Toto—E Tāua mo le Ola

E mafai faapefea e le toto ona faasaoina lou ola? E manino lava, e ao i lenei itu ona e malamalama i ai auā o loo fesootai le toto ma lou ola. O le toto na te tauavea le okesene i lou tino uma, e aveesea le carbon dioxide (kasa kaponi), e fesoasoani ia te oe e faamasani i suiga o le vevela po o le mālūlū, ma lagolago i lau tauiviga e tetee ai i faama‘i.

O le sootaga o le ola ma le toto na faia lava anamuā a o lei lomia le ata e William Harvey, i le faiga o le taamilosaga o le toto i le 1628. O mataupu silisili faavae tau i amioga tatau a lotu tetele ua taulai atu lava i se Foai Ola, o lē na faailoa maia lona finagalo e uiga i le ola, faapena foi i le toto. Na faapea mai se loia Kerisiano Iutaia e uiga ia te ia: “O loo foai mai e ia i tagata uma le ola ma le mānava ma mea uma lava. Auā e ala ia te ia ua tatou maua ai le ola ma gaoioi ma iai.” *

O tagata la o ē talitonu i lea Foai Ola, e faatuatua faapea, o ana faatonuga e mo lo tatou lelei tumau. Na faamatalaina e se perofeta Eperu o ia o Lē “o loo a‘oa‘o ia te oe i mea e aoga, o loo ta‘ita‘iina oe i le ala e te ui ai.”

O lena faamautinoaga i le Isaia 48:17, o se vaega o le Tusi Paia, se tusi ua aloaia mo mea tāua i amioga e tatau, lea e mafai ona aogā ia i tatou uma. O le ā le mea ua fai mai ai e uiga i le faaaogaina e tagata o le toto? Po o faaalia mai ai ea se auala e mafai ai e le toto ona faasaoina le ola? O le mea moni, ua faaalia manino mai e le Tusi Paia e faapea, o le toto ua lē na o se suavai lavelave o loo ola ai meaola. E sili atu i le 400 taimi o loo ta‘ua ai le toto, ma o nisi o nei mau o loo aofia ai faamatalaga e uiga i le faasaoina o le ola.

I se faamatalaga ua leva, na folafola mai ai e Lē na Foafoaina Mea e faapea: “O mea uma e ola ma feoai o le a fai ia ma mea‘ai mo outou. . . . Peitai, aua lava tou te ‘aai i aano o manu o loo iai pea lona toto ola.” Na ia toe faaopoopo mai e faapea: “A o lo outou toto ola, o le a mautinoa ona ou taui atu i ai,” ona ia faasāina ai lea o le fasioti tagata. (Kenese 9:3-6, New International Version) O lana fetalaiga lena ia Noa, o se tuaa o tagata uma, o lē sa matuā faaaloalogia e tagata Iutaia, Musalimi, ma Kerisiano. Sa faailoaina ai la i tagata uma le silafaga a Lē na Foafoaina Mea e faapea, o le toto ua fai ma sui o le ola. E iai sona uiga e tāua atu nai lo le tau ina avea o se tulafono mo mea taumafa ua faatonuina. E manino lava sa aafia ai se mataupu silisili tauamio. O le toto o le tagata e matuā tāua lona uiga, ma e lē tatau lava ona faaaogaseseina. Mulimuli ane, ona faaopoopo atu lea e Lē na Foafoaina Mea auiliiliga ia e mafai ai ona faigofie la tatou vaai i mataupu o amio tatau ua ia faafesootaia ma le toto ola.

Na ia toe faasino atu foi i le toto ina ua ia tuuina atu le Tulafono ia Isaraelu anamua. E ui lava e aloaia e le toatele o tagata le atamai ma faatulagaga o amioga tatau i na tulafono, ae toaitiiti lava ua latou iloaina ona tulafono matuia e uiga i le  toto. E pei o se faata‘ita‘iga: “Ai se tagata foi o sa Isaraelū, po o so o se tagata ese ua āumau ia te i latou, na te ‘aina sina toto lava; ou te fai mo‘u fili lea tagata na te ‘aina le toto, ma ou vavae ese ia te ia i lona nuu. Auā o i le toto le ola o le tino.” (Levitiko 17:10, 11) * Ona faamatala atu lea e le Atua o le mea e ao ona faia e se tagata tulimanu i le toto o se manu ua mate, e faapea: “Ia faamasaaina lava e ia lona toto, ma ufiufi ai i le eleele. . . . Aua tou te aai i le toto o se mea ola; auā o le ola o mea uma o lo latou toto lava lea; ai se ‘ai ai, e vavaeeseina o ia.”—Levitiko 17:13, 14.

Ua iloa nei e saienitisi, sa faamalosia e le Tulafono faa-Iutaia le soifua maloloina lelei. O se faaaoaoga, na faatonu e le tulafono tagata ia ō i tuāpa o le toagalauapi mo le lafoaia o o latou otaotavale ma tanu, ma e sā ona ‘aiina e tagata aano o manu o loo sili ona masalomia le iai o ni faama‘i. (Levitiko 11:4-8, 13; 17:15; Teuteronome 23:12, 13) A o aafia i le tulafono e uiga i le toto itu tau i le soifua maloloina, e tele lava nisi mea sa aafia ai. O le toto sa iai sona uiga faafaatusa. Ua faauiga i le ola lea na foaiina mai e Lē na Foafoaina Mea. O le amanaia o le toto o se mea faapitoa, ua faaalia ai le faalagolago o tagata i Lē na Foafoaina Mea mo le ola. Ioe, o le mafuaaga autū lena sa ao ai ona latou lē ‘aiina le toto, e lē faapea ona e leaga mo le soifua maloloina, peitai, sa iai sona uiga faapitoa i le Atua.

Ua ta‘ua pea lava pea e le Tulafono le faasāina e Lē na Foafoaina Mea o le aveina o le toto i totonu o le tino ina ia faatumauina ai le ola. “Aua e te ‘ai ai [i le toto]; e te sasaaina lea i le eleele e pei o le suāvai. E te le ‘ai ai lava; ina ia manuia ai oe ma au fanau pe a mavae atu oe, pe a e faia le mea tonu i luma o Ieova.”—Teuteronome 12:23-25, 15:23; Levitiko 7:26, 27; Esekielu 33:25. *

I le feteenai ma le auala o loo manatu ai nisi i aso nei, e lē tatau ona faaleamanaiaina le tulafono a le Atua i le toto ona ua tulai mai se faalavelave faafuasei. I le taimi faigata o se taua, na fasia ai e nisi o fitafita Isaraelu ni manu, “ona aai ai lea e le nuu ma le toto.” Ona o lenei tulaga faafuasei, pe sa faataga ai ea i latou e faatumauina o latou ola i le toto? E leai. Na faasino atu e lo latou ta‘ita‘i‘au e faapea,  sa matuia pea le sese o lo latou ala. (1 Samuelu 14:31-35) O lea, e ui lava e tāua tele le ola, ae sa lē taitai ai ona fetalai mai lo tatou Foai Ola e faapea, e mafai ona faaleamanaiaina ana tapulaa ona o se faalavelave faafuasei.

LE TOTO MA KERISIANO MONI

O le ā le tali a le Faa-Kerisiano i le fesili o le faasaoina o le ola faaletagata i le toto?

Sa avea Iesu o se tagata faamaoni a‘ia‘i, lea na ala ai ona matuā aloaia o ia. Na ia silafia sa fetalai mai Lē na Foafoaina Mea, o le aveina o le toto i totonu o le tino e sese, ma o loo faamausalīina pea lenei tulafono. O lea la, o loo iai se mafuaaga lelei e talitonu ai, sa tausisia pea e Iesu le tulafono e uiga i le toto, e tusa pe sa oo ai ia te ia omiga ina ia lē faia faapea. O Iesu na “lē agasala lava, na le iloa foi se pepelo i lona fofoga.” (1 Peteru 2:22) Sa ia faataatia ai la se faaaoaoga mo ona so‘o, o loo aofia ai ma se faaaoaoga o le faaaloalo mo le ola ma le toto. (Mulimuli ane, o le a tatou iloiloina le auala na aofia ai le toto o Iesu lava ia i lenei mataupu tāua o loo aafia ai ma lou ola.)

Mātau le mea na tupu, ina ua mavae tausaga e tele talu mai le maliu o Iesu, na tupu a‘e ai se fesili e faapea, pe sa tatau i lē ua avea ma Kerisiano ona tausia uma tulafono a Isaraelu. O lenei mea na talanoaina i se fono a le vaega pule o Kerisiano, lea na aofia ai le ‘au aposetolo. Na faasino atu e le ‘afa uso o Iesu o Iakopo i tusitusiga o loo iai poloaiga e uiga i le toto lea na faamatala atu ia Noa ma le nuu o Isaraelu. Pe o na ea tulafono e tatau ona tausisia e Kerisiano?—Galuega 15:1-21.

Na aauina atu e lena fono la latou faaiuga i faapotopotoga uma e faapea: E lē manaomia e Kerisiano ona tausia le tulafono lea na tuuina atu ia Mose, peitai, e “tatau” mo i latou “ia faamamao . . . i mea e fasia mo tupua, ma le toto, ma mea titina, [aano o manu e lei faaaluina le toto], ma le faitaaga.” (Galuega 15:22-29) Sa lei tuuina atu e le ‘au aposetolo na o sina sauniga faalotu po o se tulafono e uiga i mea taumafa. O le poloaiga na faataatia ai uiga faavae o amioga tatau ia na tausisi i ai Kerisiano anamua. Pe tusa ma le sefulu ni tausaga mulimuli ane ai, na latou ta‘utino mai, sa ao pea ona taumamao “i latou i taulaga i tupua, ma le toto . . . ma le faitaaga.”—Galuega 21:25.

Ua e silafia e faitau miliona tagata o loo auai i lotu. O le toatele o i latou e lē taumate e ioe, o amioga e tatau mo Kerisiano e aafia ai le lē tuuina atu o le tapuaiga i tupua, ma ia lē auai foi i amioga matagā e sili le leaga. E ui i lea, e aogā lo tatou matauina e faapea, na tuuina e le ‘au aposetolo le taumamao mai le toto i le tulaga maualuga tauamio lava lea e tasi, e pei o le taumamao mai na amioga. Na faaiuina la latou poloaiga i le faapea mai: “Afai tou te taumamao ma nei mea, e lelei ai outou. Ia outou manuia.”—Galuega 15:29.

Ua leva ona malamalama i ai o loo faamausalīina le poloaiga faaaposetolo. Ua ta‘u mai e Eusebius e faatatau i se fafine talavou sa iai i le vaitaimi e lata i le faaiuga o le senituri lona lua, o lē a o lei oti i faiga e sili ona faataugā, na ia aumaia le manatu e faapea, o Kerisiano “e lē faatagaina ona ‘aai i le toto e oo lava i le toto o manu e leai ni mafaufau.” Sa ia lē faatinoina sana aiā e filifili ai i le oti. Sa manao o ia ina ia ola, ae sa lē faagutugutulua o ia i ana mataupu silisili. Pe e te lē aloaia ea i latou o ē e faalaualugaina lo latou talitonuga i mataupu silisili i luga a‘e o lo latou manuia totino?

O le faaiuga a le saienitisi o Joseph Priestley e faapea: “O le faasasaaga ina ia lē ‘aiina le toto, na tuuina atu ia Noa, e aliali mai e manaomia ona tausia e i latou uma e tupuga mai ia te ia . . . Afai tatou te faamatalaina [le] faasasaaga a le ‘au aposetolo e ala i le faiga a Kerisiano anamua, o ē e lē mafai ona faapea i ai sa lē malamalama i le uiga moni ma le loloto o iai, e pau le faaiuga tatou te oo i ai e faapea, sa fuafuaina lava lea faasasaaga ina ia mautinoa atoatoa ma faavavau; auā sa lē ‘aiina le toto e so o se Kerisiano mo le tele o senituri.”

 AE Ā LE FAAAOGAINA O LE TOTO I TOGAFITIGA FAAFOMA‘I?

Po o le faasasaaga ea faale-Tusi Paia o le toto e aofia ai le faaaogaina faafoma‘i, e pei o tuigā toto, lea e mautinoa lava sa lei iloaina i aso o Noa, Mose, po o le ‘au aposetolo?

E ui lava i togafitiga faaonaponei o loo faaaogaina ai le toto sa lei alia‘e i tuā iina, ae o le faaaogaina faafoma‘i o le toto e lē o se mea fou nei. Mo le 2,000 tausaga i Aikupito ma isi nofoaga, ‘sa manatu ai i le toto o tagata o se vaifofo silisili mo le lepela.’ Sa faailoa mai e se foma‘i le togafiti na tuuina atu i le alo o le tupu o Esarata ina ua oo le atunuu o Asuria i le tafa na taulamua ai i atina‘e i mea faasaienisi e faapea: “[O le aloalii] o loo manuia lelei lava; ia fiafia lo‘u alii e, le tupu. E amata i le aso lona 22 ona ou tuuina ia te (ia) le toto e inu ai, o le a ia inuina mo aso e 3. Mo isi aso e 3, o le a ou tuuina (ia te ia le toto) mo le faaaogaina i totonu o lona tino.” Sa iai ni feutagaiga a Esarata ma tagata Isaraelu. Peitai ane, ona sa ia Isaraelu le Tulafono a le Atua, sa lē taitai ona latou inumia le toto e fai ma togafitiga faafoma‘i.

Pe sa faaaogaina le toto e fai ma togafitiga faafoma‘i i aso o Roma? O le tagata poto faapitoa i meafaiola o Pliny (o sē na ola i taimi o le ‘au aposetolo) ma le foma‘i o le lona lua o senituri o Aretaeus, ua la lipotia mai e faapea, sa faaaogā toto o tagata e togafitia ai le ma‘i māliu. Na tusia mulimuli ane e Tetuliano e faapea: “Manatunatu ia i latou o ē na matapeapea i le fia inumia o le toto faato‘ā maligi o tagata solitulafono amioleaga i faaaliga i le malae o mataaga . . . latou te aveina le toto e faamālōlō ai o latou ma‘i māliu.” Sa na faaesea i latou mai Kerisiano, o ē “e oo lava i le toto o manu sa lē iai i a [latou] taumafataga . . . I faamasinoga o Kerisiano, tou te ofoina ia i latou sosisi e fai i le toto. O le mea moni, ua outou mautinoa e faasaina e la latou tulafono.” O lea, sa sili i Kerisiano anamua le lamatia o o latou ola i le oti nai lo le ‘aiina o le toto.

Ua lipotia e le tusi Flesh and Blood e faapea: “O le toto i lona tulaga masani i aso uma sa lei . . . tuuesea mai le avea o se vaega e fai a‘i togafitiga faafoma‘i ma faiga faataulaitu. O se faaaoaoga, i le 1483, na vaivai ai Louis XI o Falani o le a oti. ‘Sa faasolo ina mafatia atili i aso taitasi, ma sa lē aogā ia te ia vailaau, e ui o se togafitiga e lē masani ai; auā sa malosi lona faamoemoe e toe maua sona soifua laulelei i toto o tagata ia na ia inuina mai toto o nisi tamaiti.’”

Ae ā le tuiina o le toto? O faiga sa faataitaia ai lenei itu na amata e lata i le amataga o le 16 senituri. Na tetee mai Thomas Bartholin (1616-1680), o le polofesa o mea tau i le tino o le tagata i le Iunivesite o Copenhagen e faapea: ‘O i latou o ē na faamalosia le faaaogaina o le toto o tagata mo togafitiga o faama‘i i totonu o le tino, e aliali mai ua faaaogā sese le toto ma ua agasala mamafa ai. Ua faasaina le ‘ai tagata. Aisea tatou te lē matuā inosia ai la i latou o ē ua pisipisia o latou alā‘ai i le toto o tagata? E tutusa lava ma le mauaina o le toto o se isi tagata e ui mai i se alatoto ua tipi, pe ui mai i le gutu po o mea faigaluega o loo faia ai le tuigā toto. Ua matuā tuua‘ia i latou na faavaea lenei faiga e le tulafono mai le Atua, lea ua faasaina ai le ‘aiina o le toto.’

O le mea lea, sa iloa e tagata atamamai i senituri ua mavae e faapea, e faatatauina le tulafono faale-Tusi Paia i le tuiina o le toto e ala atu i alatoto, e pei foi ona faatatau i le ‘aiina e ala atu i le gutu. Na faaiua e Bartholin e faapea: “So o se faiga lava o na auala e talia ai [le toto], e faatatau lava i le mea e tasi ma le faamoemoe e tasi, ia avea lenei toto e fafagaina ai le tino ma‘i pe ia toe malosi ai.”

O lenei vaaiga aoao atonu o le a fesoasoani ia te oe ina ia e malamalama ai i le tulaga faalelotu lē masuia ua uia e Molimau a Ieova. Latou te matuā faatāuaina le ola, ma latou te sailia foi tausiga lelei faafoma‘i. Peitai ane, ua latou filigā ina ia aua ne‘i o latou solia le tapulaa ua faataatitia e le Atua, lea ua tumau pea: O i latou o ē faaaloalo i le ola o se meaalofa mai Lē na Foafoaina Mea, e lē taumafai e faatumauina le ola e ala i le aveina o le toto i totonu o le tino.

 Ae ui i lea, mo le tele o tausaga, ua faapea soo mai, e faasaoina le ola e le toto. E mafai e foma‘i ona faamatala mai se tagata sa tugā sona tulaga ona ua tele le toto e alu, peitai, sa tuiina i ai le toto ona vave ai lea ona toe faasolo ina malosi. O lea, atonu e te tau mānatu ai, ‘Pe faapeī le atamai po o le lē atamai o lenei itu i le tulaga faafoma‘i?’ Ua ofoina mai faamaoniga faafoma‘i ina ia lagolagoina ai togafitiga e faaaogā ai le toto. O lea, o se mea e tatau mo oe le sailia mai o mea moni ina ia faia ai sau filifiliga malamalama lelei e uiga i le toto.

[Faaopoopoga i lalo]

[Pusa i le itulau 4]

‘‘O le iugafono ua faataatia mai i se faiga manino ma le sologa lelei [i le Galuega 15], ua faamatalaina atili e faapea e lē mafai ona toe lafoaia, lea ua tuuina mai e le faamaoniga malosi, i manatu o le ‘au aposetolo e faapea, sa lei avea lea o se fuafuaga lē tumau, po o se taualumaga e mafai ona toe suia.”—Le polofesa o Édouard Reuss, o le Iunivesite o Strasbourg.

[Pusa/Ata i le itulau 5]

Na faasino atu e Matini Luteru i mea o loo aofia ai i le poloaiga faaaposetolo e faapea: “O lenei, afai tatou te mananao ina ia iai se tatou lotu e faapea ona ogatasi ma lenei fono, . . . e tatau ona tatou a‘oa‘o atu ma maumaua‘i e faapea, e amata atu nei ona leai se aloalii, se alii, se tagata o le aai, po o se tagata faifaatoaga e ‘ai i kusi, aila, tia, po o se fasi puaa e kukaina faatasi ma le toto . . . Ma o tagata o le aai ma tagata faifaatoaga e tatau ona taumamao mai na mea ae maise lava mai sosisi mūmū ma sosisi toto.”

[Ē Ana le Ata]

Woodcut by Lucas Cranach

[Pusa i le itulau 6]

‘‘E silasila le Atua ma vaai tagata i mea i se malamalamaga e matuā eseese lava. O mea e aliali mai e tāua i o tatou mafaufau, e masani lava ona lē taulia i le fuafuaga a le poto e lē gata mai; ma o mea e aliali mai e faatauvaa ia i tatou, e masani lava ona matuā tele sona tāua i le Atua. O le tulaga lava lea sa iai mai le amataga.”—“An Enquiry Into the Lawfulness of Eating Blood,” (O se Iloiloga pe Faaletulafono le ‘Aiina o le Toto) Alexander Pirie, 1787.

[Ē Ana le Ata i le itulau 3]

Medicine and the Artist by Carl Zigrosser/Dover Publications

[Ata i le itulau 4]

I se fono ua iloga i talafaasolopito, na faamautuina ai e le vaega pule faa-Kerisiano e faapea, o le tulafono a le Atua i le toto o loo faamausalīina pea

[Ata i le itulau 7]

E tusa lava po o ā taunuuga mulimuli e oo i ai, na mumusu Kerisiano muamua e solia le tulafono a le Atua e uiga i le toto

[Ē Ana le Ata]

Painting by Gérôme, 1883, courtesy of Walters Art Gallery, Baltimore