Mataupu 15

Vailaau​—O le Ki ea Lea i le Olaga Moni?

1, 2. (a) I le ā le tele ua faaaogāina ai vailaau faasaina e tagata o loo e iloaina? (e) Aiseā e faaaogāina ai e tagata talavou vailaau faasaina?

ATONU o loo ia te oe ni vailaau (drugs)​—ni fualaau e faafilemuina ai le mafaufau (tranquilizers), ni fualaau e faatiotioina ai pe faafiafiaina ai se tasi (“pep pills”)​—po o nisi ituaiga i lou aiga, auā e toatele i tatou o loo ola i totonu o se sosaiete ua faatumulia i vailaau i aso nei. Mo se faaaʻoaʻoga, i totonu o le Iunaite Setete, ua faateleina ai le faatauina o vailaau a falegaosi vailaau e sili atu i le faatolusefulu le tau na faatauina muamua ai talu mai le Taua e Lua a le Lalolagi. Na faapea mai Dr. Mitchell S. Rosenthall, i se tausaga e leʻi mamao atu, sa lava ma totoe vailaau mo le fesuisuiaiga o faalogona o tagata sa faatonuina e fomaʻi, “e tausia ai tane uma, fafine ma tamaiti i [le Iunaite Setete] mo se masina, a lē ina ia ʻfaafiafiaina ai,’ ʻfaafaanoanoa ai,’ po o le ʻlagona tuua toatasi ai.’

² O le tele o vailaau e faatonuina mo tagata matutua. Peitai, o loo faaaogāina e talavou i nisi atunuu se vaega tele o ia vailaau ʻina ia faafiafia ai i latou lava.’ O loo latou faaaogāina foi isi vailaau faasaina e lē o gaosia lautele mo le faaaogāina faafomaʻi, o loo aofia ai fualaau e faateʻa ai tiga (heroin), le LSD ma le mariuana. Atonu ua mafuli atu nisi talavou e manatu faapea: “Afai e faaaogā e tagata matutua fualaau, faaaogā tapaa ma onanā, aiseā la o le a ou lē fiafia ai foi aʻu ia e ula le mariuana pe faaaogā vailaau faasaina?” O le ā sou manatu? Pe e te lagona o vailaau o le ki lena i le olioli atili i le olaga?

VAILAAU FAASAINA UA LILIU I AI LE TOATELE

3-9. (a) O ā vailaau faasaina ua faaaogāina mo “faalogona malolosi” po o le faafiafiaina ai? O ā iʻuga e oo i ai ia i latou o ē faaaogāina? (e) Pe e te iloaina ni mea na tutupu i tagata ona o vailaau faasaina ina ia faamaninoina ai ia iʻuga?

³ O loo tele naunau vailaau faasaina ua liliu atu i ai tagata ina ia maua ai ni “faalogona malolosi” po o le fiafia. Atonu ua tele ni mea e te faalogo e uiga i ai. Peitai, seʻi faaalu ni nai minute ina ia toe iloiloina ai po o ā ia mea.

 ⁴ E iai vailaau faamoe (barbiturates), o nisi taimi e taʻua o vailaau e faafaanoanoa ai (“downers”). O vailaau faagase e mafai ona faatonuina e fomaʻi ina ia faamoe ai se tasi. E sili atu i le lua taseni ituaiga eseese o na vailaau, ma e sili atu i le 525 tone (476 tone meterika) e gaosia i tausaga taitasi i totonu o le Iunaite Setete lava ia. O se vaega tele lava o ia vailaau ua faaalatua ona fai i auala e lē tusa ai ma le tulafono.

⁵ O loo tele foi vailaau faatupu malosi ua faaaogāina, ua masani ona lauiloa o fualaau e faatiotioina ai (“pep pills”) po o vailaau e faafiafiaina ai (“uppers”). O vailaau e faagaee faavavevave ai faalogona (amphetamine) o vailaau autū ia. E faatonuina e nisi fomaʻi ina ia taofiofia ai le fia ʻai, e faaitiitia ai le lē lavā pe faamapu ai mai mafatiaga. Ae peitai, ua fuafuaina e faapea o le ʻafa o vailaau e faagaee faavavevave ai faalogona na gaosia e tusa ma le tulafono ua oo ina faaauala atu i ni auala e lē tusa ma le tulafono.

⁶ O le LSD * e sili ona malosi mai le faitau taseni o vailaau faasaina ia e maua ai i fāsaga. I tausaga e leʻi mamao atu, ua amata ona gaosia ai “faalilolilo” e le tele o falesuesue. E aumaia ai iʻuga e ese lava ia i latou e faaaogāina. E suia faapitoa ai lava le vaai. E mafai ona tupu ai vaaiga lē moni ma fāsaga mo le faitau masina pe a uma ona inuina le inumaga mulimuli. O mea e iloa e se tagata i vaaiga i le “taimi o aafiaga o le vailaau pe a leaga tele,” e mafai ona matuā faamataʻuina ai lava.

⁷ O le mariuana, o se mea e gaosi mai le laau o le cannabis (e fai ai maea ma lavalava), o se tasi lea o vailaau faasaina ua sili ona faaaogāina lautele. Pe e te iloaina ni tagata ua latou ulaina? E feololo atu ona iʻuga e iʻu i ai i lo le LSD, e ui lava ina faaseseina ai foi faalogona. Pe a ula e se tasi le mariuana, e foliga mai le lima minute o se itula e tasi. E foliga mai e mafai ona faaleotetele ai leo ma faamalolosi ai lanu o mea.

⁸ O le heroin e gaosia mai le vailaau faagase o le (morphine), lea e maua mai le fatu o le fugalaau fua paepae o le opiaga (opium poppy).  O lea vailaau faasaina e faapitoa lava lona mataʻutia. E mafai ona puleaina ai ma fai ma masani a se tagata pe a uma ona tuiina i ai mo ni nai taimi, latou te oo i ni tiga matuitui o le misia o se mea sa masani ai seʻi vagana ua latou toe faaopoopo atili le vailaau. Pe a pulea e le heroin tagata, e mafai ona faaleagaina ai o latou loto ma le agavaa e aʻoaʻoina ai. E avea i latou ma pologa i se masani e faaleagaina lemu ai i latou. Sa tusi se faipule o Niu Ioka faapea: “Ua faaleagaina e le heroin le faagaoioiga o le faiga o a tatou aʻoaʻoga.”

⁹ O le mea moni, e iai isi vailaau faasaina e manatu le toatele o tagata e tuuina atu ai ia i latou mea e sili atu o le olaga. O se tasi o ia vailaau faasaina o le vailaau faagase (cocaine). O le isi vailaau o le nikotini (nicotine), lea e i totonu o le tapaa. Pe tatau ona e faaaogāina nei vailaau faasaina? E lē o faasaina e le Tusi Paia le faaaogāina ma le onomea o ava malosi, lea e mafai ona faatoʻafilemu ai se tagata ma faafiafiaina ai lona loto, e pei ona tatou matauina i le mataupu na faatoʻā uma atu nei. Pe tonu la pe atamai le faaaogāina o so o se vailaau o nei vailaau faasaina eseese e tele i se taumafaiga ina ia faamalieina atili ai le olaga?

O LE Ā LE TULAGA E TATAU ONA IAI IA MEA?

10-12. (a) Atonu e faaaogāina faapefea e se fomaʻi se vailaau ina ia fesoasoani ai i se tagata? (e) Ae faapefea e le faaaogāseseina o vailaau ona matuā faaleagaina ai tagata?

¹⁰ E mautinoa e iai le tulaga e tatau ona iai vailaau, ma e mafai ona faatonuina e se fomaʻi i nisi taimi mo oe ona o se faafitauli tau soifua malōlōina. Atonu e tuuina atu e se fomaʻi ia te oe se tui o le vailaau faagase (morphine) ina ia maua ai se mapusaga pe afai o loo e iai i ni tiga matuitui tele. Ua lē masalomia le fesoasoani o le vailaau faamoe (barbiturates) ma vailaau faagase (amphetamines) i nisi gasegase o loo iai ni faafitauli tau faamaʻi. Ua faaaogāina foi le heroin i nisi atunuu ina ia faateʻaeseina ai mafatiaga o se tagata gasegase i le kanesa ua lē toe iʻu i se lelei.

¹¹ Ae i le isi itu, o loo faia ai e vailaau se leaga tele i le faitau miliona o tagata. Pe ā ma le miliona tagata i le Iunaite Setete ua lipotia mai faapea ua pulea e vailaau e faamoe ai (barbiturate), faatasi ai ma le sili atu i le 3,000 ē maliliu i tausaga taitasi ona ua sili atu le inumaga mai le mea e tatau ona iai. O le pulea e vailaau  e faamoe ai (heroin) e lē gata ina iʻu i le toatele e maliliu ai i le aso ona o le sili atu o le inumaga mai le mea e tatau ona iai, ae ua suia ai foi le faitau sefulu afe e avea ma tagata solitulafono mataʻutia. E gaoia e tagata ua puleaina e vailaau faasaina le sili atu i le $3,000,000 o mea totino i le aai o Niu Ioka i aso taitasi, i se fua faatatau, ina ia lagolagoina ai a latou masani taugata!

¹² O le ā le uiga o lenei mea? Pe tatau ona faasaina vailaau? E lē tau faasaina, talu ai o le tele o vailaau faasaina e iai ni ona aogā lelei. A o le faafitauli, o le salalau lautele atu o le faamelea po o le faaaogāseseina o ia mea. Ua faaaogāina e le faitau miliona o tagata ia mea ae leai ni togafitiga o se maʻi o loo aafia ai, ma ua faaaogāina i ni inumaga tetele e lē taitai ona fuafuaina e faaaogā i togafitiga faafomaʻi. E masani lava ona faanaunau le tagata o loo faaaogāina ina ia maua ai se faalogona e pei o loo moemiti, po o le tau ina oo i se ituaiga o tulaga e pei ua sioa. Pe ua taʻusaʻoina sea faaaogāina?

IʻUGA E IʻU I AI I LE TINO

13-17. (a) E pei ona faailoa mai i tusi faafomaʻi, o ā moni lava vailaau uma? (e) O lea, aiseā e avea ai o se lamatiaga ua fuafuaina lo latou faaaogāina e oo lava i fuafuaga faafomaʻi? (i) Otooto auiliili mai le auala o loo faasino mai ai e mau o loo mulimuli mai le silafaga a le Atua e faatatau i so o se faaaogāina o vailaau faasaina mo le na o le faafiafiaina ai pe ina ia “lele” ai: 2 Korinito 7:1; Roma 13:13; 12:1.

¹³ Ai lava ua e iloa faapea o le tele o vailaau na o le faatonuga lava a le fomaʻi e mafai ona maua ai, ma o nisi o ia vailaau e lē tusa ai ma tulafono i nisi atunuu. Fesili ifo ia te oe lava ia: Aiseā? E mo le puipuiga o i tatou uma lava. Ioe, e mafai ona mataʻutia tele vailaau e oo ai lava i le oti. O le mea moni, o vailaau o se pelu e faataumaai ona itu, e mafai ona faamalōlōina ai tiga i nisi tulaga, ae i isi tulaga, e tiga ai pe oo ai lava ina fasiotia ai. Ua faamatala mai e le tusi Drugs, o se tusi na lagolagosua i ai i le tusiaina le polofesa o mataupu tau suesuega o vailaau faapea:

¹⁴ “O vailaau uma e oona, ma o mea oona uma o vailaau. E leʻi teʻi teʻi lava maua mai le upu ʻoona’ ma le ʻinumaga’ i le upu autū e tasi, pe faapea o le upu Eleni o le pharmakon, lea tatou te maua i a tatou upu o le ʻpharmacy’ ma le ʻpharmacology,’ na muai faauigaina uma i se inumaga e faamalōlōina ai ma se inumaga e oti ai.”

¹⁵ O lea la, o le inuina o se vailaau o se tulaga lamatia na fuafuaina, e tusa lava pe e te gasegase. Ae talu ai e tāua tele ia te oe lou soifua, atonu o le a e taliaina ai lea tulaga lamatia ma inuina se vailaau, ina ia faateaese ai le tiga pe ina ia faaleleia atili ai se tulaga  leaga o lou soifua malōlōina. Peitai, pe o le a saʻo mo oe ona foloina, tuiina, ulaina pe sogisogi i se vailaau faasaina ina ia mafai ai ona oo i le tulaga ua taʻua o le “lele,” e te faagaloina ai le mea moni ma alu atu i se lalolagi o loo e moemiti i ai? Pe o ōgatasi lea faaaogāina o lou tino matagofie na tuuina mai e le Atua ma le mea na fuafuaina e Lē na Foafoaina i tatou?

¹⁶ Seʻi mafaufau i le mea lenei. Afai na mafai ona e foaiina atu i se tasi se meaalofa sili ona lelei, faapea o se taavale fou, o le ā sou faalogona pe afai na te faameleaina ma le loto i ai? Faapea sa ia taumafai ina ia faaola le taavale e aunoa ma le utuina i ai o le suauu pe sui le suauu, ma sa ia faaaogāina ina ia laʻu ai otaota o manu? Atonu o le a e lagona le ita po o le inoino ia te ia mo lea meleaina faavalevalea o lau meaalofa, a ea? O le ā la lou manatu i le faalogona o Ieova le Atua pe afai tatou te meleina o tatou tino matagofie, ma faatumuina e aunoa ma se ala tatau i nisi o mea oona ona o le manao ia maua ni “faalogona malolosi” po o le “fiafia”? Ua faailoa mai e lana Afioga ia i tatou e ala i le faalaeiauina o i tatou: “Ia tatou faamamā ia te i tatou i mea uma e leaga ai le tino atoa ma le agaga, ia faaatoatoaina lo outou faapaiaina i le mataʻu i le Atua.” (2 Korinito 7:1) O lea, e lē mafai ona tatou ola e talafeagai ai ma le finagalo o le Atua pe afai ona o le manao ia maua “faalogona malolosi” po o le “faafiafiaina,” ona aveina ai lea i totonu o o tatou tino se vailaau faasaina e faaleagaina ai i tatou.

¹⁷ Seʻi manatunatu foi i le manatu lenei. Ua uma ona tatou talanoaina muamua le mea ua fautuaina e Lē na Foafoaina mea e faatatau i le onā. Ua ia faaalia mai ma le manino i lana Afioga faapea o le tagata o lē ua lē mafai ona pulea ia lava ona o le inu tele na te faaleagaina ai ia lava, e masani lava ona oo ina lē mamā ma valea, o se pogai o le masiasi ai o tagata i ona autafa. E lē fesiligia lea itu, e taʻusalaina ma le saʻo e Lē na Faia i tatou le onā.  O lea, pe o le a ese ai la le silafaga a le Atua pe afai ua lē puleaina e se tagata ia lava ona o le heroin, mariuana po o nisi vailaau faasaina? E mafai e se tasi ona lē puleaina ia e pei lava ona lē mafai ona puleaina i latou o ē onanā i le ava malosi, e ui lava ina lē tutusa le iʻuga e iʻu i ai vailaau faasaina mai le ava malosi. O lea, e mafai ona tatou iloa ai mai le fautuaga atamai ma le saʻo ua maua i le Tusi Paia le tāua o le lē liliu atu i vailaau faasaina mo le mauaina ai o ni faalogona fiafia.

AE FAAPEFEA LE FAAAOGĀINA O LE TAPAA?

18-21. (a) Aiseā e ulaina ai e le toatele naunau o tagata le tapaa, e ui lava ina iloa lelei o le faia faapea e mataʻutia tele i le soifua malōlōina o se tasi? (e) Aumai a lē itiiti mai ni mafuaaga e lua i le pogai e sese ai mo se Kerisiano ona ulaula.

¹⁸ Atonu e te fesili mai: “Ae faapefea la le faaaogāina o tapaa, lea o loo iai le vailaau e faaleagaina ai, o le nikotini? E faitau sefulu miliona tagata matutua e ulaula ʻmo le fiafiaga’ e pei ona latou fai mai ai. E tatau ea lea mea?” E leai, e lē tatau, e pei ona faamautinoa mai e ala i le lapataiga o loo aliali mai i luga o pusa sikaleti ua faatauina i le Iunaite Setete: E MATAʻUTIA LE ULAULA MO LOU SOIFUA MALŌLŌINA. E moni lena mea moni e tusa lava po o fea le atunuu e te nofo ai. Aiseā la ua faataatia ai ma le loto i ai e le toatele o tagata matutua se faaaʻoaʻoga leaga mo tagata talavou, ma i lea lava taimi, ua faaleagaina ai foi o latou lava soifua malōlōina e ala i le ulaula? O le autū lava ona ua puleaina i latou e le tapaa. Ua faamatala mai e se lipoti i le Science World faapea:

¹⁹ “O le vailaau . . . e mafua ai ona pulea se tagata, o le nikotini. . . . A leai se nikotini ona ʻgalala’ lea i ai o le tino. E matuā manao tele i ai, o nisi taimi ua faatupu ʻmaʻi’ i le tino pe a aunoa ma le tapaa. Ona amata loa lea o le​—faalogona pei e iai se mea o loo misia​—se faalogona maʻi. . . . O nisi o nei āuga o le fia moe, ulu tiga, tiga le manava, tafe o le afu ma le tatavale o le fatu.”

²⁰ Ma le manino lava, e faaleagaina le tino o se tasi i le ulaula; o se tasi lea o ʻmea e leaga ai le tino’ lea ua uunaia ai Kerisiano e Lē na Foafoaina i tatou ina ia faamamāese mai ai i tatou lava. O lea atonu e te lagona faapea o tagata matutua o loo ulaula o loo iai i se tulaga leaga e faitioina ai tagata talavou o ē o loo faaleagaina i latou lava i vailaau faasaina.  Ma e moni lea. Afai e faaauau pea e mātua ona faaleagaina i latou lava e ala i le manavaina i totonu o le nikotini, e faapefea la ona mafai ona latou faatalitalia a latou fanau ina ia manatu mamafa i mea latou te fai mai ai e uiga i le tāua o le aloese mai vailaau faasaina? Peitai, e tusa lava po o le ā le mea e faia e isi pe fai mai ai, e taitasi i tatou ma tala atu se tala i le Atua mo ana lava gaoioiga. Ma o loo iai se isi mea o loo fai mai ai le Afioga a le Atua, le Tusi Paia, e sese ai i se Kerisiano le ulaula.

²¹ Ua faatonuina e le Tusi Paia e faapea: “E te alofa atu i lē lua te tuaoi, ia pei o oe lava ia te oe.” (Mataio 22:39) Ae mafai faapefea ona e ulaula i luma o isi ma e alofa pea i lou tuaoi? Tatou te fesili faapea ona o le manatu i le mea o loo faamatalaina mai e le Medical Tribune e faapea: “O le ulaula sikareti e leaga e lē gata i le soifua malōlōina o le tagata ulaula​—ae mafai foi ona leaga i le tagata lē sala o loo i ona tafatafa.” Sa matauina foi e se nusipepa faafomaʻi lauiloa e faapea: “O le a nofo toilalo le tagata e lē ulaula i se pagatia tau soifua malōlōina mataʻina mai se tagata ulaula i le mea e lē o lelei ai le taamilosaga a le ʻea.” Talu ai e faaleagaina e le ulaula i latou o loo i tafatafa o le tagata ulaula, pe lē o manino mai ai faapea e te lē mafai ona ulaula ma alofa moni i lou tuaoi?

 PE ESE LE MARIUANA?

22-25. (a) E ese faapefea le iʻuga e iʻu i ai le mariuana mai le ava malosi e tusa lava pe faaaogāina ma le onomea? (e) O loo faapefea ona fesoasoani moni mai le Atua ia i tatou ina ia maua le mea sili mai le olaga, i le lapataia o i tatou faasaga i faiga e faaleagaina ai? (Isaia 48:17; Salamo 16:11; Faataoto 3:​1-7)

²² Ua mafuli atu nisi tagata talavou e faatusalia le ulaina o le mariuana i le inuina o le ava malosi. Atonu latou te vaai i o latou mātua po o isi tagata matutua o “onanā” i le ava, ma faaiʻu ai e faapea e leai se mea e ese ai ma le ulaina o le mariuana ina ia maua mai ai iʻuga tali tutusa faapena. Ae pe moni?

²³ Manatua faapea, o loo taʻusalaina e le Tusi Paia le inu tele i le ava malosi ae o loo faatagaina lona faaaogāina ma le onomea, i le faapea mai o ʻē onanā e lē fai ma o latou tofi le malo o le Atua.’ (1 Korinito 6:9, 10)  Ae peitai, atonu e toatele talavou e fai mai latou te faaaogāina ma le onomea le mariuana, ma e lē taitai ona oo atu i le mamao e maua mai ai iʻuga tali tutusa i le onā. Peitai, e ese le mariuana mai le ava. E mafai e lou tino ona faaliliuina le ava e fai ma “mea tafuafi” e mafai ona e “susunuina” i ou aano. O se meaʻai. Ae lē mafai ona faaaogāina e lou tino le mariuana. E lē gata i lena, e lē tumau ona iai le ava i le tino po o sela o le faiʻai mo ni taimi umi. E aveesea mai le tino i totonu o ni nai itula. Ae peitai, o le mea oona o loo i le mariuana, e lē vave aveesea mai, ma e maua ai iʻuga leaga i le tino. Sa faamalamalamaina mai e ni fomaʻi e toʻaono mai le Kolisi o Iunivesite a Fomaʻi Tau Vailaau ma Fomaʻi Tipitipi i Kolomepia, i se tusi i le faatonu o le New York Times:

“O loo iai i le mariuana le mea oona . . . lea e na o le gaʻo lava e liusuavai ai ma teuina i aano o le tino, o loo aofia ai le faiʻai, mo le faitau vaiaso ma le faitau masina, e pei o le DDT. O le tele e teuina ai e aano o le tino nei mea oona e uiga ese lona tele​—lea ua faamatalaina ai iʻuga leaga e leʻi faatalitalia e iʻu i ai tagata ulaula ua latou faia ma masani. E lē mafai ona saoloto mai vailaau faasaina so o se tasi o loo faaaogāina nei mea oona e sili atu i le faatasi i se vaiaso.”

²⁴ O lea ua faavasegaina ai e Dr. Robert Heath o le Iunivesite i Tulane le faatusaina o le ava i le maruiana faapea o se mea “valea tele.” Ua ia taʻua faapea o le ava e iai “se iʻuga e lē tumau e iʻu i ai. O le mariuana e lavelave faatasi ai ma ona iʻuga e tumau pea.” Ma le mautinoa, e oo lava i le faaaogāina ma le onomea o le mariuana e mafai ona iai ni ona iʻuga leaga, e pei ona matauina ai e le Free Press a Detroit e faapea: “O loo lipotia mai e tagata suesue tau vailaau ni mea fou ua maua lea ua faailoa mai ai faapea o le mariuana​—ma lona uso matua o [hashish]​—e mataʻutia tele i le soifua malōlōina faaletino ma le faalemafaufau pe a faaaogāina e lē aunoa, e tusa lava pe faatasi pe faalua i se vaiaso.”

²⁵ E moni, e mafai ona tatou faafetai tele mo mataupu silisili e taʻitaʻiina ai ua tuuina mai ia i tatou e Lē na Foafoaina i tatou. E alofa o ia ia i tatou, ma o le mafuaaga lena ua uunaia ai i tatou ina ia alofia mea o le a faaleagaina ai o tatou tino ma faapea ona faamanuʻaina ai i tatou, na i lo le saosaolaumea i lo tatou fiafia tumau ma le soifua malōlōina lelei. E mafai e nisi o vailaau ona manuia ai se tagata o lē o loo gasegase, ae mafai ona na ona faaleagaina ai i latou o ē liliu atu i ai ona o le manao mo le faafiafiaina ai. O vailaau e lē o le ki lea i le olaga moni.

Pe o le a avea le mafuaaga faapea e faitau miliona tagata matutua o loo ulaula, e faapogai ai foi ona e ulaula oe?

[Faamatalaga pito i lalo]

[Fesili mo le Suʻesuʻega]

 [Ata Atoa i le itulau 108]

[Ata i le itulau 113]

Pe o le a avea le mafuaaga faapea e faitau miliona tagata matutua o loo ulaula, e faapogai ai foi ona e ulaula oe?