Mataupu 11

Tala Faatusa o le Malo

1. Aiseā ua avea ai faataoto a Iesu ma naunautaiga mo i latou uma o ē auauna i le Atua?

AO MAFUTA o ia ma ona soʻo, sa fetalai ai Iesu i faataoto e tele po o tala faatusa. Ua faaalia ai i na mea po o le ā e aafia i le avea ma sui i le malo o le lagi. E faasino mai e na mea le ala e tatau ona uia e le “lafu mamoe itiiti” o suli o le Malo, atoa foi ma i latou o ē o le a maua le ola e faavavau i luga o le lalolagi i lalo o lena malo. Ua olioli foi, “isi mamoe,” e malamalama i valoaga e faatatau i le Malo, ma latou te tatalo ai ma le naunautai mo le “oo mai” o lea malo.—Luka 12:32; Ioane 10:16; 1 Tesalonia 5:16-20.

2, 3. (a) Aiseā na faaaogā ai e Iesu tala faatusa? (e) Aiseā na lē taulau ai ona malamalama isi tagata e ese ai mai i ona soʻo? (i) Aiseā e tatau ai ona tatou suesue ma le filigā le Afioga a le Atua, e lē pei o i latou ia o loo faamatalaina mai i le Mataio 13:13-15?

² Ina ua uma ona ia fetalaia atu se tasi o nei faataoto i tagata, ona ō ane ai lea o soʻo o Iesu ia te ia ma fesili atu e faapea: “Se a le mea ua e fetalai atu ai ia te i latou i faataoto?” Na tali atu Iesu e faapea:

“Ua foaiina atu ia te outou ia outou iloa mea lilo a le malo o le lagi, a ua le foaiina atu ia te i latou.” (Mataio 13:10, 11)

 Ma aiseā na leʻi faatagaina ai i latou? Auā sa latou leʻi loto malilie e matuā suesue ma ia maua le uiga sili ona loloto o ana fetalaiga, ina ia faapea ona faagaeetia ai o latou loto e gaoioi mo le “tala lelei.” Sa latou lē manatu i le Malo faapea o se “oa” po o se “penina tau tele.”—Mataio 13:44-46.

³ Sa sii mai e Iesu le valoaga a Isaia faapea ua faataunuuina i na tagata lē talitonu, i le fetalai atu faapea: “E faalogo lava outou, a e tou te le lagona; e matuā vaavaai foi outou, a e tou te le iloa. Auā ua mafiafia loto o lenei nuu, ma ua faalogo gata o latou taliga i faalogo, ua moeiini foi o latou mata; neʻi vaai o latou mata, ma faalogo o latou taliga, ma lagona o latou loto ma liliuina i latou, ma ou faamaloloina i latou.” (Mataio 13:13-15) E tatau ia i tatou ona mananao e ʻalo ese ia lē amio e pei o na tagata lē loto faafetai. O lea la, seʻi o tatou matuā taumafai ina ia suesue le Afioga a le Atua.

4. (a) O ā ituaiga o loto ua lē taulau ona maua ai se mea mai lea upu? (e) Atonu e mafai faapefea ona faamanuiaina i tatou pe afai tatou te tauivi ia maua le uiga o lea upu?

⁴ I lana faataoto na amata mai i le Mataio mataupu e 13:3-8, na faamatalaina ai e Iesu ia lava o se “tagata lulu” saito. Na te luluina “le upu o le malo” i ituaiga eseese o loto. O loto o nisi tagata e pei o le eleele i autafa o le ala. A o leʻi mauaa le fatu, a ua auina mai e le Tiapolo ona tagata e pei ni “manu felelei” e aveese “le upu nai o latou loto, neʻi faatuatua ma faaolaina i latou.” O isi loto ua pei o le eleele i le mea papa. I le amataga, latou te talia ai le upu ma le olioli, ae e oo ina mamae le laau muʻamuʻa i lalo o tofotofoga po o sauāga. O nisi saito e pauu i le ogatotonu o le “vao tuitui,” le mea e fetinaʻina ai i “mea e popole ai, ma oloa, ma mea faafiafia o le olaga nei.” Ae peitai, o loo iai foi le “saito” ua luluina i le ituaiga lelei o eleele!

“O ia lea ua faalogo i le upu, ma lagona ai; ua fua mai lava ia, e taiselau i nisi, e taiono gafulu i nisi, e taitolugafulu foi i nisi.” (Mataio 13:18-23; Mareko 4:3-9, 14-20; Luka 8:4-8, 11-15)

 Ioe, o le a faamanuiaina i tatou ma o le a matuā fua tele mai la tatou auaunaga paia i lo tatou Atua pe a tatou talia le upu i totonu o o tatou loto talisapaia ma tatou matuā galulue mo le malo o le Atua!

LE ISI “TAGATA LULU”

5. (a) I le ā le isi tala faatusa ua faalaeiauina ai nei i tatou ia uaʻi atu i ai? (e) Aiseā e lē mafai ai ona faapea o lenei “tagata” o le Alii o Iesu?

⁵ E na o le faamatalaga lava o le Evagelia a Mareko, o loo mulimuli atu i lenei faataoto e uiga i le “tagata lulu” i se tala faatusa o loo aafia ai se isi “tagata lulu” e ese foi. A o leʻi tuuina atu lenei tala faatusa, sa taʻu atu e Iesu i ona soʻo, ina ua na o i latou lava e faapea: “Ia outou i mea tou te faalogo i ai.” Ona ia faafetaui atu lea i lenei faataoto, i le faapea atu:

“O le malo o le Atua ua faapei o le tagata ua na luluina saito i le eleele. Ua moe foi o ia i le po, ma ala i le ao; a ua totogo ae le saito, ma tutupu, ua na le iloa pe na faapefea ia.” (Mareko 4:24-27)

E manino lava, o lenei “tagata” ua lē o le Alii mamalu o Iesu Keriso, auā na te lē toe manaomia ona tofā umi i se po i le lalolagi. E lē saʻo foi ona faapea atu o le Alo o le Atua, o lē na galulue faatasi ma lona Tamā i le foafoaina o mea uma, na te “le iloa” pe na faapefea ona tutupu aʻe ia mea. (Kolose 1:16) O lea, ona o mea ua faamatalaina i lenei mataupu atoa, tatou te talisapaia ai faapea o le “tagata,” ua faasino atu lea i Kerisiano taitoatasi o ē e ao ona ‘uaʻi’ atu i mataupu tau le “malo o le Atua.”

6. O ā mea e lua e tatau i “tagata lulu” taitoatasi ona vaai i ai, ma aiseā?

⁶ E tatau i “tagata lulu” taitoatasi ona mataʻia lelei po o ā ona uiga totino o loo ia lulu ai, atoa foi ma le siosiomaga o loo ia lulu ai. Auā a aunoa ma lo  tatou iloa, ona ono mafai lea e le tuputupu aʻe o o tatou uiga totino ona aafia ai mo le lelei pe mo le leaga, e tusa ai ma le “eleele” po o le ituaiga o tagata o ē o tatou auaufaatasi a o tatou taumafai ia atiina aʻe uiga faa-Kerisiano—e tusa lava po o i fafo po o i totonu o le faapotopotoga. (Faatusatusa i le 1 Korinito 15:33.) Mulimuli ane, o le a aliali aʻe “saito matua” i lona tumutumu, ona tatou selesele lea ma le tusa i ai. (Mareko 4:28, 29) Maeu le tāua faapea o i latou o le “lafu mamoe itiiti,” ma tagata uma lava o ē aapa atu i le ola e faavavau i le fuafuaga a le malo o le Atua, ona vaai po o ā ma i fea foi ua latou lulu ai e faatatau i le atiina aʻe o uiga totino ia pei o Keriso!—Efeso 4:17-24; Kalatia 6:7-9.

SE MALO FAATAGAFAI

7. Ua fesoasoani mai faapefea faataoto eseese ia i tatou i la tatou vaaiga i le Malo?

⁷ Ua faamatala mai e le tala a Mareko sa toe fetalai atili atu faapea Iesu:

“Se a se mea tatou te faatusa i ai le malo o le Atua? se a foi se faataoto tatou te faatusaina ai?” (Mareko 4:30)

Ona ia valaaulia lea o i tatou ina ia vaai i le Malo i se faatulagaga ese. E moni lava, ua fesoasoani mai nei tala faatusa ia i tatou ia matamata ai i le Malo mai itu eseese, e pei ona atonu tatou te asiasi ai i se fale i ona itu i fafo ma itu foi i totonu, ma faapea foi i isi itu eseese uma.

8. (a) Aiseā e lē mafai ai ona faatatau le tupu aʻe uigaese mai le fua o le sinapi i suli o le Malo? (e) Aiseā ua fetaui lelei ai lenei mea mo le “malo” o Kerisinetoma? (i) E faapefea i le faamatalaga a le Atua i le nuu aposetate o Isaraelu ona lagolagoina lenei manatu?

⁸ O lea la, i le ā e tatau ona tatou faatusa i ai le malo o le Atua? Ona tali mai lea o Iesu:

“E tusa ia ma le fua o le sinapi; a totōina i le eleele, e sili ona laitiiti i fua uma e tutupu i le eleele. Pe a totōina foi, ona tupu ae lea, ua avea foi ma laau tele, e sili i laau uma e afu, ua fai foi ōna la tetele, e mafai ai manu felelei ona momoe i lalo o lona paolo.” (Mareko 4:30-32)

O se tuputupu aʻe e matuā uigaese lenei—ma e moni lava, e faatatau i se mea e sili mamao atu lona telē na i lo le “lafu mamoe itiiti”  o le 144,000 o suli o le Malo, i latou na ‘faamaonia e le Tamā le tuuina atu i ai o le malo’! (Luka 12:32; Faaaliga 14:1, 3) Na i lo o lea, o le tupu aʻe lena o le “laau” tele faatagafai o Kerisinetoma e pei o se aposetasi mai le faapotopotoga na totōina e Iesu. (Luka 13:18, 19) E matuā telē! O lana gugutu e sili aʻe na i lo le 900,000,000 ona sui i le lalolagi aoao, o ē ua fai mai o le a maua e i latou le manuia i le lagi. O lenei malo aposetate ua leva ona uluai faaataata mai e le nuu solomuli i tua o Isaraelu, o ē na fetalai i ai Ieova e faapea: “Na ou totōina oe o le vine Soreka, o le fua e matuā moni lava; ua faapefea foi ona liua o oe ia te au ma lālā leaga o le vine ese?”—Ieremia 2:21-23; tagai foi i le Hosea 10:1-4.

9. (a) O ai “manu felelei” ma lālā o le “laau”? (e) E tusa ai ma faamatalaga i le 2 Tesalonia 1 ma le Mataio 7, aiseā ua tatau ai nei ona tatou tutū mamao ese mai lea “laau”?

⁹ E tusa ai ma le faamatalaga a Mataio e uiga i lenei “laau,” faapea “e o mai ai manu felelei, ma latou momoe i ona la.” E lē taumatea la e tutusa na manu ma “manu felelei” i le faataoto na taʻua muamua o ē na folopatatoina le “upu o le malo” ia na paʻūū i autafa o le auala. (Mataio 13:4, 19, 31, 32) O na “manu felelei” o loo lalafi i le faitau selau o lālā o lotu mavaevae o le “laau.” Ua fai i latou ma sui o le “tagata o le agasala” o lē ua aposetate, o le au failotu a Kerisinetoma. O le a leai ni o latou ofaga puipuia pe a tatuu i lalo e le Atua lea “laau,” faatasi ma isi lotu pepelo uma. Ia e tu mamao ese nei! Auā o le lafotuina i lalo o lena “laau” ua matuā lata mai lava!—Faatusatusa i le 2 Tesalonia 1:6-9; 2:3; Mataio 7:19-23.

10, 11. (a) O le ā le faamatalaga atoa o le mataupu ua aumaia ai e Mataio ma Luka i le faataoto o le “fua o le sinapi,” ma aiseā ua talafeagai lelei ai? (e) O le ā le apoapoaiga ma le lapataiga ua saunia e le faataoto o le Malo i le mea faafefete mo i tatou?

 ¹⁰ Ma le tusa lelei lava, ua aumaia ai e Luka le faataoto o le “fua o le sinapi” o se sosooga o le taʻuleagaina e Iesu o tagata lotu aposetate o ona aso. Ma i le peiseai o loo taumafai e faamamafaina le mea tāua, ona sosoo ai lea e Mataio ma Luka ona faamatala mai le tuuina atu e Iesu o le faataoto o le “mea faafefete.” (Mataio 13:32, 33; Luka 13:10-21) Ina ua faaaogāina faafaatusa le mea faafefete i le Tusi Paia, e iai pea lava sona uiga lē manaomia, e pei ona lapataia ai e Iesu ona soʻo “ia matuā ʻalo ese i le mea faafefete a le au faresaio ma le au satukaio,” ma ina ua faatonu atu e le aposetolo o Paulo Kerisiano ia faateʻa ese ai le “mea faafefete o le loto leaga ma le amio leaga.”—Mataio 16:6, 11, 12; 1 Korinito 5:6-8; Kalatia 5:7-9.

¹¹ Ua tautalagia i le tala faatusa se tasi vala e uiga i “le malo o le lagi” e faapei o le mea faafefete ua natia e se fafine i fua e tolu o le falaoa. Ona faapea ai lea ona avea le paluga atoa ma mea ua fefete. Ua faaataina mai ai i lea le faaleagaina faalilolilo o le faapotopotoga faatagā Kerisiano ona o aʻoaʻoga pepelo ma faiga faa-Papelonia, lea na iʻu ai i se fausaga matuā telē o le malo faatagafai o Kerisinetoma. E tatau ona avea lenei mea ma lapataiga mo i tatou. I le vaaia o le iʻuga leaga o le aposetasi i Kerisinetoma, e tatau ai ona faaeteete le “lafu mamoe itiiti” o suli o le Malo ma a latou aumea i aso nei, ina ia lē faatagaina le “mea faafefete” o aʻoaʻoga pepelo ma taufaasese na te faaleagaina o latou loto talisapaia i le mamā ma le moni o le “upu o le malo.”

 LE TAGATA LULU MA LONA ʻFILI’

12, 13. (a) I le faataoto e uiga i le “saito” ma le “titania,” ua faapefea ona faailoa mai ai e Iesu vaega autū? (e) O le ā le seleselega, ma o le ā le faamaoniga ua tatou vaai i ai faapea o loo faia i aso nei?

¹² I le isi tala faatusa na faatusaina ai e Iesu “le malo o le lagi” i “le tagata na luluina le saito lelei i lona fanua.” Ina “ua momoe tagata, ona alu ane ai lea o le ua ita mai [po o le fili] ia te ia, ua na luluina le titania i totonu o le saito, ona alu ese ai lea o ia.” O le ā la le ituaiga o fua e mafai ona faatalitalia mai lea fanua? Na faailoaina mai e Iesu lenei tagata lulu faapea o ia lava, “o le Atalii lea o le tagata,” o lē luluina saito o le Malo e iʻu i le fuaina mai o Kerisiano e pei o ni saito, “o tagata ia o le malo.” O le fili o “le tiapolo lea,” ma o le “titania” o “le fanau ia a le ua leaga”—o lana “fanau” faalotu pepelo lea. (Faatusatusa i le Kenese 3:15.) I le faataunuuga, ua ola aʻe ai pea nisi Kerisiano moni i totonu o le faaputuga fevaevaeai o “titania” o lea ua faailogaina ai le aposetasi tele na amata mai i le uluai senituri. Peitai i lo tatou nei 20 o senituri, ua tatou oo mai ai i le taimi o le seleselega—“o le gataaga lea o le lalolagi; o e selesele, o agelu ia”!—Mataio 13:24-30, 36-39.

¹³ I le faaiʻuga, i lalo o le faatonutonuga faaagelu, ua vavaeeseina ai le “saito” mai le “titania.” Ua faaalialia ai le eseesega manino i le va o ia mea e lua. E pei ona o le a tatou vaai i ai, e anoanoai faamaoniga e iloa ai ua faatasi atu “le Atalii o le tagata” i lona Malo faalelagi i aso nei, ma ua ia aoaoina Kerisiano moni e pei o saito i gaoioiga a le Malo. Ae faapefea la i Kerisinetoma ma ona faiaʻoga aposetate? Ua toe faapea mai le faataoto a Iesu:

“E aauina atu e le Atalii o le tagata ana agelu, latou te faapotopotoina nai lona malo mea uma e tausuai ai ma ē amio leaga.”

 Mo le tele o senituri ua faatausuaiina ai e le au failotu a Kerisinetoma tagata loto faamaoni i a latou aʻoaʻoga sese ma le faaalia foi o lo latou fia mamalu i o latou foliga mai i fafo. Peitai ua latou ō mai i le faamasinoga a le Atua, ma ua ‘tagiauē ma lilivau o latou nifo.’ I aso nei ua latou tagiauē ona ua faaitiitia le lagolagosua mai a latou aulotu ma le fevaevaeai foi o a latou lava vasega. I le faaeseesega, o loo molimau atu nei ma le olioli auauna a Ieova o ē e pei ni saito e uiga i lona malo. O loo latou pupula atu “e pei o le la i le malo o lo latou Tamā.”—Mataio 13:40-43; faatusatusa i le Isaia 65:13, 14.

SE FUAFUAGA O SE FAIGA ʻFAIVA’ MANUIA

14, 15. (a) Na faapefea ona amata e Iesu se fuafuaga sili o faiga ‘faiva’, peitai o ā isi ituaiga o ‘faiva’ na faia talu mai lena taimi, ma o ā ‘iʻa’ na mauaina ai? (e) O le ā le vaega ua faia e agelu i lea taimi, ma e faapefea ona latou lafoaia “iʻa”? (i) Mo le ā le avanoa e tatau ai ona tatou loto faafetai?

¹⁴ Na fetalai Iesu: “E tusa foi le malo o le lagi ma le upega ua lafo i le vai, ua maua ai iʻa eseese uma.” (Mataio 13:47) Sa amata lava e Iesu lenei fuafuaga o le faiga ‘faiva,’ ina ua ia valaauina ona uluai soʻo mai o latou upega ina ia fai i latou ma “fai faiva i tagata.” (Mataio 4:19) Ae i le taimi o le aposetasi tele, i lalo o le vaavaaiga faaagelu na faaauau ai pea ona ‘fagogota’ vaega itiiti faamaoni eseese ma lotu a Kerisinetoma mo tagata ia liliu atu. Ae ui i lea, po ua liua uma ea le faitau selau miliona o mea i le sami faafaatusa o tagata ina ia avea ma ‘iʻa lelei’? E pei ona tatou matauina, ua faavae aʻe e lotu a Kerisinetoma a latou aʻoaʻoga i luga o le poto i mafaufauga filosofia faa-Eleni o Plato, ma i luga foi o “mea lilo” a Papelonia anamua. O loo vaaia o latou fua i le feitagai, le feavauaʻi ma le toto masaa ua taʻuleagaina ai le talafaasolopito a Kerisinetoma, atoa foi ma lo latou lagolagoina o taua a le lalolagi o lo tatou 20 o senituri.

 ¹⁵ O le iʻuga la, “i le gataaga o le lalolagi,” o le taimi lena mo agelu e toso aʻe ai le “upega.” Ua fai lenei ma faatusa o faalapotopotoga i luga o le lalolagi o ē e taofi faapea o i latou o ni soʻo o Iesu Keriso—o ē moni ma ē pepelo. O na “iʻa” na maua ua “leaga [lē fetaui]” mo “le malo o le lagi” e ao ona tatiaʻi ese ma lafo i totonu o “le ogāumu aasa” o le faaumatiaga. O i inā o le a “i ai le tagiaue ma le lilivau o nifo.” (Mataio 13:48-50) Peitai o loo tuueseeseina foi e agelu ‘iʻa lelei’ mai le upega faafaatusa. Maeu lo tatou loto faafetai e tatau ai ona o lo tatou avanoa ina ia faitauina ai faatasi ma i latou nei—o tagata iloga ua tuuina atu e faamatilatila atu le suafa o Ieova ma o ē o tatalo ma le uigā mo le “oo mai” o lona malo!

16. O ā fesili ua lagāina e lenei faataoto mulimuli, ma aiseā e tatau ai ona tatou naunau i le sailia o tali?

¹⁶ Ae ui i lea, o le ā “le gataaga o le lalolagi,” lea na mamafa i ai fetalaiga a Iesu i lenei faataoto mulimuli? O ā “aso e gata ai,” sa tusi faatatau i ai nisi o le au soʻo o Iesu? Po ua tatou ola nei ea i na aso? Afai o lea, o le ā le uiga o lenei mea mo i tatou, ma nisi tagata uma?

[Fesili mo le Suʻesuʻega]

[Pusa i le itulau 104]

IA UTAGIA TALA FAATUSA A IESU O LE MALO!

● Ua faamatala mai e nei mea le Malo e moomia, e pei se “oa” po o se “penina.” O ē saili i ai ua faatusaina i “le eleele lelei,” “saito,” ma “iʻa lelei.”

● O le malo faatagafai ua faaataina mai e pei se “laau” o le sinapi e tele ona lālā, ma o se paluga o le falaoa faafefeteina. O ona tagata lagolagosua o “manu felelei,” “titania,” ‘iʻa lē aogā.’

● I le vaai atu i le tuputupu aʻe o le Malo i ona itu eseese e tele, ua sili ai ona mafai ona tatou malamalama i le finauga sili o loo i luma nei o tagata, ma ua faalototeleina ai i tatou e tutū faamaoni ma ia mausalī mo le Malo.