Mataupu 18

Le Manumalo o le Malo!

1. (a) O le ā le pogai mo le mauaina o le faamoemoega mautinoa i le lumanai o tagata? (e) O le ā le uiga o Amaketo mo ē o faaleagaina le lalolagi?

PO O le a faaumatia ea tagata mai lenei lalolagi? E leai. Ona o le Malo o le a lē faia ai faapea. Auā o le “Tupu o tupu ma le Alii o alii,” o Iesu ua faanofotupuina, o ia lea o le a na aaoina le “oo mai” o le Malo, le nutipalaina o le faalapotopotoga faalelalolagi a Satani ma ana faiga sauā. Ia Amaketo, o i latou o ē atonu e taumafai e faaleagaina le lalolagi, o i latou lava na o le a faaleagaina.—Faaaliga 11:15, 18; 14:19, 20; 19:11-16.

2, 3. (a) O le ā le lapataiga ua faaleoina mai i le valoaga a Sefanaia? (e) O le ā e manaomia ina ia faasaoina ai se tasi?

² O lo tatou Atua, o Ieova, ua ia lapataia i tatou ina ia tatou mataala pea i mea o le a ia faataunuuina ia Amaketo.

“O lenei ia outou faatalitali ia te au, o loo fetalai mai ai Ieova, ia oo i le aso ou te tulai atu ai i le vete; auā ua tonu ia te au e faapotopotoina nuu ese, e aofia lava malo; ina ia sasaa atu i luga ia i latou loʻu ita, o loʻu ita tele uma lava; auā e faaumatia le lalolagi uma i le afi o loʻu fuā.”

Peitai ane, o le a iai ē o le a faasaoina, e toatele i latou! Ma ua saunia e Ieova i latou, e pei ona faamatalaina i isi upu o lea valoaga:

 “Auā o ona po ia ou te liliu atu ai i nuu o le gagana lelei, ina ia latou valaau uma lava i le suafa o Ieova, ma auauna ia te ia ma le loto gatasi.”—Sefanaia 3:8, 9.

³ O le a avea ea la oe o se tasi o lena au faasaoina? Ioe, pe afai e te “valaau . . . i le suafa o Ieova.” E mafai faapefea ona e faia lenei mea? I le faia lea o le suiga i le “gagana lelei”—i le taliaina i lou loto o le tala lelei e faamamāina ai o le malo o le Atua, ma gaoioi loa i ai. (Mareko 13:10) Ona o le faatinoina o le faatuatua i sauniuniga a le Atua e ala ia Keriso, e tatau ai lava ona e faia e pei ona sa apoapoaiina ai e Peteru ona lava tagata i le 19 senituri ua mavae: “O lenei, ina salamo ia outou ma outou liliu, ina ia sōloiesea a outou agasala, ina ia oo mai ai o tausaga e filemu ai mai luma o le Alii [“Ieova,” NW].”—Galuega 3:19.

4, 5. (a) E mafai faapefea ona e maua se faiā mafana ma Ieova? (e) E mafai faapefea ona e tali atu i le “gagana lelei”?

⁴ I le pei o Iesu, e tatau ona e faaalia o oe lava ia e lē o se vaega o le lalolagi a Satani. (Ioane 17:14, 16) I le tuuina atu o oe lava ia Ieova e ala ia Keriso ma le uia foi i le papatisoga i le vai e fai ma faailoga e tusa o lena mea, e mafai ai ona e ulu atu i se faiā e sili ona mafana ma Ieova le Atua. (1 Peteru 3:21) E tatau lava ona e saili pea e faatupuina lenei sootaga mafana, a o e tautua i le Atua “ma le loto gatasi” faatasi ma ona tagata uma ua faamaopoopoina i le lalolagi. E tusa ai ma ou avanoa, o le a e fia galue faatasi ma i latou, i le faailoaina atu o “lenei tala lelei o le malo” i tagata uma lava o ē o le a faalogo.—Mataio 24:14; Roma 10:10-18; Eperu 13:15.

⁵ Po o oe ea o se tasi o lē ua tali atu i le “gagana lelei” o le upu moni o le Tusi Paia? O lea la, ia e faatuatua malosi ia Ieova. “O lē malosi ia; na te faaolaina.”—Sefanaia 3:17; Isaia 12:2-5.

6. O le ā le fautuaga matagofie na aumaia e Ioane, ma o le ā e ao ona faalaeiauina ai i tatou e fai?

 ⁶ A o e faatupuina le alofa mo Ieova ma lana amiotonu, e ao ona e ola ia talafeagai ma mataupu silisili o le Tusi Paia. Ua aumaia ai e le aposetolo o Ioane lenei fautuaga matagofie, e faapea:

“Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā, Auā o mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e le mai le Tamā ia, a e mai lenei lalolagi. O le a mavae atu foi lenei lalolagi atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioane 2:15-17)

“E faavavau”! Pe e lē avea ea lena ma mea e aogā ai ona faia le finagalo o le Atua ma le maelega i lenei vaitaimi o aso e gata ai o le faiga amioleaga a Satani? Pe ua lē faalaeiauina ai ea i tatou i nei “aso e gata ai” ina ia faalatalata atu pea i le faalapotopotoga a Ieova, e pei o lona sui i luga o lenei lalolagi, o le “auauna faamaoni ma le mafaufau”?—Mataio 24:45-47.

SE GALUEGA TELE

7. A mavae atu Amaketo, o le ā le mea o le a totoe?

⁷ A o maeʻa le taua o Amaketo, o le a iai pea le faalapotopotoga vaaia a Ieova, ua nofo sauni e faaaogāina i so o se auala lava na te faatonuina mai. Ma talosia ia mafai foi ona taʻuaogāina i tatou taitoatasi ina ia iai i inā!—Sefanaia 2:3; Salamo 25:8, 9, 20.

8. (a) O le ā la le mea o le a manaomia e faataunuuina ai le galuega a le Atua? (e) O le a saunia faapefea tagata o le Atua?

 ⁸ O le a manaomia e tagata o le Atua ona tumau i le maopoopo lelei i lalo o le pulega a le Malo ina ia faataunuuina ai le galuega tele o le faamatagofieina o le lalolagi ua faamamāina, i le faaliliuina o lo tatou lalolagi e avea moni ma “faatoaga o le Atua.” (Faatusatusa i le Esekielu 31:8.) Pe e te manao foi la e auai i lena galuega? O le uiga augofie ma le malosi mai le Atua o le a manaomia e faia ai lena galuega—o le maelega lava lena o loo faaalia nei e Molimau a Ieova i le ‘talaʻiina o lenei tala lelei o le malo i le lalolagi uma.’ O tagata uma o le a manaomia ona pei o tagata galulue aʻiaʻi i lalo o le faaaʻoaʻoga a le Tupu, o lē na faapea mai: “O loo galue loʻu Tamā e oo mai lava i le aso nei; o loo galue foi aʻu.”—Ioane 5:17; 4:34.

9. (a) O le ā le ituaiga o galuega o le a iai? (e) O le ā ua faaalia ai o lenei galuega e lē o se galuega fitā?

⁹ E lē taumatea, o le a anoanoai fuafuaga o le fausia o fale mo le lalolagi atoa—e lē o le fausiaina o ni poloka o ni aai matagā e nofo totogi ai, peitai o le teuteuina matagofie o alalafaga o aiga i siomaga faaparataiso. Ioe, o le a tele naunau galuega e fai, peitai o le a faia galuega e olioli ma fiafia i ai, o se galuega e aogā, lea na fai faatatau i ai e le Tupu o Solomona ana upu: “E leai se mea lelei” na i lo lenei, “ia taitasi le tagata ma ʻai, ma inu, ma fiafia i mea lelei i ana galuega uma.”—Failauga 3:12, 13; faatusatusa i le Isaia 65:17, 21-25.

10. O le ā ua faaalia e le Faaaliga 21:1-4 e uiga i tulaga o le a iai i inā?

¹⁰ I lalo o ā tulaga o le a tauaveina ai e “isi mamoe” a le Alii la latou galuega? (Ioane 10:16) Ua taʻu mai ia i tatou e le Faaaliga mataupu e 21 le mea tatou te mafai ona faatalitalia. Ua na faamatalaina mai ai “le lagi fou ma le lalolagi fou.” E lē toe pule faiga iʻuvale o malo faaletagata i le olaga nei, “auā ua mavae atu le uluai lagi ma le uluai lalolagi.” E faapena foi le Tiapolo ma ana mailei e faigata ona iloa, o le a aveesea. E lē toe iai se “sami” fenumiai o tagata, e fetosoaiina i lea mea ma lea mea a o latou tulimataia le amioleaga. Na i lo lena, o le a saunia se sosaiete toʻafilemu o tagata, “le lalolagi fou,” ua faamautū ai se faavae mausalī mo le faia o le finagalo o le Atua. O i inā e te mafai ai ona mulimulitui ma le faamaoni i faatonuga a le “lagi fou,” ua aofia ai le Tupu ma lana “faatoanofotane” o sui e 144,000. I le tulaga e pei o “le aai paia, o Ierusalema fou,” o lenei “faatoanofotane” tautupu o le a ‘alu ifo mai le lagi’ ina ia liuliualo atu ai i le galuega e toe fausia ai mea i le lalolagi. Maeu ni iʻuga fiafia o le a mauaina ai! E tusa ma le faamatalaga a Ioane:

 “Faauta ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:1-4.

11. (a) O ā ni faamanuiaga sili o loo faatalitali i ai le faitau miliona o ē faasaoina? (e) O le a faapefea ona faatumuina e le Atua le lalolagi i tagata?

¹¹ Matau mai, o loo aofia ai i lena folafolaga le faamanuiaga sili faapea “e leai foi se toe oti.” Ua iai le faamoemoe faapea e faitau miliona o le a latou maua le faaolataga e sao atu ai i le “puapuaga tele” e ulu atu ai i faamanuiaga i le “lalolagi fou.” (Faaaliga 7:9, 14) Ae peitai e faitau afe miliona, pe piliona, o le a olioli mulimuli ane i le olaga i inei i lalo o le Malo. Aiseā ua tatou faapea atu ai e faitau “piliona”? Ina ua mavae le lolo o aso o Noa, sa tuuina atu e Ieova i ē amiotonu na faasaoina se faatonuga, na faapea atu: “Ia outou fanafanau, ma ia uluola, ma ia tumu le lalolagi ia te outou.” Ua faauiga lenei mea i le faamanuiaga fiafia o le faaipoipoga a tagata ma le aumaia ai o ni fanau i le amiotonu mo sina vaitaimi pe a mavae Amaketo. (Kenese 9:1, 7; 10:1-32; Mataio 24:37) Ae ui i lea, e lē o le auala silisili lea a le Atua e ‘faatumuina ai le lalolagi’ i tagata i lena taimi. Pe faapefea la, ona faatumuina e le Atua lo tatou lalolagi i tagata, ma faataunuuina ai lana uluai fuafuaga? (Kenese 1:28; Isaia 45:18) O le a faia e ala i le toe fai e sili atu i le faitau piliona taimi, lana vavega sili o le toe faatutūina aʻe o tagata mai le oti.

 “LE ATUA . . . O E OLA”

12. O le ā le aʻoaʻoga a Iesu na maofa ai le motu o tagata?

¹² I se tasi taimi, na tali atu ai Iesu i ē na tetee ia te ia e faapea:

“A o le toe tutū mai o e ua oti, tou te le faitau ai ea le afioga a le Atua ia te outou, ua faapea mai, O aʻu nei o le Atua o Aperaamo, o le Atua foi o Isaako, o le Atua foi o Iakopo? o le Atua e le o se Atua ia o e ua oti, a o e ola.”

Mai i le silafaga a le Atua, o na tagata faatuatua sa pei o feola, ma o le a toe faatutūina mai i latou. Sa maofa lava le motu o tagata i lena aʻoaʻoga.—Mataio 22:31-33; Luka 20:37, 38.

13. O le ā le mea e mafai ona faatalitalia e uiga i “isi mamoe” faamaoni o ē ua maliliu?

¹³ O se mea lava e talafeagai lelei le faatalitalia faapea o na tagata faamaoni o ē na tumau i sauāga “ina ia maua e i latou le toe tu mai e sili ona lelei,” faatasi ai ma ē tausisi i le faamaoni o “isi mamoe” o ē atonu o le a maliliu i aso nei a o leʻi oo mai Amaketo, o le a latou maua se toetutū vave i le “lalolagi fou.” Atonu ua maliliu nisi e pele ia te oe, o nisi foi o auauna faatuatua a le Atua. Maeu le olioli o le toe feiloai atu ia i latou nei mai le oti, ma taʻu atu ia i latou le faiga sili a Ieova ina ia taʻuleleia ai o ia!—Eperu 11:35.

14. O le ā le faamoemoe ofoofogia ua faamatalaina mai i le Ioane 5:28, 29, ma le Faaaliga 20:11-13?

¹⁴ E ui i lea, ae faapefea isi tagata o ē na maliliu i le pe ua tali atoa nei le 6,000 tausaga i talafaasolopito? Ua fetalai mai Iesu: “Aua tou te ofo i lenei mea, auā e oo mai le aso e faalogo ai i lona leo i latou uma ua i tuugamau, ma latou o mai ai.” (Ioane 5:28, 29) “O e na oti, o tagatānuu atoa ma alii,” o le a ō mai nai tuugamau ina ia latou tutū i luma o le nofoalii o le faamasinoga a le Atua.—Faaaliga 20:11-13.

15. Aiseā o le a lē mataʻutia ai le taimi o le faamasinoga?

 ¹⁵ Po o le a avea ea lena ma taimi mataʻutia mo ē e toetutū mai? E ui lava i le mataʻutia o ata faalotu o le Faamasinoga Mulimuli, ae o le a avea lea aso ma taimi e sili ona olioli ai. Auā o i latou ia ua toe faatutūina aʻe o le a lē faamasinoina e tusa ma a latou  galuega leaga o aso ua tuanai, peitai, na i lo lena, o le a faamasinoina i latou e tusa ma lo latou lotomalie e ola ai i tulaga amiotonu e manaomia mo le ola i lalo o le malo o le Atua. (Faatusatusa i le Roma 6:7.) Ma o le a faia taumafaiga uma lava e fesoasoani ai ia i latou e agaʻigaʻi atu ai i le ala o le leleiga atoatoa ma le Atua. O le a faia ai le polokalama sili tauaʻoaʻoga i taimi uma i lalo o le faalapotopotoga a le Malo.

16. (a) O ā na “tusi”? (e) Aiseā o le a sili ai ona maoaʻe aʻoaʻoga i le “lalolagi fou”?

 ¹⁶ O le a tatalaina “tusi.” O na faatonuga o le a faasalalauina e fesoasoani ai i tagata o le a toe faatutūina aʻe e faia “a latou amio” ina ia agavaa ai i latou mo le ola e faavavau. (Faaaliga 20:12) O mea uma mo polokalama tauaʻoaʻoga i le “lalolagi fou,” e faatonutonuina e Ieova ma lana Tupu faa-Mesia, o le a sili ona maoaʻe pe a faatusatusa atu i so o se mea lava na ofoina mai e le lalolagi a Satani.

FAAMANUIAGA MO LE “MOTU O TAGATA E TOATELE”

17. Pe a e faasaoina atu i lena “lalolagi fou,” o le ā le mea o le a manaomia ona e fai?

¹⁷ Peitai ane, afai o oe o se tasi o le “motu o tagata e toatele” o le a faasaoina ia Amaketo, e aofia faapefea oe i lenei ata? Na faapea mai le aposetolo o Paulo: “Auā faapei ona oti uma ia Atamu, e faapea foi ona faaolaina uma ia Keriso.” (1 Korinito 15:22) O le a e manaomia foi le aogā o le togiola a Keriso, lea o le a ia faaaogāina e faatutūina aʻe ai tagata i le lelei atoatoa i le 1,000 tausaga o lana pulega. O le a manaomia foi ona e faaavanoaina oe e oe lava i le aʻoaʻoina o na “tusi” faameleniuma, ina ia e faamaoni ai i au “amio” ma iʻu atu ai i le tusia o lou igoa i “le tusi o le ola.”

18. O le ā le polokalama a le Malo o le a aumaia ai le olioli faapitoa?

¹⁸ I aso nei, o lou faiʻai faaletagata lē lelei atoatoa e mafai ona ia taliaina ma taofia na o sina vaega o lona atamai atoa. Atonu ua faalogoina o e faapea, ‘Pe ana ou manatuaina!’ Maeu la le tatau ona e faafetai i le togiola a Keriso! Auā, o se vaega o le polokalama a le Malo mo le faaleleia o tagata o le a lē gata i le aveesea o tiga o le tino ma mafatiaga,  peitai—o le a faaleleia atoatoa le foafoaga ofoofogia—o le mafaufau o le tagata, mo le suesueina ma le taofia ai o faamatalaga, fefuafuatai ai, ae o le sili atu i nei mea uma, o le talisapaia ai i le itu tau tapuaiga uiga sili o lo tatou Atua o Ieova. O le a aveesea ai eseesega o gagana, ia na iʻu i ai ona o le faaeseesega o gagana i le ʻolo o Papelu, ma o le a aʻoaʻoina tagata uma i le gagana e tasi ina ia tapuai faatasi ai i latou ia Ieova i le autasi, e pei ona faauiga i ai i le Sefanaia 3:9.

19. O le ā le olioli o le a tofutofusia ai tagatanuu o le Malo?

¹⁹ O loto lelei atoatoa o tagata, o le a faagaeetia e le alofa i le Atua ma tuaoi. E lētioa ona fetalai le Alii Silisiliese o Ieova i nei upu i ona tagata loto talisapaia e faapea:

“Auā faauta mai, ou te faia le lagi fou ma le lalolagi fou; e le toe manatua mea na muamua, e le alu ae foi i le loto. A e peitai ia outou olioli ma fiafia e faavavau i le mea ou te faia; auā faauta, ou te faia Ierusalema ma faafiafia, ou te faia foi lona nuu ma faaolioli. Ou te fiafia foi i Ierusalema, ma aʻu olioli i loʻu nuu; e le toe lagona ai le leo o sē tagi, ma le leo o sē alaga.” (Isaia 65:17-19)

O le olioli matagofie ma le faaneetaga a le 144,000 o tupu lagolago faatasi ma Keriso i lona malo, o le a sulugia mai i le faitau piliona o tagatanuu o le Malo i luga o le lalolagi, a o faasolosolo atu i latou nei i le lelei atoatoa faaletagata.

 UA FAAPAIAINA E FAAVAVAU LE SUAFA O IEOVA

20. (a) Aiseā o le a vave mavae atu ai le 1,000 tausaga? (e) Na faapefea ona faamanū atu Tavita ia Ieova? (i) O uunaia ea oe i faaupuga tutusa faapena o faaneeneega?

²⁰ O le a mavae atu tausaga e afe, e pei lava o se aso se tasi i le silafaga a Ieova, ma maeu le puupuu o le a foliga mai ai foi lena vaitaimi i tagata, ia o loo matuā pisi tele i galuega tau atinaʻe! (2 Peteru 3:8) Tatou te mafai foi ona faatalitalia le iai o le taimi e mapu ai mo faatasitasiga fiafia ma faamalositino e faafouina ai, o le olioli i musika, atoa ma isi faiva aogā, ma o le a maua pea fuafuaga mo le tapuaiga i Lē Sili na Foafoaina i tatou. O le a mananao tagata uma lava e faamanū atu ia Ieova, e pei ona sa faia e Tavita i le faia o fuafuaga mo le tapuaiga i le malumalu, e faapea:

“Ieova e, e ou le silisili ese, ma le malosi, ma le matagofie, ma le mamalu, ma le malualii; auā o ia te oe mea uma o i le lagi ma le lalolagi; Ieova e, e ou le malo, o faasilisili oe e silisili i mea uma lava. Mai ia te oe le oloa ma le mamalu, o oe e te pule i mea uma lava; o i ai foi i lou aao le mamana ma le malosi, o ia te oe foi e faateleina ma faamalosia tagata uma lava. O lenei, lo matou Atua e, ua matou faafetai atu ia te oe, ma vivii atu i lou suafa mamalu.”—1 Nofoaiga a Tupu 29:11-13.

21. (a) O le a faapefea ona faamaeʻaina e Iesu lana pulega faameleniuma? (e) O ā mea o le a faataunuuina e le Malo?

²¹ Ina ia ōgatasi ma lenei faaupuga matagofie o faaneeneega, o ia Lē e sili ia Tavita, o Keriso Iesu, o le a na faamaeʻaina lana pulega faameleniuma o le filemu ma le toe fausiaina o mea i lona faia e pei ona sa muai taʻuina mai e le aposetolo o Paulo e faapea:

“Ona oo ai lea i le gataaga, e tuuina atu ai e ia le malo i le Atua, o le Tamā lea, pe a uma ona faaumatia e ia o alii sili uma, ma faipule uma ma e malolosi [o ē tetee].”

O le toe taimi lava lena o le a faaalia ai, o le pulega a le Atua, o le pulega tonu lava lea, ma e lava lona malosi e aumaia ai faamanuiaga e faavavau i tagata tapuai ia Ieova. I lalo ifo o le pulega agalelei a le Malo, o le a aveesea ai le oti mai ia Atamu ma o le a faaolaina tagata uma “ia Keriso.” O lea, o le faitau piliona o ē o le a soifua ai i inā i le lalolagi o le a “tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai.”—Roma 8:21; 1 Korinito 15:22-28.

22. (a) O le ā le vaitaimi puupuu o tofotofoga o le a mulimuli mai? (e) O le ā le gaoioiga mulimuli o le taʻuleleia o le a faatinoina e Iesu?

 ²² Mo sina vaitaimi puupuu lava, o le a toe tatalaina mai ai Satani mai le to e lē gata, ina ia tofotofoina tagata ua faaleleia atoatoa i le lalolagi e faatatau i le faamaoni i le tulaga tautupu o Ieova. O le a iai se aofaiga lē mautinoa atonu o le a latou filifili e mulimuli atu i le Tiapolo, ae peitai ane o le a vave lava ona faaoo atu ia i latou le faamasinoga. O le “fanau” a le “fafine” a le Atua, o Keriso Iesu lea, o le a ia faatinoina lava lana gaoioiga mulimuli o le taʻuleleia i lona tuʻimomomoina lea o le ulu o le Gata tuai, ma o le a faaumatia ai o ia ma lana fanau e pei ona faia atoatoa e se afi e tumau i “le ao ma le po e faavavau faavavau lava.” O le finauga sili la na lāgāina i Etena e uiga i le pulega aoao amiotonu a Ieova i luga o ana foafoaga ola o le a faamasinoina ma faaiʻuina mo taimi uma!—Faaaliga 20:7-10; Kenese 3:15.

23. (a) O le toe mafaufau i folafolaga a le Atua e tatau ona faapogaia ai i tatou e faia le ā? (e) Aiseā e ao ai ona tatou mananao e vaai atu ua ‘oo mai le malo o le Atua’?

²³ Pe a tatou toe mafaufau i folafolaga ofoofogia a le “Tupu o le vavau,” Lē Sili na Foafoaina i tatou, o le Alii Silisiliese o Ieova, pe e lē uunaia ai ea i tatou i le loto faafetai e faaneenee i lona suafa? Pe e lē uunaia ai ea i tatou e pei o nisi i le aso o le Penetekoso, e tautatala e uiga “i vavega o le Atua,” e uiga i lana “Tupu o tupu” ma le Malo faa-Mesia? (Galuega 2:11; Faaaliga 15:3; 19:16) Pe e lē uunaia ai ea i tatou ina ia tatalo i lo tatou Tamā faalelagi e faapea, “IA OO MAI LOU MALO”? (Mataio 6:9, 10) Ioe, “IA OO MAI,” e faaumatia ai galuega a Satani ma lana faalapotopotoga mai le lalolagi! Ioe, “IA OO MAI,” e saunia ai mo tagata uma le ituaiga tonu o pulega! Ioe, “IA OO MAI,” na te aumaia le pulega mamalu i le meleniuma mo le toe faafoisiaina mai o le parataiso, o le toe faatutūina mai o ē oti atoa ma le siitiaina o tagata uma ua loto malilie i le lelei atoatoa faaletagata! Ioe, “IA OO MAI,” ina ia faapaiaina ai le suafa lē mafaatusatusalia o Ieova e faavavau, faavavau lava!

[Fesili mo le Suʻesuʻega]

[Ata i le itulau 180, 181]

I le lalolagi fou, o fanau o le a ola mai i le amiotonu o le a lē oo i ai ni faanoanoaga lea o loo pagatia ai aiga o aso nei