1, 2. (a) O le ā le manatu e lē faigofie ona talitonu i ai le to‘atele, ae o le ā ua faamautinoa mai e le Tusi Paia iā i tatou? (e) O le ā le faiā māfana na maua e Aperaamo, ma aiseā?

 O Ā NI ou lagona pe a te‘i ua fetalai mai Lē na Foafoaina le lagi ma le lalolagi e faapea, “O la‘u uō lenei”? E lē faigofie ona talitonu le to‘atele o tagata e tupu se mea faapena. Auā e faapefea ona uō se tagata faatauvaa ma Ieova le Atua? Peita‘i, ua faamautinoa mai e le Tusi Paia, e mafai moni ona tatou faalatalata atu i le Atua.

² Sa fiafia Aperaamo anamua i lenā faauōga māfana. Na ta‘ua e Ieova lenā tamā anamua e faapea, o “la‘u uō.” (Isaia 41:8) Ioe, sa faitauina e Ieova Aperaamo o sana uō mamae. O le faiā lenā sa iā Aperaamo talu ai lona ‘faatuatua atu iā Ieova.’ (Iakopo 2:23) I aso fo‘i nei, o loo sa‘ili Ieova i ni avanoa e atiaʻe ai se faiā māfana ma i latou o ē auauna atu iā te ia ma faaali i ai lona “fiafia.” (Teuteronome 10:15) Ua augani mai lana Afioga: “Ia outou faalatalata atu i le Atua, ona faalatalata mai lea o ia iā te outou.” (Iakopo 4:8) Ua maua ai e i tatou se valaaulia, atoa fo‘i ma se folafolaga.

3. O le ā le valaaulia a Ieova iā i tatou, ma o le ā le folafolaga ua fesoota‘i atu i ai?

³ Ua valaaulia e Ieova i tatou ina ia faalatalata atu iā te ia. O loo nofosauni ma naunau o ia e talia i tatou e avea ma ana uō. I le taimi e tasi, ua ia folafola mai, pe afai tatou te taumafai e faalatalata atu iā te ia, o le a faalatalata mai fo‘i o Ia. Ona tatou oo lea i se tulaga e tāua tele—o se faiā ‘vavalalata ma Ieova.’ (Salamo 25:14, NWT) O loo faailoa mai e lenei upu “vavalalata” le manatu o le talanoa faalilolilo atu i se uō faapitoa.

4. E faapefea ona e faamatalaina se uō vavalalata, ma ua faamaonia faapefea, o Ieova o se uō faapena iā i latou o loo faalatalata atu iā te ia?

⁴ Pe iai sau uō vavalalata e mafai ona sasaa atu i ai ou faalogona?  O se uō faapena e manatu mamafa iā te oe. E te maufaatuatuaina o ia, auā ua e faamaonia le moni o lona alofa. E atili faateleina lou olioli pe a lua talatalanoa i mea o loo e olioli ai. O lona naunau e faalogologo mai a o sasaa atu i ai ou lagona, o le a māmā ai ou faanoanoaga. E tusa pe foliga mai e leai se isi o malamalama iā te oe, ae o loo malamalama mai lava lau uō. E faapena fo‘i pe afai e te faalatalata atu i le Atua, o le a maua ai sau Uō faapitoa e na te faatāuaina oe, e manatu mamafa mai, ma malamalama lelei iā te oe. (Salamo 103:14; 1 Peteru 5:7) E mafai ona faaali atu ou faalogona moni iā te ia, auā ua e iloa e moni lona alofa iā i latou o loo moni fo‘i lo latou alofa iā te ia. (Salamo 18:25) Ae ua mafai ona tatou maua lenei faiā vavalalata ma le Atua, ona ua ia faaavanoaina mai mo i tatou.

5. O le ā na faia e Ieova ina ia mafai ai ona tatou faalatalata atu iā te ia?

⁵ Pe ana leai se tasi e fesoasoani mai iā i tatou, semanū e lē taitai mafai e i tatou o tagata agasala ona faalatalata atu i le Atua. (Salamo 5:4) Ae na tusi mai Paulo: “A ua faaalitinoina mai e le Atua lona lava alofa iā te i tatou, ina ua maliu Keriso ma sui o i tatou, a o tatou agasala pea.” (Roma 5:8) Ioe, na sauniunia e Ieova Iesu ia “foa‘iina atu lona ola e fai ma togiola e sui a‘i tagata e to‘atele.” (Mataio 20:28) Ona o le faatuatua i lenā taulaga togiola ua mafai ai ona tatou faalatalata atu i le Atua. Talu ai na “mua‘i alofa mai [le Atua] iā te i tatou,” na ia faataatia ai se faavae mo i tatou ina ia iai se faauōga ma ia.—1 Ioane 4:19.

6, 7. (a) E faapefea ona tatou iloa o Ieova e lē o se Atua e lilo, pe e lē mafai ona iloa? (e) O ā auala ua faaalia mai ai e Ieova o ia?

⁶ Ua faia fo‘i e Ieova se isi gaoioiga: Ua ia faaalia mai o ia lava iā i tatou. So o se faigauō lava, e faato‘ā māfana tagata pe a iloa lelei e le tasi le isi, ma ia faatāua e le tasi uiga ma gaoioiga a le isi. Pe ana faapea la o Ieova, o se Atua e lē finagalo e faailoa mai o ia, semanū e lē taitai mafai ona tatou faalatalata atu iā te ia. Peita‘i, e lē o iai lava sona faanaunauga e natia o  ia, ae o lona finagalo ina ia tatou iloa lelei o ia. (Isaia 45:19) O mea fo‘i o loo ia faailoa mai e uiga iā te ia, o loo faailoa mai i tagata uma, e oo lava i nisi atonu e faatauvaa i manatu o le lalolagi.—Mataio 11:25.

⁷ Ua faapefea ona faaalia mai e Ieova o ia lava iā i tatou? O ana foafoaga ua faailoa mai ai nisi o vala o ona lava uiga—le mata‘utia o lona mana, le loloto o lona atamai, ma le anoanoa‘i o lona alofa. (Roma 1:20) E lē o gata mai mea ua faailoa mai e Ieova e uiga iā te ia i na o mea na ia foafoaina. Ua ia saunia ai faamatalaga tusitusia e uiga iā te ia lava i lana Afioga, le Tusi Paia, auā o ia o sē fesoota‘i ma tagata.

8. Aiseā e faapea atu ai, o le Tusi Paia lava, o le faamaoniga lenā o le alofa o Ieova iā i tatou?

⁸ O le Tusi Paia lava, o le faamaoniga lenā o le alofa o Ieova iā i tatou. O inā o loo ia faailoa mai ai o ia lava i ni faaupuga e mafai ona tatou malamalama i ai—o se faamaoniga lenā e lē gata e alofa mai Ieova, ae e finagalo fo‘i ina ia tatou iloa ma alolofa atu iā te ia. O mea o loo tatou faitauina i lenei tusi tautele e mafai ai ona tatou faalatalata atu iā te ia. (Salamo 1:1-3) Se‘i o tatou talanoaina ni auala faamāfanafanaloto o loo faaali mai ai e Ieova o Ia lava i lana Afioga.

9. O ā nisi o faamatalaga tuusa‘o i le Tusi Paia o loo faamatala ai uiga o le Atua?

⁹ E tele faamatalaga tuusa‘o i le Tusi Paia o loo faamatala ai uiga o le Atua. Se‘i mātau nisi o na faamatalaga. “E fiafia Ieova i le faamasinoga.” (Salamo 37:28) O le Atua “e silisili ese lona malosi.” (Iopu 37:23) “Ou te alofa lava a‘u o loo fetalai mai ai Ieova.” (Ieremia 3:12) ‘E atamai lona finagalo.’ (Iopu 9:4) O ia “o le Atua alofa mutimutivale ma le alofa fua, e telegese lona to‘asa, a e tele le alofa ma le faamaoni.” (Esoto 34:6) “[Ieova e], o oe e lelei, ma ua e faamagalo sala.” (Salamo 86:5) E pei ona ta‘ua i le mataupu na muamua atu, e iai se uiga o loo lālāmua  ai: “O le Atua, o le alofa lava ia.” (1 Ioane 4:8) A o e tomānatu i nei uiga mata‘ina, pe e lē tosina atu ai ea oe i lenei Atua sili?

10, 11. (a) O le ā ua faamauina e Ieova i lana Afioga, ina ia tatou manino atili ai i ona uiga? (e) O le ā se faaa‘oa‘oga i le Tusi Paia, e mafai ai ona faaata i o tatou mafaufau gaoioiga mamana a le Atua?

¹⁰ E lē gata ina faamatala mai iā i tatou ona uiga, ae ua faamauina fo‘i e Ieova i lana Afioga ni faaa‘oa‘oga manino o le faatinoga o nei uiga. Ua faaalia mai e na tala ni ata manino i le mafaufau, lea e mafai ona tatou manino atili ai i vala eseese o ona uiga. O le i‘uga, o le a mafai ai ona tatou faalatalata atu iā te ia. Se‘i manatu i se faaa‘oa‘oga.

¹¹ Ua tatou faitau ai e faapea o le Atua e ‘tele lona mana.’ (Isaia 40:26) Ua tatou faitau ai fo‘i ma iloa le auala na ia lavea‘iina ai Isaraelu i le Sami Ulaula, ma tausia i latou mo tausaga e 40 i le vaomatua. E mafai ona faaata i lou mafaufau le pa‘ō o le pipisi o le vai a o vaeluaina i autafa. E mafai ona e mafaufau i le nuu—atonu pe 3,000,000 lo latou aofa‘iga—o loo savavali i le ilititai mātūtū, ae o loo faafaupu‘e le sami i itu e lua e pei o ni pa tetele. (Esoto 14:21; 15:8) E faamaonia ai iā te oe le malupuipuia o le tausiga a le Atua i le vaomatua. Sa tafe ifo le vai mai le papa. Sa fola le laueleele i mea‘ai sa foliga o ni fatu papa‘e. (Esoto 16:31; Numera 20:11) Ua faaalia i inā e Ieova, e iai lona mana, ma e na te faaaogāina fo‘i lea mana mo se lelei o ona tagata. Pe lē o se faalaeiauga ea lea e iloa ai, o loo tatou tatalo atu i le Atua malosi, “o lo tatou malu ia ma lo tatou malosi; e fai o ia ma fesoasoani silisili i puapuaga”?—Salamo 46:1.

12. Ua faapefea ona fesoasoani mai Ieova ina ia tatou “iloa” o ia i faaupuga e mafai ona tatou malamalama ai?

 ¹² O Ieova o le Agaga o ia. E tele isi mea ua ia faia ina ia mafai ona tatou iloa o ia. Ona o i tatou o ni tagata, e gata mai mea e mafai ona vaaia e o tatou mata faaletino, ma ua lē mafai la ona tatou vaaia le nofoaga o agaga. Pe ana faapea e faamatala mai e le Atua ona foliga i ni faaupuga o mea e lē mafai ona vaaia, ua lē ese lenā ma lou faamatalaina o ou foliga, e pei o lanu o ou mata po o nisi mea e maitaulia ai ou foliga, i se tagata tauaso. Na i lo lea, ua fesoasoani mai Ieova ina ia tatou “iloa” o ia i faaupuga e tatou te malamalama ai. E na te faaaogāina i nisi taimi faamatalaga faafaatusa, e faatusa ai o ia i ni mea tatou te masani ai. Ua oo lava ina ia faamatala mai faapea o loo iai ni ona foliga e pei o se tagata. a

13. O le ā le ata o loo faamatala mai i le Isaia 40:11, ma e faapefea ona aafia ai oe?

¹³ Se‘i mātau le ata o Ieova lea e faamatala mai i le Isaia 40:11: “Na te leoleoina lona lafu e pei o le leoleo mamoe; na te sapaia tama‘i mamoe i ona lima, ma tauave i latou i lona fatafata.” O inei ua faatusaina ai Ieova i se leoleo mamoe o loo sii a‘e i “ona lima” ni tama‘i mamoe. E faaalia ai le mana o le Atua lea e puipuia ma lagolagoina ona tagata, e oo lava i ē o loo sili ona vaivai. E saogalemu i tatou i ona aao malosi, auā pe afai e moni lo tatou alofa iā te ia, o le a lē taitai fo‘i ona ia tuulafoa‘ia i tatou. (Roma 8:38, 39) E sapaia e le Leoleo Mamoe Sili tama‘i mamoe “i lona fatafata”—o se faaupuga o loo faasino atu i le ‘ō‘ō o le ofu pito i luga, o inā e masani ona sapai ai e le leoleo mamoe se tama‘i mamoe faato‘ā fanau mai. Ua tatou mautinoa la, e alofa faapelepele ma tausia i tatou e Ieova. Ona tatou lagona ai lea i taimi uma le fia faalatalata atu iā te ia.

14. Aiseā e faapea atu ai ua faaalia mai ma le manino e Ieova ia lava e ala mai iā Iesu?

¹⁴ I lana Afioga, ua faaalia mai ai ma le manino e Ieova ia lava, e ala mai i lona Alo pele, o Iesu. E na o Iesu lava e sili ona lelei lona faaatagia maia o manatunatuga ma faalogona o Ieova, ma faamatala mai fo‘i Ieova i se tulaga e sili ona manino. Aemaise ai, sa soifua faatasi lenā Alo ulumatua ma lona Tamā a o le‘i faia isi foafoaga agaga atoa fo‘i ma le lagi ma le lalolagi. (Kolose 1:15) Sa masani lelei Iesu ma Ieova. O le māfuaaga fo‘i lenā na mafai ai ona ia fetalai mai: “E leai se tasi ua iloa le Atalii, ua na o le Tamā; e leai fo‘i se tasi ua iloa le Tamā, ua na o le Atalii, ma sē ua loto le Atalii e faaali atu i ai.” (Luka 10:22) A o soifua Iesu o se tagata i le lalolagi, e lua ni auala tāua sa ia faailoa mai ai lona Tamā.

15, 16. O ā auala e lua sa faailoa mai ai e Iesu lona Tamā?

¹⁵ Muamua, o a‘oa‘oga a Iesu ua mafai ai ona tatou iloa lona Tamā. Sa faamatalaina e Iesu Ieova i ni faaupuga e faagaeeloto. Mo se faaa‘oa‘oga, na  faatusa e Iesu Ieova i se tamā lotofaamagalo, o lē na matuā ootia lona loto ina ua vaai atu ua toe fo‘i mai lona atalii faamaumau‘oa, o lea na momo‘e atu ai ma fusi i lona atalii ma sogi atu i ai. O lenā sa faamatalaina ai le Atua alofa mutimutivale o lē na te toe taliaina tagata agasala ua salamō. (Luka 15:11-24) Sa faamatalaina fo‘i e Iesu Ieova faapea, o se Atua na te “tosina” maia tagata e lelei o latou loto, talu ai e alofa o ia iā i latou ta‘ito‘atasi. (Ioane 6:44) E oo lava i sina manu iti e pa‘ū i le eleele e na te silafia fo‘i. Na fetalai Iesu: “Aua tou te matata‘u ai; e sili outou i manu iti e tele.” (Mataio 10:29, 31) E mautinoa lava lo tatou fia māfana atu i le Atua alofa faapena.

¹⁶ Lona lua, o le faaa‘oa‘oga a Iesu ua mafai ai ona tatou iloa pe faape‘ī Ieova. Talu ai sa lelei atoatoa ona faaatagia e Iesu lona Tamā, na mafai ai ona ia fetalai mai: “O lē ua vaai mai iā te a‘u, ua vaai o ia i le Tamā.” (Ioane 14:9) O lea la, pe a tatou faitau i tala a Evagelia e faatatau iā Iesu—o ona faalogona ma le auala na ia feutaga‘i ai ma isi—ua peisea‘ī o loo tatou vaai moni atu lava i lona Tamā. E lē toe mana‘omia ona tuuina mai e Ieova se isi faaaliga e faailoa mai ai ona uiga. Aiseā?

17. Faata‘ita‘i mai le mea ua faia e Ieova ina ia mafai ona tatou malamalama lelei iā te ia.

¹⁷ E pei o le faata‘ita‘iga lenei: Se‘i faapea o lea e te taumafai e faamatala po o le ā le agalelei. Atonu e te faamatala atu lea uiga i ni au upu. Ae afai e mafai ona e faasino atu i se tasi o loo ia faatinoina moni se gaoioiga agalelei ma e faapea atu, “O le faaa‘oa‘oga lenā o le agalelei,” e mautinoa o le a manino le uiga o lea upu, ma atili faigofie ai ona malamalama i ai. E tai faapena fo‘i le mea sa faia e Ieova ina ia mafai ona tatou malamalama lelei iā te ia. E lē gata o loo ia faamatalaina mai o ia lava i upu, ae ua ia faailoa mai fo‘i o Ia lava iā i tatou i le faaa‘oa‘oga moni a lona Alo. O Iesu lea o loo ia faatinoina mai uiga o le Atua. I tala a Evagelia nei o loo faamatala mai ai Iesu, e tai pei o lea o loo fetalai mai Ieova: “O o‘u  uiga na.” Ua faapefea ona faamatalaina i le tusi mai le Atua Iesu a o soifua o ia i le lalolagi?

18. Na faaalia mai faapefea e Iesu le mana, le faamasinotonu ma le atamai?

¹⁸ E matagofie le auala o loo faaalia mai ai e Iesu uiga autū e fā o le Atua. Sa iā te ia le mana e fo‘ia ai faama‘i, le fia taumafa, e oo lava i le oti. E le‘i pei Iesu o tagata manatu faapito o ē na faaaogā sesē o latou mana, auā sa lē taitai ona ia faaaogāina lona mana faivavega mo sona lava lelei pe ina ia faaleaga ai isi. (Mataio 4:2-4) Sa naunau tele o ia i le faamasinotonu. Na talafeagai le tigā o lona finagalo a o taga‘i atu i togafiti a tagata pi‘opi‘o sa faatau‘oa. (Mataio 21:12, 13) Na faia ma le tonu ana feutaga‘iga ma tagata matitiva o ē ua lotomomomo, ma sa fesoasoani atu i na tagata ina ia ‘maua se mālōlōga’ mo i latou. (Mataio 11:4, 5, 28-30) E matuā lē mafaatusalia le atamai sa iai i a‘oa‘oga a Iesu, o lē sa “sili iā Solomona.” (Mataio 12:42) Peita‘i sa lē taitai ona fia faalialia Iesu i lona atamai. Sa ootia loto o tagata lautele i ana fetalaiga, auā o ana a‘oa‘oga sa malamalamagofie, sa manino, ma sa aogā fo‘i.

19, 20. (a) Na avea faapefea Iesu ma faaa‘oa‘oga mata‘ina o le alofa? (e) A o tatou faitau ma toe tomānatu i le faaa‘oa‘oga a Iesu, o le ā e tatau ona manatua pea?

¹⁹ O Iesu lava le faaa‘oa‘oga mata‘ina o le alofa. A o faagasolo lana faiva, sa ia faaalia le alofa i vala eseese, e pei o le tigā alofa ma le alofa mutimutivale. Sa lē taitai sopoloa lana silasila atu i mafatiaga o isi e aunoa ma le mutimutivale ai o lona finagalo. O ona lagona na, sa uuna‘ia ai pea o ia e faia se gaoioiga. (Mataio 14:14) E ui sa ia faamālōlōina tagata mama‘i ma fafaga i latou sa matelāina, ae e iai se isi auala e sili ona tāua sa faaalia ai e Iesu lona alofa. Sa ia fesoasoani i isi ia latou iloa, talia ma fiafia fo‘i i le upu moni o le Malo o le Atua, lea o le a manuia ai e faavavau tagata. (Mareko 6:34; Luka 4:43) Ae o le sili o na mea uma, sa lē manatu faapito le alofa o Iesu, e ala i lona finagalo malie e foa‘i atu lona ola e sui a‘i isi.—Ioane 15:13.

 ²⁰ E lētioa la tosina atu iā te ia so o se ituaiga o tagata, auā sa māfana ma loloto ona lagona mo isi! (Mareko 10:13-16) Peita‘i, a o tatou faitau ma toe tomānatu i le faaa‘oa‘oga a Iesu, se‘i manatua, o lo tatou vaai atu i lenei Alo ua tutusa lea ma lo tatou vaai atu i le ata manino mai o lona Tamā.—Eperu 1:3.

21, 22. O le ā e aofia ai i le sa‘ilia o Ieova, ma o ā faamatalaga i lenei lomiga e mafai ona fesoasoani iā i tatou i lenei taumafaiga?

²¹ Ina ua faailoa manino mai e Ieova ia lava i lana Afioga, ua ia faamautinoa mai ai lona finagalo e faapea, ia tatou faalatalata atu iā te ia. Peita‘i e na te lē o faamalosia i tatou e faia se faiā lelei ma ia. O loo tuu mai e Ieova i la tatou faitalia pe tatou te fia sa‘ili atu “manū o mafai ona maua o ia.” (Isaia 55:6) E aofia ai i le sa‘ilia o Ieova le iloa lelei o ona uiga ma ona ala e pei ona faaalia mai i le Tusi Paia. O le lomiga o loo e faitauina nei, ua fuafuaina e fesoasoani iā te oe mo le faia faapea.

²² Mo lou silafia, ua vaevaeina lenei tusi i ni vaega e tusa ai ma uiga autū e fā o Ieova: le mana po o le malosi, le faamasinotonu, le atamai, ma le alofa. I vaega ta‘itasi, e muamua lava ona fai se aotelega o le uiga. O isi mataupu o loo sosoo mai, e talanoaina ai le auala o loo faaalia ai e Ieova lenā uiga  i ona tafa eseese. Ua iai fo‘i i vaega ta‘itasi se mataupu o loo faaalia ai le auala na faatino ai e Iesu lenā uiga, faapea ma le mataupu o loo talanoaina ai le auala e mafai ona tatou faatino ai lenā uiga.

23, 24. (a) Faamatala mai le vala faapitoa lea e ta‘ua o “Fesili e Mafaufau Loloto i Ai.” (e) E faapefea ona fesoasoani iā i tatou le mafaufau loloto ina ia atili ai ona tatou faalatalata atu i le Atua?

²³ E amata atu i le mataupu lenei ona iai se vala faapitoa e faaulutalaina “Fesili e Mafaufau Loloto i Ai.” Mo se faaa‘oa‘oga, taga‘i ane i le  pusa o loo i le itulau e 24. O mau ma fesili o loo iai, e lē o fuafuaina e fai ai se autaluga o le mataupu. Na i lo lea, e tatau ona fesoasoani iā te oe ina ia e toe tomānatu ai i isi vala tāua o le mataupu. E faapefea ona aogā iā te oe lenei vala? Taga‘i i mau uma o loo ta‘ua, ma faitau lelei i ai. Ona e mafaufau lea i fesili o loo avatu faatasi ma na mau. Ia mafaufau loloto i tali. Atonu fo‘i e mana‘omia ona fai ni au sa‘ili‘iliga loloto. Ia e fesiligia oe lava i fesili faaopoopo: ‘O le ā o loo faailoa mai e lenei faamatalaga iā te a‘u e faatatau iā Ieova? E faapefea ona aafia ai lo‘u olaga i nei faamatalaga? E faapefea ona ou faaaogā nei faamatalaga e fesoasoani atu ai i isi?’

²⁴ O mafaufauga loloto faapena e atili ai ona tatou faalatalata atu iā Ieova. Aiseā? Auā ua faaalia e le Tusi Paia, ua faagaeeina le loto ona o le mafaufau loloto. (Salamo 19:14) Pe afai tatou te toe tomānatu ma se agaga talisapaia i mea ua tatou a‘oa‘oina e uiga i le Atua, e oo ina goto ifo na faamatalaga i o tatou loto. O inā lea e taa‘ina ai o tatou mafaufauga, e faama‘ite ai o tatou lagona, ma i‘u ai ina uuna‘ia i tatou e gaoioi. O le a faateleina ai lo tatou alofa mo le Atua, ma o le i‘uga, o le a uuna‘ia i tatou e lenā alofa e faafiafia o ia, auā o Ia o se Uō e sili ona pele iā i tatou. (1 Ioane 5:3) Ina ia tatou maua se faiā faapena, e tatau ona tatou iloa lelei uiga ma ala o Ieova. Peita‘i muamua lava, se‘i o tatou talanoaina se tasi vala o uiga o le Atua lea e aumaia ai se māfuaaga faalaeiau mo le faalatalata atu iā te ia—o lea uiga, o lona paia.