Lesona 15

Fesoasoani i Isi ia Latou Faia le Finagalo o le Atua

Aisea e taʻu atu ai i isi mea o loo e aʻoaʻoina? (1)

O ai nisi e mafai ona e tufa atu i ai le tala lelei? (2)

O le ā le āuga o lau amio i isi? (2)

O le ā le taimi e mafai ai ona e talaʻi faatasi ma le faapotopotoga? (3)

1. E oo mai i lenei taimi, ua tele ni mea lelei ua e aʻoaʻoina mai le Tusi Paia. E tatau i lenei poto ona taʻitaʻiina ai oe e atiina aʻe se uiga totino faa-Kerisiano. (Efeso 4:22-24) E tāua tele lena poto mo oe ina ia mafai ai ona e mauaina le ola e faavavau. (Ioane 17:3) E ui i lea, o loo manaomia foi ona faalogo atu isi i le tala lelei ina ia mafai foi e i latou ona faaolaina. O Kerisiano moni uma lava e tatau ona talaʻi atu i isi. O se poloaiga lea mai le Atua.​—Roma 10:10; 1 Korinito 9:16; 1 Timoteo 4:16.

2. E mafai ona e amata talaʻi e ala lea i lou tufaina atu o mea lelei o loo e aʻoaʻoina i isi o latalata ane ia te oe. Taʻu na mea i lou aiga, o uo, o ē tou te aʻooga faatasi, ma faigaluega faatasi. Ia agalelei ma onosai a o e faia faapea. (2 Timoteo 2:24, 25) Ia manatua, e masani ona mātauina e tagata amio a se tasi nai lo le faalogo mai i mea o loo ia fai atu ai. O lea, e mafai e lau amio ona faatosina mai isi ina ia faalogo i le feau o loo e taʻuina atu ia i latou.​—Mataio 5:16; 1 Peteru 3:1, 2, 16.

3. O le a iai le taimi e te agavaa ai e amata ona e talaʻi faatasi ma le faapotopotoga o Molimau a Ieova o i lou lava vaipanoa. O se laasaga tāua lea i lou agaʻi i luma. (Mataio 24:14) Maeu se olioli o le a iai pe afai o le a mafai ona e fesoasoani i se isi tagata e avea o se auauna a Ieova ma maua le ola e faavavau!​—1 Tesalonia 2:19, 20.