1, 2. (a) O ā suiga e tutupu a o amata ona oo atu i le soifuaga matua? (e) Na faapefea ona faamalieina tane amio Atua i taimi anamua o le Tusi Paia i o latou soifuaga matutua?

E TELE suiga e tutupu a o amata ona matutua o tatou soifuaga. O le vaivai o le tino e faavaivaia ai le malaulau na iai. O le tepa atu i le faʻata e faaalia mai ai ni maanuminumi fou ma ua faasolo ina sinā le ulu​—ua oo lava ina toulu lauulu pe tula le ulu. Atonu o le a tatou pagatia i le lē toe manatua lelei o mea. O le a iai ni faiā fou pe a faaipoipo le fanau, ma oo foi ina maua mai ni fanau a fanau. I nisi tagata, o le litaea mai se galuega e iu atu ai i se faasologa fou o le olaga.

² O le mea moni lava, o le amata ona matua o le soifuaga e mafai ona tofotofoina ai. (Failauga 12:1-8) Ae seʻi manatu pea i auauna a le Atua i taimi anamua o le Tusi Paia. E ui ina latou iu atu i le oti, ae sa ia i latou le atamai ma le malamalama, lea na matuā faamalieina ai i latou i o latou soifuaga matutua. (Kenese 25:8; 35:29; Iopu 12:12; 42:17) Na faapefea ona latou taulau i le soifua matutua aʻe ma fiafia? E mautinoa ona o le ola e ogatusa ma mataupu silisili ia ua tatou iloa i aso nei o loo tusia i le Tusi Paia.​—Salamo 119:105; 2 Timoteo 3:16, 17.

3. O le ā le fautuaga na ofoina atu e Paulo i toeaina ma loomatutua?

³ I lana tusi ia Tito, na ofo atu ai e le aposetolo o Paulo ni taʻiala aogā ia i latou o ē na faasolo ina matutua. Na ia tusi atu: “Fai atu i toeaina ia mataala i latou, ia faatoeaina, ia faautauta, ia faamaoni i le faatuatua, ma le alofa, ma le onosai. Ia faapena foi loomatutua, ia amio i latou i le amio faʻaaloalo, aua neʻi faatuaupua, aua neʻi faapologaina i latou i le uaina, a ia fai ma aʻoaʻo i mea lelei.” (Tito 2:2, 3)  O le utagiaina o nei upu e mafai ona fesoasoani ia te oe e fesagaia ai luʻi o le faasolo atu ina matua.

4, 5. O ā uiga faaalia o le toatele o mātua pe a tuua e a latou fanau le aiga, ma ua faapefea e nisi ona faamasani i le tulaga fou ua iai?

⁴ O le suia o matafaioi e manaomia ai le faamasani atu. Maeu le moni o lenei mea pe a tuua e fanau matutua le aiga ma faaipoipo! O le uluai laasaga lea e faamanatu ai i le toatele o mātua e faapea ua latou matutua. E ui ina fiafia i le iloa ua tagata matutua a latou fanau, ae masani lava ona popole mātua e mafaufau pe sa latou faia mea uma na mafai e sauniunia ai le fanau mo le olaga tutoatasi. Ma atonu latou te misia le iai o le fanau i le fale.

⁵ O se tulaga malamalama, e manatu mamafa pea mātua mo le lelei o a latou fanau, e tusa pe ua tuua e le fanau le aiga. Na faapea mai se tasi tinā: “Maimau e, pe ana mafai ona maua soo ni a matou fesootaiga, ina ia ou mautinoa ai po o manuia i latou​—ona ou fiafia lea.” Ua fai mai se tasi tamā: “Ina ua tuua e le ma tama teine lo matou aiga, sa o se taimi faigata tele. Na telē se suiga na oo i lo matou aiga, auā sa matou masani i le faifaimea faatasi.” Ua faapefea la ona foia e nei mātua le lē toe iai o a latou fanau i le aiga? I le tele o tulaga, e ala i lo latou manatu mamafa ma fesoasoani atu i isi tagata.

6. O le ā e fesoasoani i le faatulagaina pea o faiā faaleaiga i o latou tulaga talafeagai?

⁶ Pe a faaipoipo le fanau, o le a suia ai le matafaioi o le avea ma mātua. Ua taʻua i le Kenese 2:24: “E tuua ai e le tane lona tamā ma lona tinā, a e faatasi ma lana avā; ona avea ai lea o i laua ma tino e tasi.” O le amanaiaina o mataupu silisili faale-Atua o le tulaga ulu ma le faatulagaga lelei o le a fesoasoani i mātua e faatulaga ai mea i o latou tulaga talafeagai.​—1 Korinito 11:3; 14:33, 40.

7. O le ā le uiga lelei na atiina aʻe e se tasi tamā ina ua tuua e lana fanau teine le aiga ma ua faaipoipo?

⁷ Ina ua faaipoipo le fanau teine e toalua a se tasi ulugalii, ma ō ese atu ai mai lo latou aiga, sa lagona e le  ulugalii se vaega tele ua misia i o la olaga. I le taimi muamua, sa tetee tele le tamā i tane a lana fanau. Peitai a o ia manatunatu i le mataupu silisili o le tulaga ulu, na ia iloa ai ua iai nei i tane a lana fanau le tiute tauave mo le tausia o o la aiga. O lea la, pe a iai taimi e fesiligia ai e ona afafine sana fautuaga, e na te fesiligia lava i laua po o ā ni manatu a o la tane, ona ia faamautinoa ai lea o lana lagolagosua atu. Ua avea nei o ia o se uo i tane a lana fanau, ma sa la taliaina foi ana fautuaga.

8, 9. Ua faapefea e nisi mātua ona faamasani atu i le tulaga tutoatasi ua iai a latou fanau matutua?

⁸ Ae faapefea pe afai e ui lava e lē o faia e se ulugalii fou faatoʻā faaipoipo se mea e lē faale-Tusi Paia, peitai e la te lē o faia le mea na manatu o la mātua e sili atu ona lelei? Ua faamatala mai e se tasi ulugalii ua faaipoipo le la fanau e faapea: “E masani lava ona ma fesoasoani atu i ai ina ia latou iloa le silafaga a Ieova i mataupu, peitai afai ma te lē ioe i sa latou faaiuga, e ma te talia lava ma avatu ia i latou la ma lagolagosua ma faalaeiauga.”

⁹ I nisi o atunuu i Asia, e matuā faigata ai i nisi tinā ona taliaina le tulaga tutoatasi a o latou fanau tama. Peitai, pe a latou faaaloalogia le faatulagaga faa-Kerisiano ma le tulaga ulu, ona faaitiitia ai lea o lena feteenaiga i le va o i latou ma avā a a latou fanau. Ua iloa e se tasi fafine Kerisiano, o le ō ese atu o lana fanau tama mai le aiga ua avea o se “puna o le matuā tele o le agaga faafetai.” Ua faagaeetia o ia e vaai atu i o latou tomai e tausia aʻe ai o latou aiga fou. O le iuga, ua avea lenei o se faamāmā avega i le avega mamafa i le tino ma le mafaufau lea e tatau ona la tauave ma lana tane a o amata ona la matutua.

10, 11. O le ā le fautuaga faale-Tusi Paia o le a fesoasoani i tagata e alofia ai nisi o mailei e aliaʻe pe a faasolo atu ina matutua?

¹⁰ E eseese uiga e faaalia e tagata a o faasolo atu ina matuā matutua. O nisi tamaloloa ua ese le faiga o o latou lavalava i se taumafaiga ina ia foliga talavou atu ai. E  toatele fafine ua popole i suiga ia e oo mai pe a lē toe alu o latou maʻi masina (seʻi tulou). O le tulaga e faanoanoa ai, ua faatupuina e nisi tagata ua faasolo ina matutua, lagona ita ma le fuā o a latou paaga, e ala i lo latou faifai amio ma tagata talavou o le isi ituaiga. Peitai, o tane matutua e amio Atua, o loo “faautauta” i latou, i le teteeina o faanaunauga lē saʻo. (1 Peteru 4:7) Ua faapena foi ona taumafai fafine taʻumatuaina e tausisia le mautū o a latou faaipoipoga, ona o lo latou alolofa i a latou tane ma se faanaunauga ina ia faafiafia le finagalo o Ieova.

¹¹ E ala i le faagaeeina i le agaga paia, na tusia ai e le tupu o Lemuelu se viiviiga mo le “avā amio lelei” o lē na te taui atu i lana tane i le “agalelei . . . a e le agaleaga i aso uma o lona olaga.” O le a lē galo i se tane Kerisiano ona talisapaia le auala o loo taumafai ai lana avā ina ia manumalo mai i so o se tiga tau faalogona o loo oo ia te ia a o faagasolo atu i ona tausaga matua. O le alofa o le tane i lana avā o le a uunaia ai le tane e ʻviiviia lana avā.’​—Faataoto 31:10, 12, 28.

12. E mafai faapefea e ulugalii ua matutua ona faateleina lo la vavalalata a o faagasolo tausaga?

 ¹² A o faagasolo tausaga ia e tele ai mea e fai i le tausia aʻe o le fanau, atonu sa oulua fiafia ai e faataatia ese o oulua lava faanaunauga ina ia mafai ona lua uaʻi uma atu i manaoga o le lua fanau. Pe a ō ese atu la i latou mai le aiga, o le taimi lena e toe faaolaolaina ai loa le lua olaga faaipoipo. Ua faapea mai se tasi tane: “Ina ua ō ese atu le ma fanau teine mai le aiga, sa amata loa ona toe faagasolo atoa le ma faigauo ma laʻu avā.” Ua faapea mai le isi tane: “O loo ma tau fai mataala uma e tausi e le tasi le soifua maloloina o le isi, ma faamanatu e le tasi i le isi le manaoga mo le faia o a ma faamalositino.” Ina ia alofia la lagona o le tuua toatasi, ua faaalia ai e ia ma lana avā le agaga talimalo i isi tagata o le faapotopotoga. Ioe, o le faaalia o le naunau fiafia i isi e aumaia ai faamanuiaga. E lē gata i lea, e faafiafiaina ai le finagalo o Ieova.​—Filipi 2:4; Eperu 13:2, 16.

13. O le ā le vaega e faatinoina e le saʻoloto e tautala atu ma le faamaoni, a o faasolo ina matutua se ulugalii?

¹³ Aua neʻi faatagaina le motusia o fesootaiga e tuputupu aʻe i le va o oe ma lau paaga. Ia saʻoloto e talatalanoa faatasi. (Faataoto 17:27) Ua faapea mai se tasi tane: “E ma te faateleina le malamalama o le tasi i le isi, e ala i le alofa ma le magafagafa.” E ioe i ai lana avā, i le faapea mai: “A o faasolo ina ma matutua, ua oo ina ma fiafia e inu faatasi le ma iputī, talatalanoa faatasi, ma lagolagosua atu le tasi i le isi.” O lou saʻoloto e tautala atu ma le faamaoni e mafai ona fesoasoani i le faamautūina o le fusi o la oulua faaipoipoga, ma avatu ai se malosi lea o le a ia teteeina osofaiga a Satani, lē o loo faamalepeina faaipoipoga.

14. O le ā le vaega e manino mai sa faia e le tinā o le tinā o Timoteo, i le tuputupu aʻe o Timoteo e avea o se Kerisiano?

¹⁴ O fanau a fanau o “le pale” lea i tamā ma tinā matutua. (Faataoto 17:6) O le aufaatasiga a nei fanauiti e mafai moni ona faafiafiaina ai​—e faaolaolaina ma faafouina ai le loto. Ua taʻuleleia e le Tusi Paia Loi, o se  tinā matua o lē na auaufaatasi ma lana tama teine o Eunike, e tufa atu lona faatuatuaga ia Timoteo le tama a lana tama. Na tuputupu aʻe lenei tamaitiiti ma lona iloa sa faatāuaina uma e lona tinā ma le tinā o lona tinā, upu moni o le Tusi Paia.​—2 Timoteo 1:5; 3:14, 15.

15. E tusa ai o fanau a fanau, o le ā le sao tāua e mafai ona faia e tamā ma tinā matutua, ae o le ā e tatau ona la alofia le faia?

¹⁵ O se vaipanoa faapitoa la lenei e mafai ai e tamā ma tinā matutua (grandparents) ona faia ai se la sao tāua. Tamā e, ma Tinā matutua, ua uma ona lua tufa atu lo oulua poto e uiga i fuafuaga a Ieova i le lua fanau. Nei la, e mafai foi ona lua faia faapea i le isi augātupulaga lea o loo sosoo mai! E toatele fanauiti e fiafia e faalogologo atu i o latou tamā ma tinā matutua a o faamatala mai tala faale-Tusi Paia. O le mea moni, e lē o oulua e iai le avega tauave a le tamā o le totōina o le upu moni o le Tusi Paia i loto o lana fanau. (Teuteronome 6:7) Nai lo lea, e lagolagosua atu oulua i lenei tiute tauave. Tau ina ia pei a oulua tatalo o tatalo a le faisalamo e faapea: “Le Atua e, aua e te tuulafoai mai ia te au e oo ina toeaina ma ulusinā; seia ou faaali atu lou aao i lenei tupulaga, ma lou malosi i e amuli uma lava.”​—Salamo 71:18; 78:5, 6.

16. E mafai faapefea e tamā ma tinā matutua ona alofia le avea o i laua ma pogai o feteenaiga e tutupu aʻe i lo latou aiga?

¹⁶ O se tulaga e faanoanoa ai, ona o nisi tamā ma tinā matutua ua la soonafai faavalea fanau a la fanau, ma tutupu aʻe ai loa feteenaiga i le va o tamā ma tinā matutua ma a latou lava fanau matutua. Ae peitai, atonu o le lua agalelei faamaoni o le a faafaigofie ai mo fanau a le lua fanau ona taʻu mai ia te oulua o latou faalogona, ae ua mumusu e faaali atu na mea i o latou mātua moni. O nisi taimi e faamoemoe ai le fanauiti ina ia ʻau atu ia i latou o latou tamā ma tinā matutua ia e fai faavaleaina i latou, ina ia tetee atu ai i o latou mātua moni. O le ā e tatau loa ona fai? Ia faaalia le atamai ma faalaeiau fanau a le lua fanau ina ia talanoa atu i mea uma i o latou mātua. E mafai ona lua faamatala atu i ai e faapea o le mea lenei e fiafia ai le finagalo o Ieova. (Efeso 6:1-3) Pe afai e  talafeagai, e mafai ona lua ofo atu e tatala le auala e talanoa atu ai tamaiti, e ala i le lua muai faamatala atu i o latou mātua le faafitauli o se la tamaitiiti. Ia lua taʻu saʻo atu i le fanau a le lua fanau e uiga i mea sa lua aʻoaʻoina mai le tele o tausaga. O lo oulua faamaoni ma le lua tautala saʻo e mafai ona manuia ai i latou.

17. O ā lagona maumauai o le faisalamo e tatau ona faataʻitaʻi atu i ai Kerisiano ua faasolo ina matutua?

¹⁷ A o faasolo atu ina e matua, o le a e iloa ai ua lē mafai ona e toe faia mea uma sa masani ona e faia po o mea uma e te manao e fai. E faapefea ona talia ma feutagai se tasi ma le faagasologa o lona tagata matua? I lou manatu atonu e te lagona faapea o lena e 30 tausaga lou matua, ae o le tepa atu i le faʻata e taʻu mai ai le saʻo, e faitau sefulu isi tausaga e te matua ai. Aua neʻi lotovaivai. Na augani atu le faisalamo ia Ieova: “Aua e te lafoai ia te au i ona po ou te toeaina ai; aua e te tuulafoai mai ia te au pe a mavae atu loʻu malosi.” Ia avea ma au faaiuga le faataʻitaʻi atu i lagona maumauai o le faisalamo. Na ia faapea mai: “Ou te faamoemoe e le aunoa, ma aʻu toe faaopoopoina atu i ou viiga uma lava.”​—Salamo 71:9, 14.

18. E mafai faapefea e se Kerisiano taʻumatuaina ona faaaogā tatau le taimi ua litaea ai mai le galuega?

¹⁸ E toatele ua leva ona latou sauniuni e faateleina lo latou vivii atu ia Ieova pe a litaea mai a latou galuega sa iai. Ua faapea mai se tasi tamā ua litaea nei mai lana galuega: “Ua leva ona ou fuafuaina mea o le a ou faia pe a uma aʻoga a le ma tama teine. Sa ou maumauai o le a amata ona ou auai i le faiva talaʻi faataimi atoa, ma sa ou faatauina atu ai laʻu pisinisi ina ia mafai ona ou saʻoloto ai e matuā auauna atili atu ia Ieova. Sa ou tatalo atu mo le taʻitaʻiga a le Atua.” Pe afai e latalata atu i le matua e te litaea ai mai lau galuega, ia faamafanafanaina oe i le folafolaga a Lē Sili na Foafoaina i tatou e faapea: “E oo ina e  toeaina, o aʻu lava o ia, e oo foi ina ulusina, o aʻu lava ou te tauave ia te oe.”​—Isaia 46:4.

19. O le ā le fautuaga ua tuuina atu ia ē ua faasolo ina matutua?

¹⁹ O le faamasani atu i le litaea mai le galuega atonu e lē faigofie. Na fautuaina e le aposetolo o Paulo tane matutua ina ia “mataala” i a latou amioga. E manaomia i lenei mea le tetee atu pea, aua neʻi lolo atu i le faanaunauga e sailia se olaga faifaimālie. Atonu e iai se manaoga e sili atu mo se faasologa masani o mea e fai ma le pulea totino pe a oo ina litaea mai galuega nai lo le tulaga sa iai muamua. Ia tele la mea e te faia, ʻia alualu lou faamalosi i le galuega a le Alii ma le lē aunoa, ina ua e iloa e lē se mea faaleaoga lou tautiga i le Alii.’ (1 Korinito 15:58) Ia faalautele atu au galuega e fesoasoani atu ai i isi. (2 Korinito 6:13) E toatele Kerisiano ua latou faia lenei mea e ala i le maelega e talaʻi atu le tala lelei i se tulaga e tusa ai ma tapulaa o o latou soifuaga matutua. A o faasolo atu ina e tagata matua, ia e “faamaoni i le faatuatua, ma le alofa, ma le onosai.”​—Tito 2:2.

20, 21. (a) I lenei faiga o mea, o le ā e tatau ona iu ina lē toe faatasia ai se ulugalii faaipoipo? (e) Ua faapefea ona saunia mai e Ana se faaaoaoga lelei mo paaga o loo lotomafatia?

²⁰ O se mea e faanoanoa ai ae moni, e faapea, i lenei faiga o mea, e iu lava ina lē toe faatasia ulugalii faaipoipo ona o le maliu. E talitonu paaga Kerisiano ua lotomafatia o loo momoe nei ē pele ia i latou, ma ua latou mautinoa latou te toe vāai ia i latou ia. (Ioane 11:11, 25) Ae o loo faavauvau pea i le motusia o le mafutaga. E mafai la faapefea e lē o loo ola ona feagai ma lenei tulaga? *

²¹ O le manatua o mea na faia e se tasi o tagata lauiloa i le Tusi Paia o le a fesoasoani lea. O Ana o se fafine na oti lana tane ae faatoʻā fitu tausaga talu ona la faaipoipo,  ma i lo tatou faitauina o le tala e uiga ia te ia, e iloa ai o le 84 lea o tausaga o lona soifuaga. E mafai ona tatou mautinoa sa lotomafatia o ia ina ua motusia le la mafutaga ma lana tane. Na faapefea ona ia feagai ai ma le manuia? Sa ia faia le auaunaga paia ia Ieova le Atua i le malumalu i po ma ao. (Luka 2:36-38) O le soifuaga o Ana i le auaunaga ma le tatalo sa mautinoa o se vaifofo sili lea i le faanoanoa ma lagona tuua toatasi sa ia te ia o sē ua oti lana tane.

22. Ua faapefea ona feagai ma le manuia nisi fafine ma tane ua maliliu a latou paaga, mai le lagona o le tuua toatasi?

²² Ua faamatala mai e se fafine ua 72 ona tausaga o lē ua sefulu tausaga talu ona maliu lana tane: “O le luʻi e sili ona faigata ia te au o le leai lea o se paaga e talanoa atu i ai. O laʻu tane o se tagata e ese le faalogologo lelei. Sa ma talatalanoa e faatatau i le faapotopotoga ma ni o ma sao e faia i le faiva faa-Kerisiano.” Ua faapea mai le isi tuafafine ua oti lana tane: “E ui ina faasolo atu taimi ma amata ona faaleleia ai, ae ua ou iloa e sili ona saʻo le faapea atu, o mea e faia e se tasi i ona taimi avanoa, o le mea lena e faaleleia ai. Ua e iai i se tulaga e sili atu ona lelei e fesoasoani ai i isi.” E ioe i ai se tane ua 67 ona tausaga ma ua maliu lana avā, i lona faapea mai: “O le auala e sili ona lelei e manumalo mai ai i le lotomafatia o le faamanatu lea ia te oe lava ina ia e faamafanafana atu i isi.”

23, 24. O le ā le faamafanafana loto sili ua aumaia e le Tusi Paia mo ē ua matutua, ae maise lava i latou o ē ua maliliu a latou paaga?

²³ E ui lava ina toesea e le oti se paaga faapelepele, ae o Ieova e tumau pea ona faamaoni, e tumau pea ona mautinoa. Na pese le tupu anamua o Tavita: “E tasi le mea ua ou ole atu ai ia Ieova, o le mea lava lea ou te saili atu ai; ia ou nofo i le fale o Ieova i aso uma o loʻu ola, ina ia ou iloa atu ai le matagofie o Ieova, ma ou saili i lona malumalu.”​—Salamo 27:4.

²⁴ Ua faalaeiau mai le aposetolo o Paulo: “Ia ava i fafine ua oti a latou tane, o e ua ausage lava.” (1 Timoteo 5:3) O le fautuaga e sosoo mai i lenei faatonuga e faaalia ai o  fafine ua oti a latou tane ua ausage, o ē leai ni o latou tauaiga vavalalata atonu latou te manaomia le lagolagosua faaletino mai le faapotopotoga. Peitai, o le uiga o le faatonuga ina ia “ava” atu e aofia ai le manatu o le faatāua o i latou. Maeu se faamafanafana loto e mafai ona maua e fafine ma tane ua maliliu a latou paaga, i le iloaina e tāua i latou ia Ieova ma o le a ia tausia i latou!​—Iakopo 1:27.

25. O le ā le sini o loo tumau pea mo ē ua matutua?

²⁵ Ua folafola mai e le Afioga faagaeeina a le Atua e faapea: “O le pale matagofie le ulusinā, pe a ua i ai i le ala o le amiotonu.“ (Faataoto 16:31; 20:29) O lea la, ia faaauau pea, pe ua outou faaipoipo pe ua toe nofofua, ae ia faamuamuaina pea le auaunaga a Ieova i o outou soifuaga. Ona ia te outou ai lea o se igoa lelei ma le Atua i le taimi nei ma le faamoemoe o le ola e faavavau i se lalolagi o le a lē toe iai ai ni tiga ona o le soifuaga matua.​—Salamo 37:3-5; Isaia 65:20.