Mataupu 54

“Le Areto Moni Mai le Lagi”

E ANOANOAI mea na tutupu i le aso ua tuanai. Sa fafaga faavavega ai e Iesu le faitauafe o tagata, ma na ia sola ese ai mai sa latou taumafaiga ina ia fai o ia ma tupu. O le po lena sa savali atu ai o ia i luga o le Sami sousou o Kalilaia; sa ia laveaiina ai Peteru o lē na tau magoto ifo ina ua ia savali atu i luga o le sami sa fesouaiina e le afā; ma sa ia faamalūina ai le sousou o peau ina ia aua ai neʻi faaleagaina le vaa o ona soʻo.

A o lea la ua maua Iesu i tafatafa o Kapanaumi, e tagata foi ia sa ia fafagaina faavavega i le itu i mātū i sasae o le Sami o Kalilaia, ma sa latou fesili atu: “O anafea na e maliu mai ai i inei?” I le matuā aoaia o i latou, na fetalai atu ai Iesu, na pau le mafuaaga ua latou ō mai ai e saili i a te ia ona o loo latou faatalitalia se isi taumafataga e maua fua. Sa ia uunaia i latou ina ia galulue, e lē mo meaai e pala, ae mo meaai e tumau mo le ola e faavavau. O lea na latou fesili atu ai: “Se ā se mea matou te faia ina ia galulue ai i le galuega a le Atua?”

Na taʻu ane e Iesu, e na o le tasi lava le galuega e sili ona tāua. Fai mai a ia: “O lenei le galuega a le Atua, ia outou faatuatua i a te ia o lē na auina mai e Ia.”

Ae peitai, sa leʻi faaalia e tagata le faatuatua i a Iesu, e ui lava i vavega uma na ia faia. O se mea e matuā lē talitonuina, ona e ui i nei vavega uma na ia faia, ae sa latou fesili atu e faapea: “Se ā se faailoga e te faia matou te vaai atu i ai ma matou talitonu ai i a te oe? Se ā se galuega e te faia? Na ʻaai o matou tamā i le manai i le vao, e pei ona tusia, ‘Na ia avatu i a te i latou le areto mai le lagi e ʻaai ai.’”

I lana tali atu i la latou talosaga mo se faailoga, na faamanino atu ai e Iesu le Puna o sauniuniga faavavega e faapea: “E lē o Mose na avatua i a te outou le areto mai le lagi, ae o loʻu Tamā na te avatua i a te outou le areto moni mai le lagi. Auā o le areto mai le Atua, o ia lea ua alu ifo mai le lagi ma aumai le ola i le lalolagi.”

Ua latou fai ane foi e faapea: “Le Alii e, aumai ia i a te i matou o lena areto e lē aunoa.”

A ua faamatala atu e Iesu: “O aʻu nei le areto o le ola. O lē sau i a te aʻu e lē fia ʻai lava ia, ma o lē faatuatua mai i a te aʻu e lē fia inu lava ia. A ou te fai atu i a te outou, ua outou vaavaai mai i a te aʻu, ae tou te leʻi talitonu mai lava. O i latou uma ua foaiina mai e le Tamā i a te aʻu e ō mai i latou i a te aʻu, ma o lē sau i a te aʻu, ou te lē tulia lava ia i fafo; auā ou te leʻi alu ifo mai le lagi e faia loʻu lava loto, a o le finagalo o lē na auina mai aʻu. O le finagalo foi lenei o lē na auina mai aʻu, ia lē māumau se tasi ua ia foaiina mai i a te aʻu, a ia ou toe faatuina o ia i le aso gataaga. Auā o le finagalo lenei o loʻu Tamā, ia maua le ola e faavavau e i latou uma e vaai i le Alo ma faatuatua i a te ia.”

O le mea lea na amata ai ona muimui tagata Iutaia i a Iesu ona sa ia fetalai atu, “O aʻu le areto na alu ifo mai le lagi.” Sa latou vāai i a te ia ua na o se tama a ni mātua faaletagata, ma o lea na latou tetee atu ai e pei ona sa faia e tagata Nasareta e faapea: “Pe lē o Iesu ea lenei le atalii o Iosefa, ua tatou iloa lona tamā ma lona tinā? Ae ua faapefea ona ia fai mai, ‘Ua ou sau mai le lagi’?”

Na tali atu Iesu: “Soia tou te muimui. E lē mafai ona sau se tasi i a te aʻu, pe a lē tosina mai e le Tamā, o lē na auina mai aʻu; ou te toe faatuina foi o ia i le aso gataaga. Ua tusia e le au Perofeta, ‘E aʻoaʻoina i latou uma lava e Ieova.’ O i latou uma e faalogo i le Tamā ma aʻoaʻoina ai, e ō mai i latou i a te aʻu. E lē ona ua vaai se tasi i le Tamā, seʻi vaganā ai lē e mai le Atua; o ia lea ua vaai i le Tamā. E moni ou te fai atu i a te outou, o Lē talitonu, ua i a te ia le ola e faavavau.”

Sa faaauau le fetalaiga a Iesu i lona toe faapea atu: “O aʻu o le areto o le ola. Na ʻaai o outou tamā i le manai i le vao peitai na maliliu i latou. O le areto lenei ua alu ifo mai le lagi, so o se tasi e ʻai ai e lē oti lava ia. O aʻu le areto ola na alu ifo mai le lagi; o sē e ʻai i lenei areto e ola ai lava o ia e faavavau.” Ioe, e ala i le faaalia o le faatuatua i a Iesu, o lē na auina mai e le Atua, e mafai ai ona maua e tagata le ola e faavavau. E leai se manai po o se isi lava areto e mafai ona maua ai lena mea!

O lenei talanoaga e faatatau i le areto mai le lagi, e foliga mai sa amata ina ua faatoʻā mavae lava ona maua e tagata Iesu e latalata i Kapanaumi. Ae na faaauau pea seia oo ina faaiuina i se taimi mulimuli ane a o aʻoaʻo atu Iesu i se sunako i Kapanaumi. Ioane 6:25-51, 59; Salamo 78:24; Isaia 54:13; Mataio 13:55-57.

▪ O ā mea na tutupu muamua atu a o leʻi talanoaina e Iesu le mataupu e faatatau i le areto mai le lagi?

▪ Ona o mea na faia e Iesu e leʻi mamao atu, aisea sa matuā lē talafeagai ai le talosaga mo se faailoga?

▪ Aisea na muimui ai tagata Iutaia i le fetalaiga a Iesu e faapea o ia o le areto moni mai le lagi?

▪ O fea na faia ai le talanoaga e uiga i le areto mai le lagi?