Mataupu 20

Pe Mafai ona Faamanuiaina Oe i le Faaipoipoga?

Ua talanoaina i le vaega lona sefulu o la tatou faasologa pe faapefea ona maua se faaipoipoga manuia ma le fiafia, atoa ma le vaaiga a le Tusi Paia e faatatau i Mea Faitino.

1-4. (a) Aiseā e iai se mafuaaga lelei ina ia manatu mamafa ai i faamoemoega o se tasi mo se faaipoipoga manuia? (e) Ina ia manuia i le faaipoipoga, o le ā e ao ona iloatinoina e faatatau i lona amataga? Aiseā? (Kenese 2:21-24; Mataio 19:4-6)

AFAI e oo mai le taimi e te manao ai ina ia faaipoipo, o le mea masani lava le tatau ona e manao i lau faaipoipoga ina ia manuia. I le fuafuaina e tusa ma le saosaoa o le oso aʻe o talagā faaipoipoga, atonu ua foliga mai e lē o matuā lelei ou faamoemoega. I nisi nofoaga, ua taulalata atu ai le aofai o talagā faaipoipoga i le aofai o faaipoipoga! Afai e te faaipoipo, e mafai faapefea ona e taofia faafitauli mai le faaleagaina ai o lou fiafiaga faalefaaipoipoga?

² O le a faamalamalamaina atili atu mo oe faafitauli ma vaifofo, i le iloiloina o le amataga mai o le faaipoipoga. E talitonu le toatele faapea o faaipoipoga e iai sona amataga faaletagata, faapea sa faia i se auala e tagata mai aso anamua. Ae o le manatu lea o loo i le aa lava o le puapuagatia o le malepelepe o aiga i aso nei. Aiseā? Auā e tuuesea ai faapea e lē tāua fautuaga tonu lava ia e sili ona lelei e faatatau i faafitauli i faaipoipoga.

³ O le mea moni o faaipoipoga e mai se amataga silisili ona maualuga. Sa foafoaina e le Atua e Ona le Malosi Uma lava le uluai tamaloa ma le fafine, avatu ia i laua malosi o le fanau tama ma faatasia i laua i le faaipoipoga. Sa saunia foi e le Atua faatonuga​—ua faamaumauina i le Tusi Paia​—i le auala e faia ai se faaipoipoga ina ia manuia. O le mulimulituʻi i nei faatonuga, o le mea lea o le a aumaia ai lou fiafiaga pe a oo ina ua e faaipoipo.

 ⁴ Atonu e tetee nisi tagata i le faapea mai, ua leva ona iai i tagata le Tusi Paia ae peitai, ua lē faamanuiaina a latou faaipoipoga. Latou te faapea mai, o le pogai o le faateleina o talagā faaipoipoga ona e toaitiiti ulugalii o loo loto malilie ina ia onosaia faaipoipoga lē fiafia. E iai se mea moni i lea faamatalaga. E faitau miliona ulugalii lē fiafia o loo maua i ai le Tusi Paia. Ae ua latou faitau ea i ai? Ae sili ai ona tāua, pe ua latou faatatauina ona mataupu silisili i o latou olaga? O le mea moni faigofie e faapea, ua uma ona fesoasoani fautuaga a le Tusi Paia i le faitau selau afe o ulugalii ina ia taulimaina ma le manuia faafitauli a o latou aiga. E mafai foi ona fesoasoani ia te oe pe afai e te manao i se faaipoipoga fiafia.

FEUSUAIGA FIAFIA I LE FAAIPOIPOGA

5-10. (a) O ā manatu lē moni e tusa ai ma fiafiaga faaleituaiga ua iai i le toatele o tagata? (e) E mafai faapefea i le faatatauina o fautuaga a le Tusi Paia e uiga i le foai ma le lē manatu faapito, ona fesoasoani i se ulugalii ina ia mauaina ai le lotomalie i lenei vala o le olaga faalefaaipoipoga?

⁵ Atonu ua e faalogo faapea, o feusuaiga faaleituaiga o le aa lea o le tele o faafitauli i faaipoipoga, ma e moni lea. E masani ona tupu lenei mea ona o manatu lē moni ua lagolagoina e le au faasalalau tala. Ua faaataina mai e tusi lauiloa, mekasini ma ata tifaga ulugalii o ē “ua alofa lē tasi i le isi” ma nonofo “fiafia ai e faavavau.” O loo faamatilatila mai foi e tusi fiafiaga tau feusuaiga faaleituaiga, e masani ona siitia ai faamoemoega i tala atu o le mea e faataunuuina e mea ua iloatino. Ina ia faataʻitaʻia, sa faamatalaina mai e se tasi avā talavou: “Ou te taumatea na ou manao i feusuaiga faaleituaiga ia pei o se manumalo i se taui e lagonaina ai faalogona uigaese, e faamalamalamaina ai le lalolagi atoa e pei o se masini taalo e taʻua o le pinball, o le taimi lava e taavale ai le polo i le manumalo ona feemoāʻi solo mai lea o moli lanu eseese. O le uiga o laʻu tala, sa lelei ae na ou mafaufau pea, ʻPe na o le pau ai lea? E na o le pau moni ea lea o le mea o loo iai?’”

⁶ Peitai, i le avea o se talavou, atonu e te leʻi faaipoipo, pe o e iloa le faafitauli a lea avā talavou? O lona popolega ua manumalo ia te ia, o lona lava olioli tau i feusuaiga faaleituaiga, ma sa leʻi faamalieina ai o ia.  O le faitioga lenei a le toatele o fafine​—faapea e lē faamalieina i latou e o latou taitoalua i feusuaiga faaleituaiga. I tulaga faapena, o le ā e mafai e se avā ona faia? Pe o taʻua mai e le Tusi Paia se mea e fesoasoani ai? Matau le faalaeiauga tuusaʻo ua aumaia ai: “Ia avatu le tane i le avā le agalelei e tatau ai, ia faapea foi le avā i le tane. Aua neʻi faafiti le tasi i le tasi, seia iloga lava lua te loto gatasi ai i nai aso.”​—1 Korinito 7:3, 5.

⁷ E tusa ai ma lenei fautuaga faale-Tusi Paia, afai e te faaipoipo, o ai muamua lava e tatau ona e faafiafiaina? E tatau ea ona faafiafiaina lou lava tagata, e pei ona sa iai le faanaunauga autū a le avā na taʻua i luga? E leai, ae na i lo lena, o lau paaga. O le mataupu silisili o loo faamamafaina i inei i le Tusi Paia, o le foai atu. Ia faasilisilia ma le tatau le lelei ma le fiafiaga o lau paaga faaipoipo, ae lē o lou lava fiafiaga. E ōgatasi lenei mea ma mataupu silisili atili i le Tusi Paia: “Aua le saili se tasi i lona lava lelei, a ia taitasi ma saili i le lelei o le isi.” O “le alofa . . . e le sailia e ia ana lava mea.”​—1 Korinito 10:24; 1Co 13:4, 5.

⁸ Ae atonu e te fesili faapea: “A ou faaipoipo, e mafai faapefea i le sailia o le faafiafiaina o laʻu avā po o laʻu tane ona faateleina ai loʻu lotomalie?” Ia, e faalagolago tele le mauaina o le olioli mai le faia o feusuaiga faalefaaipoipoga i le mafaufau ma le loto. O lea, afai e te manatu i feusuaiga faaleituaiga faapea o se avanoa e faaalia ai le alofa loloto mo lau tane, o le a sili atu ona e iloaina soo ai faapea, e avea o se iʻuga e ese mai ai, o le a e olioli i feusuaiga i se tulaga e sili atu ona maualuga. Afai e lē o faamuamua e le mafaufau o se avā ona lava faalogona, e masani ona toafilemu, ma e mafai ai ona iloatinoina le fiafiaga totino na te faanaunau moni i ai i lea gaoioiga faalefaaipoipoga faapea o se taunuuga e iʻu i ai e faalenatura.

 ⁹ Sa faailoa mai e le faiaʻoga silisili ua savalia le lalolagi, o Iesu Keriso, e faapea o le foaiina atu o se tasi o le a maua ai e se tagata le lotomalie. Sa ia fetalai: “E sili le manuia o le na te foai atu, i le manuia o le na te talia mai.” Ua faamaonia le moni o lenei mataupu silisili mai lea taimi i lea taimi, e tusa ai ma faiā mafana faalefaaipoipoga.​—Galuega 20:35

¹⁰ E iai se isi mafuaaga i le pogai atonu e aogā ai le faatatauina o fautuaga a le Tusi Paia faasaga i lou lava faamalieina pe a e faaipoipo. O le a tele ai mea e faia i lo se isi lava mea ina ia uunaia ai lau tane e gaoioi ma le lē manatu faapito atu ia te oe, ia sili atu ona manatunatu i ou manaoga ma faanaunauga. Ua tupu lenei mea i le tele o faaipoipoga. O lē e tausolomua i le foai atu e toe tauia ma le agalelei. O lea, ua uunaia ai e le Tusi Paia le faaalia o le lē manatu faapito ma le alofa i le avatuina o mea e tatau ai faalefaaipoipoga. Ia manatua lenei mea, o le a saosaolaumea ai foi i se faiā fiafia pe afai e te faaipoipo.

11-15. (a) O le ā e manaomia e se tane o loo faamoemoe e faaipoipo ona iloatino e faatatau i se manaoga a le avā mo le uaʻi i ai ma le alofa? (e) O le ā o loo fai mai ai le Tusi Paia e faatatau i le tiute tauave a le tane e tusa ai ma lenei mea?

¹¹ Atonu ua e faalogo e faitio soo lava tane faapea, o a latou avā e matuā “leai lava ni faalogona” e avea ai o ni paaga agavaa i feusuaiga. E te iloaina ea o fea e masani ona mafua mai ai le faafitauli? O loo taʻua e le Tusi Paia: “O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava; auā e leai lava se tasi e ita i lona lava tino; a e peitai na te fafaga ma tausi atu i ai.” (Efeso 5:28, 29) Ioe, e masani ona mafua mai le faafitauli i le lē taulau ona utagiaina e le tane o le mea o loo fai mai ai le Tusi Paia i inei.

¹² Pe manaomia moni ona alofagiaina fafine e a latou tane? O le mea moni latou te manaomia. Ua masani ona faamamafaina e faufautua o faaipoipoga lenei mea.  O se upu moni faavae: Ina ia fiafia moni avā, latou te manaomia ona lagona faapea e alofagiaina i latou. O lea, afai e tatau ona e faaipoipo, ia manatua o le ki i se faalogona alofa mafana faalefaaipoipoga, o lou faataunuuina lea o lenei manaoga a lau avā ina ia alofagiaina. Ua uunaiaina e le Tusi Paia tane: “Ia taitasi outou ma alofa i lana lava avā faapei o ia lava ia te ia.”​—Efeso 5:33.

¹³ Ae peitai, atonu o le a e lagona faapea o le lagolagoina o lau avā i le itu faaletino o le a fai ma faamaoniga ua lava ma totoe o lou alofa. Ae afai e taofia faaaliga o le alofa mafana, o le ā le iʻuga o le a oo ia te ia? Atonu e aumaia ia te oe sina manatu e le tusi a se avā o loo sosoo mai ai. Sa ia tusi: “O loʻu faafitauli lenei: O loo oʻu matuā galala . . . mo sina talanoaga manaia, se faamālō, le faalogoina o ona lima o loo fusia loʻu puimanava a o oʻu faia le kuka​—po o se avanoa ou te  nofo ai i luga o ona vae. Ou te faatauina atu mea faitino uma lava o loo ia te aʻu mo se ʻoomi e tasi o le alofa mafana.”

¹⁴ Ioe, e manaomia ona faaalia i avā le alofa. Latou te faaalia le fiafia tele pe a latou mauaina, ua oo ina sili atu ona faamalieina ma e masani lava e oo ina sili atu ai ona lalelei faaletino. Sa foafoaina i latou faatasi ma lenei manaoga mo le alofa. O le pogai lea e uunaia ai e le Atua tane ina ia alolofa i a latou avā. O le lē taulau ona utagiaina o lenei fautuaga o se mafuaaga autū lea o le lē fiafia ua maua i le tele o faaipoipoga i aso nei. Aiseā e faapea ai?

¹⁵ Auā o se avā ua matelaina mo le faapelepele ma le alofa mafana a lana tane, e foliga mai e lagonaina le lē malupuipuia ma le leai o se mautinoa e tusa ai ma lona tulaga faatamaitai. E mafai ona oo ina tuputupu aʻe ai le ita i lana tane, atonu e aofia ai se faanaunauga e leʻi mafaufauina ina ia toe tauia o ia ona o lona tuulafoaia o ia.

16-18. (a) O ā manatu sese ua iai i nisi tamaloloa e faatatau i le auala e mananao fafine ina ia tausia ai i latou? (e) O le ā le uiga o le fautuaga i le 1 Peteru 3:7?

¹⁶ Ae peitai, atonu e te lagonaina faapea, o le a lē o se faatama tane le tausia faapelepele ma le alofa o le fafine e te faaipoipo i ai. Atonu ua oo lava ina e faalogo faapea, e fiafia tele fafine pe a tausia i latou i se auala paʻaa. Ae lē moni lea. O le mea moni, i se avā, atonu e lē faamalieina i feusuaiga faaleituaiga, ma e lē manaia foi, pe afai e lē taulau i lana tane ona talisapaia faapea, sa foafoaina o ia e le Atua ina ia tali atu i se tamaloa agalelei, e manatunatu alofa, ae lē o se tamaloa e sauā ma fai faatonuga.

¹⁷ Sa silafia e Lē na Foafoaina mea faapea, e manaomia e tane ua fesagaʻi e pei ona latou iai nei ma le tele o manatu sese, faatonuga pe faapefea ona alolofa i a latou avā. O le pogai lena na te faalaeiauina ai i latou ina ia faapelepele ma manatunatu alofa, i le faapea mai:  “Ia faapea outou tane, ia nonofo faatasi ma i latou [a tou avā] ma le poto, ia ava i le avā, auā o le ipu ia ua sili ona vaivai ia te oe.”​—1 Peteru 3:7.

¹⁸ Pe a oo mai i feusuaiga faaleituaiga, e tāua faapitoa lava i tane ona utagiaina lenei faatonuga. E tatau ona gaoioi o ia ia ōgatasi ma le poto i le auala na faia ai e le Atua fafine. O le mea masani lava, e lē malolosi i latou i le tino e pei o tamaloloa, ma e masani foi i faalogona ootia, e sili atu ona maʻaleʻale i latou ma lotovaivai i lo tamaloloa. O lea, ua taʻu atu ai e le Atua i tane ina ia avatu i avā le āva auā o le ipu e sili ona vaivai, ina ia faaaloalogia lo latou fausaga tau i faalogona ootia, tapulaa ma suiga mai le lelei i le leaga po o le leaga i le lelei.

FOIAINA O ISI FAAFITAULI

19. O le ā le isi mea e faatatau i le fausaga o le fafine e ao i se tamaloa ona magafagafa i ai pe afai la te mananao ina ia fiafia faatasi? (Kolose 3:12-14)

¹⁹ O le mea moni, o feusuaiga ua na o sina vaega itiiti o le faaipoipoga e manaomia ai ona faatatauina faatonuga a le Atua. Pe a e faaipoipo, o le a manaomia ona e iloaina faapea, e mafai i nisi taimi ona afāina tele lau avā i le tino, mafaufau ma auala o faalogona ootia ona o lona maʻi faalemasina. Atonu na te faia ai mea ma faaupuga e lē masani ona ia faia. O le a manaomia ona e magafagafa i lenei mea, ae aua le soona ilitata pe afai e iai taimi e soona tautala ai o ia pe mateletele ai, ae faaauau ona tausia o ia ma le agalelei.

20-24. (a) Na foafoaina e le Atua le fafine faatasi ma ni uiga e faaauupegaina ai o ia mo le ā le matafaioi i le faaipoipoga? (e) E mafai faapefea e se avā ona faaalia faapea na te faaaloalogiaina moni le tulaga ulu o lana tane? (i) O le ā ua manaomia i le tane ina ia avea ai o se ulu o le aiga e alofa moni?

²⁰ Ae peitai, e tele atu mea ua aafia ai. E manaomia e faaipoipoga manuia le felagolagomaʻiga ma le fesootaiga, ma ina ia faataulauina lenei mea, o le a fesoasoani ia te oe le malamalama i le Afioga a le Atua.  O loo faaalia ai faapea na foafoaina le tamaloa ma le fafine faatasi ma ni uiga ma ni tiute tauave eseese, ma le faamoemoe faapea e saosaolaumea lo la autasi i se fiafiaga mafana. Sa faapea mai Lē na Foafoaina mea ina ua uma ona foafoaina le tamaloa: “Ou te faia se fesoasoani mo ia e avea o se faaatoaga o ia.”​—Kenese 2:18, NW.

²¹ Sa faapea ona foafoaina le tamaloa ma le fafine ina ia ō faatasi; ua paleni o la uiga pe faaatoaina ai e le tasi le isi. Sa taitoatasi ma foafoaina ma se manaoga e faatumuina e le isi. Ua faapea ona faia ai le fafine o se fesoasoani i lana tane, ma ina ia ōgatasi ma lena matafaioi ua uunaia ai e le Tusi Paia: “O outou fafine, ia outou usiusitai i a outou lava tane . . . Auā o le tane o le ulu ia o le avā.” Ua faapea mai foi le Tusi Paia: “O le fafine foi ia ava o ia i lana tane.” (Efeso 5:22, 23, 33) E tatau lenei mea, auā afai e leai se ulu i totonu o le aiga o lē e mauaina le āva mai lana avā, e masani lava ona iai feeseeseaiga ma fenuminumiaiga.

²² Ua taatele i aso nei le maitaita ma le faatavā o tamaitai i tamaloloa, ma ua matauina nei uiga e faufautua o faaipoipoga faapea o se puna o faafitauli faaleaiga. O lea, pe a e faaipoipo, o le a poto mo oe pe afai e te faatatauina fautuaga a le Tusi Paia. Afai e lē taulau i lau tane ona taʻimua e  pei ona tatau ai ia te ia, o le a e manao la ina ia e fesili ifo ia te oe lava: E mafai ea ona ou faia ni mea e sili atu ina ia faalaeiauina ai o ia e faataunuuina lana matafaioi e tatau ai i le aiga? Pe ou te talosagaina ni ana fautuaga ma taʻiala? Pe ou te faailoa atu faapea o loo oʻu vaavaai atu ia te ia mo le taʻitaʻiga? Pe ou te alofiaina le taʻufaatauvaaina o mea na te faia? Pe a ia faaalia le loto naunau ina ia faia ni faaiʻuga pe taʻimua i mea fai a le aiga i ni auala laiti, pe ou te faaalia le talisapaia mo lea mea?

²³ Ae maise lava, o le tamaloa, o loo iai o ia i le tulaga e faamanuiaina ai le faaipoipoga e ala i le faatatauina o fautuaga a le Tusi Paia. Ia manatua lena mea pe afai e te faaipoipo. E ui lava o le a avea ai oe i lena taimi o se ulu o le aiga, i le avea ai ma tane, e lē faapea e avea ai lena mea e fai ai oe ma se tagata pule tautalatasi. E leai, auā ua poloaia tane e le Afioga a le Atua ina ia alolofa i a latou avā, “faapei o Keriso foi ona alofa mai i le ekalesia [Kerisiano], ma foaiina mai e ia ia te ia e fai mona sui.” (Efeso 5:25) O lea, o le faatatauina o fautuaga a le Tusi Paia, o le a e faia ai ma le alofa ma le loto naunau ni taulaga mo le tamaitai e te faaipoipo i ai. A o e te leʻi faia ni faaiʻuga, o le a lelei mo oe ona manatunatu i ona manatu, o mea e fiafia pe lē fiafia i ai o ia, e oo lava i le faia o lona manaoga pe a leai se finauga e tulai mai ai. O lea auala o le a e faaalia ai ia te ia le alofa ma le āva, e pei ona poloaia ai e le Tusi Paia.

²⁴ O le utagiaina o fautuaga faapea a le Atua, o le a e olioli ai i le filemu ma le autasi i lau faaipoipoga, pe afai e oo mai le taimi e faia ai faapena. O le a avea o se manuia moni, e iʻu ai i le faataunuuina ma le faamalieina sa faamoemoeina e Lē na Foafoaina i tatou mo lea fuafuaga matagofie ina ia aumaia i le fanau a tagata.

[Fesili mo le Suʻesuʻega]

[Ata i le itulau 161]

Ina ia fiafia se avā, na te manaomia ona lagona o loo alofagia o ia

[Ata i le itulau 164]

E matuā tāua mo se faaipoipoga fiafia le matuā uaʻi atu pe a tautala lau paaga