Mataupu 23

O le ā E te Manao i ai mai le Olaga?

1-6. (a) Ina ia maua le mea e sili ona lelei mai le olaga, o le ā e ao ona e loto naunau e fai? (e) O le ā e sili atu ona tāua i lo le mauaina o se galuega maualuga, ina ia e maua ai se olaga fiafia? (i) Aiseā e mafai ai e le Tusi Paia ona fesoasoani ia te oe i lenei mea?

I TAIMI o le talavou, e tele mea e uiga i lou olaga. Atonu e foliga mai e mamao atu lava i se ala umi, e pei o se auala ma sona mutaaga o loo i se mea i tala atu o le tafatafaʻilagi. O fea o le a taʻitaʻiina atu i ai oe?

² E leai se masalosalo o le a iai i le ala i le ola ni mea mo oe e faateʻia ai, faatasi ai ma ni mea e lē fiafia ai. Peitai, e pei ona ua tatou vaaia i lenei tusi, e tele mea e mafai ona e faia i le taimi nei ina ia faamautinoa ai e te mauaina le mea e sili ona lelei mai le olaga. O le fesili e faapea, E te loto malie ea e faia le taumafaiga ua manaomia?

³ E mafaufau le toatele o tagata talavou i galuega o le a latou tuliloaina pe a uma a latou aʻoga. Atonu ua e mafaufau foi oe i lena mea. Ae tusa lava po o le ā le ituaiga o galuega e te faia, afai e leaga ona fai, e lē aumaia ai ia te oe le tele o le lotomalie. Peitai, e iai se isi mea e sili mamao atu ona tāua i lo lea.

⁴ Faapea ua avea oe ma se tusi ata lelei o fale po o se valiata, inisinia taavale, faimusika, faifaatoaga, faiaʻoga, po o so o se mea e ono avea ai oe. Pe o se faamaoniga mautinoa lea faapea o le a fiafia ai lou olaga? E lē faapena moni. O le mea e sili atu ona tāua: Pe o le ā le ituaiga o tagata o le a avea ai oe? Ua maua e le toatele o tagata se galuega manaia i se matātā, ae ua latou lē taulau leaga lava i o latou olaga totino; sa avea i latou o ni tagata e matuā lē fiafia lava.

 ⁵ O le pogai lena e tāua tele ai le Tusi Paia. O le mea moni, ua avea le Tusi Paia o se mea e pei o se faaputuga o ni tusi mai Lē na Foafoaina i tatou. I le avea ma o tatou Tamā faalelagi, e naunau fiafia o ia i lo tatou fiafiaga, ma e tatau foi ona tatou naunau fiafia i mea na te taʻu mai ia i tatou. Ua tatou vaaia ni taʻiala ua ia aumaia ia i tatou o ni tali i le tele o o tatou faafitauli. Ma e lē moni ea faapea e alagātatau ia mea uma? O le mea moni, a aunoa ma na taʻiala mai ia te ia, e mafai faapefea ona tatou mautinoaina le mea e fai pe iloa le mea o le a aogā mo le lelei?

⁶ Ua manatua ai le mea na tusi atu ai le aposetolo o Paulo i se tagata faigaluega talavou, o Timoteo. Sa uunai Paulo ia te ia ina ia tausia mea sa ia aʻoaʻoina talu ona tamaitiiti e faatatau i aʻoaʻoga a le Tusi Paia ma sa faapea mai: “O Tusi Paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” (2 Timoteo 3:14-17) So o se mea lava e taʻuaogāina moni i le olaga​—e tusa lava po o le ā le ituaiga o gaoioiga atonu e aafia ai​—o le a sili atu ona faaauupegaina ai oe ina ia faia ma fai ia lelei pe afai e te faatagaina oe lava e taʻitaʻia e le Afioga a le Atua. E mafai ona avea ai oe ma atalii po o se afafine lelei, se tane po o se avā lelei, se tamā po o se tinā lelei, se tagata faigaluega lelei, se uo lelei, ae sili ai i na mea uma, se auauna lelei a Lē na Foafoaina oe.

TAUAVEINA TIUTE TAUAVE

7-11. E pei ona faaalia i le Tusi Paia, o le ā le ki i le mauaina o le mea e matuā sili ona lelei i le olaga?

⁷ O le a lē pine pe mulimuli ane foi ona e faia lea o ni filifiliga faigata. O le a oo mai le taimi o le a tatau ai ia te oe ona tauaveina lau lava avega o tiute tauave. I le taimi nei lava, o loo pei oe o se tamaʻi aeto.  Atonu e te iloaina e masani i aeto ona fausia o latou faamoega i luga lava o le pito o le pupū o loo faamalumalu mai. Pe a amata tau apatā apaau o tamaʻi aeto ma ua sauni e felelei, o le a eueu e aeto matutua i latou i le autafa o le faamoega ona​—tulei loa lea i le vanimonimo! Ua taʻu mai e se tasi o tagata o loo mataʻia lana matamataga i se aeto matua o loo faapaʻū ifo le tamaʻi aeto pe ā ma le ivasefulu futu a o leʻi tifa ane i lalo ma ona apaau ua faaloloa ma faatietie ai le tamaʻi aeto i lona tua. Ona toe lele atu lea i le faamoega ma toe faia ai foi le mea lava lea e tasi seia oo ina iloa e le tamaʻi aeto ona lele.​—Bulletin of the Smithsonian Institution, Vol. CLXVII, itulau e 302.

⁸ I lou tulaga, ua fausia e ou mātua se fale faatasi ma taumafaiga e tele faapea ma le fuafuaina. Ae e te lē mafaia ona faatalitalia e faavavau i laua ina ia faia mea mo oe pe faia ni filifiliga tetele mo oe. O le a moni lenei mea ae maise lava pe afai e oo ina matua ma e filifili e tuua le aiga. E mafai e ou mātua ona fesoasoani ia te oe ina ia saunia oe mo le tauaveina o tiute tauave i le avea o se taulealea po o se tamaitai ua matua, e faafaigofie ai mo oe seia oo ina e mafaia ona tu na o oe, e pei lava ona faia e le aeto matua i lana tamaʻi aeto. Ae o le a tatau foi ona e faia lau lava vaega.

⁹ O le fuafuaina o apaau malolosi o le aeto ma lona agavaa e teʻi ai lava ua iloa lele​—o nei mea na pogai mai Lē na Foafoaina mea e silisili ona atamai. O lea, tatou te manaomia ai taitoatasi ona iloatinoina faapea, o le ki i le mauaina o le mea e sili ona lelei i le olaga, ua maua lea i lo tatou faalagolago ia te Ia. E tusa lava po o le ā le lelei (po o le ā le leaga) o se amataga atonu e mafai e ou mātua ona avatu ia te oe, ma e tusa lava po o le ā le lelei o se mafaufau ma le tino atonu o ia te oe, o le a e manao pea ina ia talisapaia le manaoga mo le taʻitaʻiga mai ia Ieova le Atua ma vaavaai atu ia te ia mo le malosi ina ia mulimuli ai i ana taʻitaʻiga. Na ia faagaeeina nei upu ina ia tusia mo tagata talavou e pei o oe:

 ¹⁰ “Ia e faalogo mai i aʻu upu; ia uai mai ou taliga i mea ou te fai atu ai; aua neʻi teʻa ese ia mea i ou mata; ia e tausi i ai i totonu o lou loto; auā o ia mea o le ola lea i e ua maua; ma le mea e malolo ai o latou tino uma. Ia sili ona leoleoina o lou loto i le leoleoina o mea uma; auā e tupu mai ai le amio. . . . Ia vaai saʻo ou mata i ou luma; ma ou laumata, ia faasagatonu ia i ou luma. Ia mafaufau i le ala o ou vae; ona faatumauina ai lea o ou ala uma.”​—Faataoto 4:20-26.

¹¹ O le tele e te vaai atu ai ia Ieova le Atua ma lana Afioga mo le faatonutonuga, o le sili atu foi lena o le molemole o le auala o le ola o le a iai mo oe.

AVEA LE ATUA O SAU UO

12, 13. (a) E ese ai mai le alofiaina o le mea ua fai mai ai le Tusi Paia e sese, o le ā le isi mea tatou te manaomia pe afai e avea le Atua ma a tatou uo? (e) Sa tatalaina faapefea le ala mo i tatou ina ia maua ai se faiā faapena? (Ioane 14:6)

¹² E te mafaia faapefea ona fai lenei mea? E lē na ona alofia o mea e faaalia e le Afioga a le Atua faapea e sese. E te manaomia ona maua se faiā totino ma Ieova o sou Tamā faalelagi. Atonu e mafai e ou mātua ona faasino oe i lena auala, ae la te lē mafaia ona faamautuina lea faiā mo oe. E ao lava ona e faia e oe lava ia lena mea, i le sailiaina o le faauoga a Ieova. Afai e te manao i Lē na Faia lenei vateatea aoao ina ia avea ma au uo, o le ā o loo ia manaomia mai ia te oe?

¹³ Ina ia tatala le ala mo lenei mea, sa auina mai ai e Ieova le Atua lona Alo ulumatua i se tofiga i lenei Lalolagi paneta, na mafua ai ona ia fanau mai o se tagata. Ina ua avea o ia ma se tagata ua matua, sa tuuina mai loa e le Alo o le Atua lona soifua ona o tatou. E pei ona fai mai le Tusi Paia: “A ua tatou iloa o ia o le na faamaulaloina teisi i agelu,  o Iesu lea, ua faapaleina i le mamalu ma le viiga, ona o le tiga o le oti, ina ia oo ia te ia le oti ona o tagata uma i le alofa tunoa o le Atua.”​—Eperu 2:9.

14, 15. (a) O le ā e mafai e i tatou uma lava ona iloa i o tatou olaga o loo faaalia ai tatou te lē lelei atoatoa? (Roma 5:12; 7:21-23) (e) I le Mataio 6:12, o le ā ua faatusaina i ai agasala? E mafai faapefea ona totogia lena ʻaitalafu?’

¹⁴ Ua faaalia mai e le Tusi Paia faapea o le mafuaaga sa manaomia ai lenei mea ona tatou te lē lelei atoatoa ma agasala uma lava. E lē tatau ona faigata ia te oe le iloatinoina o le moni o lena mea, auā i nisi taimi atonu ua e iloa ai o se tauiviga moni le taofia o le faia o mea na e iloaina e sese. E matuā foliga mai o nisi o taimi na e faavaivai ai ma lolo atu i nisi o tuinanauga sese. O lea faanaunauga na tuufaasolo mai agaʻi i le faia o mea sese o se mea na tatou maua mai o tatou uluai mātua, ma o le pogai lena o le iai o le fanau uma a tagata i se tulaga o le oti.

¹⁵ Ae na aumaia e le Alo o le Atua lona soifua faaletagata lelei atoatoa ina ia saunia ai le auala mo le soloiesea o a tatou agasala uma. Ua fesoasoani le Tusi Paia ia i tatou ina ia malamalama pe faapefea ona aogā lenei mea e ala i le faatusaina o agasala i ni ʻaitalafu.’ (Mataio 6:12) Mo se faaaʻoaʻoga, afai e te faasalalauina ni fāfātala sese e faatatau i se isi tagata, pe o le a e lē fai mai ua e “nofo aitalafu” ia te ia i se faatoesega? O lona uiga ua e “aitalafu” ia te ia ona o le sese na e faia. Ae o le aitalafu ua ia i tatou faasaga i le Atua e telē naʻuā e lē taitai ona mafai ona tatou totogia e i tatou lava. Ae peitai, e sili atu ona tāua tele faapena le soifua faaletagata o Keriso Iesu, o lea ua mafai ai ona soloiesea aitalafu uma tatou te aumaia i o tatou lava luga faasaga i le Atua ona o le agasala na tuufaasolo mai, ma o le pogai lena na tuuina mai ai e le Alo o le Atua lona soifua ona o i tatou.

16-18. (a) Aiseā e te lagonaina ai e tatau ma onomea ona mauaina e le Atua lo tatou talisapaia mo mea sa ia faia e ala i lona Alo? (Roma 5:6-10) (e) O ā nisi o mea e mafai ona tatou faia ina ia faaalia ai lea talisapaia?

¹⁶ O lea ua tatalaina ai le ala mo i tatou ina ia faia se faauoga ma le Atua. Ae tatau ona tatou faaalia tatou te talisapaiaina le mea ua ia faia i le faataulagaina o lona lava Alo ma le mea na faia e lona Alo i le maliu mo i tatou. E tatau ona tatou faaalia tatou te faatuatua i le sauniuniga lenei a le Atua. Na fetalai Iesu:  “E alofa le Tamā i le Alo, ua tuu mai foi mea uma i lona aao. O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.”​—Ioane 3:35, 36.

¹⁷ Seʻi na ona faapea e te laveaiina le ola o se tagata​—atonu o le laveaiina o se tasi mai le malemo pe mai se fale o loo mū​—ma iʻu ai i lou lava oti ona o le faia o lenei mea. Ae faapefea pe afai e leʻi faaalia e le tagata o lē na laveaiina se loto faafetai, e leʻi popole foi e alu i ou mātua ma fai atu se tala e faaalia ai le talisapaia mo lau gaoioiga lē manatu faapito? E te manatu o le a faapeī le lagona o lou tamā? Ua mafai la ona e malamalama i le pogai e tonu ai le faanoanoa o Ieova le Atua ma taofia lana faauoga mai ia i latou o ē iloaina le mea na faia e lona Alo mo le fanau a tagata ae lē faaalia le talisapaia mo lea mea.

¹⁸ E te mafaia ona faaalia le talisapaia e ala i le olaga o loo e ola ai. E te mafaia ona faaalia e te salamō ma le faamaoni i sese ua e faia ma talosaga atu i le Atua ina ia ʻtotogia au aitalafu’ e ala i le taulaga a lona Alo. E te mafaia ona tuuina atu oe lava i le Atua ina ia auauna ia te ia mo aso o totoe o lou olaga, i le faia o le mea e fiafia i ai o ia. Ua faaalia e le Tusi Paia faapea tatou te mafaia ona faailogaina lenei tuuina atu e ala i le papatisoga i le vai. O le mea moni, e lē o se mea lenei e faia faanatinati. E te lē mafaia ona faapea atu i le Atua o le a e faia se mea ona toe sui lea o lou mafaufau. O le auala lena e faia e fanau iti; latou te lē o mautinoa moni le mea latou te mananao e fai. Ae a o e taulalata atu i le avea ma taulealea po o se tamaitai ua matua, o loo e ausiaina le tulaga i lou olaga e te mafaia ai ona fili fili. O lea, o se mea lea mo oe e mafaufau mamafa i ai.

 FAAFETAIAʻIA LE LUʻI

19-21. (a) E tali tutusa faapefea le luʻi ua lua fesagaʻi ma le luʻi na fesagaʻi ma Tavita ina ua alu atu o ia e tau ma Koliata? (1 Samuelu 17:4-11, 26-51; Ioane 15:17-20; Iakopo 4:4) (e) Aiseā e mafai ai ona tatou mautinoa faapea e mafai ona faafetaiaʻia lenei luʻi ma le manuia? (Ioane 16:33; Filipi 4:13; Faataoto 3:5, 6)

¹⁹ O le a lē faigofie pea le faamaonia pea faapea o oe o se uo a le Atua. O le mea moni, ua faaalia e le Tusi Paia o le a e maua se luʻi tele ona e lē o se uo ae o le fili o le Atua le lalolagi atoa. Ae aua le faavaivai ai. E te mafaia ona faaalia lea lava agaga e tasi na faaalia e le auauna a le Atua o Tavita a o avea o ia ma taulealea talavou. Sa alu atu o ia i le togalauapi a le vaegaau a tagata Isaraelu i le taimi na luʻia ai i latou e vaegaau a tagata Filisitia, o ē tapuai i atua sese. Sa faifai e le toa o Filisitia​—o se tagata tinoese na igoa ia Koliata​—tagata Isaraelu, i le tofotofoina o i latou ina ia faia se taua ma ia. Na lagona e Tavita lenei mea. E ui ua na o se talavou, ae sa ia te ia le faatuatua malosi ia Ieova. Sa ia taliaina le luʻi, alu atu i le tagata tinoese ma le maualuga o loo matuā faaauupegaina ma lafotuina o ia i lalo i se maa e tasi mai lana maatā e leoleo ai mamoe.

²⁰ I aso nei o loo e fesagaʻi ai ma se lalolagi o se fili, ae aua le mataʻu. O Ieova o le Atua Malosi lava lea e pei ona sa iai o ia i aso o Tavita ma e te mafaia ona maua se manumalo pe afai e te faaalia le lototele, ae sili ai i na mea uma, o le faatuatua o le a Ia lē taitai ona tuulafoaia oe ae o le a lagolagoina oe ma avatu ia te oe le malosi ua manaomia.

²¹ Ua tutumau i ni faigata nisi o tamaloloa ma fafine o loo aofia ai ma le toatele o tagata talavou, na lamatiaina o latou ola pe na oo lava ina maliliu ai ina ia faataunuuina ai manaoga o nisi o malo faapolotiki a le lalolagi. Ae peitai, maeu le sili mamao atu ona faamamaluina i le faataunuuina o manaoga o Lē na Foafoaina le vateatea aoao! Seʻi iloiloina nei pe faapefea e lenei mea ona mafai ona avatu ai ia te oe se ola e matuā sili mamao atu ona lelei i lo le ola e olioli ai se tasi i le lalolagi i aso nei.

[Fesili mo le Suʻesuʻega]