Lesona 3

O Ai Iesu Keriso?

Aisea ua taʻua ai Iesu o le Atalii “ulumatua” o le Atua? (1)

Aisea ua taʻua ai o ia o “le Upu”? (1)

Aisea na maliu mai ai Iesu i le lalolagi o se tagata? (2-4)

Aisea na ia faia ai vavega? (5)

O le ā e lē o toe mamao ona faia lea e Iesu i le lumanai? (6)

1. Na soifua Iesu i le lagi o se peresona agaga a o lei afio mai i le lalolagi. Na avea o ia ma uluai foafoaga a le Atua, ma ua taʻua ai o ia o le Atalii “ulumatua” o le Atua. (Kolose 1:15; Faaaliga 3:14) Ua na o Iesu lava le Atalii na foafoaina e le Atua lava ia. Na faaaogā e Ieova ia Iesu a o lei avea ma tagata, e fai ma ana “tufuga” i le foafoaina o isi mea uma lava i le lagi ma le lalolagi. (Faataoto 8:22-31; Kolose 1:16, 17) Na faaaogā foi e le Atua o ia e avea ma Ana fofoga fetalai sili. O le pogai lena ua taʻua ai Iesu o “le Upu.”​—Ioane 1:1-3; Faaaliga 19:13.

2. Na auina mai e le Atua Lona Alo i le lalolagi e ala i le faaliliuina mai o lona ola i le manava o Maria. Sa leai la se tamā faaletagata o Iesu. O le mafuaaga lena na lē tuufaasolo atu ai ia te ia se agasala po o se lē lelei atoatoa. Na aauina mai Iesu e le Atua i le lalolagi mo mafuaaga e tolu: (1) Ia aʻoaʻo i tatou i le upu moni e uiga i le Atua (Ioane 18:37), (2) ia tausisia le faamaoni lelei atoatoa, ua saunia ai se faaaʻoaʻo mo i tatou e mulimuli ai (1 Peteru 2:21), ma (3) ia faataulagaina lona ola ina ia faasaʻolotoina ai i tatou mai le agasala ma le oti. Aisea na manaomia ai lenei mea?​—Mataio 20:28.

3. I le lē usiusitai atu i le faatonuga a le Atua, na faia ai e le uluai tagata o Atamu le mea ua taʻua e le Tusi Paia o le “agasala.” Ona faasalaina ai lea o ia e le Atua i le oti. (Kenese 3:17-19) Na lē toe ausia ai e ia tapulaa a le Atua, o lea na lē toe lelei atoatoa ai o ia. Na faifai mālie atu ina matua o ia ma iu ina oti. Na tuufaasolo mai e Atamu le agasala i lana fanau uma lava. O le mafuaaga lena ua tatou ola matutua ai foi, mamaʻi, ma maliliu ai. E mafai faapefea  ona laveaiina le tagata?​—Roma 3:23; 5:12.

4. Na avea Iesu o se tagata lelei atoatoa e pei lava o Atamu. E ui i lea, sa lē pei Iesu o Atamu, auā sa atoatoa lelei lona usiusitai atu i le Atua e oo lava i le tofotofoga e sili ona faigata. O lea la, na mafai ai ona ia faataulagaina lona soifua lelei atoatoa faaletagata ina ia totogia ai le agasala a Atamu. O le mea lena o loo taʻua i le Tusi Paia o le “togiola.” Ua mafai ai la ona faasaʻolotoina le fanau a Atamu mai le faasalaga o le oti. O i latou uma e faatuatua atu ia Iesu e mafai ona faamagaloina a latou agasala ma mauaina le ola e faavavau.​—1 Timoteo 2:5, 6; Ioane 3:16; Roma 5:18, 19.

5. A o iai i le lalolagi, na faamālōlōina ai e Iesu ē na mamaʻi, fafaga i ē na fia aai, ma faatoafilemuina matagi malolosi. Na ia faatutūina foi ē na oti. Aisea na ia faia ai vavega? (1) Na mutimutivale lona alofa i tagata o ē na puapuagatia, ma na manao o ia e fesoasoani atu ia i latou. (2) O ana vavega na faamaonia ai o ia o le Alo o le Atua. (3) Ua faailoa mai ai mea o le a ia faia mo tagata usiusitai pe a pule o ia o se Tupu i le lalolagi atoa.​—Mataio 14:14; Mareko 2:10-12; Ioane 5:28, 29.

6. Na maliu Iesu ma na toe faatūina aʻe e le Atua e avea o se foafoaga agaga, ma toe foi atu ai o ia i le lagi. (1 Peteru 3:18) I se taimi mulimuli ane ai, ona fai ai lea o ia ma Tupu e le Atua. E lē o toe umi ae aveesea e Iesu amioleaga uma ma puapuaga mai lenei lalolagi.​—Salamo 37:9-11; Faataoto 2:21, 22.

[Ata i le itulau 7]

O le faiva a Iesu na aofia ai le aʻoaʻo atu, le faia o vavega, ma le ofoina atu o lona soifua mo i tatou