Ua tusa nei ma le ono masina talu ona amata le talaʻiga a Ioane le Papatiso. A o iai o ia i le vaitafe o Ioritana, ua alu ane iā te ia Iesu lea ua pe ā nei ma le 30 ona tausaga. O le ā le māfuaaga? E lē o tau ina asiasi atu Iesu e vaai po o ā mai Ioane, ma po o ā mai foʻi lana galuega. Ua alu atu nei Iesu iā Ioane, ina ia papatisoina o ia.

Peitaʻi, ua taumafai Ioane e taofia o ia ma faapea atu: “E tatau ona e papatiso mai iā te aʻu, ae aiseā ua e maliu mai ai iā te aʻu?” (Mataio 3:14) O loo iloa e Ioane o Iesu o le Alo faapitoa o le Atua. Manatua foʻi, na osooso ma le fiafia Ioane a o iai i le manava o lona tinā o Elisapeta, ina ua asiasi atu Maria a o tō o ia iā Iesu. E mautinoa sa faamatala e Elisapeta iā Ioane lenei mea ina ua matua o ia. Atonu foʻi sa iloa e Ioane le feʻau a le agelu e faatatau i le fanau mai o Iesu, ma le taimi na faaali mai ai agelu i leoleo mamoe i le pō na fanau ai Iesu.

Ua iloa lelei e Ioane o le papatisoga o loo ia faia, e mo i latou e salamō mai i a latou agasala. Peitaʻi, o Iesu e leai sana agasala. E ui i taumafaiga a Ioane e taofia o ia, ae ua fetalai atu pea Iesu: “O lenei inā faia ia o lenei mea, auā e faapea ona tatau iā i tatou ona faataunuuina o mea tonu uma.”—Mataio 3:15.

Aiseā ua talafeagai ai ona papatisoina Iesu? E lē o papatisoina Iesu ina ia fai ma faailoga o le salamō mai i agasala. Nai lo o lea, ua faailoa atu ai lona ofoina atu o ia lava e faia le finagalo o lona Tamā. (Eperu 10:5-7) Ua leva ona avea Iesu ma kamuta, ae o lea ua oo nei i le taimi e amata ai le galuega na auina mai o ia e lona Tamā e fai. Pe e te manatu e faatalitalia e Ioane se mea ofoofogia e tupu, a o ia papatisoina Iesu?

Ua faapea mai Ioane: “O Lē na auina mai aʻu e papatiso i le vai, na fetalai mai o ia, ʻO lē e te iloa le agaga ua alu ifo ma tumau ai i ona luga, o ia lenā e na te papatiso atu i le agaga paia.’” (Ioane 1:33) E manino mai la, o loo faatalitalia e Ioane e alu ifo le agaga paia o le Atua i luga o se tagata e na te papatisoina. O lea, ina ua maliu aʻe Iesu mai i le vai, e leʻi faateʻia Ioane ina ua ia iloa atu ʻle agaga o le Atua e pei o se lupe ua alu ifo i luga o Iesu.’—Mataio 3:16.

Peitaʻi, e iai isi mea ua tutupu a o papatisoina Iesu. O se faataʻitaʻiga, “ua matala mai le lagi” iā te ia. O le ā le uiga o lenā faaupuga? E foliga mai a o papatisoina Iesu, ua ia toe manatua lona olaga sa iai i le lagi a o leʻi afio mai i le lalolagi. O lea, ua toe manatua e Iesu lona olaga a o avea ma atalii agaga o Ieova, lea e aofia ai upu moni na aʻoaʻoina ai o ia e le Atua a o leʻi afio mai i le lalolagi.

Ua fetalai mai foʻi se siʻufofoga mai i le lagi: “O loʻu Atalii pele lenā, o lē ua malie i ai loʻu loto.” (Mataio 3:17) O ai e ana lenei siʻufofoga? Po o le siʻufofoga o Iesu? E leai, auā o loo la iai faatasi ma Ioane i inā. O lea la, o le siʻufofoga lenei o le Atua. E manino mai la, o Iesu o le Alo o le Atua, ae e lē o ia o le Atua.

O se vala mataʻina le avea o Iesu ma atalii faaletagata o le Atua, e pei o Atamu. Ina ua uma ona faamatalaina e le soo o Luka le papatisoga o Iesu, ona ia faapea mai lea: ʻE tusa ma le tolu sefulu tausaga o Iesu ina ua amata lana galuega. E pei ona manatu i ai tagata, o ia o le atalii o Iosefa, o le atalii o Heli, o le atalii o Tavita, o le atalii o Aperaamo, o le atalii o Noa, o le atalii o Atamu, o le atalii o le Atua.’—Luka 3:23-38.

E pei ona sa avea Atamu ma atalii faaletagata o le Atua, e faapena foʻi Iesu. I le taimi o le papatisoga o Iesu, ua amata ai se la faiā faapitoa ma le Atua, ma avea ai o ia ma Ona atalii faaleagaga. O lea, ua mafai ai e Iesu ona aʻoaʻo atu upu moni mai le Atua, ma faailoa atu le ala i le ola. Ua uia nei e Iesu se ala e iʻu ai i le faataulagaina o lona soifuaga faaletagata, mo le fanau a tagata agasala.