Mataupu 2

Le Pogai e Mafai ai ona E Vaai i le Lumanaʻi ma le Mautinoa

1-4. O le ā e fai e le mautinoa e uiga i le manuia po o le lē manuia o se tagata? Aiseā e toatele ai tagata e lē matuā lagona le mautinoa e uiga i le lumanai?

 PE SA e taumafai ea e te oso i luga o se laau faalava i le oso maualuga, po o luga foi o se pa po o se puipui? Afai sa leʻi maoaʻe tele le maualuga, ma sa e mautinoa e mafai ona e ausia, e lē taumate la na manuia lau oso. Peitai, afai sa e fefe e lē mafai ona e ausia, atonu na lē taulau lau oso, ma iʻu ai i ni taunuuga le fiafia mo oe.

² O le auala lena o loo iai le tele o mea. Mo se faaaʻoaʻoga, afai e te fefe e alu i le vai, o le a lē mafai ona e iloa aau.

³ E faapena foi, le tulaga, mo le mauaina o le mea sili mai lou talavou. O le mautinoa, e mafai ona iai sana vaega tele i le faia o lenei mea. E lē mafai ona e fiafia moni pe agaʻigaʻi lelei i luma i le ala o le ola e aunoa ma le mautinoa i le mea o loo taatia mai luma. Peitai i aso nei, o le ā o loo iai e alagātatau ai ona tatou mautinoa.

⁴ E ono mafai ona tatou faaaluina se taimi tele e talanoa ai e uiga i pogai mo le lē mauaina o le mautinoa. Ua faapolusioneina atili lo tatou Lalolagi paneta, ua faamamateina ai mea o loo ola i le vao, ma ua iai foi oge, ma isi faalavelave matuiā. O nei mea atonu e te tau manatunatu ai faapea pe iai se mea e aogā ona tepa taulaʻi agaʻi atu ia ai.  Ua manatu nisi o le tupulaga talavou faapea, ona o le tulaga ua faaleagaina ai mea i le lalolagi, ua lē tele foi la se lumanai mo i latou. Ma atonu e foliga moni mai faapea. Peitai, e anoanoaʻi mea e lē talanoaina tele e tagata, peitai e aumaia ai ia i tatou mafuaaga e ao ai ona tepa taulaʻi agaʻi i luma i le lumanai ma le mautinoa. Seʻi iloiloina la nisi o nei mea.

O LOU AIGA FAALEPANETA

5-8. Taʻu mai nisi o vaega ua mafai ai ona iai le ola i luga o le lalolagi. Na faapefea ona iai lenei tuufaatasiga ofoofogia o mea?

⁵ E faigofie lava mo i tatou ona soona taliafuaina le lalolagi ma le faalētatau. Peitai, o lenei paneta ua tatou fananau ma ola ai o se tafa o galuega moni e matuā ofo ai. E peiseai o se polo taavilivili, o loo malaga ai le lalolagi i le faitau miliona o maila i le vateatea a o taamilomilo i le la, e 93 miliona maila (pe tusa ma le 150,000,000 kilomita) le mamao ese. O le ā le mea e ono tupu pe ana fai e ese se isi tulaga o loo iai le lalolagi? Ia, ana fai e mamao mai le la, e pei o paneta o Pluto ma Neptune, semanū e pei le lalolagi o se pusa aisa tele, ua sili mamao atu ona malulu tele e ola ai. Ma ana fai foi e tasi vaetolu le mamao o lona latalata i le la, e pei o le paneta o Venus, semanū e pei le lalolagi o se umu, auā o le a matuā aasa tele lona vevela e oo ai lava ina pupuna vaitafe ma vaituloto.

⁶ Po o, e ui lava ina ua fetaui lona mamao mai le la, e faapefea pe ana lē faataamilo le lalolagi i lona ʻau e pei ona faia i le tai luasefulu ma le fa itula? Faapea la, e pei o Mercury, e sili itiiti atu i le faatasi ona faataamilo a o faia lana malaga faaletausaga e taamilo ai i le la. O lona uiga la, toetoe lava o le afa o le lalolagi e ono avea ma nofoaga lē aogā ua liu aisa e i lalo ifo o le selo lona tau, ma o le vaega la o loo totoe o se ogaumu aasa ua tuufua.

⁷ Ua lē na o le pau lena. Aiseā, e lē se mea itiiti ai, i le tele o le lalolagi, e mafai ona tatou olioli i le mālū ma fugalaau o le tau e totogo ai mea, aso la ma le mafanafana o le tau mafanafana, le manutinuti ma lanu o  mea i le tau e afu ai mea ma le matagofie o le kiona o le tau malulu? O nei vaitau ua pogai mai le tu faasipa o le lalolagi i se tulimanu e fetaui ma lona auala faataamilo i le la. Ua fesoasoani nei vaitau ina ia avea ai le tele o le fogāeleele o lenei paneta ma nofoaga e sili ona taugamalie ina ia mau ai. Ma ua faapea foi ona latou faia ia mafai mo se vaega tele o le laueleele ona fuaina mai meaʻai mo tagata ma manu.

⁸ E faitau selau isi vaega o loo galulue faatasi ina ia mafai ona maua le ola i lenei paneta. Peitai, o le ā ua taʻu mai e nei mea uma ia i tatou? Fesili ifo lava oe ia te oe: Na faapefea ona iai lenei tuufaatasiga maofa o nei mea? Ma le mautinoa e tatau lava ona tatou iloa e iai Lē na Fuafuaina lo tatou Lalolagi paneta. Ioe, o le tele o faiga mo le iai o le ola i le lalolagi ua matuā sili ona lavelave na i lo so o se vaa o le vateatea ua fuafuaina ma gaosia e saienitisi faaletagata. O manatu uma ma galuega ua iai i faiga lavelave o le lalolagi ua latou taʻuina mai ai foi ia i tatou se isi mea. Ma le manino lava, ua taʻuina mai e nei mea ia i tatou faapea ua naunau Lē na Fuafuaina le lalolagi ia maua e i latou o ē nonofo ai le ola fiafia ma le manuia. E aofia ai ma oe i lena mea.

9-12. E ui lava e tele se faatamaʻiaga ua faia i le lalolagi, ae o le ā ua faataʻitaʻia mai ai lona agavaa e toe faaleleia ai mai le faatamaʻiaga?

⁹ E moni, o le toatele o tagata o aso nei ua latou faatamaʻiaina le lalolagi i se tulaga leaga tele i le faapolusioneina ma faaaogāseseina. Peitai e mafai ona suia na faiga. Ma e mafai ona toe faaleleia mea na faatamaʻia.

¹⁰ Mo se faaaʻoaʻoga, manatu i le mea na tupu i le motu o le Pasefika o Krakatoa. Na malepe i luga i se pasaega tele o se maugamū. Pe ana fai e te asiasi i ai ina ua faatoʻā uma lava, o le a e vaaia ai ua na o lefulefu lava le motu atoa. Sa aunoa ma se ola na totoe​—leai ni tagata, leai ni meaola, leai ni laau. Ae peitai o le ā la le mea na tupu?

¹¹ E aunoa lava ma se fesoasoani a se tasi, na amata ona toe faaleleia le motu. I totonu o le tolu tausaga, na amata ona toe lauolaola aʻe ai i inā ni ituaiga o laau e luasefulu ma le ono. E leʻi umi lava  ae ola aʻe ai niu, tolo vao ma oketi. Ina ua mavae tausaga e luasefululima talu ona pa le maugamū, ona iai lea o ituaiga o meaola e 263 i luga o Krakatoa. Ua mouese atu le faatafunaga mai le maugamū. A ua toe faafoisia mai tulaga pei se togalaau o le motu.

¹² E mafai ona toe tupu i le lalolagi atoa le auala maofa na toe faaleleia ai le motu o Krakatoa. Ma, e pei ona o le a tatou vaaia mulimuli ane ai i lenei tusi, o loo iai mafuaaga lelei e talitonu ai o le a faapea lava.

O SE FALEGAOSI MEAʻAI E OFO AI

13-17. Ua maua faapefea mea taumafa mai le laueleele? (Salamo 104:14) E faapefea i mea taumafa eseese ua maua mai le laueleele ona saosaolaumea i le oliolisaga o se tasi i le olaga? O lea, o le ā le ituaiga o olaga sa i le finagalo o Lē na Fuafuaina nei mea uma mo i tatou? (Isaia 25:6; Salamo 67:6)

¹³ O le isi taimi e te toe alaala ai i lalo i se taumafataga, nofo ma mafaufau faapenei: E le āfaina po o e taumafaina se araisa paepae po o pateta papae, saito enaena po o pi eena, sana samasama po o maukeni samasama, pasio po o le kuava, e maua uma lava mai i laau e lanumeamata o latou lau. Aiseā? Ona o le gasesega ofoofogia e taʻua o le photosynthesis. *

¹⁴ I na laau uma lava ua iai se mea e lanumeamata i totonu o o latou lau e taʻua o le chlorophyll. Pe a taia e le malamalama o le la nei laulaau ona galue ai loa lea o le chlorophyll i le gaosia o suiga lavelave tau vailaau. I totonu o sela o le laau, e tuufaatasia ai le vai, kaponi ma le okesene (e puʻeina e le laau mai le ʻea) ina ia gaosia ai le suka taatele, le faavae autū o mea taumafa uma. I le faaaogāina o le suka lena, e gaosia ai foi e laau lanumeamata le tele o mea lavelave e pei o meaʻai e iai le suka ma le masoā (carbohydrates), gaʻo, meaʻai faatupu tino (proteins) ma vaitamini. Pe a tautala i le sauniuniga ofoofogia e pogai mai le photosynthesis, fai mai le tagata atamai i mea tau laau o Frits W. Went:

“I le faatatau atu i le mamafa o le tone, o lona gaosiga ua avea ai falegaosi mea a le tagata e foliga faatauvaa. O tausaga taitasi e gaosia mai ai e falegaosi uamea le 350 miliona o tone o le uamea, a o falegaosi simā o le lalolagi e 325 miliona tone o simā. Ae peitai ane, o laau lanumeamata o le lalolagi, latou te gaosia mai tone o le suka e 150 piliona i tausaga taitasi uma.”

¹⁵ E iloa e saienitisi le mea o loo tupu, peitai latou te lē o malamalama pea i le auala o loo galue ai le photosynthesis. E pei ona faapea mai se tasi tusitala faasaienisi, e masani lava ona faasino e le au suesue i le gasesega faapea “o le pusa uliuli.” Aiseā? Auā “latou te iloa mea e ō i totonu ma mea e ō mai i fafo peitai ua lē o mautinoa e uiga i mea uma o loo faia i totonu.” I a latou fale suesue tau vailaau uma lava, e lē taitai ona mafai ona toe faaluaina e tagata lenei gasesega uiga ese.

¹⁶ Toetoe lava o se mea e maofa ai ona o le anoanoai o mea taumafa o ituaiga eseese ua fuaina mai e le laueleele. E lē taumate e te matuā fiafia i nisi mea taumafa​—seʻi faapea o le mago. Peitai, e faapefea pe afai o mea uma​—e iai pateta, araisa, falaoa, apu, moli​—e tofo suamalie uma lava pei o le mago? O le a lē pine ae e fiu i lena tofo, a ea? Na i lo lea, ona o le eseese o fualaau aina, fualaau fai sua, sana, loina ma filimoto ua saunia e falegaosi mea taumafa o le laueleele, e faitau afe tofo eseese e olioli ai vaega o sela o le laulaufaiva (taste buds) lea e taʻuina atu ia te oe le eseesega o tofo.

¹⁷ O lea foi, o le ā le mea ua taʻu mai ia i tatou e nei mea uma? Ma le matuā manino lava, o Lē na amataina lenei falegaosi mea taumafa uiga ese, e finagalo mo le ola i lenei lalolagi ina ia matuā fiafia. E manatu mamafa o ia e uiga i se lumanai fiafia mo i tatou. O Lē na Fuafuaina Mea o ia lava lea e tasi na faia le Lalolagi paneta o se aiga talafeagai lelei, ua faapea foi ona silasila i ai, o lea lava aiga ua fau ma soloi i mea uma ua manaomia mo se faigaai fiafia mo i latou o loo mau ai. O le a tatou talanoaina foi mulimuli ane i lenei tusi le auala ua Ia faamoemoeina e faaavanoaina atu ai lena faigaai ia i latou uma o ē mananao ina ia auai atu i ai.

 TAGAI IFO IA TE OE LAVA

18-23. O ā mea e faatatau i o tatou tino e faaalia ai faapea sa fuafuaina ia sili mamao i tatou i lo manu?

¹⁸ O le toe mea, seʻi manatunatu teisi ane ia te oe lava. Ina ia mafaufau, o le mea moni, e manaomia ona e faaaogāina lou faiʻai (tulou)​—o lea, aiseā e lē amata mai ai i inā? O le tulaga masani lava, e te lē mafai ona vaai i lou lava faiʻai, peitai o le ā o lou manatu, e faapeʻī? Pe a oo ina atoa lelei, e foliga mai le faiʻai o le tagata e pei o se lama lapoa e piniki-faaefuefu ma o lona mamafa e itiiti ifo i le tolu pauna (1.3 kilo). Peitai, maeu le tele o le tomai ua fafaoina i lena nofoaga itiiti! Fai mai le lipoti faasaienisi i le New York Times:

“O le tuufaatasiga o le faiʻai . . . e matuā lavelave tele ua avea ai komepiuta tetele faaeletise (giant electronic computers) e peiseai o ni mea taalo a se tamaitiiti pe a faatusatusa atu i ai.”

¹⁹ Ioe, o le faiʻai ua ia te oe ma mafai ona faaaogā, ua faamatalaina faapea “o se fasi mea aupito sili ona lavelave i le vateatea.” O lenei, afai e tuuina atu e se tasi ia te oe se uati lelei po o se mea puʻeata taugata po o se masini faifaaopoopo eletise tautele, e mautinoa o le a e tausia lelei ma taumafai e maua mai ai le mea sili i lona faaaogāina, a ea? E ao la ona e lagonaina le talisapaia e sili atu mo lou faiʻai.

²⁰ Manatu foi, i lou tino. O lenei, e moni e sili le malosi o le leona ia te oe, e moni foi e lapoa atu le elefane, e vave atu foi le aau a le mumua (dolphin), e lelei atu foi le aʻe a le manuki, e mafai foi e le aeto ona lele maualuga i ona lava apaau ae e te lē mafaia. Peitai, e leai lava se tasi o nei meaola e mafai ona tuufaatasia i ai tomai uma ua i le tagata. E lē mafai e leona ma elefane ona felelei, e lē mafai e le mumua ona aʻe i laau ma mauga, e lē mafai foi e aeto ona feausi. Peitai, e mafai e tagata ona faia nei mea uma, e aunoa ma se fesoasoani po o le faaaogā faatasi ma mea na latou fauina. Ioe, e sili atu i mea uma, e matuā tutasi lava tagata i o latou tomai i le faia o mea, i uiga matalasi e lē gata mai.

 ²¹ O se tasi o pogai o lenei mea o ou lima ia. E leai lava se mea faigaluega ua fauina na te mafaia ona fai mea uma e mafaia e ou lima​—mai galuega mamafa i le faainisinia po o le faakamuta, e oo lava i gaoioiga e manaomia ona paʻi i ai ma le faaeteete e pei o le taina o se laau faamusika, valiina o se ata po o le tusiina foi o se ata mo se fale.

²² E moni, o ou lima ua na o se tasi lea o mea ua avea ai lou tino o se mea ofoofogia. E lētioa ona faapea mai Dr. W. W. Akers, o se inisinia e galulue faatasi ma fomai tipitipi, e faatatau i le tino o le tagata:

“O le tino o le faavae lea o le faaaʻoaʻoga sili ona lelei tau i gaoioiga faasaienisi. E toetoe lava so o se masini e mafai ona e mafaufauina​—e tusa lava po o le ā lona lelei​—e mafai lava ona e vaai i totonu o le tino ma maua ai se mea e sili atu.”

²³ Ma le manino lava sa finagalo le Matai o Lē na Fuafuaina mea ia silisili atu tagata i lo manu ma ia mafai ona olioli i le lalolagi i le auala silisili e mafai ai. Ua aumaia ai ia i tatou e lea le mafuaaga e mautinoa ai faapea o loo Ia manatu mamafa i lo tatou olioli i se lumanai faamanuiaina.

E MAFAI ONA E AGAʻI ATU I LUMA MA LE MAUTINOA

24-28. Aiseā e fetaui ai ona talitonu faapea sa iai Lē na Fuafuaina ma Faia le lalolagi? (Roma 1:20) O fea ua ia saunia ai tali i a tatou fesili e faatatau i le olaga? (2 Timoteo 3:16) E mafai faapefea ona tatou iloaina pe o le faia o le mea ua fai mai ai le Tusi Paia, o le a fesoasoani moni ia i tatou ina ia faafetaiaʻia ma le mautinoa le lumanai? (2 Peteru 3:13; Faaaliga 21:1-4)

²⁴ Ua tatou vaaia faapea o lenei paneta ma mea uma o iai ua aumaia ai se faamaoniga o le atamai ma le fuafuaga e sili atu i lo le tino mai o so o se fale po o se nofoaga ua tatou vaaia. E lē taumatea e mafai ona e ioe i lenei faaupuga faigofie ua maua i le Tusi Paia: “Auā e taitasi fale ma saunia e se tasi.” (Epe. 3:4) A faapea na  e alu i se toafa tele naʻuā ma e mauaina ai se fale i inā, ae leʻi vaaia o iai se tasi. E te lē manatu faapea na faia e le fale ia lava, a ea? E faapea foi la le lalolagi, e manino lava e iai Lē na Fuafuaina ma Faia, e ui lava ina tatou te lē vaaia. Fai mai lē na manumalo i le Nobel Prize o Max Planck:

“E leai se faamalamalamaga o le vateatea vagana ai le manatu faapea o loo iai se Atamai Foafoa mea Silisili Ese.”

²⁵ Ua taʻuina mai e le Tusi Paia ia i tatou po o ai lenei “Atamai Foafoa mea Silisili Ese” na fausiaina lo tatou aiga, le lalolagi. Ua taʻuina mai ia i tatou o ia o Lē na Faia le lagi ma le lalolagi, o Ieova le Atua.

²⁶ E manino mai e malosi tele ma atamai Lē na Fuafuaina mea e sili. E faapea foi ona manino mai le ia te ia o se faanaunauga sili mo i tatou uma​—ua aofia ai ma oe​—i lona finagalo. Afai e te mafai ona aʻoaʻoina mea ua iloa e isi tagata, ona e mafai ai lea ona iloaina mea e tele, e sili atu ona tele mai ia te Ia e pei o le auala e mauaina ai le mea sili mai i lou talavou.

²⁷ O i inā la e manaomia ai le Tusi Paia. Ua talaina mai ai fuafuaga a Lē na Foafoaina mea mo le lalolagi ma le fanau uma a tagata. E tuuina mai ai ana tali i fesili e tele a tagata.

Na te faaalia ai mea e tutupu mai ai o latou faafitauli ma le auala o le a foia ai. Ua lē o taʻitaʻia e le Tusi Paia ou faamoemoe i le faiga lē taulau o mea o loo iai nei lea ua faatumulia ai le lalolagi i le tele naunau o faalavelave ma lamatiaga. O loo faasino i faiga fou o mea o loo ofoina mai ai se mea e sili mamao atu ona lelei.

²⁸ Pe ua e faitau i le Tusi Paia i se mamao na oo iai pe leai, ae atonu e te tau manatunatu po o mea ua fai mai ai e mafai moni ona foia ai ou faafitauli ma tali i au fesili. O le a lē taitai ona e iloa vagana ua e matuā vaai totoʻa ma le faaeteete i ai. I lenei tusi o loo e faitauina nei, o le a tatou vaai ai i le mea ua fai mai ai le Tusi Paia atoa ma tali ma taʻitaʻiga ua aumaia ai. Vaai i ai oe lava ia i le fetaui lelei ma le faamaoni o le Tusi Paia. Ioe, vaai lava pea oe i ai pe mafai faapefea ona fesoasoani atu ia te oe le Afioga a Ieova le Atua, le Tusi Paia, ina ia faafetaiaʻia le luʻi o loo lua faafesagaʻi, ona e agaʻi atu ai lea ma le mautinoa i luma i se lumanai fiafia ma le manuia.

[Faamatalaga pito i lalo]

[Fesili mo le Suʻesuʻega]

 [Ata i le itulau 11]

O le poto e uiga i Lē na Foafoaina le lalolagi e aumaia ai le faavae mo le mautinoa i le lumanai