Mataupu 128

Sa Toe Soifua mai Iesu!

INA ua iloa e fafine ua gaogao le tuugamau o Iesu, ona momoʻe atu lea o Maria le Makatala e taʻu atu i a Peteru ma Ioane. Ae peitai e foliga mai sa faatali ai pea isi fafine i le tuugamau. E leʻi pine lava, ae faaali mai se agelu ma valaaulia i latou i totonu o le tuugamau.

Na vaaia ai foi e fafine i inā se isi agelu, ma na faapea atu le tasi o agelu i a i latou: “Aua tou te matataʻu; auā ua ou iloa ua outou sailia mai Iesu na faasatauroina. E lē o i inei o ia; auā ua toe faatuina mai o ia, e pei ona fetalai atu ai o ia. Ō mai inā matamata i le mea na tuu ai o ia. Inā ō atu ia ia vave, tou te taʻu atu i ona soʻo, ua toe faatuina mai o ia nai ē ua oti.” O lea i le mataʻu ma le olioli tele, na taufetuli atu ai foi ma nei fafine.

O le taimi lea, na maua atu ai e Maria Peteru ma Ioane, ma sa ia lipoti atu i a i laua: “Ua latou aveeseina le Alii i le tuugamau; matou te lē iloa foi le mea ua latou tuuina ai o ia.” Sa taufetuli atu loa aposetolo e toalua. Na saoasaoa le tamoʻe a Ioane—ona e mautinoa e laitiiti—ma sa muai taunuu ai o ia i le tuugamau. O le taimi foi lea na ō ese atu ai fafine, o lea sa leai se isi na iai i inā. Na punou ifo Ioane ma autilo atu i totonu o le tuugamau ma sa iloa atu ai fusi, a o tu pea i fafo.

Ina ua taunuu atu Peteru, sa leʻi faatalatū o ia ae ulu atu loa i totonu. Na ia iloa atu fusi sa fusifusia ai o ia o taatitia ai i inā atoa ma le ie sa aui ai le ao o Iesu. Sa taʻaiʻai i le mea lava e tasi. Na ulu atu foi Ioane i le tuugamau, ma sa ia talitonu ai i le lipoti a Maria. Ae sa leʻi maumanatu Peteru po o Ioane, ua toe faatuina Iesu, e ui lava sa Ia taʻu atu pea i a i latou faapea o le a toe tu mai o Ia. I le lē mautonu, na toe foi atu ai le toalua lenei i o la aiga, ae sa nofo ai pea Maria, o lē na toe foi mai i le tuugamau.

O le taimi lea, na faanatinati atu ai isi fafine e taʻu atu i le au soʻo faapea ua toe tu mai Iesu, e pei lava ona poloai ai agelu i a i latou ia faia. A o latou taufetuli atu i le saoasaoa na latou mafaia, na faafetaui i latou e Iesu ma fetalai atu: “Si oʻu alofa!” I le faapaʻūū atu i ona vae, ua latou ifo atu ai i a te ia. Ona fetalai atu lea o Iesu: “Aua tou te matataʻu; inā ō atu ia, tou te taʻu atu i oʻu uso, ina ia latou ō atu i Kalilaia, latou te iloa ai aʻu.”

Muamua, ina ua lūlū le mafuie ma faaali atu agelu, sa meia fitafita na leoleo ai ma sa pei i latou o ni tagata oti. Ina ua toe malamalama, sa latou ō atu loa i le aai ma taʻu atu i faitaulaga sili le mea na tupu. Ina ua uma ona taupulepule faatasi ma “toeaina” o Iutaia, ona faia ai lea o se faaiuga ina ia taumafai e faia i se auala faalilolilo le mataupu e ala i le faatogafalea o fitafita. Sa faatonuina i latou: “Ia outou taʻutaʻu atu, ‘Na ō mai ona soʻo i le po ua gaoi i a te ia, a o matou momoe.’”

Talu ai ona e ono faasalaina ai fitafita Roma i le oti pe a momoe a o faia o latou tiute, sa folafola atu ai e faitaulaga: “Afai e oo atu lenei [lipoti e uiga i lo outou momoe] i taliga o le kovana, o le a matou faaoleole i a te ia ma o le a saoloto ai outou mai le popole.” Talu ai ona sa matuā tele lava le tau o le faatogafalea, na faia ai e fitafita e pei ona faatonuina ai i latou. O le iuga, na salalau atu ai i tagata Iutaia le lipoti sese e uiga i le gaoia o le tino o Iesu.

Sa matuā tele lava le faanoanoa o Maria le Makatala, o lē na nofo ai pea i le tuugamau. Faamata o fea o iai Iesu? Ina ua punou atu e autilo i totonu o le tuugamau, na ia vaaia ai agelu e toalua ia foi sa toe faaali ane e oofu i ofu sisina! O le tasi sa nofo i ulu ma le isi i vae o le mea sa taatia ai le tino o Iesu. Na la fesili atu: “Funa e, se ā le mea e te tagi ai?”

Na tali atu Maria: “Ua latou aveese i loʻu Alii, ma ou te lē iloa po o fea ua latou tuuina ai o ia.” Ona ia toe liliu lea ma iloa ai se tasi foi na ia toe fai mai lea lava fesili: “Funa e, se ā le mea e te tagi ai?” Ma sa fesili atu foi o ia lenei: “O ai ea e te sailia?”

I le manatu faapea ai o le leoleo fanua lena i le faatoaga o iai le tuugamau, na fai atu ai o ia i le tagata: “Le Alii e, afai ua e aveese i a te ia, taʻu mai ia i a te aʻu po o fea le mea ua e tuuina ai o ia; ona ou aveeseina lea o ia.”

Na fai atu le tagata: “Maria e.” Ma na vave lava ona iloa e Maria o Iesu lea, e ala i le auala e masani ona fetalai soo ai Iesu i a te ia. Sa alaga o ia “Raponi e!” (o lona uiga le “Aʻoaʻo e!”) Ma faatasi ai ma le olioli tele, sa ia tago atu ai i a te ia. Ae na fetalai atu Iesu: “Aua e te tago mai i a te aʻu, auā ou te leʻi alu aʻe lava i loʻu Tamā; a ia e alu i oʻu uso, ma fai atu i a te i latou, ‘Ou te alu aʻe i loʻu Tamā ma lo outou Tamā, o loʻu Atua ma lo outou Atua.’”

Na tamoe atu loa Maria i le mea sa faapotopoto ai le au aposetolo ma le au soʻo. Na ia faaopoopo atu ai lana faamatalaga i le lipoti ua uma ona taʻu atu e isi fafine e uiga i lo latou vaaia o Iesu na toe faatuina. Peitai, o na tagata, o ē sa leʻi talitonu i fafine muamua, e foliga mai sa latou lē talitonu foi i a Maria. Mataio 28:3-15; Mareko 16:5-8; Luka 24:4-12; Ioane 20:2-18.

▪ Ina ua iloa le tuugamau ua gaogao, o le ā na faia e Maria le Makatala, ma o le ā le mea na tupu i isi fafine?

▪ O ā uiga faaalia o Peteru ma Ioane ina ua vaaia ua gaogao le tuugamau?

▪ O le ā na fetaiaʻi ma isi fafine i le ala i lo latou ō atu e lipoti atu le toetu o Iesu i le au soʻo?

▪ O le ā na tupu i fitafita sa leoleo, ma o le ā le tali mai i le la lipoti i faitaulaga?

▪ O le ā na tupu a o iai na o Maria le Makatala i le tuugamau, ma o le ā le tali atu a le au soʻo i le lipoti a fafine?