Mataupu 30

Lana Tali atu i Ē na Molia o Ia

INA ua molia Iesu e taʻitaʻi lotu o Iutaia ona o le solia o le Sapati, sa ia tali atu e faapea: “O loo galue loʻu Tamā e oo mai lava i le aso nei, ma o loo galue foi aʻu.”

E ui i le tuuaiga a le au Faresaio, ae o le galuega a Iesu e lē o se ituaiga o galuega e faasaina e le tulafono o le Sapati. O lana galuega o le talaʻi atu ma le faia o faamalologa, o se tofiga lea mai le Atua, ma i le faataitai i le faaaoaoga a le Atua, sa ia faia ai pea lena galuega i aso taitasi. Peitai, sa avea lana tali atu ma itu na atili ai ona feitai tagata Iutaia na i lo le taimi muamua, ma ua latou saili ai e fasioti i a te ia. Aisea?

Ona o lea ua latou talitonu, e lē gata ina solia e Iesu le Sapati, ae ua latou manatu foi o se upuvale lona fetalai mai o ia o le Alo totino o le Atua. Peitai, e leʻi fefe ai Iesu a ua toe tali atu i a te i latou e faatatau i lana faiā faamaonia ma le Atua e faapea: “O loo alofa le Tamā i le Atalii, ma ua faaali mai foi i a te ia mea uma lava e faia e ia.”

Sa faaauau ona fetalai atu Iesu: “E faapei ona toe faatutu ma faaola e le Tamā i ē ua oti, e faapea foi ona faaola e le Atalii o i latou ua ia loto i ai.” O le mea moni, ua uma ona faatutuina e le Atalii ē na oti i se auala faaleagaga! Na fetalai atu Iesu: “O lē faalogo mai i laʻu upu ma talitonu i a te ia na na auina mai aʻu, ua oo atu i le ola na i lo le oti.” Ioe, sa faaauau ona ia fetalai atu e faapea: “E oo i le aso, ua oo nei foi i ai, pe a faalogo ē ua oti i le leo o le Atalii o le Atua, e ola ai foi i latou o ē utagiaina.”

E ui lava e oo ane i lena taimi, e leai se faamaumauga e iloa ai na faatuina moni e Iesu se tasi mai le oti, ae na ia taʻu atu i ē na molia o ia e faapea, o le a toetutu moni mai ē ua oti. Sa ia fetalai atu e faapea: “Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou ō mai ai.”

E oo ane i lena taimi, e mautinoa e leʻi faamatalaina atu lava e Iesu i le lautele lana vaega matuā tāua i fuafuaga a le Atua e pei o lea sa ia faia ai i se auala e sili ona maʻoti ma mautinoa. Peitai, e tele mea na iloa e ē na molia Iesu, i lo na o lana lava molimau. Sa faamanatu atu e Iesu i a te i latou e faapea: “Na outou aauina atu nisi i a Ioane, ma na ia molimau foi i le upu moni.”

I tausaga e lua faatoʻā mavae, na taʻu atu ai e Ioane le Papatiso i na taʻitaʻi lotu Iutaia e uiga i Lē o mulimuli mai i a te ia. I lona faamanatu atu i a te i latou e uiga i lē sa latou matuā faaaloalogia, o Ioane lea ua faafalepuipuiina, na fetalai atu ai Iesu: “Sa outou loto foi mo sina taimi puupuu ina ia olioli i lona malamalama.” Na toe faamanatu atu e Iesu lenei mea i o latou mafaufau ma le faamoemoe ina ia fesoasoani ai, ioe, ia faasaoina i latou. Peitai, sa leʻi faalagolago o ia i le molimau a Ioane.

“O galuega lava ia ou te faia, [e aofia ai le vavega sa ia faatoʻā faia] e molimau mai i a te aʻu ua auina mai aʻu e le Tamā.” Ae e lē gata i lea, sa faaauau ona fetalai atu Iesu: “O le Tamā foi na auina mai aʻu, o ia lava ua molimau i a te aʻu.” Mo se faataitaiga, sa molimau le Atua i a Iesu i lona papatisoga, ina ua fetalai ifo e faapea: “O loʻu atalii pele lena, ua ou fiafia lava i a te ia.”

O le mea moni, sa leai se mafuaaga a ē na molia Iesu e ala ai ona latou teena o ia. O Tusitusiga paia lava ia sa faapea mai o loo latou suesueina, o loo molimau i a te ia! Ua faaiu atu e Iesu e faapea: “Afai ana outou talitonu i a Mose, po ua outou talitonu mai i a te aʻu, auā na tusi o ia e uiga i a te aʻu. Ae afai tou te lē talitonu i ana tusi, pe faapefea ona outou talitonu i aʻu upu?” Ioane 5:17-47; 1:19-27; Mataio 3:17.

▪ Aisea sa leʻi solia ai le Sapati i galuega a Iesu?

▪ Sa faapefea ona faamatalaina e Iesu lana vaega matuā tāua i fuafuaga a le Atua?

▪ O le molimau a ai sa faasino i ai e Iesu ina ia faamaonia ai o ia o le Alo o le Atua?