Mataupu 7

E Tautala Ou Laei ma Lou Foliga Mai​—E Uiga iā te Oe

1-4. Aiseā e taʻuina atu ai e le auala o loo tatou laei ai se mea e uiga i le pe faapeī i tatou i totonu? Aumai ni faaaʻoaʻoga.

PE NA e saafiafi i le eseese o lanu e faafiafiaina ai i se laufanua o fugālaau i le tau e totogo ai mea po o le maofa i lanu mananaia ua maua i iʻa o le teropika? I le vaai atu i nei mea ua faatalitonuina ai i tatou e faapea, e talisapaia e Lē na Foafoaina i tatou le eseese ma le matagofie o mea. E lē finagalo o ia ina ia puaoa, faanenefu pe pasiā ona o le tutusa, le foliga mai o mea uma. Maeu le fiafia i le vaai atu i le eseese tele o teuga a tagata i le lalolagi atoa! Peitai, pe ua e tu ea ma mafaufau i le tele e mafai e lou foliga mai fafo ona taʻuina atu ai pe faapeī oe i totonu?

 ² A o e itiiti lava, ai lava e leʻi tele se mea na taʻuina atu e ou laei e uiga i le ituaiga o tagata sa e iai. Sa filifili e ou mātua ou laei mo oe ma selu lou lauulu. Peitai, a o e tuputupu aʻe e avea ma tagata matua, sa la faatagaina oe ina ia faaalia ou lava manatu e uiga i le filifiliga o ou laei, le auala e teuina ai lou lauulu ma mea faapena. O lea la ua oo nei ina faatino lau lava filifiliga. Ua agaʻi ina faateteleina ona faaatagia mai e lou lava foliga mai pe faapeī oe i totonu, lou lava uiga totino faaletagata. O le ā ua taʻu mai e ou laei ma lou foliga mai e uiga ia te oe?

TAUSIA LOU PALENI

³ O tagata o ē matuā loto mitamita ia i latou lava, e masani ona faaalia mai e ala i lo latou matuā manatu tele i teuga. Latou te masani ona mananao ina ia “tu matilatila” o latou laei po o foliga i lo isi uma tagata. Peitai, e mafai foi ona faaalia le lotomimita po o le manatu faapito e ala i le tueleelea. Aiseā? Auā e mafai ona paiē le tagata tueleelea, e mafai foi ona ia te ia se manatu faapito “e lē popole,” e tusa ai ma le aafiaga e iai lona foliga mai i luga o isi. I le va o ia uiga maualuluga e lua o loo iai le tagata o lē e lē manatu tele ia te ia lava ae manatu mo isi. O lona foliga mai o le a faaalia lea e ala i le lelei o le filifiliga o mea e fiafia ai ma le onomea.

⁴ Ua manatu nisi tagata talavou faapea e tatau ona latou ōgatasi ma aʻega fou o teuga ina ia aua ai neʻi foliga faaanamua. Peitai, i le va o le “sopo tapulaa mai le mea ua masani ai” ma le matuā “faaonaponei,” o loo iai se tulaga faaogatotonu. Afai e te tumau ai i lena, o le a e laei lelei pea lava la ma e te lē tali atu ai i suiga taitasi uma o teuga, pei se faatagata meataalo e femigoiaʻi i taimi uma lava e toso ai le manoa.

5-7. (a) O ai moni e lelei ai pe a taumafai se tagata ina ia ōgatasi ma aʻega fou uma o teuga o laei? (e) E tusa lava pe lē tele ni tupe a se tagata, e faaalia faapefea e ona laei lona faaaloalogia o ia lava? (i) E mafai faapefea ona faatatauina mataupu silisili o loo maua i le Filipi 2:3, 4 ma le Roma 15:2 i le auala tatou te laei ai?

 ⁵ Fesili ifo ia te oe lava: O ai e lelei ai i loʻu manatu tele i teuga? O le lalolagi o fefaatauaʻiga lea e faaautū maia le faatulagaina ma le faamalosiauina o teuga. E tasi lava lo latou faanaunauga sili: ia maua ni tupe. Afai e masani ona e faia le mea e mananao ai, ona e faaleleia ai lea o i latou, ae o le a lē lelei moni ai oe i so o se auala.

⁶ O le tueleelea atonu e foliga mai e lē tele sau tupe e alu ai ae mafai ona telē sona tau ia te oe i isi auala. E mafai ona lē iloa ai sau galuega pe e te lē maua ai le faaaloalo o isi. E tusa lava pe lē taugata ni laei o se tasi, ae afai na te tausia lelei ma mamā, e faaalia ai e lenei mea lona faaaloalogia o lona lava tagata. E sili atu ona faaaloalogia ai o ia e isi tagata ma sili atu ona faatuatuaina o ia.

⁷ O loo maua i le Tusi Paia i le Roma 15:2 se tulafono lelei e ao ona mulimuli ai i meafai uma o le olaga: “Auā ia taitasi o i tatou ma faafiafia i lē la te tuaoi ina ia lelei ai o ia, e faamafanafanaina ai.” E sili atu ona vaavaai mai isi tagata ia i tatou i lo lo tatou vaavaai ia i tatou lava. O lea, pe lē tatau la ona tatou taumafai e avatu ia i latou se mea o le a latou iloaina e manaia i le vaavaai? E lē o se mea e faia ai i latou ia lagona ai le manatu ifo o le tagata lava ia ia te ia ona o o latou lava foliga mai, ae o se mea e faaali atu ai tatou te manatu i o latou faalogona.

 MATAULIAINA I LAEI

8-11. (a) Ua matauliaina faapefea vaega eseese po o ituaiga o tagata i o latou laei? (e) O le ā la e mafai ona manatu i ai tagata i le auala e laei ai se tagata, ma e mafai faapefea e lenei mea ona aumaia ai faafitauli?

⁸ E taʻu mai e le auala e te laei ai se isi mea e uiga ia te oe. E mafai ona matauliaina ai oe faatasi ma se tasi o vaega po o se vasega. Sa moni lenei mea e oo lava i le faitau afe o tausaga ua mavae, ina ua tusiaina le Tusi Paia. Mo se faaaʻoaʻoga, ua tatou faitau i le tusi e Lua i Tupu e uiga i ni avefeau o loo lipotiina atu i le Tupu o Aasaia ma taʻu atu i ai le feiloaiga ma se tamaloa o lē na tuuina ane ia i latou se tasi o feau. Sa fesili atu le Tupu: “Se tagata peī ea?” Ina ua latou faamatala atu ona ofu, sa faapea atu loa lava le Tupu: “O Elia.” Na ia iloa faapefea? Auā na laeiina e Elia se laei patino o se perofeta.—2 Tupu 1:2, 5-8.

⁹ O le matauliaina o se perofeta o se mea e viia ai. Ae ua faaalia mai e se isi faaaʻoaʻoga faale-Tusi Paia faapea, e mafai foi ona fesootai atu  se laei o se tasi i se mea e lē viiaina ai. Ina ia mauaina se tasi o faamoemoega, na aveesea ai e le avā a le atalii o Iuta, o Tamara, laei o loo matauliaina ai o ia o se fafine ua oti lana tane, ae faia se pulupulu ma se veli ma nofo i tafatafa ane o le auala. Ina ua savali ane Iuta, o loo faapea mai le tala faamaumau: “Fa te ia o ia le fafine talitane, auā sa na ufiufi ona mata [i le veli].” Sa avatu e ona laei ia te ia le foliga o se fafine talitane o lena vaitaimi.​—Kenese 38:13-15.

¹⁰ E mafai e le auala tatou te laei ai ona fesootaia i tatou ma nisi o vasega o tagata, i aso nei pei lava ona iai i tuā i inā, e ui lava tatou te lē o faia mea o loo latou faia pe talitonu i mea latou te talitonu i ai. Ua manatu tagata faapea tau lava o lo tatou faamaonia o le vasega o tagata o ē laei faapena. E mafai ea ona tatou tuuaʻia i latou?

¹¹ O le auala e laei ai e lē gata e faaesea ai alii leoleo, alii fuimū po o tamaitai tausimaʻi; ae faaesea ai foi tagata o ē o a latou galuega e lē viiaina ai. I aso nei, ua seāseā lava laeiina e fafine talitane pulupulu po o veli e pei ona sa latou faia i Kanana i sina toluafe limaselau tausaga ua mavae. Ae ui i lea, ua oo lava ina faasino mai ma le matuā manino tele e o latou ofu o loo matuā aliali mai ai tino ma taʻuina mai ai mea lē mamā, le galuega o loo latou faia pea. I le vaega o tane, o i latou o ē fiafia i fouvalega po o gaoioiga faavae faapolotiki, ua latou laeiina foi ni teuga patino, ma e faapena foi i nisi o tauātane ma tauāfafine. Pe tatou te mananao e faafesootaia ma so o se tasi o latou nei? Ma afai tatou te laei pei o latou ma i le iʻuga e maua mai ai ni faafitauli​—e pei o le taumafai e sue se galuega po o le taumafai ina ia agavaa mo nisi o faaeaga i totonu o se faapotopotoga Kerisiano​—pe tatau ona faateʻia ai i tatou?

 O LE Ā E TATAU ONA FUAFUAINA LE TEUGA O LE LAUULU

12-15. (a) O ā ituaiga o teuga o lauulu e te lagona e tosina tele i ai manatu i aso nei? Aiseā? (e) O le ā le manatu autū o le fautuaga ua aumaia i le 1 Peteru 3:3? (i) O le ā le uiga o le 1 Korinito 11:14, 15? E te faatatauina faapefea i auala o teuga o loo iai nei? (o) Afai e faataʻitaʻi tane i le auala e teu ai e tamaitai o latou lauulu, atonu o le ā o le a taʻuina atu ai e lenei mea i isi?

¹² E tele teu e te mafaia ona fai ai lou lauao. I le faagasologa mai o senituri, ua eseese lava teuga o lauulu mai lea atunuu i lea atunuu ma lea vaitaimi i le isi. Pe iai se eseesega po o le ā le teuga o le lauulu e te filifilia? Ioe, e iai. Ona o le lotomimita faaletagata ua maua mai ai i nisi taimi teuga o lauulu ua matuā ova atu ma le mea e tatau ona iai. O lea le mafuaaga na iloaina ai e aposetolo o Paulo ma Peteru le tatau ona fautuaina fafine Kerisiano ina ia aua le teuanoaʻi pe faatāuaina tele le teuga o le lauulu. Na tusi Peteru: “Aua neʻi faia i le tino a latou teuga, o le fili lea o le lauulu, ma le teuteu i auro.”​—1 Peteru 3:3.

¹³ Ae ui i lea, i tausaga lata mai nei, ua uaʻi faapitoa atu ai​—i teuga o lauulu o tane talavou​—ae maise lava lauulu uumi tele ma talafa uumi. Ae peitai, pe sa leʻi faauumiina lauulu o tane i taimi o le Tusi Paia i lo le mea e masani ai i le tele o atunuu i aso nei? E leai se faalētonu sa latou faia faapena. Peitai, e iai se isi mea e mautinoa le tutusa ai. O le ā? Sa tausisia pea le pupuu o le lauulu o tane i lo tamaitai. O le pogai lena na mafai ai ona tusi atu le aposetolo o Paulo i le faapotopotoga i Korinito, i Eleni, ma faapea atu: “E le aʻoaʻo mai ea le mafaufau [natura] ia te outou, a uumi le lauulu o le tane, o le mea lava lea e mā ai o ia? A e afai e uumi le lauulu o le fafine, o le mea lea e viia ai o ia.” (1 Korinito 11:14, 15) Ua aʻoaʻoina faapefea i tatou e le “natura” i lenei mea?

¹⁴ O se tasi o mea, i tagata e keli o latou lauulu, e pei o tagata sa Semī ma tagata Europa o ē na tusi atu i ai Paulo, e masani lava ona iloga le eseese o le uumi e tutupu faalenatura ai lauulu o tane ma tamaitai.  I le tele lava o tulaga, e masani ona pupuu lauulu o tane. I le taimi foi lava lena, ua matauina lautele ai e tagata e faapea, o se mea e “masani ai”​—o le mea tatau ma fetaui​—mo tane ina ia ʻoti o latou lauulu i se uumi e onomea ai, ia pupuu ifo i lo lauulu o tamaitai. E lē o se mea e masani ai mo se tamaloa po o se tama e faauumi lona lauulu ina ia foliga ai o ia e pei o se teine. Na i lo lena, ua avea lea mea ma masani o se tupulaga (ma nuu) o loo faatoateleina ai tauātane ma tauāfafine. Ma ua faailoa mai e le Tusi Paia e faapea, o le tauātane ma le tauāfafine o le “tu e le tatau,” e lē talafeagai uma ma e inosia i le silafaga a le Atua.​—Roma 1:26, 27.

¹⁵ Pe ua matuā faatapulaaina ai i tatou e lenei mea? E leai, auā e pei lava ona iai i laei, e faapena foi i le teuga o le lauulu, e tele auala eseese e faafiafiaina ai ma lalelei ai e teu ai le lauulu o se tasi, e aunoa ma le faapea ua lē onomea pe ua lē masani ai. E mafai pea ona iai faiga eseese e matagofie e aunoa ma le sopo i tala atu o le mea ua tonu i fofoga o le Atua.

FAAPEFEA VALI?

16-19. (a) O le ā lou lagona e uiga i le faaaogāina o vali? (e) O ā ni taunuuga leaga e maua mai vali i nisi taimi? (i) Ua saunia faapefea e mataupu silisili o le Tusi Paia se taʻitaʻiga paleni i lenei mataupu?

¹⁶ O loo faaalia e le Tusi Paia faapea sa faaaogāina e tagata vali i taimi anamua. Tatou te iloa e laeiina e tagata laei, e lē gata ina ia ufiufi ai le tino, ae ia foliga lalelei ai foi. Sa masani ona faaaogā e tagata Eperu anamua fagu sausau ina avea ai o latou tino o se mea e sili atu ona fiafia e faalatalata i ai. O loo iai foi le faamaoniga faapea, sa latou faaaogāina nisi o vali, ae maise lava uu, ina ia faaitiitia ai le mago o le paʻu ma faaleleia atili ai o latou foliga mai.

¹⁷ O le ā la e tatau ona fai ma taʻitaʻiga mo tamaitai talavou o aso nei o ē mananao ina ia faia mea e aumaia ai le faamaoniga a le Atua?  E manaomia ona latou mulimuli i le fautuaga lelei ina ia faia mea uma lava ʻma le onomea ma le leai o se mea e leaga ai [po o le soifua malōlōina o] le mafaufau,’ ia fai ma teuga autū le “tagata lilo o le loto, ia teua lea i le mea e le pala, o le loto agamalu ma le filemu, o le mea tau tele lava lea i luma o le Atua.”​—1 Timoteo 2:9, 10; 1 Peteru 3:3, 4.

¹⁸ O le mea moni, e lelei i teine talavou ona iloa e faapea, e masani ona tele atu le leaga e faia e vali i lo le lelei. E mafai ona faaleagaina ai ni foliga aulelei pe faamatagā atili ai ni foliga e lē aulelei. E ese mai ai i lea, e masani ona punitia e vali le momosi o foliga o le talavou lea e sili mamao atu ona lalelei i lo le aafiaga faatagafai e maua mai vali.

¹⁹ O le soona faaaogāina o vali e teine, e masani lava, e na ona faauaʻi atu ai i vaivaiga. A o le mea e sili ona leaga, e mafai ona ono taofia ai so o se matagofie o uiga faaletagata (o le mea moni, lea e sili atu ona lalelei ma e sili ona tumau i lo le manaia mai o foliga) mai le faaaliaina atu po o le matauina mai ai. O le soona faaaogāina o vali e mafai ona faauigasese ai ou uiga faaletagata i le vaai a isi, ma a mavae sina taimi, e oo ai lava ina mafai ona mafuli atu ina taaʻina ai ou uiga faaletagata i le foliga maualalo o loo e faaaliaina.

MULIMULI I TAʻIALA SAʻO

20-22. (a) Na i lo le aumaia o tulafono e faatatau i laei ma teuga, o le ā ua tatou maua i le Tusi Paia? O le ā la ua manaomia mai ia i tatou ina ia faatatauina ai nei mataupu silisili? (Faataoto 2:10, 11) (e) Aiseā ua iai i mātua le aiā ina ia faataatitia ai ni taʻiala faaopoopo mo a latou fanau?

²⁰ E leai ni tulafono patino i le Afioga a le Atua e faatatau i nei mea, ae na i lo lena, ua saunia mai ai taʻiala lelei. E tatau i tagata talavou ona saili ina ia maua se vaaiga paleni, ma o le a fesoasoani le Tusi Paia ia i latou ina ia faia faapena.

²¹ Ua i ou mātua le aiā faalenatura e faataatitia ai ni taʻiala faaopoopo. Afai na valiina le fale o loo e nofo ai i se paluga o ni vali e malolosi ma e ese lava, o le a taumanatu tagata pe sa iai se mafaufau o le ulu o le aiga po o le avā foi.  Pe afai foi na lafoaʻia le fale ma ua malepelepe lona foliga mai, o le a itiiti la so latou faaaloalo mo lē e ona le fale. O loo sili atu ona fai oe ma sui o ou mātua i lo le fale. O loo e tauavea o la igoa, ma po o ā lava ni mea e te faia pe e te tautala ai, e atagia mai ai le toleniga o loo la avatua ia te oe ma le ituaiga o tagata e iai i laua, faapena foi ma le auala e te foliga mai ai. Ae sili atu ai ona tāua, pe afai e te faapea mai o oe o se auauna a le Atua, ua fai la oe ma Ona sui. Pe o fetaui lou foliga mai ma le mea ua e fai mai ai?

²² Manatu i fetalaiga a Iesu: “Afai ua outou iloa ia mea, amuia outou pe a outou faia.” (Ioane 13:17) O mafai ea ona e malamalama oe lava i le uiga o le mea ua fautua mai ai le Tusi Paia? E te mafaia ona faaalia o loo ia te oe le malamalamaga moni ma le malosi o uiga faaletagata e ala i le faatinoina o fautuaga a le Tusi Paia i lou olaga. O le a e mauaina ai la le fiafiaga i le iloaina o loo faamaonia oe i le silafaga a le Atua, lona Alo, ma ē uma e alolofa ma auauna ia te ia.

[Fesili mo le Suʻesuʻega]

[Faamatalaga faaopoopo i le itulau 53]

O le ā o loo taʻu mai e ou laei e uiga ia te oe?