Mataupu 24

Se Lumanaʻi Matagofie ua Teuina mo Oe

1-3. (a) Aiseā tatou te ola ai i se taimi e sili ona moomia i le talafaasolopito faaletagata? (e) O le ā le suiga o le a aumaia e le Atua mo lo tatou lelei?

O LOO e ola i le tele o auala i se taimi e sili ona moomia i le talafaasolopito faaletagata. E lē ona o le auala o loo iai tulaga o le lalolagi i aso nei ae ona o le mea ua faaalia e le Tusi Paia o le a aumaia e le lumanai ua lata mai.

² E silafia e Ieova le Atua le manaomia tele o le iai o se suiga​—se suiga tele​—i mea o loo i inei i le lenei paneta. E manino mai ua na o ia o Lē e mafai ona aumaia lea suiga. Ua faitau afe nei tausaga le leva o le lalolagi o le fanau a tagata. Ae o loo tauivi pea ma faafitauli tuai lava ia e tasi lea ua faaauau pea ona faalavelavea ai le sosaiete faaletagata: o taua, le matelaina, leaga o fale e nonofo ai, le lē faamasinotonu ma faafitauli tau tamaoaiga.

³ E matuā anoanoai tele ua lē mafaitaulia mea e manaomia ona faasaʻosaʻoina i le faiga o mea a le lalolagi o loo iai nei. E moni lava, e ao ona iai se mea e sili ona lelei i lo lea. Ma ua faaalia mai e le Tusi Paia ua ia Ieova le Atua se mea e sili mamao atu ona lelei ua teuina mo i latou o ē alolofa ma auauna ia te ia. O le mea moni, ua ia faaaogāina se ono afe tausaga ina ia faaalia mai ai lana fuafuaga mo le aumaia o se faiga fou atoatoa, se parataiso o fiafiaga. I totonu o lena faiga fou ma le fiafia o mea, ua ia folafolaina ai le aveesea e faavavau o tulaga iʻuvale ma le sauā ma le manatu faapito lea e faoesea mai ai i le ola le tele o lona olioli.

 FAAPEFEA MA O AFEA O LE A OO MAI AI SUIGA

4-8. (a) O le a aumaia faapefea e Ieova le suiga ua manaomia? (e) O le ā e faamaonia ai ua latalata tele mai le taimi e faataunuuina ai lenei mea? (2 Timoteo 3:1-5; Mataio 24:7, 8, 32, 33)

⁴ O le a ia faia faapefea lenei mea? Muamua lava, e ala i le aveesea o pule fenuminumiaʻi ma le lē aogā a lenei lalolagi i lalo o le faitau selau o faiga faapolotiki o loo faagaoioia i le taimi nei. Ua ia faalauiloa mai lana fuafuaga ina ia toe suia ia mea i se faigamalo e tasi e faia e ia lava, o lona malo e ala i lona Alo o Iesu Keriso. Sa faapogaia e le Atua le perofeta o Tanielu ina ia valoia lena mea, i le faapea mai: “O ona po o ia tupu [po o pulega] e faatuina ai e le Atua o le lagi o le malo e le faaumatia e faavavau; o lea malo foi, . . . na te tuʻimomomoina ma faaumatia ia malo uma lava, a o ia e tumau lava e faavavau.” (Tanielu 2:44) O afea o le a tupu ai lenei mea? E iai se auala e iloa ai pe a latalata mai.

⁵ Afai e te nofo i se sone i le lalolagi e masani ona suia lona tau ma e te vaaia ai le faasolo mamate o lau o laau ma touulu ifo, ma e te vaaia ai le faasolo faauli mai o le lagi i lea aso ma lea aso ma lagona le malulu ma le mālū o le ʻea, ma e te vaaia le felelei atu o taumanu agaʻi i se sone o le lalolagi e sili atu ona mafanafana​—e aunoa ma lou vaai i le kalena e te iloaina lava ua taulata mai le tau malulu, a ea? E lē na o se tasi o na mea e mafai ona taʻuina atu ai lea mea ia te oe, auā e mafai lava ona faauli le lagi i le tau mafanafana, pe mafai foi ona faamaʻia laau ma toulu ai o latou lau. Ae o le tuufaatasia o na mea uma e faia aʻe ai se faailoga mautinoa o le taulalata mai o le tau malulu.

⁶ I se auala tali tutusa faapena, o loo iai se “faailoga” ua faia aʻe i le tele o vala ua aumaia e le Tusi Paia. Ma ua taʻu mai e lea faailoga faapea ua latalata mai le taimi mo le malo o le Atua e ala ia Keriso Iesu ina ia puleaina ai lenei lalolagi. E te mafaia ona vaaia lena faailoga i aso nei i le na o le tilotilo i nusipepa po o polokalama o tala i leitio ma televise. O le ā lea?

 ⁷ Sa valoia e Iesu faapea i totonu o se tasi o tupulaga o le a oo mai ai se taimi ua faailogaina faapitoa lava e ala i taua, matelaina, faamaʻi ma mafuie, faatasi ai ma le popole tele ma le lē mautonu i le po o le ā o le a aumaia e le lumanai i le lalolagi. E lē o mea tonu ea na o loo tatou fesagaʻi pea lava pea i aso nei e ala i puna o tala? E leai se tupulaga na iai muamua i le talafaasolopito faaletagata ua vaaia na mea uma i se tele faapena e pei o le tupulaga o loo soifua i le lalolagi talu mai le 1914. O le pogai lea e taʻua ai e tagata tusitala o talafaasolopito le 1914 o se “tai liliu” i le talafaasolopito o le fanau a tagata.

⁸ I le taʻuaina o le tupulaga o loo vaaia lena “faailoga,” sa fetalai Iesu: “Pe a iloa e outou ia mea ua faia, ia outou iloa ua latalata le malo o le Atua. E moni, ou te fai atu ia te outou, E le mavae atu lenei tupulaga, seia taunuu mea uma.” (Luka 21:31, 32) O le uiga o lenei mea ua latalata mai le faiga fou a le Atua. O ā suiga o le a ia aumaia?

SUIGA UA TEUINA E LE ATUA MO LE AIGA FAALETAGATA

9-13. (a) I le faiga fou a le Atua, o ā tulaga o le a iai mo le fanau uma a tagata? (e) O le ā e faatalitonuina ai oe faapea e mafai ma o le a faataunuuina moni nei mea? (Faaaliga 21:5)

⁹ Ua folafolaina e le Atua le taofia e faavavau o le finauga vavaō faapolotiki ma fetauaiga ua faataugaina ai le tele o le tamaoaiga o le lalolagi, e ala i le tuua o lenei paneta ma ona tagata o loo ʻaināina i lalo o le pulega a le faigamalo lelei atoatoa e tasi ua faatonutonuina mai le lagi.  O le uiga o lea mea o le a faaumaina ai taua ia o loo aveeseina talavou, o mea e sili ona lelei o atunuu, ma mulimuli ane, toe faafoi atu i latou i ni aofaiga tetele ua pipili, ua tatipiesea lima, ogalima po o vae, atonu ua tauaso pe sili ai ona leaga, le aumaia ua maliliu. O i latou o ē ola i le faiga fou a le Atua o le a avea o ni tagata e alolofa i le filemu o ē ua faataunuuina ai le valoaga i le Tusi Paia i le Isaia 2:4: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” Faatasi ai ma le filemu o le a iai i le lalolagi atoa, e mafai ai la ona faataulauina mea e sili ona matagofie mo le lelei o tagata uma i so o se mea.

¹⁰ E lē na o le taofia ai o le iʻuvale ma le faatauga o faiga faapolotiki. Ae o le a faamutaina foi le matapeapea o faiga tetele faapisinisi. O le tele o nei faiga o loo faaeleeleaina ai le laueleele, o loo faaoonaina ai le ʻea, le vai, le laueleele, o loo mamate ai meaola o le vaomatua i le laueleele. Ae ua taʻu mai e le Tusi Paia ia i tatou, i le Faaaliga 11:18, faapea o le a ʻfaafanoina e le Atua i latou o loo fano ai le lalolagi.’ O le a toe faafoisiaina uma mai ai loa lea o le matagofie o vaomaoa o le laueleele, le feilafi mai ma le manino o ona vaitafe ma vaituloto, le mālū ma le manogi o lona ʻea, ma ituaiga eseese e tele o manufelelei, iʻa ma manu vaefa o le vaomatua. E mafai ona e iai ma i latou o loo olioli i nei mea i le lumanai matagofie ua teuina e le Atua mo i latou o loo faatuatua i lana Afioga.

¹¹ Ua folafola mai e Lē na Foafoaina i tatou faapea, i totonu o lana faiga fou, o le a olioli ai tagata uma i fua faaʻoaina o le laueleele, e tusa lava po o fea e nonofo ai. O le a e lē toe vaaia i lenei lalolagi tamaiti o loo matelaina e manava puputa ma lima mimiti, e pei ona iai i le tele o vaega o le lalolagi i aso nei. I le Isaia 25:6, 8, na faapogaia ai e le Atua lenei valoaga ina ia tusiaina: “E faia e Ieova o ʻau i lenei mauga mo nuu uma le faigaai o mea lelei . . . E faaumatia e ia le oti e faavavau; e soloiesea foi e le Alii o Ieova o loimata i mata uma lava.”

¹² Ioe, ae sili ai ona lelei, o loo faaalia e le Tusi Paia faapea o le a toe  faafoisia mai e le Atua le soifua malōlōina lelei atoatoa i le fanau a tagata usiusitai. O le a faamutaina e faavavau faanoanoaga uma ma mafatiaga ua aumaia e le tiga ma le oti, a o aumaia e le malo a lona Alo le vaifofo o gasegase faaletagata faapea ma le lē lelei atoatoa. Ua taʻu mai e le Faaaliga 21:4 ia i tatou: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”

¹³ O le uiga o lena mea o le a oo mai le taimi o le a aveesea ai le gasolo atu e avea ma tagata matua lea e iʻu i ai ona o le lē lelei atoatoa faaletagata. Maeu le alofa o le Atua i le sauniaina o se lumanai o le a saoloto mai mea e pei o le maanuminumi, lauulu sinā po o le ulu tula, ponaivi gauigofie, le lē faamalosia o musele, le tau lē au o le mānava ma isi mea uma ua ō mai faatasi nei ma le tagata matua. Ioe, ua mafai e le Atua ona faia le mea o loo faamatalaina mai i le Iopu 33:25, mo tagata ua matutua, i le faapea mai: “E toe ola lelei ai lona tino e sili i le tama itiiti, e toe foi o ia i ona po o lona taulealea.” Ioe, e mafaia e Ieova le Atua ona aumaia le soifua malōlōina ma le malosi e sili moni atu ona lelei i lo le mea ua maua e talavou i aso nei, auā e oo lava i tagata talavou i le taimi nei o loo mamaʻi ma feoti faafuaseʻi nisi ae leʻi taitai tausaga.

LE AUALA E MAFAI AI ONA E OLIOLI I LE LUMANAI

14-16. O le ā e te manaomia ona faia ina ia olioli ai i lenei lumanai matagofie?

¹⁴ E mafai e lena lumanai matagofie ona avea mo oe pe afai e te faia le mea o loo fai mai ai le Tusi Paia: “O lenei, ia e manatua le na faia oe i ona po o lou taulealea [po o le tamaitai talavou], a o lei oo mai aso leaga, a o lei oo mai foi tausaga e te faapea ai [e pei ona fai mai ai tagata o loo mafatia mai le avea ma tagata matua], E leai soʻu fiafia i ai.”​—Failauga 12:1.

¹⁵ E lē faapea e tau ina mafaufau i Lē na Foafoaina oe mai lea taimi i lea taimi. O se mea tau i le manatuaina o ia i aso uma ma le aso atoa e ala i le sailia ina ia ola i se auala e faafiafiaina ai o ia ma o le a finagalo ai o ia ina ia e iai faatasi ma i latou o ē o le a ola i lana faiga fou.  O le a ia lē faamalosia oe ina ia faia faapea. E ao ona e faia i lau lava filifiliga ma lou saolotoga. E te iloaina lava a faamalosia oe e ou mātua ina ia faia se mea e tatau ona e faia, ona la lē maua lea o se fiafiaga moni i le vaai atu o e faia. Ae afai e te faia ma le loto naunau ma le fiafia ona e te iloaina e faafiafiaina ai i laua, e te aumaia ai la ia i laua le fiafia tele. E faapena foi, ua fetalai mai Ieova i lana Afioga: “Loʻu atalii e, ia poto oe, ma e faafiafia loʻu loto.”​—Faataoto 27:11.

¹⁶ Ioe, ia olioli i lou talavou, le tauosoosoga o lou olaga, ma ia maua mai ai le mea sili. Fausia aʻe uiga o le a aumaia ai ia te oe le fiafiaga silisili e mafai ai, i le taimi nei ma le lumanai. Faaaogā lou talavou ina ia maua ai se amataga lelei i le auala i le ola, ae lē i le na o ni nai faitau sefulu o tausaga o le olaga i totonu o lenei faiga o mea o loo faasolo atu ina faaumatia ma pala, ae i le ola e faavavau i le osoosoga o le malosi tau talavou i le lalolagi parataiso a le Atua.

[Fesili mo le Suʻesuʻega]