Sa faalaeiauina e Iesu ona aposetolo faamaoni e ala i se talanoaga māfana faaleuō. Atonu o lea ua teʻa le 12 i le pō, ma ua faamatala atu nei e Iesu se talafaatusa faagaeeloto.

Ua amata lana faamatalaga e faapea: “O aʻu o le vine moni, a o loʻu Tamā o le galue vine o ia.” (Ioane 15:1) E talitutusa lenei talafaatusa ma faamatalaga i senituri ua mavae e faatatau i le nuu o Isaraelu, lea sa taʻua o le vine a Ieova. (Ieremia 2:21; Hosea 10:1, 2) Ae o lea ua tuulafoaʻiina e Ieova lenei nuu. (Mataio 23:37, 38) O lea ua faailoa atu nei e Iesu se manatu fou. O ia o le vine lea na atiaʻe e lona Tamā, talu mai le taimi na faauuina ai o ia i le agaga paia i le 29 T.A. Peitaʻi ua faailoa atu e Iesu, e lē na o ia e faaāta mai e le vine e ala i le faapea atu:

ʻO lālā uma ua iā te aʻu e lē fua mai, e aveeseina e loʻu Tamā, a o lālā uma e fua mai, e na te teuteuina ina ia saga fua tele mai. E pei ona lē mafai ona fua mai o se lālā pe a lē tumau ona pipii i le vine, e faapena foʻi outou, pe a lē tumau ona autasi ma aʻu. O aʻu o le vine, a o outou o lālā.’—Ioane 15:2-5.

Na folafola atu e Iesu i ona soo faamaoni, pe a ia tuua i latou o le a ia auina mai se fesoasoani, o le agaga paia lea. I le lima sefulu tasi aso mulimuli ane, o le a maua e le ʻauaposetolo ma isi lenā agaga, ona avea ai lea o i latou ma lālā o le vine. E tatau i “lālā” uma ona autasi ma Iesu. E mo le ā le fuafuaga?

Ua faamatala atu e Iesu: “O lē e tumau ona autasi ma aʻu, o aʻu foʻi e autasi ma ia, ona fua tele mai ai lea o ia, auā e lē mafai ona outou faia o se mea e tasi pe a ou lē iai.” E tatau i nei “lālā” po o soo faamaoni o Iesu ona fua tele mai e ala i le: faaaʻoaʻo i uiga o Iesu, maelega e taʻutaʻu atu i isi le Malo o le Atua, ma fai isi ma soo. Ae faapefea pe afai e lē tumau ona autasi se tasi ma Iesu ma lē fua mai? Ua faamatala atu e Iesu: “Afai e lē tumau ona autasi se tasi ma aʻu, e lafoaʻi ese o ia.” Peitaʻi, “afai e tumau ona outou autasi ma aʻu, ma tumau foʻi aʻu upu iā te outou, so o se mea lava e tou te mananaʻo i ai e tou te ōle atu ai, e taunuu lava.”—Ioane 15:5-7.

Ua toe talanoa atu nei Iesu e faatatau i le tausia o ana poloaʻiga. O le taimi lona tolu lea ua ia taʻua ai lea manatu. (Ioane 14:15, 21) Ua ia faamatala atu se tasi o auala autū e faamaonia ai e ona soo o loo latou faia faapea: “Afai tou te tausi i aʻu poloaʻiga, tou te tumau ai i loʻu alofa, e pei ona ou tausi i poloaʻiga a le Tamā, ma ou tumau ai i lona alofa.” Ae e iai isi mea e aofia ai nai lo o le tau ina alofa iā Ieova le Atua ma lona Alo. Ua fetalai atu Iesu: “O laʻu poloaʻiga lenei, ia outou alolofa o le tasi i le isi e pei ona ou alofa atu iā te outou. E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō. O aʻu uō outou pe afai tou te faia mea ua ou poloaʻi atu ai.”—Ioane 15:10-14.

Ua toe o ni nai itula ona faamaonia atu lea e Iesu lona alofa, e ala i le foaʻi atu o lona ola mo i latou uma e faaalia le faatuatua iā te ia. O lana faaaʻoaʻoga e tatau ona uunaʻia ai ona soo, e faaali atu foʻi lenā alofa faataulagaina o le tasi i le isi. O lenā alofa e mātaulia ai i latou, auā na fetalai Iesu i le taimi ua mavae: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”—Ioane 13:35.

E tatau i le ʻauaposetolo ona mātau le māfuaaga ua taʻua ai i latou e Iesu o ana “uō.” Ua ia fetalai atu: “Ua ou taʻua outou o uō, auā ua ou faailoa atu iā te outou mea uma na ou faalogo ai i loʻu Tamā.” Maʻeu le tautele o lenā faiā, o le avea ma uō vavalalata a Iesu, ma iloa mea ua taʻu atu e lona Tamā iā te ia! Ae ina ia maua lenā faiā, e tatau i le ʻauaposetolo ona “saga fua tele mai.” Ona faailoa atu lea e Iesu o le iʻuga e oo iai pe a latou faia faapea: “[O le a] foaʻi mai iā te outou e le Tamā so o se mea tou te talosaga atu ai i loʻu igoa.”—Ioane 15:15, 16.

O le alofa o loo faaalia e nei “lālā” po o soo o Iesu e le tasi i le isi, o le a fesoasoani iā i latou e onosaia ai tulaga e tulaʻi mai. Ua lapataʻi atu Iesu o le a ʻinoʻino le lalolagi iā i latou. Peitaʻi, ua ia avatu lenei faamāfanafanaga: ʻAfai ua ʻinoʻino mai le lalolagi iā te outou, ia outou iloa ua ʻinoʻino muamua mai iā te aʻu nai lo o outou. Afai o ni tagata o le lalolagi outou, e alofa mai le lalolagi iā te outou auā o ona tagata. A o lenei, e lē o ni tagata o le lalolagi outou, o le mea lea e ʻinoʻino ai le lalolagi iā te outou.’—Ioane 15:18, 19.

Ua faaauau ona faamatala atu e Iesu le māfuaaga o le a ʻinoʻino ai le lalolagi i ona soo: “[E] latou te faia nei mea uma e tetee atu ai iā te outou ona o loʻu igoa, auā latou te lē iloa o ia o lē na auina mai aʻu.” Ua fetalai atili Iesu: “Pe ana ou lē faia iā i latou galuega e leʻi faia e se tasi, po ua leai sa latou agasala, a o lenei ua latou vāai i aʻu galuega, ma ua ʻinoʻino mai iā te aʻu, e faapea foʻi ma loʻu Tamā.” O lona uiga, o galuega mamana a Iesu ua taʻusalaina ai i latou e ʻinoʻino iā te ia. O lo latou ʻinoʻino, ua faataunuuina ai valoaga.—Ioane 15:21, 24, 25; Salamo 35:19; 69:4.

Ua toe folafola atu foʻi e Iesu o le a ia auina mai le fesoasoani, o le agaga paia lea. E mafai ona maua e soo uma o Iesu lenā mana e sili ona malosi, ma o le a fesoasoani iā i latou ina ia fua mai e ala i le “molimau atu.”—Ioane 15:27.