1-3. (a) O le ā le avega mamafa sa tauave e le faisalamo o Tavita, ma na faapefea ona faamāfanafanaina lona loto atuatuvale na iai? (e) Pe a tatou agasala, o le ā le avega mamafa tatou te ono tauamoina, ae o le ā le faamautinoaga a Ieova iā i tatou?

 NA TUSI le faisalamo o Tavita: “Ua oo lava aʻu agasala i luga o loʻu ulu; e pei o se avega mamafa, ua mafatia ai lava aʻu. Ua ou matuā vaivai, ua ou momomo lava.” (Salamo 38:4, 8) Sa iloa e Tavita le mamafa o le tauaveina o se lotofuatiaifo o loo nofosala. Peitaʻi sa faamāfanafanaina lona loto atuatuvale. Na ia iloa lelei, e ui ina ʻinoʻino Ieova i le agasala, ae e lē ʻinoʻino o Ia i le tagata agasala pe afai e salamō moni ma tetee atu i le agasala. O le faatuatua atoatoa o Tavita i le finagalo malie o Ieova e faasafua mai lona alofa mutimutivale i ē salamō, na ia faapea mai ai: “Le Alii e, . . . e faamagalo sala.”—Salamo 86:5.

² Pe a tatou agasala, tatou te ono tauavea foʻi se avega mamafatū o se lotofuatiaifo ua ōia. E aogā le iai o lenei faalogona salamō. E uunaʻia ai i tatou e fai ni gaoioiga tatau e faasaʻo ai a tatou mea sesē. Peitaʻi o se lamatiaga le lofitūina i lagona nofosala. E ono ugauga mai pea o tatou loto faapea o le a lē faamagaloina i tatou e Ieova, e tusa lava po ua tatou matuā salamō. Pe a oo ina “tofatumoanaina” i tatou i lagona nofosala, e mafai e Satani ona uunaʻia i tatou e faamaamulu, ia iai lagona faapea e lē o toe fia silasila mai Ieova iā i tatou, ma ua lē toe talafeagai ona tatou auauna iā te ia.—2 Korinito 2:5-11.

³ Po o le silafaga moni lenā a Ieova? E leai lava! O le faamagalo o se tasi o vala o le alofa silisili o Ieova. Ua ia faamautinoa mai i lana Afioga, afai tatou te salamō moni mai le loto, e faamagalo mai o ia. (Faataoto 28:13) Ina neʻi tatou manatu faapea e lē mafai ona maua le faamagaloga a Ieova, seʻi o tatou talanoaina le pogai ma le auala o loo ia faamagalo mai ai.

4. O le ā e manatua e Ieova e faatatau i lo tatou tulaga, ma e faapefea ona aafia ai le auala o loo ia feutagaʻi mai ai iā i tatou?

⁴ O loo silafia lelei e Ieova mea e gata ai so tatou malosi. Ua faapea mai le Salamo 103:14: “Ua silafia lava e ia le mea na fai aʻi i tatou; ua manatu ia o le efuefu lava i tatou.” Ua ia silafia lelei, na foafoaina i tatou mai le efuefu, ma e iai o tatou vaivaiga ona o le tulaga lē lelei atoatoa. O le faaupuga e na te silafia “le mea na fai aʻi i tatou” ua faamanatu mai ai, o loo faatusa e le Tusi Paia Ieova i se faiipu omea, a o tatou o ana ipu o loo fai. (Ieremia 18:2-6) E feutagaʻi le Faiipu Omea Sili ma i tatou e tusa ma lo tatou tulaga vaivai, ma le auala tatou te talia pe lē talia ai lana taʻitaʻiga.

5. Ua faapefea ona faamatalaina e le tusi o Roma le malosi o le pule a le agasala?

⁵ E silafia lelei e Ieova le malosi o loo iai le agasala. O loo faamatalaina e lana Afioga le agasala o se uunaʻiga malosi o loo matuā puleaina le tagata. Ae o le ā le malosi o le pule a le agasala? I le tusi o Roma, o loo faamatala mai ai e Paulo: O loo tatou “nofo sala,” e pei o ni fitafita o loo pulea e lo latou taʻitaʻiʻau (Roma 3:9); ua “malo” pe pule le agasala i tagata e pei o se tupu (Roma 5:21); e “nofo” iā i tatou (Roma 7:17, 20); o lana “tulafono” o loo galue pea iā i tatou, i le tulaga o loo taumafai e pulea o tatou olaga. (Roma 7:23, 25) Pagā le malosi o le pule a le agasala i o tatou tino augavale!—Roma 7:21, 24.

6, 7. (a) O le ā le silafaga a Ieova iā i latou o loo saʻili atu i le alofa mutimutivale o Ieova i se loto ua salamō? (e) Aiseā e lē tatau ai ona tatou tafili saunoa i le alofa mutimutivale o le Atua?

⁶ O lea la, e silafia e Ieova e lē mafai ona atoatoa la tatou usiusitai, e tusa lava po o le ā so tatou naunau e usitai iā te ia. Ua ia faamautinoa mai ma le alofa iā i tatou, pe a tatou saʻili atu i lona alofa mutimutivale i se loto ua salamō, o le a ia faamagaloina i tatou. Ua faapea mai le Salamo 51:17: “O taulaga i le Atua, o le loto momomo lea; le Atua e, e te lē inosia le loto momomo ma le nutimomoia.” O le a lē taitai ona teena, pe  tuliesea e Ieova se loto ua ʻmomomo ma nutimomoia’ ona o lagona nofosala.

⁷ Po o le uiga ea o lenei mea, e mafai ona tatou tafili saunoa i le alofa mutimutivale o le Atua, ma fai ai pea ma a tatou faamolemolega lo tatou tulaga agasala? E matuā leai lava! E lē taaʻina Ieova i ni lagona alofa valea. E iai tapulaa o lona alofa mutimutivale. E matuā leai sana faamagaloga iā i latou o ē faifai pea ma le loto i ai le agasala, ma e lē faaalia se salamō. (Eperu 10:26) Ae pe afai na te silafia mai se loto ua salamō moni, e faamagalo mai foʻi o ia. Seʻi o tatou talanoaina nei nisi o faaupuga uigā o loo faaaogā i le Tusi Paia e faamatala ai lenei vala ofoofogia o le alofa o Ieova.

8. O le ā tonu lava le uiga o le aveesea e Ieova o a tatou agasala, ma o le ā le mautinoa ua aumaia ai iā i tatou?

⁸ Na faapea mai Tavita ina ua salamō: “Ona ou faailoa atu ai lea iā te oe o laʻu agasala, na ou lē ufitia foʻi laʻu amiolētonu; . . . ona e aveesea ai lea o le leaga o laʻu agasala.” (Salamo 32:5) O le upu “aveesea” o loo faaliliuina i ai se upu Eperu o lona uiga autū lava o le “sii ese” pe “tauaveina.” O loo faaaogā i inei lea upu e faailoa mai ai le aveesea o le “sala, agasala, [po o] sesē.” O lona uiga, peiseaʻī ua sii i luga e Ieova agasala a Tavita ma tauave ese. E mautinoa o lenei mea na tuumāmāina ai lagona nofosala sa tauave e Tavita. (Salamo 32:3) E mafai foʻi ona tatou matuā mautinoa i le Atua, o lē na te tauave ese agasala a i latou o ē saʻili mo lana faamagaloga, e ala i le faatuatua i le taulaga togiola a Iesu.—Mataio 20:28.

9. O le ā le mamao ese ma i tatou e ave i ai e Ieova a tatou agasala?

⁹ Sa faaaogā e Tavita se isi faaupuga uigā e faamatala ai le faamagaloga mai iā Ieova: “E pei ona vāvā mamao o sasaʻe ma sisifo, e faapea lava ona faamamao e ia iā i tatou o a tatou solitulafono.” (Salamo 103:12) E oso aʻe le lā i le itu i sasaʻe ae e goto ifo i le itu i sisifo. O le ā le mamao o sasaʻe mai sisifo? O lona uiga, o sasaʻe e masani lava o matuā mamao ese lava mai sisifo; e lē taitai ona fetaiaʻi nei itulagi e lua. Ua fai mai le manatu  o se tasi tagata atamai e faatatau i lenei faaupuga, o lona uiga, “i se mamao lava e oo i ai; i se mamao e mafai ona tatou manatu i ai.” Ua tatou iloa mai i upu a Tavita, pe a faamagalo mai Ieova, e na te matuā aveesea mamao lava a tatou agasala.

10. Pe a faamagaloina i tatou e Ieova, aiseā e lē tatau ai pea ona tatou lagona le nofosala i na agasala i lo tatou olaga atoa?

¹⁰ Pe na iai ea se taimi sa e taumafai ai e aveese se pisia mai se ofu e lē malosi sona lanu? Atonu o le a aliali mai pea le pisia e ui i ni au taumafaiga malolosi. Ae seʻi mātau fetalaiga a Ieova i le auala e faamagalo ai: “E ui lava ina pei o ofu mūmū a outou agasala, e sisina ia e pei o le kiona; e ui lava ina mūmū ia e pei o le ie ulaula, e avea e pei o fulufulu mamoe.” (Isaia 1:18) O le upu “mūmū” e faauiga atu i le lanu mūmū sesega. a O le lanu “ulaula” o se tasi o lanu malosi sa vali ai ie. (Nauma 2:3) E lē taitai mafai e ni a tatou taumafaiga ona aveesea ai le pisia o le agasala. Peitaʻi e mafai e Ieova ona aveesea agasala  ua matuā mūmū ulaula, ma toe faamamāina e pei o le sinasina o le kiona, po o se fulufulu mamoe e leʻi valia. Pe a faamagalo mai Ieova iā i tatou, e lē manaʻomia ona tatou manatu e tauave le mamafa o na agasala i lo tatou olaga atoa.

11. O le ā le uiga o le lafoaʻiina e Ieova o a tatou agasala?

¹¹ Na fatuina e Esekia se pese faamomoiloto o le lotofaafetai ina ua manuia mai se maʻi tugā na aafia ai ma faapea atu iā Ieova: “Ua e lafoaʻiina aʻu agasala uma i ou tua.” (Isaia 38:17) Ua faaalia i lenei mau le peiseaʻī o loo lafoaʻiina e Ieova i ona tua agasala a ē salamō, e lē mafai ona Ia toe tagaʻi atu i ai pe toe mātauina foʻi. Ua fai mai se tasi manatu, e mafai ona faaupu faapenei: “Ua e faia [aʻu agasala] e peiseaʻī e leʻi tupu.” Po ua lē faalaeiau ea lenā manatu?

12. Ua faaalia mai faapefea e Mika, pe a faamagalo mai Ieova, e na te aveesea foʻi e faavavau a tatou agasala?

¹² Ina ua folafola mai e Mika le toe faafoʻisiaga, na ia faailoa mai lona talitonuga maumaututū faapea, o le a faamagalo e Ieova ona tagata ua salamō: “O ai ea se Atua e tusa ma oe . . . ua e lē manatua solitulafono a ē o totoe o lona tofi? . . . e te lafo foʻi a latou agasala uma i mea loloto o le sami.” (Mika 7:18, 19) Seʻi manatu i le uiga o na upu iā i latou sa soifua i tuā i inā. Pe e mafai ona e toe maua mai ai se mea na lafoina “i mea loloto o le sami”? Ua faaalia mai la i upu a Mika faapea, pe a faamagalo mai Ieova, e na te aveesea foʻi e faavavau a tatou agasala.

13. O le ā le uiga o fetalaiga a Iesu “Faamagalo mai i i a matou aitalafu”?

¹³ Na faaaogā e Iesu se talafaatusa e faatatau i se tagata aitalafu ma se tagata o loo aitalafu mai ai, e faataʻitaʻia ai le faamagalo o Ieova. (Mataio 18:23-35) Na faalaeiauina i tatou e Iesu ina ia tatou tatalo: “Faamagalo mai i a matou agasala [“aitalafu,” fpl].” (Mataio 6:12, NWT) Pe a tatou agasala, ua avea ai i tatou o ni tagata “aitalafu” iā Ieova. E tusa ai o le uiga o le veape Eleni lea o loo faaliliuina i le “faamagalo,” ua faapea mai se tasi tusi: “Ia faaui ese pe faamatuu ese se aitalafu, e ala i le lē toe tāpā.” O lona uiga, pe a faamagalo mai Ieova,  e na te soloia ai foʻi ma le aitalafu lea na semanū e tuu mai iā i tatou. Ua faamāfanafanaina ai la tagata agasala ua salamō. O le a lē taitai ona tāpā mai e Ieova se totogi mo se aitalafu ua uma ona ia soloia!—Salamo 32:1, 2.

14. O le ā le manatu e oso aʻe i le mafaufau mai le faaupuga “soloiesea a outou agasala”?

¹⁴ O loo faamatala atili mai le faamagaloga a Ieova i le Galuega 3:19: “O lenei, inā salamō ia ma liliu, ina ia soloiesea a outou agasala.” O le upu soloiesea e faaliliuina mai ai le veape Eleni o lona uiga, “ia tapē ese, . . . faalēaogā pe faatamaʻia.” E manatu nisi tagata atamamai, o le manatu lea e faamatalaina, o le tapē ese o se tusilima. Na mafai faapefea ona faia lenei mea? O le vaitusi sa taatele lona faaaogāina i taimi anamua, sa faia mai i se paluga na palu faatasi ai se lama uliuli (carbon), le sua e pei o se apulupulu (gum), ma le vai. Pe a uma ona tusitusi se tagata i le faaaogāina o lenā vaitusi, ona ia aumai lea o se omomi susū ma tapē ese ai lenā tusitusiga. O inā o loo iai se ata matagofie o le alofa mutimutivale o Ieova. Pe a ia faamagaloina a tatou agasala, e tai pei o loo ia aumaia se omomi ma tapē ese ai na agasala.

15. O le ā o loo finagalo Ieova ina ia tatou iloa e faatatau iā te ia?

¹⁵ Pe a toe tōmanatu atu i nei talafaatusa, po ua lē manino mai ai la o loo finagalo Ieova ina ia tatou iloa, e faamagalo moni e ia a tatou agasala, pe afai e silasila mai ua tatou salamō moni? E lē tatau ona tatou fefefe faapea o le a ia toe faasalaina i tatou i le lumanaʻi ona o na agasala. E faamaonia lenā manatu i se isi mea o loo faaalia mai ai e le Tusi Paia le tele o le alofa mutimutivale o Ieova: Pe a ia faamagalo, e na te faagalo foʻi.

16, 17. Pe a faapea mai le Tusi Paia e faagalo e Ieova a tatou agasala, o le ā le uiga, ma aiseā ua e tali mai ai faapena?

¹⁶ Na folafola mai e Ieova e faatatau iā i latou o loo i le feagaiga fou: “Ou te faamagalo i a latou amio leaga, ma ou lē toe manatua a latou agasala.” (Ieremia 31:34) Po o lona uiga  ea, pe a faamagalo mai Ieova, ona lē mafai lea ona ia toe manatuaina agasala? E lē o le uiga lenā. O loo taʻu mai e le Tusi Paia iā i tatou agasala a le toʻatele o tagata na faamagaloina e Ieova, e aofia ai Tavita. (2 Samuelu 11:1-17; 12:13) E mautinoa lava sa silafia e Ieova agasala na latou faia. Ua tusia tala e uiga i a latou agasala, faapea lo latou salamō ma faamagaloga a le Atua, mo so tatou lelei. (Roma 15:4) O le ā la le uiga o faaupuga a le Tusi Paia e faapea e lē “manatua” e Ieova agasala a i latou ua ia faamagaloina?

¹⁷ O le veape Eperu ua faaliliuina i le ʻou te manatua,’ e tele nisi ona uiga na i lo le tau ina manatua mea ua tuanaʻi. O loo taʻua e le Theological Wordbook of the Old Testament e faapea, e aofia ai “le faia o se gaoioiga talafeagai.” O lona uiga, ina ia “manatua” se agasala e aofia ai le faia o se faasalaga i tagata  agasala. (Hosea 9:9) Peitaʻi ina ua fetalai le Atua ʻou te lē toe manatua a latou agasala,’ ua ia faamautinoa mai e faapea, a māeʻa ona ia faamagaloina agasala a ē ua salamō, o le a ia lē toe faasalaina i latou i se taimi o i luma ona o na agasala. (Esekielu 18:21, 22) E faagalo e Ieova i le uiga faapea, e na te lē faamanatu maia a tatou agasala i lea taimi ma lea taimi, ina ia tuuaʻia pe faasalaina ai pea lava pea i tatou. Po ua lē o se faamāfanafanaloto ea le iloa, e lē gata e faamagalo mai lo tatou Atua, ae na te faagalo foʻi?

18. Aiseā e lē uiga ai le faamagaloga faapea, o le a lē oo lava i se tagata agasala ua salamō, āuga uma o lana agasala?

¹⁸ Pe afai e faamagalo e Ieova le tagata agasala ua salamō, pe o lona uiga ea, o le a lē oo lava i lenā tagata āuga uma o lana agasala? E leai. E lē mafai ona tatou agasala e aunoa ma le iai o ni āuga. O upu nei na tusi mai ai Paulo: “O le mea e lūlūina e le tagata, o le mea lava lea e seleseleina mai ai e ia.” (Kalatia 6:7) E ono oo iā i tatou ni āuga o a tatou gaoioiga. E lē faapea o le a faamagalo i tatou e Ieova, ona ia toe aumaia lea o ni mala iā i tatou. Pe a tulaʻi mai faafitauli, e lē tatau i se Kerisiano ona manatu faapea, ʻAtonu o loʻu faasalaga lenei mai iā Ieova ona o aʻu agasala i taimi ua tuanaʻi.’ (Iakopo 1:13) Peitaʻi, e lē taofia e Ieova lo tatou mafatia i aafiaga o a tatou gaoioiga sesē. O le tatala o se faaipoipoga, se maʻitō e leʻi manaʻomia, o faamaʻi pipisi mai feusuaʻiga, le lē toe iai o se faatuatuaina po o se faaaloalogia—o āuga uma nei o le agasala e faanoanoa ai, ma e lē maʻalofia. Manatua le taimi ina ua faamagalo e Ieova Tavita mai le agasala sa ia faia iā Patesepa ma Uria. E leʻi taofia e Ieova le oo atu iā Tavita o āuga mataʻutia o lana agasala.—2 Samuelu 12:9-12.

19-21. (a) Na faapefea ona aogā le tulafono o loo faamauina i le Levitiko 6:1-7, mo le tagata ua āfaina i se agasala na fai, ma lē na faia le agasala? (e) Pe afai ua āfaina isi i a tatou agasala, o le ā le gaoioiga tatou te fai ina ia fiafia mai ai le finagalo o Ieova?

¹⁹ E iai ma isi āuga o a tatou agasala, aemaise pe afai o loo  afāina ai isi i a tatou gaoioiga. E pei o le mea na tupu lea e taʻua i le Levitiko mataupu e 6. O inei o loo taʻua ai i le Tulafono na tuuina atu iā Mose se tulaga o loo faia ai se tagata se mea sesē matuiā i lona gaoia o oloa a se isi ona uso Isaraelu, pe ave faamalosi, pe taufaasesē foʻi. Ona faafiti lea o le tagata agasala fai mai e leai sana agasala, e oo lava ina matuā tautō pepelo mai. Ona feteenaʻi ai lea o a la upu ma le isi tagata. Peitaʻi, mulimuli ane e toe afāina ai le lotofuatiaifo o le tagata na faia le agasala, ma taʻutino loa lana agasala. E tolu mea e ao ona ia faia ina ia faamagalo ai o ia e le Atua: ia toe faafoʻi mea na ia aveina, ia totogi atu i le tagata na afāina se aofaʻiga e tusa ma le 20 pasene o le tau o mea na ia gaoia, ma saunia se tamaʻi mamoe e osi ai le taulaga o agasala. Ona faapea mai lea o le tulafono: “E faia foʻi e le faitaulaga se togiola mo ia i luma o Ieova, ona faamagaloina ai lea o ia.”—Levitiko 6:1-7.

²⁰ O lenei tulafono o se sauniuniga alofa mai le Atua. Sa aogā i lē na afāina ai, auā na toe faafoʻi i ai ana meatotino, ma atonu foʻi sa ia fiafia ina ua faailoa e le tagata sesē lana agasala. I le taimi e tasi, sa aogā foʻi le tulafono i lē na uunaʻia e lona lotofuatiaifo o ia e taʻutino lana agasala, ma faasaʻo lana mea sesē. E mautinoa lava, pe afai e musu o ia e faia faapea, o le a lē faamagaloina foʻi o ia e le Atua.

²¹ E ui e lē o toe pule iā i tatou le Tulafono na tuu atu iā Mose, ae o le Tulafono lenā ua mafai ai ona tatou malamalama i le finagalo o Ieova, e aofia ai lona finagalo i le faamagalo. (Kolose 2:13, 14) Pe afai ua afāina isi i a tatou agasala, e fiafia le finagalo o le Atua pe a tatou faia se gaoioiga e faasaʻo ai le mea ua sesē. (Mataio 5:23, 24) Atonu e aofia ai le faailoa atu o la tatou agasala, le taʻutino atu o lo tatou nofosala, pe faatoese atu foʻi i lē ua aafia fua. O inā e mafai ai ona tatou ole atu iā Ieova e ala i le taulaga a Iesu, ma tatou mautinoa ai e faamagaloina i tatou e le Atua.—Eperu 10:21, 22.

22. O le ā e ono aumai faatasi ma le faamagaloga a Ieova?

²² Ua pei lava Ieova o se tamā alofa, e lē gata ina faamagalo mai, ae aumai foʻi ma sina aʻoaʻiga. (Faataoto 3:11, 12) Atonu  e aveesea mai se Kerisiano ua salamō lona faaeaga o le auauna o se toeaina, se auauna o le faiva, po o se paeonia. Atonu o se mea tigā mo ia lona lē toe tauaveina mo se vaitaimi o na faaeaga sa sili ona pele iā te ia. Peitaʻi, o le faia o lenā aʻoaʻiga e lē faapea ai ua lē faamagaloina o ia e Ieova. E tatau lava ona tatou manatua, o le aʻoaʻiga mai iā Ieova o se faamaoniga lea o lona alofa iā i tatou. O le taliaina ma le faatatauina o na aʻoaʻiga e sili atu ona lelei mo i tatou.—Eperu 12:5-11.

23. Aiseā e lē tatau ai lava ona tatou manatu, o le a lē alofa mutimutivale mai Ieova iā i tatou, ma aiseā e tatau ai ona tatou faataʻitaʻi i lana faamagaloga?

²³ Maʻeu se lagona faafouina i le iloa o loo “faamagalo” mai lo tatou Atua! E tusa pe tatou te faia ni mea sesē, e lē tatau ona tatou manatu ai, o le a lē alofa mutimutivale mai Ieova iā i tatou. Pe afai e moni lo tatou salamō, ia faia taumafaiga e faasaʻo ai se mea sesē, ma tatalo faatauanau mo le faamagaloina o i tatou e ala i le toto maligi o Iesu, e mafai ona tatou mautinoa atoatoa o le a faamagaloina i tatou e Ieova. (1 Ioane 1:9) Seʻi o tatou faataʻitaʻia lana faamagaloga i a tatou feutagaʻiga ma isi. Pe afai e faamagaloina ma le alofa i tatou e Ieova, o lē e lē agasala, po ua lē tatau foʻi la iā i tatou o tagata agasala ona taumafai e faamagalo atu i isi?