144,000 “o mea uma lava o i le lagi.” (Kalatia 3:26-29; Faaaliga 14:1) E na o se vaega o i latou o loo totoe pea i le lalolagi.

 Le Aoaoina o “Mea o i le Lalolagi”

8. O ai e faasino i ai “mea o i le lalolagi,” ma o le ā la latou faiā ma Ieova?

⁸ O le pulega lava lenā o loo aoaoina ai foʻi “mea o i le lalolagi.” E faitau miliona tagata ua aoaoina nei mo le faamoemoe ina ia ola e faavavau i le lalolagi. I le autasi ma le vaega totoe o suli o le Malo, ua latou viia ai le suafa o Ieova ma faasilisilia lana tapuaʻiga. (Isaia 2:2, 3; Sefanaia 3:9) Ua latou taʻua foʻi Ieova o le “Tamā” auā e latou te ioe o ia o le puna o le ola. Ma ua latou olioli i se tulaga taʻuleleia i ona luma ona o lo latou faatuatua i le toto maligi o Iesu. (Faaaliga 7:9, 14) Peitaʻi, talu ai o loo iai pea i latou i se tulaga lē lelei atoatoa, o le a faatoʻā taʻua atoatoa ai i latou i le lumanaʻi, o fanau a le Atua.

9. O le ā le folafolaga ua taʻu mai e le Roma 8:21 mo tagata?

⁹ O i latou e faamoemoe e ola i le lalolagi, o loo faatalitali atu nei ma le naunautaʻi i le taimi o le a ‘tuusaunoa ai tagata mai le faapologaina e le iu vale.’ (Roma 8:21) O lenā faasaʻolotoga o le a amata pe a faamutaina e Keriso ma ana ʻaufaalelagi le puapuaga tele, e ala i le tumutumuga iā Amaketo. O lona uiga, o le faaumatiaga o le faiga aoao o mea amioleaga a Satani, ona sosoo lea ma le oo mai o faamanuiaga o le Pulega a Keriso mo le Afe Tausaga i le mana o le Malo.—Faaaliga 19:17-21; 20:6.

10. O le ā le pese o viiga o le a usuina e auauna a Ieova?

¹⁰ Maʻeu le mataʻina o le a iai pe a oo ina autasia auauna a Ieova o i le lalolagi, ina ia faaleo atu saafiafiga a ana auauna o i le lagi, o ē o loo alalaga fiafia: “Le Alii e, le Atua e ou le malosi uma lava, Ua tetele au galuega e ofo ai! E tonu ma faamaoni ou ala, Le Tupu o augātupulaga e! Le Alii e, o ai se le mataʻu ma vivii atu i lou suafa? Auā ua na o oe e paia; Auā e o mai nuu uma lava,  ma latou ifo i ou luma; auā ua faaalia au faamasinoga tonu.” (Faaaliga 15:3, 4, LF) Ioe, o auauna uma lava a Ieova o le a autasi e tapuaʻi atu i le Atua moni e toʻatasi. E oo lava i ē ua maliliu o le a toe faatutūina aʻe ma maua se avanoa e faatasia ai ina ia sii aʻe o latou leo i le viiaina o Ieova.—Galuega 24:15.

Se Saʻolotoga Ofoofogia i le Lumanaʻi

11. O le ā le saʻolotoga ofoofogia o le a maua e i latou e faasaoina mai le puapuaga tele?

¹¹ Pe a uma ona faamamā ese tagata amioleaga mai le lalolagi, e le puapuaga tele ma lona tumutumuga iā Amaketo, o le a lē toe avea loa Satani le Tiapolo o “le atua o le lalolagi nei.” O le a lē toe manaʻomia e tagata tapuaʻi a Ieova ona latou tetee atu i taaʻiga leaga a Satani. (2 Korinito 4:4; Faaaliga 20:1, 2) O le a lē toe faia e lotu sesē ni pepelo e uiga iā Ieova, ma lē toe avea o se taaʻiga e faatupuina fevaevaeaʻiga i olaga o tagata. O le a lē toe oo i auauna a le Atua moni ni faiga lē faamasinotonu pe toe faileagaina e pule faaletagata. Maʻeu se saʻolotoga ofoofogia o le a iai!

12. O le a faapefea ona faasaʻolotoina tagata uma mai le agasala ma ona aafiaga?

¹² Ona o Iesu o “le Tamai mamoe a le Atua, na te aveesea le agasala a le lalolagi,” o le a ia faaaogā ai le tāua o lana taulaga ina ia soloiesea agasala a tagata. (Ioane 1:29) A o iai Iesu i le lalolagi ma sa faamagaloina agasala a se tagata, ona ia faamālōlōina lea o lenā tagata e fai ma faamaoniga o lea mea. (Mataio 9:1-7; 15:30, 31) O le a faapena foʻi ona faamālōlōina faavavega e Keriso Iesu, o le Tupu faalelagi o le Malo o le Atua, o ē tauaso, o ē gūgū, o ē logonoa, o ē ua lē atoatoa vaega o o latou tino, o ē ua āfaina o latou mafaufau, ma i latou o loo  aafia i so o se isi lava maʻi. (Faaaliga 21:3, 4) O le a aveesea le “tulafono a le agasala” mai tagata usiusitai uma, ina ia avea o latou mafaufauga ma gaoioiga o ni mea e faafiafiaina ai i latou faapea foʻi ma le Atua. (Roma 7:21-23) E oo atu i le faaiʻuga o le Meleniuma, ua iai i latou i le tulaga o ni tagata lelei atoatoa, ma i le ‘faatusa ma le foliga’ o le Atua moni e toʻatasi.—Kenese 1:26.

13. I le faaiʻuga o le Pulega Faa-Meleniuma, o le ā le gaoioiga o le a faia e Keriso, faatasi ai ma le ā le iʻuga?

¹³ Pe a uma ona aumaia e Keriso tagata i le lelei atoatoa, ona ia toe faafoʻi atu lea i le Tamā le pule lea na faaee ane iā te ia mo le faatinoina o lenei galuega: “E tuuina atu . . . e ia le malo i le Atua, o le Tamā lea, pe a uma ona faaumatia e ia o alii sili uma, ma faipule uma, ma e malolosi. Auā e tatau ona pule o ia, seia tuuina e ia ona fili uma lava i lalo o ona vae.” (1 Korinito 15:24, 25) Ua faataunuuina atoatoa e le Pulega Faa-Meleniuma a le Malo lana fuafuaga; o lona uiga e lē toe manaʻomia ona iai pea lenei malo lagolago i le va o Ieova ma tagata. Ma talu ai o le a aveesea atoatoa le agasala ma le oti ma o le a togiolaina tagata, o le a muta ai foʻi la se manaʻoga mo le avea o Iesu ma Togisala. Ua faamatala mai e le Tusi Paia: “Ona tuuina i lalo foi lea o le Alo lava i le na tuuina i lalo ia te ia o mea uma, ina ia pule aoao le Atua i le aoao o mea.”—1 Korinito 15:28.

14. O le ā o le a oo i tagata lelei atoatoa uma, ma aiseā?

¹⁴ Pe a mavae lenā, o le a foaʻiina atu i tagata lelei atoatoa le avanoa, e faamaonia mai ai la latou filifiliga e auauna atu e faavavau i le Atua moni e toʻatasi. O lea, a o leʻi vaetamaina atoatoa e Ieova i latou e fai ma ana fanau, o le a toe faataga e Ieova se tofotofoga faaiʻu e faia mo na tagata lelei atoatoa uma. O le a tatalaina  Satani ma ana temoni mai le tō e lē gata. O le a lē āfaina ai fua i lenei mea i latou e alolofa moni iā Ieova. Peitaʻi so o se tasi o le a lē faamaoni ma lē usiusitai atu iā Ieova, o le a faaumatia loa e faavavau, faatasi ai ma lē na uluaʻi fouvale ma ana temoni.—Faaaliga 20:7-10.

15. O le ā le tulaga o le a toe iai foafoaga atamamai uma a Ieova?

¹⁵ Ona vaetamaina ai loa lea e Ieova tagata lelei atoatoa uma, o ē sa sapasapaia le pule silisili ese a le Atua, a o faagasolo le tofotofoga faaiʻu. E amata i lenā taimi ma faasolo atu, o le a latou matuā fiafia ai i le saʻolotoga mamalu o atalii o le Atua, o se vaega o le aiga aoao o le Atua. O le a autasi foafoaga atamamai uma i le lagi ma le lalolagi, ina ia tapuaʻi atu iā te ia, o le Atua moni e toʻatasi. O le a oo le fuafuaga a Ieova i le manuia faamamaluina! Pe e te manaʻo e avea oe ma vaega o lenā aiga aoao e fiafia ma tumau e faavavau? Afai e te manaʻo i ai, e matou te faalaeiauina oe ina ia teuloto le manatu o loo fai mai ai le Tusi Paia i le 1 Ioane 2:17 e faapea: “E mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”

Talanoaga Autalu

• A o leʻi tupu le fouvalega i Etena, o le ā le faiā sa iai a Ieova ma ona tagata tapuaʻi uma?

• O le ā le tiute tauave e paʻū atu i ē o loo auauna i le Atua?

• O ai i latou e leʻi oo i le taimi e avea ai ma fanau a le Atua, ma e faapefea ona fesootaʻi atu lenei mea i le fuafuaga a Ieova e tusa ai o le tapuaʻiga autasi?

[Fesili mo le Suʻesuʻega]

 [Ata i le itulau 190]

O le a ola fiafia tagata usiusitai i se parataiso i le lalolagi atoa