Mataupu 14

Pe Tatau ona E Inu i le Ava Malosi?

O le vaega lona fitu lenei o la tatou faasologa. Ua aumaia ai i inei le vaaiga faale-Tusi Paia e faatatau i le ava malosi ma taunuuga leaga e maua mai le faaaogāina o vailaau oona.

1-4. (a) Pe faaaogāina e nisi o tagata talavou ua e faamasani i ai le ava malosi? (e) E faapeī faalogona o tagata i o tatou vaipanoa e faatatau i le faaaogāina o mea inu malolosi? O tutusa ea manatu a so o se atunuu e faatatau i le faaaogāina o mea inu faapena?

E TOATELE ma ua sili atu tagata talavou o loo fesagaʻi ma lenei fesili i aso nei. Aiseā? Auā ua faatuputupulaia le faaaogāina o le ava malosi i le va o tagata laiti, faatasi ai ma le toatele o loo liliu i ai e suitulaga i vailaau faasaina. E tusa ai ma lenei mea, seʻi o tatou iloiloina nisi o mea moni, ma seʻi vaai pe mafai ona fesoasoani mai ia i tatou i le tagai i ai i lenei mea ma le mafaufau saʻo mo lo tatou lava lelei tumau.

² O ava malosi​—e aofia ai le tele o mea inu. O nisi mea inu, e pei o le pia, e maualalo le malosi o le alakaholo o loo iai. O isi e fai sina malolosi teisi, e pei ona moni i le tele o uaina. E iai foi la mea ua taʻua o “mea malosi,” e maualuluga teisi atu le alakaholo o loo iai. E aofia ai i nei mea brandies, uisikī, sini, vodka atoa ma isi.

³ E eseese foi manatu ma aganuu a atunuu o le lalolagi. I nisi atunuu​—Falani, Italia, Sepania, Eleni ma isi lava atunuu​—e taatele ai le uaina i le laulau o taumafataga a aiga. Atonu na tuputupu aʻe lenei mea ona o se faafitauli i le mauaina o vai lelei i le taumafa pe ona o le aganuu lava.  Peitai, e oo lava i nei atunuu, e eseese ai manatu agaʻi i le faaaogāina o ava malosi. E lē gata i lea, ae eseese foi iʻuga o le a maua mai le faaaogāina o ava malosi mai lea atunuu i lea atunuu ma mai lea tagata i lea tagata. E manaomia ona e manatuaina lenei mea i le atiina aʻe o se vaaiga saʻo agaʻi i ava malosi faapena.

⁴ O lea la, e tusa ai ma lenei eseesega uma lava, pe o iai se tulaga mautu ma tutusa ina ia taʻitaʻiina ai oe i lenei mataupu? Ioe, ua saunia lea e le Tusi Paia. I le matauina o le mea o loo fai mai ai, tagai i ai pe e te lē ioe faapea o se fautuaga atamai ma le paleni.

SE VAAIGA PALENI

5-7. (a) O le ā o loo fai mai ai le Tusi Paia e faatatau i le faaaogāina o le uaina e tagata o le Atua i taimi ua mavae? (e) E mafai ona e aumaia se tala faatusa o loo faaalia mai ai le auala e mafai ai ona faapogaia e se mea e lelei se faafitauli matuiā pe afai ua faaaogāseseina pe ua faaaogā vave ae e te leʻi taitai?

⁵ Ua faaalia e le Tusi Paia e faapea, sa avea le uaina ma mea inu taatele e faaaogāina faatasi i taimi o taumafataga mai lava i taimi anamua, sa faaaogāina e tagata e pei o Aperaamo, Isaako ma le toatele lava o isi. Sa saunia e Iesu se uaina mo se faigaʻai i se faaipoipoga, ma sa faatonuina e le aposetolo o Paulo Timoteo ina ia “inu sina uaina itiiti, ona o lou manava ma lou maʻi e tupu soo.”​—1 Timoteo 5:23.

⁶ Ma le tonu lava la, o loo lisiina mai e le Tusi Paia le uaina i totonu o sauniuniga ma faamanuiaga a le Atua mo le faafiafiaina o tagata. Ua faapea mai se salamo a le Tusi Paia: “Ua faatupu e ia mutia mo manu vaefa, atoa ma mea totō e aoga i tagata, . . . ma le uaina e faafiafia ai loto o tagata.” (Salamo 104:14, 15) Ua faailoa mai foi e le Tusi Paia faapea sa faaaogāina e tagata o le Atua i nisi taimi isi ava malosi, e aofia ai le pia ma mea inu malosi.

⁷ Pe o le uiga o lenei mea e lē manaomia ona e faaeteete e tusa ai ma le inuina o ava malosi? E leai lava. Auā o loo faapea foi ona faaalia mai e le Afioga a le Atua le ʻisi itu o le mataupu.’ E tele mea o loo iai i le olaga e lē sese, peitai, e mafai ona aumaia ai iʻuga mataʻutia  pe a faaaogāseseina po o le vave faaaogāina ae e te leʻi taitai. Na tuuina mai e le Atua i tagata le malosi e fanautama ai, ae tatau ona faaaogāina nei mea i le na o le faaipoipoga ua faamamaluina, ma o lea faaaogāina e mafai ona aumaia ai le tiute tauave mamafatū, o le tausia lea o se aiga. E mafai ona aogā tele le afi, āusa, eletise ma meafaigaluega eseese i tane ma fafine i a latou galuega, ae afai e faatalalē i le faaaogāina, e mafai foi ona matuā āfaina ai. Afai e lē utagiaina le lapataiga, e mafai foi ona maua ai iʻuga mataʻutia mai le inuina o ava malosi.

IʻUGA E OO I AI ONA O AVA MALOSI

8-11. (a) Pe a aveina i totonu o le tino, o le ā le iʻuga e iʻu i ai sina mea laitiiti o le ava e inuina? O le ā e tupu pe a oo ina sili atu ona tele se mea e inu? (e) Ua faamatalaina faapefea e le Faataoto 23:29-35 iʻuga e iʻu i ai ona o le onā? Ua e vaaia ea se tasi ua amio faapena?

⁸ Seʻi manatu i iʻuga o le ava e oo i vaega o le tino faaletagata. E lē manaomia ona faamalūina, e lē pei o isi mea. E amata ona mitiia i ou alatoto i le taimi lava e ulu atu ai i lou puta, e ui o le tele o mea e mitiia e faagaoioia i totonu o le taufale (gaau) laitiiti. E vave lava ona aveina atu i lou faiʻai, lou ate atoa ma isi vaega o le tino. Talu ai o loo iai i le ava ni mea e maua ai le malosi (calories), o lea la, e amata ai e lou tino ona faia gaoioiga tau vailaau ina ia maua ai le malosi, o le uiga o lea mea, o le faaliliuina o le ava e avea o se vailaau e mafai e lou tino ona faamūina e pei o se mea tafuafi. E faia e lou ate le tele o lea galuega. E faamāmāina e ou māmā ma ou fatugao nisi o lea avega a o aveesea mai nisi o le ava e auala i le mānava ma le feau lata.

⁹ E oo loa i alatoto, o ā ni iʻuga o le ava e oo i se tagata? A itiiti sina mea e inu, o le iʻuga e oo i ai o le fia moe, e filemu ma e lē gaoia. Ae a tele se mea e inu, ona faagesegese ai lea o ʻfaatonutonuga autū’ o le mafaufau. O lea la, atonu pe a itiiti mai, o nisi tagata, o le a mafua ai ona matuā tautalatala, soona tafitivale ma e oo lava ina maitaita. Pe e te leʻi vaai o tupu lena mea i tagata?

¹⁰ A inu pea le ava, ona matuā gese ai lea o le mafaufau. Ua āfaina le felavasaiga autū o neura. Ma amata ai ona faafaigata i se tagata ona tau faatonutonu ana gaoioiga. O le pogai lena e faafaigata ai ona savali, ,  vaai ma tautala ma le manino. E oo foi ina nunumi lona mafaufau. E faateteleina le leaga o le faafitauli e le iʻuga uiga ese e iʻu i ai o loo i le ava i le faia o le tagata ina ia manatu faapea, o loo sili ona galue lelei lona mafaufau i lo le mea e masani ai. O lea, o ia lava le tagata mulimuli e masani ona iloa faapea, ua tele naunau lana inu. Ma e oo loa i le tulaga ua onā, e sau se taimi ona mafai lea ona maua sana mapu.

¹¹ Seʻi matau le saʻo lelei o lenei ata e faatatau i lamatiaga ma le lē toafilemu e maua mai ona o le inu tele i ava malosi. O loo maua i le Tusi Paia i le Faataoto 23:29-35: “E ia te ai ea le aue? e ia te ai ea mala? e ia te ai misa? e ia te ai le atuatuvale? e o ai ea manunua fua? e ia te ai ea mata mūmū? O e ua faatuai i le uaina; o e o atu e saili i le uaina filogia. . . . E vaai ou mata i fafine ese; e tautala foi lou loto i mea faapiopio. E tusa lava oe ma le ua taoto i totonu o le sami; [o loo fenuminumiai ma le lē mafesoasoania e pei o se tagata o loo malemo], e tusa foi ma le ua taoto i le tumutumu o le fanā [le mea e lagona tele ai le taumalua o le vaa]. E te faapea, Na latou fasia aʻu, a ou te lei tiga ai; na latou tuʻia aʻu, a ou te lei lagona; [auā e lē o mafaufau le tagata onā i mea o loo tutupu ma e masani lava ona ia lē iloaina ona manua seʻi vagana ua teʻa le onā].” E lē matuā manaia i le faalogo lea mea, a ea? Ae o le mea lena e tupu pe a onā se tasi.

 O SE FAAFITAULI O LOO TUPUTUPU AʻE

12-17. (a) E faapeī le tele o le faafitauli o le faaaogāseseina o le ava i totonu o tagata talavou? Latou te amataina faapefea? (e) Afai e taumafai se tasi e faamalosia oe ina ia inu, o le ā le uunaiga atonu o loo ia te ia moni lava? (Sapakuka 2:15)

¹² Ae pe o iai tagata talavou i se lamatiaga moni o le oo ina onanā po o le avea ma ē ua puleaina e le ava? Ioe, ua iai. Sa faapea mai Donald G. Phelps, le faatonu sili o le National Institute e faatatau i le Faaaogāseseina o le Ava ma le Puleaina e le Ava i Washington, D.C.:

“E tali tutusa le fua faatatau o ē faaaogāseseina le ava i le va o le faitau aofai o o tatou talavou ma le faitau aofai o tagata matutua. O le sefulu pasene o tama uma e 13 tausaga le matutua (sa fesiligia i se suesuega faaleatunuu e uiga i tupulaga laiti) e onanā a lē itiiti mai e faatasi i le vaiaso. O lona uiga e faa-52 i le tausaga.”

¹³ Ua leva tele o feagai Falani ma se faafitauli matuiā e faatatau i le pulea e le ava malosi o tamaiti, o loo faaalia ai e nisi tagata faailoga o le ate fefete a o laiti lava. I Hagakeri (o se atunuu e sili ona maualuga ai le televave o le pule i le ola), sa togafitia ai i falemaʻi ogatotonu i tausaga lata mai nei le faitau afe o tamaiti i tausaga taitasi ona o le onanā.

¹⁴ Aiseā e oo atu ai tagata talavou i lenei tulaga? O le tele lava o tulaga, ona o le iai i totonu o o latou aiga o se tasi ua avea o se tagata e inu tele. A o le tele o isi tulaga, ona e uunaia i latou e isi tagata talavou ina ia amata ona inu. O nisi taimi, e faamalosia ai se tama talavou e isi latou te tupulaga faatasi ina ia ʻfaamaonia o ia moni o se tama tane,’ e ala i le matuā inu tele i nisi o mea inu, po o le faia foi o se teine talavou ina ia lagona faapea, e sese le itu o loo agaʻi i ai tau vafealoai pe afai e lē inu o ia.

¹⁵ Ae seʻi fesili ifo ia te oe lava ia, Pe o le inuina o se ava malosi e faamaonia moni ai se mea e uiga i le ituaiga o tagata o loo e iai? Ma le manino lava e leai, talu ai e oo foi i meaola e mafai ona faaseseina ina ia feinu ma onanā ai. O le mea moni lava, o le ā le mea o loo mananao ai tagata o ē o loo faamalosia oe ina ia inu? Pe o latou sailia sou lelei, se mea o le a aogā ia te oe? Pe na ona latou taumafai e tuu oe i le vasega  lea latou te iai? Faamata o loo latou faamoemoe ina ia maua se mea “malie” i le vaai atu ua e lē puleaina au gaoioiga, ua lē pei o se taulealea ua matua po o se tamaitai, ae pei o se tama itiiti o lē ua lē mafai ona savali, tautala ma vaai ma le manino, ma o sē e tautala ma faia mea ma le faavalevalea?

¹⁶ Matau le mea na fai mai ai se tasi pule o Dr. Giorgio Lolli, e faapea:

“O le tagata ua pulea e le ava o loo toe foi i tua mai le lalolagi o tagata matutua i le avea ma tamameamea, i le tulaga faaletino ma le tulaga faalemafaufau. Ua lē mafai ona iloa le eseesega o le malamalamaga faalemafaufau ma faalogona tonu faaletino. E pei o se tamameamea, ua lē mafesoasoania ma e manaomia se tausiga faapepe.”

E lē gata i lea, e mafai foi e tagata o ē o loo sailia amioga lē mamā faaleituaiga ona latou faamalosia se uo e inu ina ia faatoilaloina ai le pulea o ia lava (tama po o se teine).

¹⁷ E moni lava o le lolo atu i so o se tasi o nei omiga o le a faaalia ai​—e lē o le iai i se tasi o le malosi pe ua matua​—ae o se tasi e vaivai ma e leai se lototele tau i amioga mamā. O se mafuaaga lelei ua lapatai mai ai le Faataoto 20:1 e faapea, e mafai ona avea le uaina ma “faatauemu lea; o le ʻava, o le faapisapisao lea; o i latou uma o e faaseseina ai, e le popoto i latou.” E te lē tau manaomia ona tofo i le onā ina ia iloa ai pe faapeī lona lē manaomia​—e pei lava ona lē manaomia ona gagau se vae ina ia iloa ai pe faapeī le tiga e mafai ona oo i ai.

18, 19. O le ā e mafai ona iʻu i ai mai na o se mea leaga lava e tasi e tupu ona o mea inu malosi, e tusa lava pe lē o puleaina e le ava malosi se tagata?

¹⁸ E lē na o le lamatia i le avea ma se “tagata inu faatupu faalavelave,” po o se tagata ua pulea e le ava malosi e manaomia ai se faaeteetega. E na o le tasi lava se mea leaga e tupu ia te oe ona o le ava malosi e mafai ona aumaia ai se leaga tumau. Atonu o se faalavelave faafuaseʻi tau taavale, atonu e maimau ai le ola po o le lima po o le vae​—o oe lava ia po o se isi tagata e lē sala.  Pe atonu o se gaoioiga tau amioga lē mamā e faapisipisiaina ai lou olaga atoa ma mafai ona aumaia faigata matuitui. Pe atonu foi o se amioga sauā o le a faapea ona e faanoanoa ai mo se taimi umi. Aiseā e uia ai se lamatiaga e lē manaomia?

¹⁹ O le faaono tutupu mai o iʻuga faanoanoa faapea ua manino mai i le mea moni e faapea, mai se aofaiga e 50,000 o tagata e maliliu i tausaga taitasi i luga o ala tetele o le Iunaite Setete, o le sili atu i le afa o ē maliliu e mafua ona o faalavelave faafuaseʻi e fesootai atu i ava malosi. Ma ua faapea mai se lipoti a le New York Times, o le “sili atu i le 80 pasene o fasiotigā tagata ma faaoolima taufaamatau ua faia e tagata onanā.”

FUAFUAINA LE MATAUPU MA LE ATAMAI

20, 21. (a) Aiseā e sili atu ai i nisi tagata ona lē faaaogāina so o se ava malosi lava? (Hosea 4:11) (e) Aiseā e lē o se mea poto ai le faaaogāina o mea inu faapena ina ia taumafai ai e solaese mai i faafitauli?

²⁰ I le fuafuaina o le mataupu, ia manatua o le ava malosi e lē o se mea e matuā manaomia i le olaga o se tasi e pei o le ʻea, mea taumafa faapea ma le suāvai. E mafai ona e soifua e aunoa ma ia mea, ma ua sili atu i le toatele le faia faapea. Ia manatua foi, o le tagata o lē fia maua le faamaoniga a Ieova le Atua, o Lē Foai Ola, e tatau ona auauna ia te ia ma le ʻloto, solu, mafaufau ma le malosi atoa.’ (Luka 10:27)  E lē gata ina mafai ona faoa e le faaaogāseseina o le ava malosi se tasi mai le malamalamaga faalemafaufau ma le mataalia faapea ma le malosi faaletino, ae āfaina ai foi le loto o se tasi, e taʻitaʻiina atu ai i le faatuputupulaiaina o uunaiga leaga.

²¹ E moni, o loo tautala le Tusi Paia i le faaaogāina ma le onomea o mea inu faapei o le uaina. Ae faapefea pe afai e vaai se tasi i mea inu faapena faapea o se solaaga mai le mea moni o le olaga pe solaese mai ai i le fiu? Pe o se vailaau totino ina ia ʻfaalototeleina ai se tasi’ ina ia foia ai le matamuli po o le fefe? Atonu o le a ia iloaina lelei ai lava faapea e sili atu ona leaga le togafitiga i lo le faalavelave. O le ā le lelei o le tupe pe afai e faamaonia e lē o se tupe moni? Ma o le ā le lelei o se faalogona o le fiafia po o le lototele pe afai e faamaonia e na o se mea faatagāfai?

22. E tusa ma se tasi o lipoti, i lalo o ā tulaga ai lava a itiiti mai o le faaaogāina o ava malosi o le a taʻitaʻiina atu ai i faafitauli?

²² Ua faaalia e se lipoti saʻo lelei a le National Institute of Mental Health * faapea, o lamatiaga o le faaaogāseseina o ava malosi a itiiti mai ai lava sa aliali mai i tulaga sa iai o loo sosoo mai lalo: (1) O le mea na muai faaaogāina ai e le tagata ava malosi o totonu lea o se aiga malosi po o se vaega faalotu ma e masani lava ona maualalo le fua o le alakaholo (e pei o le uaina o taumafataga po o le pia) ma e masani lava ona inuina o se vaega o le taumafataga. (2) O le mea na manatu ai i le faaaogāina o nei mea malosi faapea, e lē o se mea lelei e lē o se agasala foi, sa lē manatu i le inuina faapea o so o se fua o le avea ma tagata matua po o le avea ai ma “tama tane moni.” (3) O le mea sa lē faamalosia ai se tasi ina ia inu ma sa manatu i le teenaina o se mea inu e pei o le teenaina o se fasi falaoa. (4) O le mea sa matuā lē faamaonia ai lava le soona inu tele, na manatu i ai faapea e lē o se “aʻega” po o se mea ula po o se mea e tatau ona faatagaina. Ma atonu lava o le mea aupito tāua,  (5) o le mea sa iai se maliega autasi ma le ōgatasi i le faia o le mea ua saʻo ma le mea e sese e tusa ai ma le faaaogāina o mea inu faapena, le tuuina atu e mātua o le faaaʻoaʻoga lelei o le faaaogāina ma le onomea.

23, 24. (a) O le ā le taʻitaʻiga ua saunia mo oe e le Tusi Paia e faatatau i le faaaogāina o mea inu malolosi? (Faataoto 23:20; 6:20; 1 Korinito 6:9, 10) (e) O le a e faatatauina faapefea le fautuaga e faatatau i lenei mataupu ua aumaia i le Roma 14:13-17, 21?

²³ O le mea moni, o lou taʻiala sili ona lelei ma le saogalemu, o le Afioga lea a le Atua. E pei ona ua tatou iloaina, o loo saunia mai ai faaaʻoaʻoga mo le faaaogāina tatau o ava malosi faapea ma lapataiga malolosi faasaga i o latou faaaogāseseina. O loo fautuaina ai tagata talavou ina ia faaaloalo i le faaiʻuga a o latou mātua. O lea ia atamamai, ia faalogo atu i mea latou te fai mai ai pe tatau ona e inu i ava malosi pe leai, po o lalo foi o ā tulaga e mafai ai ona e faia faapea. E te atamai foi pe afai e te alofiaina le inu tele i nei mea inu pe afai o i latou o loo faaaogāina o ni tagata talavou uma ma e lē o iai ni mātua po o ni tagata o le aiga o loo iai ina ia faia se taaʻiga e faatonutonu ai.

²⁴ Ina ia maua le mea sili ona lelei mai lou talavou, ma olioli i le fiafia tumau, e te manaomia ona vaai i le Afioga a le Atua mo le taʻitaʻiga. O lea, “pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.”​—1 Korinito 10:31.

[Faamatalaga pito i lalo]

[Fesili mo le Suʻesuʻega]