Mo le Tagata Faitau:

E te māfana i le Atua? E to‘atele tagata e manatu e matuā lē mafai lava ona tupu se mea faapena. E popole nisi faapea e lē o fia silasila mai le Atua; e manatu nisi ua matuā leai lava so latou aogā. Peita‘i o loo augani mai le Tusi Paia iā i tatou: “Ia outou faalatalata atu i le Atua, ona faalatalata mai lea o ia iā te outou.” (Iakopo 4:8) Ua faamautinoa mai e Ieova i ona tagata tapua‘i: “O a‘u o Ieova lou Atua, o lē ua taofi lou lima taumatau; o lē ua fai atu iā te oe, Aua e te fefe, o a‘u, ou te fesoasoani iā te oe.”—Isaia 41:13.

E faapefea ona tatou maua lenā faiā vavalalata ma le Atua? So o se faigauō lava tatou te faia, e mafai ona iai se faiā mautū pe a tatou iloa lelei le tagata, ma tatou fiafia ma faatāua uiga o lenā tagata. E tāua la ona tatou su‘esu‘eina uiga o le Atua ma lana auala e tauaaoina ai mea, e pei ona faamatala mai i le Tusi Paia. O le a mafai ona tatou faalatalata atu i le Atua, pe a tatou mafaufau loloto i le auala o loo ia faaalia ai ona uiga ta‘itasi. Ia iloa le auala na faaatagia atoatoa mai ai e Iesu Keriso na uiga, ma malamalama pe faapefea ona ati a‘e fo‘i e i tatou na uiga. Ona tatou iloa ai lea e tonu ma talafeagai le avea o Ieova ma Pule Silisili Ese aoao. O ia fo‘i o le Tamā e mana‘omia e i tatou uma. Ona o lona mana, lona faamasinotonu, lona atamai ma lona alofa, o le a lē taitai la ona ia lafoa‘ia lana fanau faamaoni.

Talosia o le a aogā iā te oe lenei tusi ina ia e matuā faalatalata atu ai iā Ieova le Atua. Ia iai sa oulua faiā mautū e lē taitai ona toe lepetia, ina ia e soifua e vivii atu iā te ia e faavavau.