1, 2. (a) O ā faiga sa matuā lē tonu lava na oo iā Iosefa? (e) Na faapefea ona faasa‘oina e Ieova faiga lē tonu?

 SA MATUĀ leai lava se faamasinotonu i se mea na tupu i aso anamua. E aunoa ma se solitulafono na faia e si taule‘ale‘a aulelei, ae o lea ua saisaitia o ia i le falepuipui, ua tuua‘ia pepelo e faapea sa taumafai e faia faamalosi ni feusua‘iga ma se tama‘ita‘i. Ae lē o le taimi muamua lea ua faia ai se faamasinoga lē tonu iā te ia. I tausaga muamua atu i le 17 o ona tausaga, sa faalataina ai lenei alii talavou o Iosefa, e ona lava uso, ma na toetoe lava o latou fasiotia o ia. Sa latou faatauina atu o ia e fai ma pologa i se nuu ese. O inā na ia teteeina ai faatosinaga lē mamā a le avā a lona matai. Ona tuua‘ia pepelo lea o ia e le fafine ina ua matuā māasiasi i le teena, lea na māfua ai ona saisaitia o ia. Talofa e, auā e foliga e leai se tasi na fesoasoani ane iā Iosefa.

² Peita‘i sa silasila mai i ai le Atua, o lē ‘e fiafia i le amiotonu ma le faamasinotonu.’ (Salamo 33:5) Sa faasa‘oina e Ieova mea lē tonu na faia, ma suia mea tutupu ina ia i‘u ai i le faasa‘olotoina o Iosefa. Ae sili atu ai, na i‘u ina tuuina atu iā Iosefa, o lē na lafoina i le falepuipui, ni tiute tauave maualuluga ma se mamalu uigaese. (Kenese 40:15; 41:41-43; Salamo 105:17, 18) O le i‘uga, na faamaonia e leai se agasala a Iosefa, ma sa ia faaaogāina lona tulaga maualuga e lagolago atu ai i le fuafuaga a le Atua.—Kenese 45:5-8.

3. Aiseā ua lē o se mea e ofo ai lo tatou manana‘o ia tonu ma fai lelei i tatou e isi?

³ E ootia ai lava o tatou loto i lenā tala, a ea? O ai se tasi o i tatou e lē o iloa atu ni faiga lē tonu po ua āfaina ai fo‘i? E mautinoa lava, tatou te faanaunau ia tonu ma fai lelei i tatou e isi. E lē o se mea lenei e ofo ai, auā na tuuina mai e Ieova iā i tatou uiga e faaatagia atu ai ona lava uiga, ma o le faamasinotonu o se tasi o ona uiga autū. (Kenese 1:27)  Ina ia iloa lelei Ieova, e mana‘omia ona tatou malamalama i ona faalogona e faatatau i le faamasinotonu. Ona mafai lea ona tatou malamalama i ona ala ofoofogia ma tatou matuā faalatalata atu ai iā te ia.

4. I le manatu faaletagata, o le ā le uiga e masani ona faauiga i ai le faamasinotonu?

⁴ I le manatu faaletagata, na pau le uiga e masani ona faauiga i ai le faamasinotonu, o le faatatauina tonu o tulafono. Ua ta‘ua e le tusi o le Right and Reason—Ethics in Theory and Practice e faapea, “e fesoota‘i atu le faamasinotonu i tulafono, avega tauave, aiā tatau, ma tiute, ma e fua ai taui e maua e tusa o le tulaga tutusa po o le tulaga talafeagai.” Peita‘i, e iai isi mea e aofia fo‘i i le faamasinotonu a Ieova na i lo le na ona tausisi i tulafono, i le manatu faapea o se tiute po o se avega tauave e tatau lava ona fai.

5, 6. (a) O le ā le uiga o upu i ulua‘i gagana lea ua faaaogā mo le “faamasinotonu”? (e) O le ā le uiga o le faapea atu o le Atua e tonu?

⁵ E mafai ona tatou malamalama lelei i le uigā ma le atoaga o le faamasinotonu a Ieova, pe afai tatou te manatunatu i upu o le ulua‘i gagana lea sa faaaogā ai i le Tusi Paia. I Tusitusiga Eperu, e tolu upu autū o loo faaaogā. O le upu o loo sili ona faaaogā soo mo le “faamasinotonu,” atonu o loo faaaogā fo‘i mo le “faamasinoga tonu.” (Kenese 18:25) O isi upu e lua, ua masani ona faauiga i le “amiotonu.” I Tusitusiga Eleni, o le upu ua faaliliu i ai le “amiotonu” o loo faamatalaina faapea, o le “uiga o le sa‘o po o le tonu.” E mautinoa la, o le amiotonu ma le faamasinotonu e fesootaʻi lelei.—Amosa 5:24.

⁶ Pe a tautala la le Tusi Paia e faapea o le Atua e tonu, o lona uiga o loo ta‘u mai ai iā i tatou, e na te faia le mea ua tonu ma sa‘o, ma e faifai pea e aunoa ma se faaitu‘au. (Roma 2:11) E mautinoa e lē taitai ona ese le auala e gaoioi ai o ia. Na ta‘ua e le tagata faatuatua o Eliu e faapea: “E mamao ma le Atua ona ia amio leaga, ma Lē e ona le  malosi uma lava ona ia amiolētonu.” (Iopu 34:10) E mautinoa e matuā lē mafai e Ieova ona faia se mea e lē tonu. Aiseā? E lua māfuaaga.

7, 8. (a) Aiseā e lē mafai ai e Ieova ona faia se mea lē tonu? (e) O le ā ua māfua ai ona amiotonu, pe faimeatonu Ieova i ana feutaga‘iga ma isi?

⁷ Muamua lava, e paia o ia. E pei ona tatou mātauina i le Mataupu e 3, e matuā lē ponā ma faimeatonu Ieova. E lē mafai la ona ia faia se mea e lē tonu. Se‘i mafaufau i le uiga o lenā manatu. O le paia o lo tatou Tamā faalelagi o se māfuaaga mausalī lea e talitonu ai o le a lē taitai ona faalētonu le auala na te tausia mai ai lana fanau. Sa mautinoa lenā manatu iā Iesu. I le pō mulimuli o le soifuaga o Iesu i le lalolagi, na ia tatalo ai: “Le Tamā paia e, ia e tausi iā i latou i lou suafa.” (Ioane 17:11) O “Le Tamā paia”—i le Tusi Paia, o le ta‘u lenā ua na o Ieova e faasino atu i ai. Ua fetaui lelei auā e leai se tamā faaletagata e mafai ona faatusatusa atu iā te Ia i lona tulaga paia. Na mautinoa lelei e Iesu o le a puipuia malu ona soo e lona Tamā, o lē e atoatoa lona mamā, ma e matuā lē aafia lava o Ia i so o se agasala.—Mataio 23:9.

⁸ Lona lua, o le alofa lē manatu faapito o se uiga moni o le Atua. O le alofa lenā ua māfua ai ona amiotonu, pe faimeatonu o Ia, i ana feutaga‘iga ma isi. Peita‘i o le tele o faiga lē tonu—e pei o le lotonuu, faaitu‘au, ma le faailogatagata—e masani ona mapuna a‘e mai le matape‘ape‘a ma le manatu faapito, o uiga e tuufaafeagai ma le alofa. Ua faamautinoa mai e le Tusi Paia iā i tatou e faatatau i le Atua o le alofa: “O Ieova lē amiotonu e fiafia o ia i le amiotonu.” (Salamo 11:7) Ua fetalai mai Ieova: “O a‘u o Ieova, ou te fiafia i le faamasinoga.” (Isaia 61:8) Pe lē o se faamāfanafanaloto ea le iloaina e fiafia lo tatou Atua i le faia o le mea ua sa‘o, pe tonu?—Ieremia 9:24.

9-11. (a) O le ā le sootaga i le faamasinotonu a Ieova ma lona alofa mutimutivale? (e) Ua faapefea ona manino mai le faamasinotonu a Ieova ma lona alofa mutimutivale, i le auala o loo ia feutaga‘i ai ma tagata agasala?

⁹ O le faamasinotonu a Ieova ua pei lava o isi vala uma o ona uiga lē mafaatusalia, e atoatoa ona lelei, e leai se mea e faalētonu ai. Na vivii atu Mose iā Ieova, e faapea: “O le Papa, e sao lava lana galuega; auā e tonu ona ala uma lava; o le Atua faamaoni, e lē o iā te ia se amiolētonu, o le amiotonu ma le amio sa‘o lava ia.” (Teuteronome 32:3, 4) O mea uma o loo faailoa mai ai le faamasinotonu a Ieova, e lelei atoatoa, e lē ponā—e lē taitai ona taa‘inagofie, e lē taitai fo‘i ona soona ‘ina‘inā.

¹⁰ O loo iai se sootaga vavalalata i le faamasinotonu a Ieova ma lona alofa mutimutivale. Ua faapea mai le Salamo 116:5: “O Ieova o lē alofa fua ma lē amiotonu ia [“tonu,” The New American Bible]; o lo tatou Atua, e alofa mutimutivale ia.” Ioe, e lē gata ina faimeatonu Ieova, ae alofa mutimutivale fo‘i. E fetaui lelei uiga nei e lua. O le faaalia o lona alofa mutimutivale e lē o se tau faamāmāina lea o lana faamasinotonu, e peisea‘ī na semanū e mata‘utia se faatinoga o lana faamasinoga. Peita‘i o nei uiga e lua e masani lava ona ia faaalia i le taimi e tasi, e mafai fo‘i ona faaaogā faatasi i se gaoioiga e tasi. Se‘i manatu i se faaa‘oa‘oga.

¹¹ Ua tuufaasolo mai le agasala i tagata uma lava ma ua tatau ai ona latou maua le totogi o le agasala—o le oti. (Roma 5:12) Peita‘i e lē fiafia le finagalo o Ieova i le oti o ē agasala. O ia o “le Atua o lē faamagaloina sala, o lē alofa fua, ma lē alofa mutimuti vale.” (Neemia 9:17) E ui i lea, talu ai e paia o ia, e lē mafai ai ona ia faatagaina e faavavau le amiolētonu. E mafai la faapefea ona ia faaalia le alofa mutimutivale i tagata ua tuufaasolo mai i ai le agasala? O loo maua le tali i se upu moni e sili ona tāua i le Afioga a le Atua: O le sauniunia e Ieova o se togiola mo le faaolataga o tagata. I le Mataupu e 14 o le a tatou iloa atili ai nisi mea e uiga i lenei fuafuaga  alofa. E lē gata ina tonu lenā fuafuaga, ae e matuā alofa mutimutivale fo‘i. O inā ua faaalia mai ai e Ieova lona alofa mutimutivale i tagata agasala ua salamō, a o tausisia pea ana tulafono o lana faamasinotonu e lelei atoatoa.—Roma 3:21-26.

12, 13. (a) Aiseā ua avea ai le faamasinotonu a Ieova ma pogai o lo tatou faalatalata atu iā te ia? (e) O le ā le faai‘uga na faia e Tavita e tusa ai o le faamasinotonu a Ieova, ma e faapefea i lenei mea ona faamāfanafanaina ai tatou?

¹² O le faamasinotonu a Ieova, e lē o se uiga tatou te ono segisegi ese ai mai iā te ia, ae o se uiga e atili ai ona tatou māfana iā te ia. O loo manino ona faamatala mai e le Tusi Paia le alofa o le faamasinotonu po o le amiotonu a Ieova. Se‘i o tatou talanoaina nisi o auala faamāfanafanaloto o loo faatino ai e Ieova lana faamasinotonu.

¹³ O le faamasinotonu lelei atoatoa a Ieova ua māfua ai ona faamaoni ma alofa mai o ia i ana auauna. O le vala lenei o le faamasinotonu a Ieova ua tofo moni i ai le faisalamo o Tavita, ma sa ia faatāuaina. Ona o mea na oo i ai, ma lona malamalama i le auala e gaoioi ai le Atua, o le ā le faai‘uga na faia ai loa e Tavita? Na ia faalauiloa mai: “E fiafia Ieova i le faamasinoga, na te lē tuua fo‘i ona tagata amio Atua; e leoleoina i latou e faavavau.” (Salamo 37:28) Ma‘eu se faalaeiauga faamāfanafanaloto! O le a lē taitai ona lafoa‘ia e le Atua i latou o ē alolofa iā te ia. E mafai ai la ona tatou mautinoa o le a latalata mai o ia ma tausi mai ma le alofa iā i tatou. E faamautinoa e lona faamasinotonu lenei mea!—Faataoto 2:7, 8.

14. Ua faapefea ona manino mai le finagalo alofa o Ieova i ē mafatia, i le Tulafono na ia avatu iā Isaraelu?

¹⁴ Ona o lona faamasinotonu, e silafia lelei ai e le Atua mana‘oga o ē ua mafatia. Ua manino mai le finagalo alofa o Ieova iā i latou na, i le Tulafono lea na ia tuuina atu iā Isaraelu. Mo se faaa‘oa‘oga, na aofia i le Tulafono ni faatulagaga faapitoa ina ia mautinoa ua tausia lelei tamaiti mātuaoti ma fafine ua oti a latou tane. (Teuteronome 24:17-21) Sa silafia e  Ieova le faigatā o le olaga mo na aiga, o lea na gaoioi ai o ia e avea ma Faamasino ma o Lē sa puipuia i latou e pei o se tamā. Sa avea fo‘i o Ia ma lē “e na te faia le faamasinogatonu mo le tama ua leai sona tamā, ma le fafine ua oti lana tane.” (Teuteronome 10:18, NWT; Salamo 68:5) Sa lapata‘ia e Ieova le fanauga a Isaraelu e faapea, afai latou te faileagaina fafine ma fanau o ē sa leai so latou puipuiga, o le a mautinoa lona faafofoga mai i le alaga a na tagata. Na ia fetalai: “Ona ou matuā ita ai lea.” (Esoto 22:22-24) E ui o le ita e lē o se uiga autū o Ieova, ae e oo iā te ia le to‘asa amiotonu pe afai e faia ma le loto i ai ni gaoioiga lē tonu, aemaise pe afai e afāina ai tagata vaivai ua leai so latou fesoasoani.—Salamo 103:6.

15, 16. O le ā le faamaoniga mata‘ina o le lē faailogatagata o Ieova?

¹⁵ Ua faamautinoa mai fo‘i e Ieova e faapea, “na te lē faailogaina tagata, e lē talia fo‘i e ia se taui.” (Teuteronome 10:17) E lē pei Ieova o le to‘atele o tagata o loo iai le pule, auā e na te lē faatāuaina ni tamaoaiga faaletino po o foliga vaaia. E matuā leai lava sana sootaga i faiga faailogatagata ma le faaitu‘au. O se faamaoniga mata‘ina moni lenei o le lē faailogatagata o Ieova. O le avanoa e avea ai ma ana auauna tapua‘i, ma faamoemoe atu ai i le ola e faavavau, ua lē o aumaia mo na o tagata o loo i tulaga maualuluga. Na i lo lea, “o lē mata‘u iā te ia i nuu uma lava, ma fai le amiotonu, ua talia i latou e ia.” (Galuega 10:34, 35) O loo tatala mai lenei faamoemoega ofoofogia i tagata uma e tusa lava po o ā o latou tulaga i le olaga nei, le lanu o o latou pa‘u, po o latou atunuu. Pe lē o se tulaga sili ea lenā ona lelei o le faamasinotonu?

¹⁶ E iai se isi vala o le faamasinotonu lelei atoatoa a Ieova e aogā fo‘i ona tatou tilofa‘ia ma faaaloalogia: le auala o loo ia feutaga‘i ai ma tagata ua solia ana tulafono.

17. Faamatala pe aiseā ua lē tuua‘ia ai le faamasinotonu a Ieova i faiga lē tonu a lenei lalolagi.

¹⁷ E ono taumānatu nisi: ‘Afai e lē finagalo malie Ieova i le amiolētonu, ae faapefea la mafatiaga lē tonu ma faiga pi‘opi‘o  o loo matuā taatele i le lalolagi i aso nei?’ E matuā lē tuua‘ia lava le faamasinoga a Ieova i na faiga lē tonu. O le tele o faiga lē tonu i lenei lalolagi amioleaga o se āuga lea o le agasala ua tuufaasolo mai e Atamu i le fanau a tagata. I se lalolagi o loo filifilia ai e tagata lē lelei atoatoa o latou lava ala agasala, ua faapena fo‘i ona anoanoa‘i ai faiga lē tonu—ae e lē o toe umi se taimi o totoe.—Teuteronome 32:5.

18, 19. O le ā e faaalia ai o le a lē faavavau ona faapalepale mai Ieova iā i latou e solia ma le loto i ai ana tulafono amiotonu?

¹⁸ E ui ina mutimutivale mai le alofa o Ieova iā i latou o loo faalatalata atu ma le faamaoni iā te ia, ae o le a lē faavavau ona onosaia e ia se tulaga e faalumaina ai lona suafa paia. (Salamo 74:10, 22, 23) E lē tatau ona ulagia le Atua o le faamasinotonu; o le a ia lē taofia le oo mai o se faasalaga ogaoga i tagata e agasala ma le loto i ai, auā ua tatau lava lea e tusa ai o a latou gaoioiga. O Ieova o “le Atua alofa mutimutivale ma le alofa fua, e telegese lona to‘asa, a e tele le alofa ma le faamaoni, . . . a e lē faasaoina lava e ia o ē agasala.” (Esoto 34:6, 7) I le ōgatusa ma nei upu, sa tatau ona faasalaina e Ieova i nisi taimi i latou e solia ma le loto i ai ana tulafono amiotonu.

¹⁹ Mo se faaa‘oa‘oga, o feutaga‘iga a le Atua ma Isaraelu anamua. E oo lava i le taimi ua nofoia ai le Nuu Folafolaina, sa faaauau pea ona lē faamaoni le fanauga a Isaraelu. E ui ina “faaonoono” iā Ieova ona o a latou amioleaga, ae na te le‘i faaumatiaina ai i latou i le taimi lava lenā. (Salamo 78:38-41) Na i lo lea, sa ia faataga pea ma le alofa mutimutivale ni avanoa ina ia suia ai o latou ala. Na ia augani atu: “Ou te lē fiafia lava i le oti o lē amio leaga, a ia liliu mai lē amio leaga ai lona ala, ma ola ai; liliu ia outou, ina outou liliu ese ia i o outou ala leaga; auā pe se ā ea le mea tou te fia oti ai, le aiga o Isaraelu e?” (Esekielu 33:11) Talu ai sa tāua le ola i le silafaga a Ieova, o lea na ia aauina atu ai pea ana perofeta, ina ia toe liliu ese ai Isaraelu mai o latou ala leaga. Peita‘i, sa masani ona mumusu tagata faauamaaa e faalogo atu ma salamō. O le i‘uga, na faatagaina ai loa e Ieova fili e faaumatia i latou, ina ia puipuia ai lona suafa paia ma mea uma o loo aofia ai.—Neemia 9:26-30.

20. (a) O ā mea e uiga iā Ieova, ua tatou a‘oa‘oina mai ana feutaga‘iga ma le nuu o Isaraelu? (e) Aiseā ua talafeagai ai le faaaogā o le leona e fai ma faailoga o le faamasinotonu a Ieova?

 ²⁰ E tele ni mea tatou te a‘oa‘oina mai feutaga‘iga a Ieova ma le nuu o Isaraelu. Ua tatou iloa ai, o loo silasila mai ona fofoga i mea lē tonu uma ma o loo matuā tigā ai ona faalogona. (Faataoto 15:3) O se faalaeiau fo‘i le iloaina, e nofosauni o ia e faaalia lona alofa mutimutivale pe afai e iai se māfuaaga tatau o le faia faapea. E lē gata i lea, ua tatou a‘oa‘oina fo‘i e lē taitai ona ‘ina‘inā le auala e faatino ai lana faamasinotonu. O le onosaʻi o Ieova, ua to‘atele ai tagata e manatu sesē faapea, o le a lē taitai ona ia faaoo maia le sala i ē amioleaga. Ae e matuā lē moni lava lenā manatu, auā o feutaga‘iga a le Atua ma Isaraelu ua tatou iloa ai fo‘i, e iai mea e muta mai ai le onosai o le Atua. E maumaua‘i Ieova mo le amiotonu. E lē tutusa Ieova ma tagata, o ē masani ona faatalatū e faatino le faamasinotonu. Peita‘i o Ieova, e maumaua‘i pea o ia e fai le mea ua tonu. Ua fetaui ai le faaaogā o le leona lea ua fai ma faailoga o le faamasinotonu ma le lototele, e fesoota‘i atu i le afioaga ma le nofoalii o le Atua. a (Esekielu 1:10; Faaaliga 4:7)  Ua tatou mautinoa ai, o le a ia faataunuuina lana folafolaga ina ia tafiesea faiga lē tonu mai lenei lalolagi. Ioe, o lana auala e faamasino ai e mafai ona taaofa‘i uma i upu nei: maumaua‘i pe a talafeagai, ae alofa mutimutivale i so o se mea e mafai ai.—2 Peteru 3:9.

21. Pe a tatou mafaufau loloto i le auala o loo faaalia ai e Ieova le faamasinotonu, o le ā le tulaga e tatau ona tatou manatu ai iā te ia, ma aiseā?

²¹ Pe a tatou mafaufau loloto i le faamasinotonu a Ieova, e lē tatau ona tatou manatu iā te ia o se faamasino sauā ma lē alofa, e na o le pau le mea o finagalo ai o le faaoo atu o le sala i ē faimea sesē. Na i lo lea, e tatau ona tatou mafaufau iā te ia o se Tamā e alofa ae maumaua‘i, o lē e feutaga‘i pea ma lana fanau i le auala e sili ona lelei. Talu ai o Ieova o se Tamā e faimea tonu, ua ia faapaleni ai lona maumaua‘i mo le mea ua sa‘o, ma lona alofa mutimutivale i lana fanau i le lalolagi, o ē o loo mana‘omia lana fesoasoani ma lana faamagaloga.—Salamo 103:10, 13.

22. O le ā le faamoemoe ua tatou maua ona o le faamasinotonu a Ieova, ma aiseā ua ia feagai ai ma i tatou i lenei auala?

²² Ma‘eu lo tatou lotofaafetai ona e tele isi mea o loo aofia i le faamasinotonu a le Atua, na i lo le tau ina faaoo mai le faasalaga i tagata faimea sesē! Ona o le faamasinotonu a Ieova, ua mafai nei ona tatou maua se faamoemoe fiafia—le olaga lelei atoatoa e faavavau i le lalolagi, lea “e mau ai le amiotonu.” (2 Peteru 3:13) O le auala lenei o loo feagai ai le Atua ma i tatou, auā e sa‘ilia e lana faamasinotonu le lavea‘iga ae lē o le faamalaiaina. O le mea moni, o se malamalamaga lelei i le faatinoga atoa o le faamasinotonu a Ieova, e mafai ai ona tatou faalatalata atu iā te ia! I mataupu o loo sosoo mai, o le a tatou matuā tilofa‘ia le auala o loo faaalia ai e Ieova lenei uiga e sili ona matagofie.