Lesona 5

O le ā le Fuafuaga a le Atua mo le Lalolagi?

Aisea na foafoaina ai e Ieova le lalolagi? (1, 2)

Aisea ua lē o avea ai le lalolagi o se parataiso i le taimi nei? (3)

O le ā o le a tupu i tagata amioleaga? (4)

O le ā o le a faia e Iesu i le lumanai i ē o mamaʻi? i ē ua matutua? i ē ua maliliu? (5, 6)

Ina ia mauaina faamanuiaga i le lumanai, o le ā e manaomia ona e faia? (7)

1. Na foafoaina e Ieova lenei lalolagi ina ia mafai ona ola olioli ai tagata e faavavau. Na finagalo o ia ina ia aināina pea le lalolagi e tagata amiotonu ma le fiafia. (Salamo 115:16; Isaia 45:18) O le a lē faaumatiaina lava le lalolagi; o le a tumau e faavavau.—Salamo 104:5; Failauga 1:4.

2. A o lei faia e le Atua le tagata, sa Ia filifilia se vaega laitiiti o le lalolagi ma faia o se parataiso matagofie. Na ia faaigoaina o le faatoaga i Etena. O iina na ia tuuina atu i ai le uluai tamaloa ma le fafine, o Atamu ma Eva. Na fuafuaina e le Atua e fai se la fanau ma faatumulia ai le lalolagi uma. Ma o le a faasolo mālie atu ai lava ona latou faia le lalolagi atoa o se parataiso.—Kenese 1:28; 2:8, 15.

3. Na agasala Atamu ma Eva i lo la solia ma le loto i ai o le tulafono a le Atua. O lea na tulia ai i laua e Ieova mai le faatoaga o Etena. Na leiloa ai iina le parataiso. (Kenese 3:1-6, 23) Ae sa lei faagaloina e Ieova lana fuafuaga mo lenei lalolagi. Ua ia folafolaina mai lona faia e avea o se parataiso, o iina o le a nonofo ai e faavavau tagata. O le a faapefea ona ia faia lenei mea?—Salamo 37:29.

4. A o lei avea lenei lalolagi ma parataiso, e tatau ona liaieseina tagata amioleaga. (Salamo 37:38) O le a tupu lenei mea ia Amaketo, o le taua lea a le Atua e faaiuina ai le amioleaga. Ona sosoo ai lea ma le saisaitia o Satani mo le 1,000 tausaga. O le uiga o lenei mea o le a lē toe iai ni tagata amioleaga e totoe e faaleagaina le lalolagi. E na o tagata lava o le Atua o le a faasaoina.—Faaaliga 16:14, 16; 20:1-3.

5. Ona pule mai ai lea o Iesu Keriso o se  Tupu i lenei lalolagi mo le 1,000 tausaga. (Faaaliga 20:6) O le a faasolosolo mālie ona ia aveesea atoatoa le agasala mai i o tatou mafaufau ma tino. O le a avea i tatou ma tagata lelei atoatoa e pei ona sa iai Atamu ma Eva a o lei agasala. Ona lē toe iai loa lea o le maʻi, olaga matua, ma le oti. O le a faamālōlōina ē o mamaʻi, ma o tagata matutua o le a toe talavou.—Iopu 33:25; Isaia 33:24; Faaaliga 21:3, 4.

6. I le vaitaimi o le Pulega o le Afe Tausaga a Iesu, o le a galulue ai tagata faamaoni ina ia faia le lalolagi o se parataiso. (Luka 23:43) E lē gata i lea, e faitau miliona ē ua maliliu o le a toe faatutūina mai i le olaga faaletagata i le lalolagi. (Galuega 24:15) Pe afai latou te faia le mea e manaomia e le Atua mai ia i latou, o le a faaauau la ona ola e faavavau i latou i le lalolagi. Afai latou te lē faia faapea, o le a faaumatia i latou e faavavau.—Ioane 5:28, 29; Faaaliga 20:11-15.

7. O le a faapea ona faataulauina ai le uluai fuafuaga a le Atua mo le lalolagi. Pe e te fia mauaina nei faamanuiaga i le lumanai? Afai o lea, e ao ona faaauau ona e aʻoaʻo e uiga ia Ieova ma usiusitai i mea o ia finagalo i ai. O le faatasi atu i sauniga i le Maota o le Malo o Molimau a Ieova o i lou nuu o le a fesoasoani lea ia te oe e faia faapea.—Isaia 11:9; Eperu 10:24, 25.

[Ata i le itulau 10]

Ua leiloa le parataiso

[Ata i le itulau 11]

Pe a mavae Amaketo, o le a toe faia le lalolagi o se parataiso