Mataupu 49

Se Isi Talaʻiga Faataamilo i Kalilaia

I NA ua mavae tausaga e lua o faia ma le malosi le talaʻiga, pe sa tau faatalalē ai loa ma faifai lemū Iesu? I le tuu faafeagai, sa ia faalauteleina lana galuega talaʻi, e ala i le amataina o se isi malaga lona tolu, i Kalilaia. Sa ia asiasi atu i aai uma ma nuu i lena vaipanoa, ma aʻoaʻo atu i sunako ma talaʻi atu le tala lelei o le Malo. O mea na ia silafia i lenei malaga sa ia mautinoa atili ai le manaoga ina ia faamalosia le galuega talaʻi.

So o se mea lava na maliu atu i ai Iesu, sa ia silafia ai lava le manaomia e le motu o tagata o se faamalologa faaleagaga ma se faamafanafanaga. Sa pei i latou o ni mamoe e leai so latou leoleo, ua lailoa ma tuulafoaiina, ma sa mutimutivale ai lona alofa mo i latou. Ua ia fetalai atu i ona soʻo: “E tele le saito e seleseleina, a o le au faigaluega e toaitiiti ia. O lea, ia outou aioi atu ai i le Matai e ana le saito e seleseleina, ina ia aauina mai e ia ni ē galulue i lana saito e seleseleina.”

Sa fuafuaina e Iesu ana gaoioiga. Na ia taloina ona aposetolo e toʻa 12, o ē na ia filifilia e tusa o se tausaga ua tuanai atu. Na ia tofia i latou e taitoalua, ma ua maua ai paga e ono o tagata talaʻi, ona ia tuuina atu lea i ai o faatonuga. Ua ia fetalai atu: “Aua tou te ui i se ala o nuu ese, aua foi tou te ō atu i se aai o Samaria; ae lelei ona outou ō atu i mamoe o le aiga o Isaraelu ua leiloa. A outou ō, ia outou talaʻi atu e faapea, ‘Ua latalata mai le malo o le lagi.’”

O le Malo lea sa tuu atu latou te talaʻia, o le Malo lena na aʻoaʻo e Iesu i latou ina ia tatalo i ai i lana tatalo faaaoao. Sa latalata mai lena Malo, ona sa faatasi ai lē na tofia e le Atua e fai ma Tupu, o Iesu Keriso. Ina ia faamaonia o ona soʻo o ni sui o lena malo e sili ona malosi, na foai atu ai e Iesu i a te i latou le mana e faamalolo ai maʻi, e oo lava i le faatutuina o ē ua oti. Sa ia faatonuina foi i latou ina ia faia fua nei auaunaga.

Ona sosoo ai lea ma lona fetalai atu i ona soʻo, ina ia aua neʻi sauniunia ni mea faitino mo la latou talaʻiga faataamilo. “Aua neʻi teu ma outou o auro, po o ario, po o ʻapa memea i o outou fusi. Aua foi le avea se taga meaai i le malaga, po o ni ofu tino tailua, po o seevae, po o se tootoo; auā e tatau ona avatu le mea e ʻai i lē faigaluega.” Auā o i latou e talisapaia le feau, o le a talilelei ane ma avane meaai ma mea e api ai. E pei ona fetalai Iesu: “O se aai po o se faoa aai tou te oo atu i ai, ia saili po o iai sē ua tatau ai; ia outou nonofo ai i le outou ō ai.”

Ona avatu loa lea e Iesu o faatonuga i le auala e faailoa atu ai le feau o le Malo i tagata o aiga. Na ia faatonuina i latou e faapea: “A outou ulufale atu i se aiga, ia outou ofo alofa atu i ai; ma pe afai ua tatau lea aiga, ia oo atu i ai la outou faamanuia; ae afai ua lē tatau ai, ia toe foi mai i a te outou la outou faamanuia. Ai sē e lē talia outou, pe lē faalogo i a outou upu, ia tūtū atu i ai le eleele o o outou vae pe a outou ō ese nai lea fale po o lea aai.”

Sa faaalia faapea e Iesu, o se aai e teena ai la latou feau, e matuā ogoogo le faamasinoga e oo atu i ai. Na ia faamatala atu e faapea: “E moni ou te fai atu i a te outou, i le aso faamasino, e feoloolo ai Sotoma ma Komoro i lena aai.” Mataio 9:35–10:15; Mareko 6:6-12; Luka 9:1-5.

▪ O anafea na amata ai e Iesu se talaʻiga faataamilo lona tolu i Kalilaia, ma o le ā na ia mautinoa ai?

▪ Ina ua aauina atu ona aposetolo e toʻa 12 e talaʻi, o ā faatonuga na ia avatu i a te i latou?

▪ Aisea sa saʻo ai ona aʻoaʻo atu le au soʻo e faapea ua latalata mai le Malo?