Mataupu 8

O ā Ituaiga o Uo E te Manao Ai?

1-5. (a) E mafai faapefea ona faaopoopo atu faigauo i lou olioli i le olaga? (e) O le a e faamatalaina faapefea se uo moni? (Faataoto 18:24)

O LE iai o se uo moni e tele mea e faaopoopo atu ai i le olioli e soifua ai. O tagata o ē “tuua toatasi” ma aloese mai isi, e seasea lava, pe afai e iai, ona maua le fiafiaga moni. O le ā le mea o loo iai e uiga i le faigauo e faaopoopoina atu ai mea e tele i lou fiafiaga?

² O le faia faatasi o se mea ma se uo e foliga mai e faateleina ai le olioli o lena mea faapitoa ua e oo i ai. Na fetalai Iesu i se tasi taimi e uiga i se leoleo mamoe o lē na toe maua lana mamoe na leiloa faapea ma se fafine o lē na leiloa lana tupe. Sa taʻitasi ma valaau i a la uo, e faapea, “Ia tatou olioli ia.” (Luka 15:6, 9) Ioe, e masani ona e manao ina ia tofutofusia faatasi ma au uo i mea lelei, ma i le iʻuga, e foliga mai e faaluaina ai lou fiafia. Pe leʻi oo ia te oe lena mea?

³ I se isi itu, afai ua lē lelei le gasologa o mea ma ua e lagona le mafatia, e tele mea e mafaia e se uo lelei ina ia maua ai se mapusaga mai lou faanoanoaga. E mafai ona avea uo ma fesoasoani moni pe a faamataʻuina e faalavelave. E mafai ona latou lapataia oe mai se lamatiaga ma fesoasoani ia te oe ina ia solaese mai ai, ma mafai ona faalaeiauina oe pe a oo ina faigata alumaga o mea. Atonu e mafai ona e ioe i le mea o loo fai mai ai le Faataoto 17:17: “E alofa le uo i aso uma lava; a e fanau le uso mo le aso vale.”

⁴ Ua faamamafa mai e lena mau se uiga o loo faailogaina malosi ai uo moni:  O le faamaoni [loyalty]. O le avea ma uo, o lona uiga ia sili mamao atu i lo le na ona amio faaleuo. O se uo moni lava e faamaoni ia te oe faapea ma mea e sili ona e naunau i ai. E faapena ea au uo?

⁵ I aso nei, o le toatele o tagata e foliga mai e tele ina mananao ina ia sili atu ona lelei i o latou tuaoi na i lo le fesoasoani ia te ia. E oo lava i ē ua taʻua o “uo,” e masani ona iai se agaga tauva, ae lē o le faamaoni. O le tele o faigauo e na ona tumau pe afai e lē manaomia e se tasi o i laua ona faia ni suiga pe lafoaʻi nisi o manaoga manatu faapito mo le lelei o le isi. E lē faigofie ona maua se uo moni i lenei lalolagi tauva.

6-8. O ā auala sa faamaonia ai e Ionatana ma Usai faapea o laua o ni uo a Tavita?

⁶ Ua vaaia ia Tavita se faaaʻoaʻoga lelei mai le Tusi Paia o se tasi o lē sa iai ni ana uo taʻuaogāina moni lava. Atonu na e faalogo i le auala na maua ai e Tavita se uo lelei, o Ionatana, le atalii o le Tupu o Saulo, ina ua mavae le faatoilaloina o Koliata, o se fili toa tinoese. Ana faapea sa lotoleaga Ionatana, e ono mafai ona inoino o ia i a Tavita e avea o se faatavā mo le nofoalii o Isaraelu. Na i lo lena, sa iloa e Ionatana faapea o loo i luga o Tavita le faamaoniga a le Atua, “ona pii mau lea o le loto o Ionatana i le loto o Tavita, ua alofa Ionatana ia te ia, pei ona alofa o ia ia te ia lava.” (1 Samuelu 18:1) Na alofa Ionatana ia te ia ona o lona lototele ma lona faatuatua ia Ieova le Atua. Atonu sa ia Ionatana foi lava ia se tuutoina tali faapena i le Atua. E leai lava se isi faavae sili ona lelei mo se faigauo mamae i lo lena.

⁷ E mafai ona e faitau atili e uiga i se uo mulimuli ane ai a Tavita e igoa ia Usai, o se tasi o lē sa avea ma aumea vavalalata a Tavita i le vaitaimi o lana nofoaiga tautupu. O se tala faamaumau e manaia i le faitau, le auala na lamatia ai e Usai lona ola ina ia tetee atu ai i le faufauga faalilolilo taufaalata a Apisaloma, o se tasi o atalii o Tavita.​—Tagai i le 2 Samuelu 15:10-37; 2Sa 16:16–17:16.

⁸ E lē taumate o iai ni au uo faapenei. Afai e leai, e mafai faapefea ona e mauaina i latou? O le a tele ni taumafaiga moni lava e alu ai, ae mautinoa e aogā.

 SAILI UO TAʻUAOGĀINA

9-13. (a) E mauaina faapefea e se tagata ni uo taʻuaogāina? Aiseā e lē o se mea poto ai le taumafai ina ia maua ni uo e ala i le foai atu pe i le faatofutofusiaina i mea faitino? (e) O le ā le ituaiga o tagata e sili ona lelei ona aloese mai ai i le avea ma se aumea vavalalata, e pei ona faaalia i le Salamo 101:5-7?

⁹ E moni tele le faaupuga faapea, ʻe na o le pau lava le auala e maua ai se uo, o le avea lea o oe o se uo.’ E lagona malosi e tagata i nisi taimi lea faalogona pe a ʻtuuesea’ mai ni mea e isi tagata talavou o ē atonu latou te mataʻiina. Po o le maua o ni uo ae teʻi ua toe ō ese atu. Latou te lagona le tiga tele ona o lenei mea. E lē taumatea latou te lē o iloaina faapea, o le faigauo o se auala vala-lua.

¹⁰ E lelei ai la ona tatou fesili ifo ia i tatou lava: O le ā laʻu mea o loo fai ina ia faauo ai i isi? O le ā le tele o le faamaoni ma le naunau lē manatu faapito o loo oʻu manatu ai i isi, ma o le ā laʻu mea e fai ina ia saosaolaumea ai i lo latou fiafiaga ma lo latou lelei? O ā uiga o loo oʻu atiina aʻe ina ia lagona ai e isi faapea, latou te mananao moni lava ina ia avea aʻu ma se uo?

¹¹ E faalagolago tele le ituaiga o uo e te maua i le auala e te uia ina ia taumafai e sailia i latou. Ua saili nisi ina ia maua ni uo e ala i le faaaluina o tupe mo i latou, po o le valaauliaina o i latou ina ia auai i le olioli i le mauaina o mea faitino, e pei o se laaupese ma ni pese po o mea e fai ai taaloga.  E moni, o ia mea e ono tosina atu ai nisi ia te oe. Ua faapea mai le Faataoto: “E toatele o e alolofa i le mauoa,” ma e faapea “e uo tagata uma lava ma le tagata foai mea.” Ioe, e toatele tagata e amio faaleuo pe a faaalu ma le lē popole e se tagata ana tupe. Peitai, a uma loa tupe ona leai foi lea o ni “uo.”​—Faataoto 14:20; 19:6.

¹² E lē mafai ona “faatau” ni uo taʻuaogāina e ala i le faaaogāina o mea faitino, pe ala i le faaviivii po o le masani ona lolo atu pea i le mea e manao i ai le isi. So o se uo lava e mafai ona faatauina e lē taitai ona aogā, e tusa lava po o le ā le tele atonu e iai. E tosina mai uo moni i le ituaiga o tagata e te iai, i ou uiga, ae lē o mea e mafai ona latou maua mai ia te oe.

¹³ O lea, a o lelei le iai o se tulaga faaleuo faasaga i tagata, ae afai e te manao i ni uo moni, e manaomia ona e fili lelei e uiga ia i latou e te filifilia e avea ma aumea vavalalata ma maufaatuatuaina. Sa faapena Tavita. Fai mai a ia: “O le ua mata faamaualuga ma le loto fefete, ou te le mafaia lava lea. Ou te fia vaai i e o faamaoni i le nuu, matou te nonofo ma aʻu; . . . E le nofo i loʻu fale o se fai mea faaʻoleʻole.” (Salamo 101:5-7) Aiseā e matuā tāua tele ai mo tagata talavou i aso nei ona fili lelei e tusa ai ma aumea vavalalata?

AISEĀ E TĀUA AI SE FILIFILIGA LELEI

14-16. (a) O ā aafiaga e maua e se tagata mai ana uo? Faataʻitaʻi. (e) O le a aafia faapefea se faigauo pe afai e te taʻuina atu i le isi tagata faapea o loo lua feeseeseaʻi?

¹⁴ O se uiga faavae e faatatau i fesootaʻiga faavafealoaʻi e faapea, e te mafuli atu e amioaʻi e pei o i latou i ou tafatafa pe afai tou te miomio faatasi ma i latou mo se taimi umi. O lau filifiliga o uo e taʻu mai ai mea e tele e faatatau i le ituaiga o tagata e iai oe po o le mea foi e foliga mai o le a e iai. E mautinoa e iai se aafiaga e “faafoliga” i ai oe e au uo.

 ¹⁵ Pe e te filifilia uo o ē faamaoni [honest] ma amiolelei, o ē magafagafa, o ē faaaloalo i le Atua ma lana Afioga ma o ē e lototetele ina ia faia le mea ua saʻo? Pe o e tosina i tagata o ē femitai ia i latou lava ona o le mafai ona “faia o mea e sili aʻe” i lo isi, ma o ē, na i lo le lototetele faamaoni ae ua faia ni mea mataʻutia e lē mautinoa tau lava ina ia faaalialia ai? O latou sauni ea ina ia lamatiaina i le faia o se sao i amioga lē mamā, po o le gaoi po o le faaaogāina o vailaau faasāina ona gugutu lea faapea o loo latou ʻsao mai ai’? Afai latou te taumafai ina ia “lave” atu oe tou te ō faatasi i se mea e mafai ona e afāina ai, e mafai ea ona taʻua ma le tonu i latou “o ni uo”?

¹⁶ Manatua, afai o oe o se uo vavalalata a ni tagata faapena, a lē o le tou ō faatasi po o le tou feeseeseaʻi. O le feeseeseaʻi ma i latou atonu o le a faaiʻuina ai le “faigauo.” Aiseā? Auā o le a latou manatu i le feeseeseaʻiga o se faitioga po o se aʻoaʻiga. E masani lava ona fiafia tagata faapena e faatauemu i isi, peitai, latou te lē mafafai e i latou lava ona taliaina aʻoaʻiga. O loo tautala le Faataoto 9:8 e faatatau i lena ituaiga tagata ona faaopoopo mai ai lea i le faaeseesega e faapea: “Aoai atu i le ua poto, ona alofa mai lea o ia ia te oe.” E mafai e uo moni ona talanoa tuusaʻo le isi i le isi ma tau fai fesoasoani le tasi i le isi ina ia faaleleia pe faasaʻo i latou lava pe a manaomia. Pe a iai sau uo e lelei moni lava, o lē mafaufau saʻo ma tautala saʻo, ua ia te oe la se oloa tāua e sili ona taugata. O uo moni e pei o ni taimane​—e tāua ae maua gatā. I se faaeseesega faanoanoa, o uo pepelo e pei o maa taatele​—e maua i so o se mea.

17-19. (a) Afai e avea oe ma aumea vavalalata a se tasi o lē e lē talitonu moni i le Atua po o le Tusi Paia, o le a aafia ai faapefea oe? (Faataoto 11:9; Kenese 34:1, 2) (e) Afai e te manao moni ina ia fesoasoani i se tagata faapena, o le ā le auala sili ona lelei e fai aʻi?

 ¹⁷ O le toatele o tagata talavou i aso nei, ona o le leai o se faatuatua i Lē na Foafoaina mea faaleperesona po o lana Afioga, ua latou taliaina ai le manatu faapea, “ina tatou aai ma inu, auā o a taeao tatou te oti ai.” O le auala lena na lagona e tagata o aso anamua, o ē na faasalaina ina ia tau ma manu feai i malae o mataaga. Sa leai so latou faatuatua ia Ieova le Atua ma lona mana e toe tuuina atu ai le ola ia i latou o ē faatuatua ia te ia. I le avea o se tagata talavou, o loo e faatoʻā amata moni lava i le olaga. Pe e te manao la ina ia faaaʻoaʻo i le manatu sa iai i na pagota taʻusalaina e faatatau i le olaga? Ina ua uma ona faamatalaina lena vaaiga e uiga i le ʻola tau lava mo le asō,’ sa faaauau ona faapea mai le aposetolo o Paulo: “Aua neʻi faaseseina outou, O le feoai ma e amio leaga e leaga ai amio lelei.” (1 Korinito 15:32, 33) Mafaufau i le moni o lena mea. Afai e te sailia aumea vavalalata faatasi ma tagata o ē manatu na o mo le taimi nei, e mafai ona e mautinoa o le a latou faaleagaina ou faamoemoega ma taumafaiga agaʻi i le mauaina o se lumanai fiafia e tumau.

¹⁸ O nisi taimi atonu e fai mai se tagata talavou faapea e miomio faatasi o ia (o le tama po o le teine) ma se tasi e masalomia ona ala ma lona igoa lelei ina ia fesoasoani ai ia te ia lena. O se mea lelei le manao ina ia fesoasoani i isi. Ae afai e te auai ma i latou i o latou fiafiaga manatu faapito, o le ā le tele o le fesoasoani o loo e tuuina atu ia i latou? Mo se faaaʻoaʻoga, afai e te iloa atu se tamaitiiti i se vaivai palapalā, pe e te alu atu ma se fasimoli taele ma taumafai e faamamā le tamaitiiti i totonu o le vaivai? O le iʻuga, e na ona fai ma mea e te palapalā atu ai ma oe. E ao ona muamua ona e taumafai ina ia faamalosia le tamaitiiti e alu ese mai le vaivai palapalā a o e te leʻi faamoemoe e faia so o se mea i le faamamāina o ia i se tulaga latalata i ai.

¹⁹ O le mea moni, o le taliaina o se tagata ua iai ni amioga masani e leaga e avea ma se aumea vavalalata, o le a masani ona iai se taunuuga leaga i lena tagata (faapena foi ma oe). Aiseā? Auā atonu o le a faamalosia ai o ia ina ia tumau ai pea i lena lava auala e tasi, ma manatu faapea e mafai pea ona ia faalagolago i lou lagolagoina o ia.  Pe lē sili mamao atu ai ona fesoasoani le faatapulaaina o lau auaufaatasiga i taimi pe a mafai moni lava ona e fesoasoani i le tagata e ala i le faasinoina i ai o fautuaga lelei ma e ala i le valaauliaina o ia ina ia lua ō faatasi i nofoaga o loo faamatalaina mai ai lena fautuaga?

UO E SILI ONA TĀUA

20. E ala i la tatou filifiliga o uo, e faapefea ona mafai ona avea moni ai i tatou lava ma fili o le Atua?

²⁰ Ae sili atu ai i na mea uma, e tatau ona e manatu mamafa pe faapefea i auaufaatasiga ma tagata e masalomia o latou amioga masani ona ono afāina ai lau faiā ma le Atua ma lona Alo. I le Iakopo 4:4 ua taʻua mai ai lenei mea moni: ʻO sē fia uo ma le lalolagi ua avea o ia ma fili o le Atua.’ E mafai ona faatatau lena mataupu silisili i la tatou faiā ma so o se tagata lava i le lalolagi e pei lava o la tatou faiā ma le lalolagi atoa. Afai tatou te faamaonia auala lē tatau a se tasi pe sili atu ia i tatou auaufaatasiga ma lena tagata i lo tagata talavou o ē mananao moni e faafiafia le Atua, pe ua lē faaalia atu ai la le avea o i tatou lava o ni ʻuo a le lalolagi’?

21-23. (a) O ā ni lelei e maua e se tagata o lē avea moni le Atua ma Keriso o ni ana uo? (Roma 8:35, 38, 39) (e) E mafai faapefea ona tatou faaalia faapea tatou te mananao moni lava ina ia avea i laua o ni a tatou uo?

²¹ Afai e te manao moni mo le fiafiaga nei ma i le lumanai, ia taumafai i so o se mea ina ia iloa ai ona faatāuaina le faauoga a le Atua ma lona Alo. Ua faitau afe nei tausaga talu ona faataʻitaʻia mai e le Atua lana faauoga ia i latou o ē alolofa i le amiotonu, atiina aʻe ana fuafuaga sili e aumaia ia i latou le ola e faavavau i ni tulaga e fiafia moni. Sa faamaonia e le Alo o le Atua lona alofa faamaoni [loyal] mo tagata e saʻo o latou loto, a o iai o ia i le lalolagi. Na ia fetalai atu i ona soʻo: “E le sili lava le alofa o se tasi i lenei alofa, ia tuuina atu e se tasi lona ola e sui aʻi ana uo.  O aʻu uo outou, pe afai tou te faia mea uma lava ou te fai atu ai ia te outou.”​—Ioane 15:13, 14.

²² O le a lē fiu pe tuulafoaʻia oe e Ieova le Atua ma lona Alo ona ua e feagai ma mea faigata, e lē pei o le toatele o ē atonu e faatagā pei o ni au uo. Afai e te maufaatuatuaina i laua, o le a e iloaina ai faapea, o le a ia te oe moni lava la la fesoasoani ma lagolagosua i taimi o faalavelave.

²³ Pe e te talisapaia moni ma faanaunau mo nei Uo sili? Ia faaalia la i lou sailia o aumea faamaoni [loyal] o ē talia ma o le a ola aʻe i le matafaioi na tusi faatatau i ai le aposetolo o Ioane ina ua ia faapea mai: “Auā o lenei lava le alofa i le Atua, ia tatou tausi i ana poloaiga; e le mamafa foi ana poloaiga.” (1 Ioane 5:3) I taimi e lelei ai ma taimi e leaga ai, o le a faamaonia ai aumea faapena o ituaiga o uo na e aogā ona faiuo i ai.

[Fesili mo le Suʻesuʻega]

[Faamatalaga faaopoopo i le itulau 61]

Ina ia maua ni uo, e manaomia ona avea oe ma uo.

[Ata i le itulau 63]

O uo moni e pei o ni taimane