O E Fiu ea i le Aiga?
Mataupu 9
O E Fiu ea i le Aiga?
E masani ona fesagaʻi talavou ma faafitauli i totonu o le aiga faapea ma le va o i latou ma o latou mātua. Ua talanoaina i le vaega lona lima lenei o la tatou faasologa auala e aloese mai ai ma le vaaiga e ao ona latou vaai ai i o latou mātua.
1-3. (a) O le ā e te manatu e saosaolaumea i le tulaga o le fiu i le tele o aiga i aso nei? (e) E sese ea le atiina aʻe o mea e fiafia i ai i fafo atu o lou aiga?
AO leai ni aiga se lua e tutusa lelei, ua taatele ai i le toatele o tagata talavou i aso nei le faafitauli i le tulaga lea o le fiu. I aso ua tuanaʻi, e lē foliga mai o le tulaga lea sa tele ina iai. I tausaga ua mavae, sa fai faatasi e aiga le tele o mea ma o lea sa sili atu ai ona vavalalata. Peitai, i le toatele o tagata talavou i aso nei, ua avea ai le “aiga” ua na o se fale, o se nofoaga e ʻai ma moe ai.
2 Pe o avea le tulaga lea o le fiu o se faafitauli mo oe? Afai o lea, e mafai la ona faaitiitia tele ai lou olioli i lou aiga. E lē taumatea e te lagona i nisi taimi lou matuā fia alu ese na o oe ma saili se olaga fiafia i lau lava auala.
3 I sona uiga, o se tulaga faalenatura lenei e tuputupu aʻe i le talavou. A o e tupu aʻe ma atiina aʻe, e faalenatura lava le faalauteleina o lau vaaiga i mea. E tuputupu aʻe lou fia iloa. E te naunau e faataʻitaʻi mea fou e ala i le tofotofo i ai. O le fesili la, O le a e faaaliaina faapefea lena vaaiga ua faalauteleina? E tatau ea ona avea ma mea e te fiu ai i le aiga pe pasiā ia te oe le iai o le taʻitaʻiga ma le pulega faamātua? O le ā le pogai moni o le tele o le tulaga lea o le fiu, ma o le ā le vaifofo?
LE ESEESEGA E MAFAI ONA FAIA E MANATU
4-6. (a) E fuafua faapefea e le manatu o se tagata lava ia i le mamao e sili atu e oo i ai pe o fiu o ia pe leai? (e) O le ā e mafai ona e faia totino ina ia faaleleia atili ai le agaga i lou aiga? (Filipi 2:3, 4)
4 E moni, ua iai i nisi o aiga faafitauli moni lava ua faapea ona faigata ai ona maua le filemu ma le lotomalie. Peitai, o le tele lava o taimi e faapena ai ona o lou lava manatu, lea e filifilia ai pe o e mauaina le olioli po o le fiu i lou olaga faaleaiga. Aiseā e faapena ai? Auā o totonu lava o tulaga tutusa ia, o loo iai nisi o tagata talavou o ē ua mafai ona olioli i le olaga, a o isi i lena lava tulaga e tasi ua fiu. O le eseesega, o nisi e sili ona lelei o latou manatu e uiga i o latou olaga faaleaiga. O le faafetaiaʻia la o le tulaga lea o le fiu, faatasi ai ma isi mau faafitauli, e faalagolago tele i ou lava manatu faasaga i nei mea.
5 Aiseā e lē vaai i ai i le auala lenei: E tofu uma lava aiga taitasi ma se uiga totino. Ua lē o faia aʻe lea e se tagata e toatasi, peitai e tofu sao uma lava tagata taitoatasi i le uiga totino tuufaatasi o le aiga. E faapeī lou aiga? O avea ea lou aiga o se nofoaga mafana ma le fiafia? Pe fiafia le tasi i le isi, faia ni talanoaga faatupu fiafia i taimi o taumafataga, maua le olioli i le faia faatasi o mea ma mo le tasi i le isi? Po o taitoatasi ma ō i tou lava auala ma sina naunau itiiti o le tasi i le isi po o le leai foi? O lē fea le auala e tatau ona iai e sili ia te oe?
6 E faigofie ona tuuaʻia isi pe afai ua lē o iai mea i tulaga e tatau ona iai e tusa ai ma lou manao. Peitai, aiseā e lē fesili muamua ai a o e te leʻi faitio: “O le ā saʻu lava saofaga i le uiga totino ma le agaga o le aiga? O le ā le tele o le taumafaiga ou te faia ina ia faaleleia atili ai?” Afai o loo tauivi se vaa i le sami ua afātia, e lē fesoasoani tele le nofonofo o se seila i le tulimanu ma faitio. O se tulaga o le “pulupulu lima faatasi uma” ma ia taufai fesoasoani tagata uma ina ia mafai ona alu pea le vaa i le sami sousou seia oo i le nofoaga saogalemu o loo faanaunau i ai.
7-9. O le ā e mafai ona fesoasoani ia i tatou ina ia manumalo mai ai i le tulaga o le fiu i so o se galuega atonu e ao ona tatou faia?
7 E masani lava i tagata talavou ua fiu ona lē taulau ona vaai i le aogā o mea ua tuuina atu ia i latou ina ia faia. Po o le ā lava se tofiga o loo ia te oe, po o le aʻoga po o le aiga po o le galuega, taumafai ina ia vaai pe faapefea ona aafia ai lou olaga, faapea foi ma olaga o isi, i le taimi nei atoa ma aso o loo fotuai mai. Afai e te mafaia ona faia lena mea, o le a e mafaia ai ona galue i na tofiga ma se lagona mo ni fuafuaga. E mafai e lenei mea ona faia le eseesega i le va o le olioli i le olaga ma le fiu.
8 O le mea moni, o galuega tonu lava na e te fiu ai, e ono mafai ona fausia aʻe ai i totonu ia te oe uiga ma amioga masani, ia o le a faia ai se vaega sili ona tele i lou manuia i le lumanai i le olaga. Ina ia faataʻitaʻi: Afai o oe o se taulealea, pe ua e fauina se vaalele faaaʻoaʻo? Muamua lava, e tatau ona e faapipiia faatasi fasimea e tele o le tino ona ufiufi lea o le tino. Atonu e lē aliali mai le tino pe a oo ina maeʻa. Peitai, a aunoa ma le malosi ma le ata ua tuuina i ai, o le a lē aogā le vaalele. Afai foi o oe o se tamaitai talavou, ua e suʻia ea se ofu? Atonu e lē aliali mai āi na e suʻiina pe a uma le ofu. Peitai, a aunoa ma na suʻiga e lē o iloa atu, o le a leai se ofu.
9 E faapena tonu lava i le tele naunau o mea o loo e aʻoaʻoina i le aʻoga pe aʻoaʻoina e ala i mea e te faia i le aiga. O se vaega o se faiga atoa e mafai ona fesoasoani e faataatiaina ai se faavae mo le manuia i le lumanai. E mafai ona e aʻoaʻoina le onosai ma le lotomau ma maua ai le malosi i totonu, e ala i le faia po o le fai soo o galuega faigofie ma e masani lava o ni galuega po o ni feau e lē naunau fiafia i ai.
TAUSOLOMUA MA SE NAUNAU FIAFIA E SILI ONA LAUTELE
10-12. (a) Pe a fai mai se tagata, “E leai se mea e fai,” o le ā o loo masani ona lē iai i lea tagata? (e) O le ā le ituaiga o faafouga o le tino ma le mafaufau e saosaolaumea i lea mea e lē o iai?
10 E masani lava ona faalogoina le faitioga i taimi avanoa, “E leai se mea e fai.” O le tele lava o taimi, o le faafitauli e lē o le leai o ni mea e naunau fiafia ma aogā e fai, peitai, o le leai o se tausolomua, mafaufauga ma manatu. Po o le mafai foi ona faaalia mai ai i le faitioga faapea e matuā itiiti mea tatou te naunau fiafia i ai.
11 E lē o tele se mea o loo faia e le faiga o mea o loo iai nei ina ia faamalosiauina ai le tausolomua, ae maise lava i le aiga. E oo lava i tagata talavou i aso nei, ua masani ona avea o ni tagata matamata i lo le avea ma tagata o loo faisao i ai ma le tiotio. O le auala ea lena o loo faaalu ai le tele o lou taimi i le aiga, matamata i ata tifaga, polokalama o televise, faalogologo i musika ua puʻeina po o le matamata i isi o loo taaalo i tauvaga o taaloga.
12 E sili atu ona faigofie lea i lo lou faia e oe lava o ni mea, po o le aʻoaʻoina pe faapefea ona fai ni mea. Peitai i se taimi umi, e saosaolaumea ai foi i le tulaga o le fiu. E oo ai ina e matuā faalagolago i isi mo faafiafiaga; e tuua ai oe e te lē mafaia ai e oe lava ia ona faia ni mea ina ia avea ai o se olaga e fiafia. E lelei lava lea mo pepe—ae lē lelei mo taulelea ma tamaitai talavou o loo agaʻi atu ina matutua.
13, 14. O ā nisi o mea e fai e te olioli ai ma e manaomia ai le tausolomua po o le faia i ai o sou sao?
13 O le ā le lautele o matātā o mea e te fiafia ai? E toetoe lava leai se mutaaga o le lisi o gaoioiga taʻuaogāina ma matātā o le atamai e ao ona sailia. E tele taumafaiga e faaalu i le faitau i lo le matamata i le televise. Peitai, e sili mamao ona maualuga le taui e maua ai. E leai se vala o gaoioiga, leai se tomai po o se matātā, leai se nofoaga po o ni tagata po o ni meaola ua lē o aofia ai i tusi. Ma o le tele o lau faitau o le tele foi lena o lou fiafia e faitau, o le sili atu foi lena ona tele o lou agavaa e mitiiaina ai le poto. Peitai, e lē lava le tau ina faitau ina ia ʻfaaalu ai le taimi.’ E manaomia ona e filifili i le mea o le a aogā. Ona mafai lea ona e faitau ma se sini i lou mafaufau, o se sini e mafai ona faaʻoaina ai lou olaga i le taimi nei lava faapea foi i le lumanai e ala i le faaauupegaina o oe ina ia faia ni mea.
14 O le mea moni, e lē fiafia tagata uma e faia mea e fiafia i ai isi. O nisi e fiafia e galulue i laau po o uamea, a o isi e sili atu ia i latou le fiafia e puʻe ata po o le fai togālaau. O nisi teine atonu e fiafia i le kuka po o le tao keke, a o isi e sili atu ia i latou le fiafia e suʻisuʻi po o le teuulu. Peitai, o le aʻoaʻoina i le faia o mea fou i le aiga pe i se isi mea, ma le atiina aʻe o le agavaa e faia ai galuega lelei, o le a aumaia ai le lotomalie ma faatumauina ai pea le soifuaga ia tausaafia.
15-18. (a) Ua aafia faapefea le olaga o se tagata lava ia pe a ia faia ma masani le faia o mea mo isi tagata? (Galuega 20:35) (e) O le ā se tasi o mea e sili ona taʻuaogāina e mafai e se talavou Kerisiano ona fai mo isi tagata? (Mataio 24:14; 1 Timoteo 4:16) (i) I so o se taumafaiga taʻuaogāina, aiseā e tāua ai le sogasogā?
15 Pe a e iloa e faigata ona e naunau i le faia o se mea i lou lava fiafiaga, aiseā e te lē faia ai se mea mo se tasi tagata, ae amata i le aiga? O se galuega atonu e lē manaia pe a e faia mo oe lava e mafai ona maua ai le fiafia moni pe a e faia mo se isi—se tagata o le aiga, se uo, ae maise lava se tasi o loo manaomia moni se mea. E matuā maua ai le lotomalie moni i lenei mea, ma e lē uma avanoa e faia ai faapea. Aua le faatali seʻi fai atu e fai se mea. Afai o le mea ua e faia e leʻi faatalitalia e le isi tagata, o le ofo lea ua faaopoopo i ai o le a faaopoopo tele atu lea i lou olioli. Faataʻitaʻi ona fai.
16 O le isi lenei auala e mafai ona e maua ai aogā e ala i le faia o mea mo isi. Ua iloa e tagata talavou o ē ua faafiafiaina moni i le folafolaga a le Atua e uiga i se faiga fou faapea, o le tufaina atu o lenei tala lelei i isi e aumaia ai le uigā ua faaopoopoina i o latou olaga. E matuā faaʻoaina lava le sailia o tagata o ē matelāina mo le upu moni ma le mafai ona fesoasoani ia i latou. E ui ina sili atu le toatele o i latou e tetee i le upu moni i lo latou, ae ua lē faapuaoaina ai iʻuga faagaee loto o lenei galuega. Na i lo lea, ua avea ma luʻi tele. E manaomia ai le onosai ma le faatuatua. O vala tetele nei e manumalo ai i le tulaga o le fiu.
17 Ua faapea mai le aposetolo o Paulo e uiga i la tatou auaunaga i le Atua ma i latou o ē auauna ia te ia: “Aua neʻi tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai.” (Kalatia 6:9) E faapena foi pe a e sailia ina ia atiina aʻe agavaa e iai ni faamoemoega moni ma ni aogā, e tatau ona e sogasogā seia oo ina amata ona e seleseleina mai nisi o fua o au galuega.
18 A o faagasolo pea la le taimi, e mafai ona e faalauteleina lou sueina o isi agavaa o loo iai pea ina ia atiina aʻe, ma o le iʻuga, o le a avea ai oe ma tagata e sili ona lelei, e sili atu ona naunau fiafia ma taʻuaogāina. O le a fiafia ou mātua ma isi o loo i le aiga tou te faatasi, ma o le a e saoloto mai ai i le fiu i le aiga.
[Fesili mo le Suʻesuʻega]
[Ata i le itulau 68]
E manaomia le felagolagomaʻi atoatoa i faalavelave i le sami. Pe e te fesoasoani ina ia faafoeina se ala ma le filemu pe a iai ni faalavelave i le aiga?
