Ua faatoʻā uma lava le papatisoga o Iesu, ma ua taʻitaʻiina o ia e le agaga o le Atua i le toafa i Iutaia. E tele mea o loo ia mafaufau i ai. I le taimi o lona papatisoga, na ‘⁠matala mai ai le lagi.’ (Mataio 3:​16) O le taimi lea ua ia toe manatua ai mea sa ia aʻoaʻoina ma faia a o iai i le lagi. Ioe, e tele mea o loo ia manatunatu loloto i ai.

E 40 ao 40 pō o iai Iesu i le toafa, ae e leʻi taumafa o ia i lenā taimi atoa. Ina ua ia lagona le fia taumafa, ona alu ane ai lea o Satani le Tiapolo ma faaosoosoina o ia e faapea: “Afai o oe o se atalii o le Atua, inā fetalai atu ia i nei maa ia liu falaoa.” (Mataio 4:3) Ua teena e Iesu lenā faaosoosoga, auā ua ia iloa e lē tatau ona ia faaaogāina lona mana, e faamalie ai ona lava manaʻoga.

E leʻi gata ai i inā taumafaiga a le Tiapolo. Ua ia ave Iesu ma faatū i luga o le pā o le malumalu, ma faaosoosoina o ia ina ia oso i lalō. E leʻi faia e Iesu lenei gaoioiga faalialiavale. Ua taʻua e Iesu Tusitusiga Paia, e faaalia ai le sesē o le tofotofoina o le Atua i lenei auala.

Ua toe faaosoosoina foʻi e Satani Iesu, i le faaali atu i ai “o malo uma o le lalolagi ma o latou mamalu” ma faapea atu: “Ou te avatu nei mea uma iā te oe, pe afai e tau lava ina e faapaʻū ma tapuaʻi mai iā te aʻu.” Peitaʻi ua matuā teena e Iesu lenā faaosoosoga ma faapea atu: “Inā alu ese ia oe Satani.” (Mataio 4:​8-​10) E leʻi lolo atu Iesu i faaosoosoga, auā ua ia iloa e na o Ieova e tatau ona avatu i ai le auaunaga paia. Ioe, ua filifili Iesu e tumau ma le faamaoni i le Atua.

E tatou te aʻoaʻoina ni lesona mai i nei faaosoosoga, faapea le auala na tali atu ai Iesu. Na tutupu moni lava nei faaosoosoga. Ua faaalia mai ai i inei, e iai moni le Tiapolo ae e lē o se uiga leaga, e pei ona talitonu i ai nisi. E faamaonia ai foʻi, o loo pulea moni lava e Satani malo o le lalolagi. Pe ana faapea e lē o Satani o loo pulea malo o le lalolagi, e faapefea ona avea o se faaosoosoga moni le ofoina atu o nei mea iā Keriso?

Na faapea atu foʻi le Tiapolo, e lotomalie o ia e tauia Iesu e ala i le avatu i ai o malo uma o le lalolagi, pe a ia faia se gaoioiga e tasi o le tapuaʻi atu lea iā te ia. Atonu e faaosoosoina foʻi i tatou e le Tiapolo i se auala faapena, e ala i le ofoina mai o ni avanoa e maua ai le tele o le ʻoa, pule, po o se tulaga taualoa foʻi. Maʻeu le atamai pe a tatou mulimuli i le faaaʻoaʻoga a Iesu, e ala i le tumau ma le faamaoni i le Atua po o ā lava faaosoosoga e tatou te fesagaʻia. Ae ia manatua, na alu ese le Tiapolo mai iā Iesu “seʻia oo i se isi taimi talafeagai.” (Luka 4:​13) E ono tupu foʻi lenā mea iā i ­tatou. O lea, e tatau ona tatou mataala i taimi uma.