Lesona 12

Faaalia o le Faaaloalo mo le Ola ma le Toto

E ao faapefea ona tatou manatu i le ola? (1) le faapaʻūtama (1)

E faapefea ona faaalia e Kerisiano o loo latou magafagafa mo le saogalemu? (2)

Pe e sese pe a tape meaola? (3)

O ā nisi o faiga e faaalia ai le lē faaaloalo mo le ola? (4)

O le ā le tulafono a le Atua e faatatau i le toto? (5)

Pe e aofia ai i lenei mea ia tuigā toto? (6)

1. O Ieova o le Puna o le ola. E nofo aitalafu foafoaga ola uma lava i le Atua ona o le ola. (Salamo 36:9) E paia i le Atua le ola. E oo foi lava i le ola o se pepe e lei fanau mai o i le manava o lona tinā e tāua tele ia Ieova. O le fasiotia ma le loto i ai o se pepe o tuputupu aʻe, e sese i le silafaga a le Atua.​—Esoto 21:22, 23; Salamo 127:3.

2. O Kerisiano moni e magafagafa mo le saogalemu. Latou te faamautinoaina ua saogalemu a latou taavale mo le feoai ai ma e leai ni mea e lamatia ai i o latou fale. (Teuteronome 22:8) E lē faia e auauna a le Atua se mea e lamatia ai o latou ola, ona e faapea e maua ai le fiafia pe faagaeetia ai foi. O lea, latou te lē auai i ni taaloga o faia ai ni faiga sauā e faamanuʻalia ai ma le loto i ai isi tagata. Latou te alofiaina faafiafiaga e faapea ona uunaia ai faiga sauā.​—Salamo 11:5; Ioane 13:35.

 3. E paia foi i Lē na Foafoaina Mea le ola o se meaola. E mafai e se Kerisiano ona tapeina meaola mo meaʻai ma lavalava pe ina ia puipuia ai foi o ia mai faamaʻi ma lamatiaga. (Kenese 3:21; 9:3; Esoto 21:28) Ae o se mea sese le faasaunoa i meaola po o le tapeina foi o i latou ona o ni taaloga pe ia maua ai foi se fiafiaga.​—Faataoto 12:10.

4. O le ulaula ma le lamuina o le fua o le betel nut, ma le faaaogaina o vailaau faasāina ia maua ai le fiafiaga, e lē tatau mo Kerisiano. O nei faiga e sese auā (1) e mafai ona faapologaina ai i latou e na mea, (2) e faaleagaina ai o tatou tino, ma (3) e lē mamā. (Roma 6:19; 12:1; 2 Korinito 7:1) E mafai ona faigata tele ona lafoai nei masaniga leaga. Ae e tatau lava ona tatou lafoaiina ina ia faafiafia ai Ieova.

5. E paia foi le toto i le silafaga a le Atua. Ua fetalai mai le Atua o le solu, po o le ola, o loo i le toto lea. E sese ai la le ʻaina o le toto. E sese foi le ʻaiina o le aano o le manu e lei lelei ona faaaluina ese le toto. Pe afai e titina se manu po o le pe i se mailei, e lē tatau ona ʻaiina. Pe afai e veloina i se tao po o le fanaina foi, e tatau ona vave faaaluina ese lona toto pe afai o le a faaaogaina mo meaʻai.​—Kenese 9:3, 4; Levitiko 17:13, 14; Galuega 15:28, 29.

6. Pe o se mea sese ea le taliaina o se tuigā toto? Ia manatua, ua faapea mai le tulafono a Ieova e tatau ona tatou taumamao mai le toto. O le uiga o lenei mea, e lē tatau ona tatou taliaina i totonu o o tatou tino e ala atu i so o se ituaiga faiga lava, le toto o isi tagata pe oo foi i o tatou lava toto ia sa tuieseina ma teuina. (Galuega 21:25) O lea la, e lē taliaina e Kerisiano moni se tuigā toto. E latou te taliaina isi ituaiga o togafitiga faafomaʻi, e pei o le tuiina atu o vailaau e lē o ni toto. E mananao i latou e ola, ae latou te lē taumafai e faasaoina o latou ola e ala lea i le solia ai o tulafono a le Atua.​—Mataio 16:25.

[Ata i le itulau 25]

Ina ia faafiafia le Atua, e tatau ona tatou teena tuigā toto, o amio ua fai ma masani e lē mamā, ma nisi tulaga e ono faapuupuuina ai le ola