Lesona 14

Le Auala o Loo Faamaopoopo ai Molimau a Ieova

O anafea na afua mai ai le amataga faaonaponei o Molimau a Ieova? (1)

E faapefea ona faia sauniga a Molimau a Ieova? (2)

O faapefea ona totogia tupe faaalu? (3)

O ai e taʻimua i faapotopotoga taitasi? (4)

O ā faatasiga tetele o faia i tausaga taitasi? (5)

O le ā le galuega o faia i o latou ofisa ulu ma ofisa o lālā? (6)

1. Na afua mai le amataga faaonaponei o Molimau a Ieova i vaitausaga e amata mai i le 1870. I le amataga, na taʻua i latou o Tagata Aʻoga o le Tusi Paia. Ae i le 1931, na latou taliaina ai le igoa faale-Tusi Paia o Molimau a Ieova. (Isaia 43:10) E mai ni amataga faatauvaa, ua tupu aʻe nei le faalapotopotoga i le faitau miliona o Molimau, o ē o loo pisi i le talaʻiga i le silia ma le 230 atunuu.

2. O le tele lava o faapotopotoga o Molimau a Ieova e faia a latou sauniga e faatolu i vaiaso taitasi. Ua valaauliaina oe ina ia faatasi atu i se tasi o na sauniga. (Eperu 10:24, 25) Ua fai le Tusi Paia ma faavae autū o mea o aʻoaʻoina ai. E amata ma faaiu ia sauniga i le tatalo. O le tele lava o ia sauniga o loo usuina ai “pese faaleagaga” e sau mai le loto. (Efeso 5:18, 19) E ulufua, ma e leai ni peleti e aoina.​—Mataio 10:8.

3. O le tele lava o faapotopotoga e faia a latou sauniga i se Maota o le Malo. O ni fale e faigofie lo latou fausaga na fausiaina e Molimau tauofo. O le a e lē vaaia ai ni faatusa, koluse, po o ni mea tai faapena i le Maota o le Malo. O tupe faaalu ua totogia lea e ala i meaalofa tauofo. O loo iai se pusa mo meaalofa mo i  latou e mananao e fia fai se foai.​—2 Korinito 9:7.

4. I faapotopotoga taitasi uma lava, o loo iai toeaina po o ovasia. E taʻimua i latou i le aʻoaʻo atu i le faapotopotoga. (1 Timoteo 3:1-7; 5:17) E fesoasoani atu i ai auauna o le faiva ia i latou. (1 Timoteo 3:8-10, 12, 13) E lē o faasilia aʻe nei tane e tāua atu i lo isi uma o le faapotopotoga. (2 Korinito 1:24) E lē o tuuina atu foi ia i latou ni tofi faapitoa. (Mataio 23:8-10) E lē faaesea foi ni ofu e oofu ai i latou nai lo isi. E faapena foi ona lē o totogia i latou mo galuega o latou faia. E naunau toeaina mai i o latou loto e tausia manaoga faaleagaga o le faapotopotoga. E mafai ona latou tuuina atu le faamafanafanaga ma le taʻitaʻiga i taimi o faalavelave.​—Iakopo 5:14-16; 1 Peteru 5:2, 3.

5. E faia foi e Molimau a Ieova fonotaga po o tauaofiaga tetele i tausaga taitasi. O taimi na, e faapotopoto ai le tele o faapotopotoga mo se polokalame faapitoa o faatonuga mai le Tusi Paia. O le papatisoina o soo fou o se vaega e faia pea e lē aunoa i fonotaga po o tauaofiaga taitasi.​—Mataio 3:13-17; 28:19, 20.

6. O le ofisa ulu o Molimau a Ieova o loo iai lea i Niu Ioka. O loo iai foi iina le Vaega Pule, o se vaega tutotonu o toeaina ua lava le potomasani o ē o gafa ma le vaaia o faapotopotoga i le lalolagi atoa. O loo iai foi ofisa o lālā e silia ma le 100 i le lalolagi atoa. O loo fesoasoani ai ē e tauofo i na nofoaga e lolomia ma auina mai lomiga faale-Tusi Paia. Ua tuuina mai ai foi iina taʻiala auā le faamaopoopoina o le galuega talaʻi. Aisea e lē fuafua ai e te asiasi atu i se lālā o pito latalata ane ia te oe?